Ẑess

Da Wikipedia, l'ençiclopedia libara.
Jump to navigation Jump to search
Sto articol al é scrit in belumat
Ẑess
Ẑesmajòr/ Cesiomaggiore
comun
Žess vist da Žessmenor
Žess vist da Žessmenor
Dati aministrativi
Stato bandiera Itałia
Rejon Vèneto – stema Vèneto
Provincia Belun – stema Belun
Sìndico Michele Balen (Łista sìvega) dal 07/05/2012
Lengue Belumat
Teritorio
Coordinae 46°04′00″N 11°58′00″E / 46.083333, 11.983333Coordinate: 46°04′00″N 11°58′00″E / 46.083333, 11.983333
Altitudine 479 m s.l.m.
Superfise 82,16 km²
Abitanti 4 187 (31/12/2010)
Densità 50,96 ab./km²
Frasion Ẑes majòr, Ẑes menòr, Soranẑen, Busche, Peẑ, Can, Caljol, Culogne, Moržanch, Pulir, Fianema, Menin, Marsiei
Comuni confinanti Feltre, Gosalt, Lentiei, Sagron Mis (TN), San Gregorio, Santa Justina, Sospiroi, Medan (TN), Tresacua (TN)
Altre informasion
Còd. postałe 32030
Prefiso 0439
Fuxo orario UTC+1
Còdexe ISTAT 025011
Còd. catasticałe C577
Targa BL
Cl. sismega 2
Nome abitanti cesiolini
Patrono santa Giuliana
Dì de festa 16 de feorèr
Locałixasion
Italy location map.svg
Ẑess
Italy relief location map.jpg
Ẑess
Posiẑion de 'l comun te la provincia de Belun
Posiẑion de 'l comun te la provincia de Belun
Sito istitusionałe

Ẑes (par talian Cesiomaggiore) (BL) al è an comun de 4 076 abitanti de l'Alto Veneto.

Giografia[canbia | canbia el còdexe]

Ẑes al se estende te la destra idrografica de 'l Piave, verso medanot e verso le ẑime de croda de le Dolomiti. Al capoluogo de 'l comun al è Ẑes, che 'l è circa 12 km a Nord-Est de la cità de Feltre e a 18 km a n.o. de la cità de Belun.

La strada provincial pedemontana, paralela setentrional de la statal 50, la sta arent a le montagne e la traversa 'l comune, 'ndando in su da Feltre e po' in do verso Santa Justina, aonde che la torna a dontarse a la statal che la va da Feltre a Belun.

A Sera al teritorio de 'l comune, delimità da 'l Caoran, al confina co 'l comun de Feltre; a Matina se cata i teritori de Santa Justina e de San Gregorio. A medanot, drio le žime, al comun al confina co altri teritori de la Provincia de Belun e de 'l Trentin.

Al teritorio 'l è caraterizà da 'l continuo calar de i còi verso la val de 'l Piave. Al paesagio 'l è vivace, movest e alternà da paeset, vile vece, cesete, canp e boschi de piante a foja larga.

Storia[canbia | canbia el còdexe]

Al teritorio de Ẑes el fa parte, fin da l'antichità, de la zona feltrina, tera che prima de i romani la era abitada da i Reti.

Al nome se pensa che 'l gnene da 'l antroponimo latin caesius, riferì a na gens Caesia[1], de la qual al fa parte al poeta latin Cesio Basso (I secolo d.C.). La presenža de la gens Caesia 'nte la zona de Ẑes la è atestada da 'l ritrovamento de na inscriẑion che menẑona an L. Caesius L. L.[2]. Tra i reperti che testimonia la presenẑa romana ghe n'è na colona monumental de 'l 47 d. C., che la recorda la costružion de la via Claudia Augusta altinate (tra Altinum, su 'l mar Adriatico e Augusta Vindelicum, ades Augsburg, 'te la region danubiana), e che al è gnest al sinbolo araldico de 'l comune.

Te'l medioevo Ẑes al è deventà sede de la pieve de Santa Maria, cesa dipendente da la diocesi de Feltre e da 'l so "vescovo - conte". Al teritorio al è restà fraẑionà in tanti feudi governadi da castaldi sogeti a'l vescovo. Tra de sti qua ghe n'era i Muffoni, ciamadi anca "da Cesio", i Rambaldoni da Fianema, da i quai al gnen Vittorino da Feltre, i Corte da Marsiei. Ste fameje le èa anca la carica de "marighi" o "capovilla" cioè i era i capi de i paeset. Resti de le so residenže fortificade se pol vederli 'ncora al dì de incoi 'nte 'l capoluogo comunal de Ẑes e te le fraẑion de Fianema e Marsiei.

