Eraclea

**Eraclea**
Eraclea (it)
	; ;
Pozision
	45°35′00″N 12°41′00″E
Stato	Itàłia
Rejon	Vèneto
Sità metropułitana	Sità metropułitana de Venèsia
Capitałe	Eraclea (it)
Popołasion
Totałe	11 970 (2023)
Densità	125,41 hab./km²
Zènaro
Demònemo	eracleensi ,
Zeografia
Àrea	95,45 km²
Bagnà da	Piave
Altitùdene	2 m
Rente a	Jèzoło ; San Donà de Piave ; Càorle ; San Stin de ła Livensa ; Tore de Mosto
Dati istòreghi
Dì festivo	Festa patronałe(15 de agosto)
Patrono	Asunsion de Maria
Còdazi de identifegasion
Còdaze postałe	30020
Còdaze de matricołasion	VE
Fuzo oràrio	UTC+1 ; UTC+2
Clasifegasion climàtega	clima subtropegałe ùmido
Prefiso tełefònego	0421
ID ISTAT	027013
Còdaze catastałe de Itàlia	D415
Sito web	comune.eraclea.ve.it

Eraclea el xe un comun de 12.695 àneme inte la Provinçia de Veneçia su quel golfo che 'l ciapa el nome da la serenìssima çità. Fin al 4 de novenbre 1950 la se ciamava Grisolera (col decreto n. 1061 del Presidente de la Repùblega Italiana Luigi Einaudi, ma su na idea del sìndaco de quela volta, Guerrino Burato, e del segretario comunal, Aldo Tassoni, el nome del comun el vegneva canbià in Eraclea; el consejo comunal el gaveva sielto el nome de l'antiga çità che gaveva dà orìsene a Veneçia, e che a se troveva al confin del teritorio del comun vesin a la localedà de Çitanova, inte la direçion de San Donà.

Storia

L'antiga Eraclea

El nùcleo stòrego de la çitadina basso medievale, del qual desso tutavìa no ghe xe restà gnente, el se forma co la fuga verso la sicureça de la laguna de le popolaçion romane che le vegneva da le çitadine de Oderço (Opitergium) e Concordia sachezade dai bàrbari. El primo nome de la çità basso medievale el xe stà Melidissa, dal greco meliedes, "posto mejor". L'insediamento primo uman el ga avudo infati drento le lagune che le se catava longo tuto l'arco de l'alto adriàtego, a ciapar dal Po fin al Tajamento. El mar el jera sevarà dal basin lagunar da un cordon litoràneo sabioso intervalà da le fusi dei vari fiumi el delta dei quali el verzeva drento le stesse lagune. I primi abitanti de quela che la xe deventà in breve la pi granda de le çità romane che ghe jera longo la via Annia i jera ndadi qui par scanpar da le distruçion causade da le invasioni de popolaçion barbàreghe che le taca intel VI sècolo fin el scuminçio del VII. La majorança de lori i vegneva propio da Opitergium, mentre altri da Altin, Concordia e Aquileja.

L'aglomerà urban se ga spanto su n'ìsola che, separada da la teraferma da aque profonde, la dava la sicureça dei rifusadi da le incursion e da le raçìe periòdeghe de le scere milidari al sèvito de le orde barbàreghe che le migrava traversando la pianura padana.

Drio la metà del VII sècolo, Eraclea la jera za la çità major de l'estuario, in posiçion çentrale, proteta da alte mure e defendesta da ben ordinadi cursi d'aqua, co caràtare spicà de forteça fata a resister ai assalti da tera e dal mar. A est la vardava el mar, protezesta da na larga distesa de sabia popolada da pini marini; ai lati sud e nord la gavea dei canai e a òvest dei fiti bosci e tere cultivade che le confinava col teritorio trevisan, de Altin e de Oderço.

L'ìsola modesta dei marinari, pescadori e casadori la jera desso na çità inportanta (parchè co 90000 àneme) residença gradida e cavedal invidià de la laguna vèneta. In ela la sorzeva la catedral de san Piero Apòstolo fondà da San Magno.

Le popolaçion che le se ga insediade in Melidissa le jera de cultura e costumi romani e le ga tegnù streti raporti coi çentri del poder inperiale che 'l se jera conservà in est e inte l'esarcà torno la çità de Ravena.

