Vit

Da Wikipedia, l'ençiclopedia libara.
Va a: navigasion, serca
Sto articol al é scrit in belumat
Nuvola apps bug2.svg
Vit
Ripatella 4644.jpg
Vitis vinifera
Clasificasion sientìfega
Regno: Plantae
Divixion: Magnoliophyta
Clase: Magnoliopsida
Órdene: Rhamnales
Fameja: Vitaceae
Gènare: Vitis
Spece: V. vinifera
Nomenclatura binomiałe
Vitis vinifera
L., 1753
Nomi comuni
vit
Sotospece
  • V. vinifera vinifera
  • V. vinifera lambrusca
  • V. vinifera riparia
  • V. vinifera rupestris
  • V. vinifera cinerea
Segui el Projeto Fórme de vita


La vit (Vitis vinifera L., 1753) la è an arbusto che se ranpega de la fameja Vitaceae. La ghe n'è 'ten tuti i continenti fora che in Antartide. In Europa la è coltivada inte le region centrai e de 'l Sud; in Asia inte le region ocidentai (Anatolia, Caucaso, Medio Oriente) e in Cina; in Africa inte le region setentrionai e in Sudafrica; inte 'l Nord de la Merica in California, Messico e te le aree là arent (Novo Messico, Stato de Nova York, Columbia); inte la Merica de 'l Sud in Cile, Argentina, Uruguay, e Brasil; in Oceania in Australia e Nova Zelanda.

Note storiche[canbia | canbia sorxente]

La apariẑion de la vit su la tera la pol esser datada tra i 130 e i 200 milioni de ani fa, cin pì cin manco in coincidenẑa co la diferenẑiaẑion de i mamiferi da i altri vertebradi. La storia de i raporti tra la vit e al om la reguarda epoche tant in drio, probabilmente a la fin de 'l neolitico, dopo de na fermentaẑion casual de ua cenesta inte bidoi rudimentai. I primi segn de coltivaẑion de la vit i è stati catadi inte la region de 'l Caucaso, in Armenia e inte 'l Turkestan. Inte la Genesi Noè, pena gnest fora da l'Arca, al à inpiantà an vignal, al ghe 'n à beest al vin, al se à inciocà e al se à mess a dormir nut inte la so tenda (Genesi 9, 20-1), a testimonianẑa de 'l fato che le tecniche par far al vin le ea da esser cognosseste belche prim de 'l diluvio universal. I primi riferimenti storici a la vit e a 'l vin se i cata tra i Sumeri inte la 'Epopea di Gilgamesh (III milenio a.C.). Testimonianẑe de la coltivaẑion de la vit se le cata inte tanti geroglifici Egiẑiani, aonde che 'l vin al era na bevanda riservada a i preti, a i funẑionari grossi e a i re.

Scene de vendema in teracota etrusca de 'l VI secolo a.C.

I è stati i Greci a portar la vitivinicoltura inte l'Europa, belche in epoca minoica. Esiodo, inte Le opere e i dì, a descrive in modo detaglià i laòri de vendema e de vinificaẑion e tanti i è i riferimenti a la vit e a 'l vin anca inte Omero. A i coloni greci se ghe atribuiss la introduẑion le la coltivaẑion de la vit in Sicilia e inte altre aree de l'Italia de 'l Sud, aonde che la coltura la à catà condiẑion climatiche e pedologiche ideai, a 'l punto da far meritar a la region al nome de Enotria.

I Etruschi i à perfeẑionà tant le tecniche de viticoltura e i à svilupà na intensa atività de esportaẑion de 'l vin, portandolo bel oltre al bacino de 'l Mediteraneo.

I Romani i à perfeẑionà ancora de pì le tecniche vitivinicole inparade da i Etruschi, come inlustrà da diverse opere, inte le quai se cata noẑion de biologia e tecniche de coltura validi anca adess, par esenpio al De Agri cultura de Marco Porcio Catone, la Rerum rusticarum de Marco Terenzio Varrone, le Georgiche de Publio Virgilio Marone e al De re rustica de Lucio Giunio Moderato Columella. Inte sta ultima opera la è documentada anca la cognossenẑa de 'n gran patrimonio de qualità de vit tant da magnar fa da far vin.