De 'l 1404 Žes al è ndat co Feltre a far parte de la Republica de Venežia: la cerimonia de la consegna de le ciau de la cità a 'l anbassiador veneẑian, Bartolomeo Nani, al 15 giugno de quel an, la è stata fata da Vetor Muffoni, da Ẑes, e la gnen ancora rievocada te 'l Palio de Feltre. Durante al periodo de la dominažion veneẑiana (XV-XVIII secolo), le residenẑe fortificade le se à trasformà in vile, come la vila Tauro a le Ẑentenere, la vila Corà e la vila Muffoni inte 'l capoluogo comunal.

Dopo de la dominaẑion de i francesi de Napoleone al Feltrin, e insieme Žes, al è ndat a far parte de 'l Inpero Austriaco e de 'l Regno Lonbardo-Veneto.

De 'l 1866 insieme a 'l resto de 'l Vèneto, Feltre e Ẑes i è stati anetesti a 'l Regno d'Italia: te 'n quela circostanža Ẑes al à ciapà al nome talian de "Cesiomaggiore" (inveẑe che "Cesio" o "Ẑes"), da' che ghe n'era belche te 'l regno an nantro comun co 'l stesso nome te la Provincia de Inperia. Al Regno d'Italia al se ha portà drio tanti problemi economici e sociali che i è stati a la base de 'l fenomeno de la emigraẑion.

Al teritorio de Ẑes al è stat metest a la proa durante la prima guera mondial. Al 1917, in particolar, al è stat ciamà "''al an de la fan''" par colpa de i sachegi fati intant che ghe n'era i austriaci.

Altre tribolazion le ghe n'é state co la seconda guera mondial, in specie te 'l so ultimo periodo.[3].

Personalità de Ẑes[canbia | canbia el còdexe]

  • Vittorino da Feltre, educator e umanista de 'l XV secolo, al fea parte de la fameja de i Rambaldoni, paroi de 'l castel de Fianema.
  • Piero da Cesio, pitor e incisor de 'l XV secolo.
  • Piero Favero (1812-1890) agricoltor, vivaista, propagador de la Vit Mericana.
  • Giovanni De Bortoli, cognossest come Nane Castaldo, scritor.
  • Romano Ocri (Ẑess 1897-Veneẑia 1980), originario de Soranẑen, fraẑion che la à belche na scola dedicada a el.
  • Guido Rossa operaio metalmecanico copà a Genova da 'l grupo teroristico de le Brigate Rosse. Ghe è stat dedicà al asilo de Peẑ.

Fraẑion[canbia | canbia el còdexe]

Al Bordugo[canbia | canbia el còdexe]

La è na fraẑion picioleta inte la Val Canžoi. La confina co Le Ave a N, Le Montagne a W, La Busa a S e Tostcian a E. Sto paeset al è nassest arent a 'l Caoran e la so economia la era fondada su la energia de l'aqua. Ghe n'era difati la oficina de i Gris e na segheria. AL patrono al è San Gregorio Taumaturgo.

Anẑaven[canbia | canbia el còdexe]

Paeset a E de Dorgnan e Peẑ, a SE de Tussui, a W de Bjei (Santa Jostina). Al è abastanẑa gross e al à an centro co case vece e na area a meodì co case nove.

Busche[canbia | canbia el còdexe]

A S de Peẑ, arent Pont (Feltre), ghe n'è Busche. Infin a 'n ẑentener de ani fa al era abità da 3 o 4 fameje. La cesa de San Gabriel la è stata trata dò dintorn de i ani '80 de 'l Otoẑento parchè la era dirocada e no la ghe intaressea a gnissuni. Ultimamente la so posižion su la statal de 'l Grapa la à fat nasser tuta na serie de inprese che le à tirà là anca la đent. Inte sto paeset ghe n'è anca la stažion de 'l treno, de riferimento par i comuni de Žess, Mel e Lentiei. Famosa la è la lateria de Lattebusche, la pì grossa de la provincia de Belun. Al comun de Ẑess al è drio investir par riqualificar la zona e crear an novo centro de 'l paess, che al gnen cossì a no catarse pì su la riva de San Gabriel. A matina de Busche ghe n'è al omonimo lago artificial che bina l'aqua par far ndar la central de Quero. De recente è stat fat laori mar la viabilità, e è stat vert an centro comercial. In costruẑion ghe n'è la nova cesa.

