Fondamenta

Da Wikipedia, l'ençiclopedia libara.
Jump to navigation Jump to search
Na tipica fondamenta venexiana

Ła fondamenta venesiana (plurae: fondamente) ła xe el toco de strada che'l va drio un canal o un rio.

Tipegamente ła fondamenta ła prexenta anca łe rive co scałini in piera d'Istria che i va xó in aqua, per agiutar a armizar łe barche, a cargar e scargar i béni e ła sałia e ła diséxa dei pasegeri.

Ghe xé tre tipi fondamentałi de fondamente:

  • ła fondamenta sensa bande, particołarexada da na strisia in piera d'Istria łóngo el bordo che'l costexa el canal,
  • ła fondamenta co bande in metało lexièr, sostegnui da cormełeti de piera d'Istria mesi a distansa regołar,
  • ła fondamenta con bande piene in quarełi, co sora na covertura sénpre in piera d'Istria.

Ghe xé anca fondamente particołari, costituie in parołe pòare da un pòrtego che'l se fianca al rio e 'nte łe quałi el pasagio el xé coverto in quanto el se cata diretamente soto el corpo dei edifisi, come 'ntel caxo del sotopòrtego. Tìpisi exénpi i xé el toco de fondamenta coverta che dal Canpo dei Santi Apòstołi el porta in diresion de Rialto e ła curta fondamenta cołonada indrio al Teatro Ła Fenice.

Su łe fondamente i se fasan squaxi sénpre parece atività de trafeganti (negosi, bar, ostarie...), in serti caxi anca in modo davèro fito, alternae a łe intrade a łe caxe vere e propie.

Ghe xé fondamente davèro łónghe, come quełe 'nte ła xona nord del sestièr de Canarégio che'l se slonga dal'altesa del'Abazia de la Misericordia fin squaxi al'altesa de ła Stasione dei Treni.

Particołarmente famoxe infrà i Venesiani łe xé łe Fondamente Nove, che łe se fasa su ła łaguna Nord verso el canpo santo de San Michièl e l'ìxoła de Muran łóngo tuto el toco che'l va da ła Saca de ła Misericordia al'Arsenal, e ła Fondamenta de łe Zàtare che ła se fasa invese verso sud łóngo tuta ła łonghesa del canal de ła Zueca da San Basegio fin a ła Ponta de ła Dogana, costituéndo na tìpega meta de caminade in primavera e istà.