Giovanni De Bortoli

Giovanni De Bortoli (Castaldo), cognossest anca come Nane Castaldo o Nane Gastaldo, al era an castaldo, an contadin e an scritor feltrin.

Biografia

Nane castaldo al era originario de Aone (Sovramonte), aonde che al ze nassest probabilmente dei primi ani '30 del 1800. Al ga abu la fortuna de ndar a scola e inparar a leder e scriver e a far de cont, roba che la ghe ga permetest, insieme de na serta dose de fortuna e de inteligensa, de catar laoro come castaldo par cont del nob. Giobatta Bellati, a Umin (Feltre). Durante la so vita al ga saest ciapar la justa posision par farse ben oler da i coloni, ma da curar te el stesso tenpo anca i afari del paron. La so pasion par la leteratura e in modo particolar par al setor agricolo la lo ga aconpagnà durante tuta la so vita, tanto che i so proneodi i se recorda che al ła binà sù na libreria intiera de opere soe e de altri autor, archivio che parò al ze ndat desfat durante la seconda guera mondial, quando che ze stat brusà la casa. Durante la vita da castaldo, nane al ga scrit na serie de opuscolet stati publicadi par la gran part da la tipografia "Panfilo Castaldi" de Feltre. Fenì al periodo a la dipendensa del Bellati, al ga abu come liquidasion na colonia a Menin (Sess), oncora de proprietà dei so proneodi (che i porta al soracognome "castaldi"). Nane Castaldo al ze mort tra al '20 e al '23, a la veneranda età de 92 o 93 ani, e al ze stat sapolì te el cimitero de Soransen (Sess).

Le opere

A parte qualche scrit de secondaria inportansa, Nane Castaldo al ga aquisì na serta inportansa deograsia dei so opuscolet ciamadi "Appunti di Nane Castaldo". Se trata de na serie de libret, anca consistenti, publicadi probabilmente co na cadensa anual, aonde che al scrivea note su serti avegnimenti che sucedea durante al an (a tal proposito va mansonà al descorso fat da Don Federico Fiorenza a na edision de la Festa campagnuola) e tuta na serie de consigli pràteghi che i contadin i ła da seguir par otimizar i so racolt. Adess i so scriti i ze depositadi par la gran part 'te la biblioteca civica de Feltre. Serte copie le ghe n'è anca a Rovereto e a San Michele al Adige (provincia de Trento). Qualche libret se el cata ogni tanto in vendita su Internet. Al ze inportante sotolinear che le spese de publicasion dei scriti de Nane Castaldo le gnea senpre pagade dal Nob. Gio.Batta Bellati, sichè no se cata mai la firma "Giovanni De Bortoli" ma solche quela del paron.

Elenco de le opere

• I ricordi di Nane Castaldo - lunario pel 1871 - Tipografia Sociale Panfilo Castaldi, Feltre, 1871
• I ricordi di nane Castaldo - cenni di viticoltura premiati co medaglia d'oro dall'Esposizione provinciale di Belluno - Premiata Tipografia Sociale Panfilo castaldi, Feltre, 1871
• Chiacchere alla buona di nane castaldo a' suoi amici sericoltori del Feltrino - castaldi, Feltre, 1877
• Vita di Villa
• el detien schemi gràfeghi so