Can[canbia | canbia el còdexe]

Al confina co Culogne a N, Tostcian e Soranẑen a W, Menin e Caljol a S, Ẑessmenor a E. Al è an paeset abastanẑa gross fabricà pì che sie inte 'l pian. Na olta al fea part tut de na unica vila e parerèe che i residenti i se maridesse tuti fra de parent par no divider la proprietà. Al patrono al è Santa Luẑia.

Cossalter[canbia | canbia el còdexe]

Paeset de na trentina de persone. Al nome al gnen fursi da "col" "salterio" (breviario) parchè fursi na olta al prete al ndea là a dederse al breviario. Al confina co Menin a W, co Soranẑen a N, co Fianema a E, e co Polir a S. La cesa la è fora de 'l paess e la è dedicada a San Vendemian (1 giugno). Te 'l centro se pol ricognosser te na casa le fonde de 'l legendario Castel de Roconcui.

Col San Vito[canbia | canbia el còdexe]

A S de Žess, su in žima a 'l omonimo col, che n'è al paeset de Col San Vito. Da là se pol goder an bel panorama su tut al capologo comunal. Al patrono al è San Vito.

Cullogne[canbia | canbia el còdexe]

A N de Tostcian e de Can ghe n'è al paeset de Culogne. Al è bel e al solivo e cress ben i castegner.

Dorgnan[canbia | canbia el còdexe]

A S de Tussui e Caljol, a E de Polir, a W de Anžaven e a N de Pev ghe n'è sto altro bel paeset. Al patrono al è San Bastcian.

Fianema[canbia | canbia el còdexe]

A NE de Salgarda, a SW de Soranẑen, a W de Cossalter e Polir, ghe n'è Fianema. La è na fražion bela grossa, popolada par al passà probabilmente da đent che ferea i cavai. Adess ghe n'è anca an bar e al dugo de i sboci. La cesa paesana la è piena de piture vece che merita esser viste. La è dedicada a San Roco, ma la è tradižion dir messa anca par la inmacolada conceẑion, al 8 de disdenber.

La Busa[canbia | canbia el còdexe]

A N de Soranẑen, a W de Tostcian, a S de 'L Bordugo e a E de Le Montagne ghe n'è sto gropet de case, in riva a 'l Caoran. Na olta ghe n'era molin e anca an fol. Adess al è in fase de abandono parchè al è a 'l pustern e la strada par ruarghe la è bruta.

Le Au[canbia | canbia el còdexe]

Inte la parte central de la Val Canẑoi ghe n'è sto paeset. Al nome no se sa se al pode gner da la presenẑa de boẑ de au. Drio la ceseta de Santa Rosia se pol veder ancora an toch de la via Claudia Augusta Altinate, scavà inte la croda.

Le Montagne[canbia | canbia el còdexe]

A N de Soranẑen e a E de 'L Bordugo e de La Busa ghe n'è sto altro grop de case picà te la montagna. A W de ste abitažion ghe n'è Arson, inte 'l comun de Feltre. Le Montagne al è an posto che piass pì che sia par le ferie parchè al è al solivo e fora de la confusion. Le case le è tute vecie e in stile feltrin. La festa paesana la gnen fata in ocasion de 'l aniversario de la benedižion de 'l Cristo arent a la fontana.

Massiei[canbia | canbia el còdexe]

A S de Morẑanch e de Ẑess, e a E de Col San Vito, arent a Sarei (comun de Santa Jostina), ghe n'è Massiei. Inte 'l centro se pol veder ancora al vecio castel. La cesa principal la è dedicada a San Piero (sagra al 29 de giugno) e quela secondaria a San Liberal.