Fra el 610 e el 641 Melidissa la xe stà ribattezà Eraclea in onor del'inperador Eraclio I de Bisançio.

Intel 697 ghe ga ciapà sede el dux bisantin de la Veneçia, figura dal qual vegnarà fora dopo el Dose de la Serenìssima. El rolo de cavedal dogale el xe stà parò perdudo contendesto dal 742 da Metamauco e da la nemiga Equilo, fin a che inte l'804 la çità la xe stà butà zo. Intrà le so rovine la xe nassuda la Civitas Nova Heracliana nome che 'l vive anca desso inte l'omònema localedà.

La nàssita de Grisolera

Grisolera (l'atual Eraclea) la xe nassuda çirca inte la metà del XVII sècolo dopo la sanguinosa guera de Candia. La localedà la jera ciamada "La Grisolera" parchè çircondada da palù e cane de palù ciamade justo "grisiole" par el color grizo del penacio. El teritorio el se cata intrà l'ùltemo trà del fiume Piave e quel del fiume Livença inte n'àrea che fin ai ani 1930 la jera squasi spopolada par no solo el teritorio de palù, ma anca de la malaria endèmega. Basta recordar che, fin l'iniçio de l'òpera de sugada de le palù, l'82% del teritorio comunal el jera ocupà da speci de aqua, canai, canedi e palù.

Ai iniçi del 1700, inte la zona de l'atual piaça de Eraclea vesin l'àrzere de la Piave, la xe stà costruida na cesa intitolada a l'Imacolada e al Rosario, deventando parocia el 4 otobre 1728. Grisolera la xe deventà comun inte el 1806 col Regno d'Italia. Co l'arivo del regno Lonbardo-Vèneto inte el 1815 el comun el xe stà cavà via e 'l so teritorio dividesto intrà San Donà e Cavaçucherina parchè el gavea solche 1018 àneme^[2]; intel 1818 el xe tornà comun autònomo.

Grisolera la xe stà ocupà da l'eserçedo austrongàrego da co ghe xe stà l'ofensiva de Cavoreto fin la liberaçion col spostamento del fronte dopo la bataja de Vitorio Vèneto. L'eserçedo italian intel corso de la ritirada el ga fà saltar tute le dighe e i àrzeri de le bonìfege pena tacade: l'intero teritorio comunal el xe tornà a esser slagà e inpaludà par el corso che restava de la guera. Ciò che 'l no jera stà slagà da la III armada italiana in ritirada, el xe stà par òpera de l'eserçedo austrongàrego al momento de l'ùltemo ripiegamento, qual stràsego de la bataja de Vitorio Vèneto.

La difondesta presença umana la ga avudo iniçio co le bonìfeghe pùbleghe dopo la prima guera mondiale (Consorsio Òngaro Inferior, poi Consorsio de Bonìfega de la Bassa Piave). Intel 1919 le xe stà sùbito tacade de novo le òpere de Bonìfega de Eraclea che le xe ndade vanti par tuti i ani vinti e i primi ani trenta.

Vista dea pineta de Eracleamare

Da l'ativedà realizada dal cav. Marco Aurelio Pasti par el prosiugamento de le palù catade drio el cordon sabioso de va spiaja (Vale Livençola) xe nada la spiaja de Eraclea: Marina de Santa Crose (la sarà po batezada Eracleamar a l'iniçio dei ani setanta). Propio intel corso de quele prime ativedà de arzeramento de le tere emerse la ga tacà l'atività che la ga formà la prinçipale caraterìstega de la riviera de Grisolera: el cav. Pasti, in union ai vesini propiedari de la Vale Osi (Conti Gaggia), inte i primìssimi ani 20 i ga sverdà le dune che le coreva longo la costa co mijaja de pini comuni (Pinus pinea).

St'ùltemi i gaveva el dover de rinforçar i rialçi sabiosi preservandoli da l'erosion del vento e de le marezade.

Aministrasion Comunale

Sìndico: Luigi Scipioni (comissario prefetiçio) (çentro-dreta) dal 21/12/2024 (1º mandato)
Sentrałin comunal: 0421 234111
Posta eletronica: segreteria@comune.eraclea.ve.it