Menin[canbia | canbia el còdexe]

Al è an paeset de 150-200 anime. Al è a SW de 'l capologo e 'l confina co Soranžen a NW, Cossalter a W, Polir a S, Caljol a E, Can a NE. Al centro storico al è in medo a 'l Col de Žimia e a 'l Col Cumiass, ma te i ultimi 30 ani è stat fat sù tante case anca te la canpagna ciamada Chiẑole. Arent a 'l paess vecio ghe n'è la Vila de i De' Međan, che na olta la era circondada da 'l pì bel giardin de la Provincia de Belun, che al è stat par la gran part eliminà dopo de la prima guera mondial. Arent ghe n'è la cesa de San Biasi, co la pola de nass monumental. Infin a 50 ani indrio la economia la era basada su la produẑion agricola (ua e vin, po, per, fasoi, sorch, mjel, ...) e su 'l alevamento de vache da lat. Sta tera la era cognossesta par al vin bon che se podea far e al è stat al primo avanposto te la provincia de Belun onde che sie stat inpiantada la ua mericana. Ogni an al conte Gaspare De' Mezan al fea na festa par onorar i contadin pì bravi. Ancora adess ghe n'è na bona produžion de ua mericana da magnar e de bianche ta da vin. No manca gnanca le vit Grinto che le gnen doperade a far al vin par casa. An deto al recita:«Tos'cian su la forca, Pulir inte 'l profondo, e Menin 'te 'l fior de 'l mondo.»

Morẑanch[canbia | canbia el còdexe]

Al confina a W co Ẑess, a E co Ẑargnei (Santa Jostina), e a S co Massiai. Al gode de na bona esposiẑion a Meodì e al è tut te 'l sviert.

Pulir[canbia | canbia el còdexe]

Al è an paeset grosset e 'l confina co Menin e Cossalter a N, Fianema a W, Pont a S, Pež e Dorgnan a E. Ghe n'è na ostaria e 'n canpo da dugar a balon. Al patrono al è San Lorenžo.

Salgarda[canbia | canbia el còdexe]

Paeset nassest dintorn de 'n castel che custodia al passajo su 'l Caoran de na strada, fursi romana. Al centro abità al è smedà da 'l Caoran, che al segna anca al confin tra i comuni de Žess e Feltre. Al confina co Fianema a E e Vilabruna a W. Na olta la economia la era fondada su segherie e molin. Ghe n'è anca 2 centrai dismeteste, anca se par che sie invià al discorso par ripristinarghen una. Co la costruẑion de 'n novo pont su 'l Caoran se à creà an novo grupet de case, ciamà anca Salgarda Nova. Al patrono al è San Giuda.

Soranẑen[canbia | canbia el còdexe]

Al è al secondo paes de 'l comun par popolaẑion. Al confina co Tos'cian a NE, La Busa a N, Arson a NW, Fianema a W, Cossalter a S, Menin e can a E. Al à qualche oficina mecanica. La produẑion na olta la era incentrada su la agricoltura. Al à an uficio postal, do ostarie e na scola elementare. In altri tenpi ghe n'era anca an castel. La cesa parochial la è dedicada a i ss. Piero e Paolo (29 giugno).

Tos'cian[canbia | canbia el còdexe]

Al confina co Can a E, Culogne a N, Al Bordugo e La Busa a W, Soranẑen a S. Se 'l riconoss par la ceseta de San Valentin (festa 14 febraro) in ẑima a 'n col. Inte 'l centro ghe n'è na oficina e na pizeria.

Tussui[canbia | canbia el còdexe]

Al è a N de Dorgnan, a S de Žess, a E de Caljol e a W de Anžaven e Col San Vito. Al è a 'l soliu e al è pien de canp de sorch.

Val Canẑoi[canbia | canbia el còdexe]

Insieme de case sparse te la parte pi a montagna de la Val Canẑoi. La economia na olta la era fondada su i comerci co 'l Primier, su la produẑion de legn e su i pascoi. Adess la economia che rende de pì la è al turismo. La à vist nasser una de le confraternite pi vece dintorn de la cesa de San Piero d'Avola, po' sostituida co quela de Santo Stach, e a la fin co quela de Sant' Antoni.

Ẑess Majòr[canbia | canbia el còdexe]

Al è al capologo de 'l comun e anca al centro abità pi gross. Al à Ẑess Menor a W, Tussui, Col San Vito e Marsiei a S, Morẑanch a E. Al è a 'l solivo e tut in riva. La cesa, dedicada a Santa Maria, la è te la parte bassa de 'l paes vecio. Sot al centro abità ghe n'è la zona industrial, caraterizada da oficine artigianai de 'l legn e de 'l fer. Interessanti i musei etnografico de Saravela (par andar verso Santa Justina) e de la bicicleta visin le scole. Arent a la zona artigianal ghe n'è al canpo da balon.

Ẑes menòr[canbia | canbia el còdexe]

Can a W, Caljol a S, Ẑes a E. Al conta an bela poca de đent. Al è interessante darghe na ociada a 'l centro storico fat de case a sass che rispeta tuti i elementi de la architetura tradižional feltrina de i ultimi 400 ani. Sta part de 'l paess però a pinpianet la è drio a gner abandonada da la đent e la è drio a degradarse. Se à svilupà invece tuta na serie de case nove te 'n quela che era la canpagna, infin a dontar Ẑes menor co Ẑes. Al patrono al è San Leonardo.

Economia[canbia | canbia el còdexe]

Al teritorio al viu na discreta produẑion agricola e artigianal. Se cata 'te la zona diverse inprese artigianai dedicade a la produžion de aredi e de conplementi par la ediliẑia. Inportanti i è la produẑion e la laoraẑion de la lat tant a livel de media inpresa (Lattebusche) che de nicia (malghe in montagna). Ghe n'è na bona part de popolaẑion che, a titolo principal o no, la à an redito da la coltivaẑion de le patate, de i cereai, de i pon, de la ua mericana e de i fasoi. Inportante la è anca la presenža de arnie e de 'l taj de i bosch. No manca al turismo che al è drio a cognosser, in graẑia anca de la presenža de 'l Parco Nazionale Dolomiti Bellunesi, an svilupo svelto e cressente.

Aministraẑion[canbia | canbia el còdexe]

Al sindaco de 'l comun de Ẑes 'l è Giani de Bastiani, rielegest par al secondo mandato 'nte le eležion de la fin de magio 2007, co pì de 'l 70% de i voti. Vicesindaco l'è Dino Tonin e asesori Michele Balen (cultura, scola e identità locale) e Celso Lenzi (lavori publici e gemelagi).

Gemelagi[canbia | canbia el còdexe]

Al comun de Ẑess al è gemelà co 'l Municipio de Aratiba, 'te 'l Brasil.

Prodoti tipici[canbia | canbia el còdexe]

Note[canbia | canbia el còdexe]

  1. . La origine latina de i toponimi Cesio e Cesana la è riportada da Sergio Sacco[citasion nesesaria] (Istituto bellunese di ricerche sociali e culturali). La ipotesi la è stata fata anca par al passà e considerada prova de la antica origine romana de Žes: Mario Gaggia[citasion nesesaria] (autor de Famiglie nobili di Feltre, Castaldi editor, Feltre 1936) al riferis che la fameja de i Muffoni, ciamada anca "Cesia" o "de Cesio", la averie avest origine romana da la gens Caesia. Giovan Battista Pellegrini[citasion nesesaria], che 'l xe stà professor de glotologia a l' Università de Padova al ritien i toponimi "Cesana" e "Cesio" derivanti da 'l gentiližio Caesius. Per Evaristo Viel[citasion nesesaria] (prete de San Gregorio e studioso de storia locale de 'l Feltrin), "Žes" al deriverìe inveže da 'l vocabolo nçès ("đent" par spagnol): i nomi Žes e Žes menor se i pronuncia difati "a la spagnola", come çès e çès menòr. Altri toponimi derivadi da 'l nome de la gens Caesia i sarie Cesano e Cesana. In pì, la è stata riscontrada in Germania na "Selva Cesia" (Caesia).
  2. Antonio Dal Corno, Memorie istoriche di Feltre, 1710; Antonio Vecellio, I castelli feltrini, Feltre, 1896, che al ghe ne riporta la presenža 'nte la racolta de Daniello Tomitano a Velaj te 'l 1623. Francesco Vergerio, La contea di Cesana, a i iniži de 'l XIX secolo al atribuìa de conseguenža a Lucio Cesio la fondažion de i paes de Žes e Žes menor.
  3. Tra le memorie de sto periodo le ažion de i partigiani: al 6 de giugno de 'l 1944 an grupo de i parigiani de la "Brigata Antonio Gramsci", guidà da 'l comandante "Bruno", al se à catà te i dintorn de na casa de la fražion de Menin, de Oreste Gris (Oreste Pelegrin), par definir al piano de ažion de 'l sabotajo de 'l Tonbior