Inte 'l III e IV secolo d.C. la crisi de 'l inpero Roman la à creà, pi che sia inte le canpagne, condiẑion de instabilità che le à portà a 'l declino de la viticoltura. A la epoca de la fin de 'l Inpero Roman de Ocidente, la superficie coltivada a vit la fea registrar an calo forte, mancenendose pi che sia inte le aree arent a le cità e a le coste.

Tra 'l V e 'l X secolo la conservaẑion de 'l patrimonio vitivinicol al è par la gran part opera de i monaci: i Basiliani e i Benedetin i à fornì an novo inpulso a la coltura de la vit inte la Europa portandola a i limiti estremi le latitudine e de altitudine. De fianco de la viticoltura "de cesa", se à svilupà, pì che sia in Franẑa, na viticoltura "nobiliar": fra principi e feudatari la coltura de la vit e la produẑion de 'l vin i è gnesti sinboi de prestijo.

Infin a 'l VII secolo la coltura de la vit la à abu na ẑerta inportanẑa anca inte 'l Medio Oriente; in seguito, colpa de la espansion de 'l Islam, la è ndata incontreghe a na progressiva decadenẑa.

Tra la fin de 'l Bass Medioevo e 'l Rinassiment è ripartì in Europa al svilupo de la viticoltura "borghese": al svilupo demografico, la concentraẑion de la đent inte le cità e le aumentade disponibilità economiche de artigiani e comercianti i à portà a grossi investimenti inte la viticoltura, che la è tornada a esser conveniente in termini de schei. Inte 'l Rinassiment se assiste anca a 'l svilupo de na anpia leteradura dedicada a la vit che la favoriss an novo aprocio sientifico, a 'l qual se ghe atribuiss tra 'l altro la nassita de la moderna anpelografia, base fondamental de 'l futuro progress de la viticoltura. Anca inte le arti figurative se cata tante riproduẑion de la vit e de i so fruti.

Co la scoperta de la Merica la Vitis vinifera vinifera, cioè quela che ghe n'era in Europa, la è stata portada inte 'l Novo Continente, prim in Messico e dopo, deograẑia de i conquistadores, anca inte 'l Mèerica del Sud.

Inte 'l XIX secolo al oidio, la peronospora e la filossera, malatie de la vit gneste da la Merica, le à devastà gran quantità de vignai. A i contadin ghe à tocà a incalmar le qualità de vit europee sopraviveste su salvarech seleẑionadi da vit mericane, resistenti a sti malan, e a doperar regolarmente medesine come al solfer. Senper de quei ani se à scominẑià a coltivar qualità ibride come la ua Mericana, la Grinto, la Grinton, la Bacò, la York.

Inte la seconda metà de 'l XX secolo se à assistì a 'l passajo da na viticoltura fondada su la tradiẑion e su 'l pressapoch a na viticoltura moderna basada su precise cognossenẑe sientifiche inte i setor de la microbiologia, de la chimica e de la anpelografia. Sto processo al ghe n'è stat anca par via de i canbiamenti economici, culturai e de i modei de vita e alimentaẑion de grandi strati de la popolaẑion, che i à portà a na modificaẑion de la domanda, senper pì orientada verso prodoti de qualità.

Descriẑion[canbia | canbia sorxente]

La vit la è na pianta arborea ranpegante che par cresser la se taca a sostegni tramite le forchete; se la pianta no la gnen ẑarpida la pol donder grande alteẑe tacandose te i alberi; la è dotada de 'n aparato de radiss ben svilupà, se 'l pol passar via i 10m de longheẑa. La part legnosa la è divisa inte la ẑoca (an per de somess sora al teren), inte le ganbe (i primi ran che parte da 'l gross) e inte i cau che i è i ramet de an o de do ani. Le foje, nervade a palme, le è alternade e de so posta e le è fate de ẑinque part pì o manco destacade co na forma de cor a la base. Ste part le è an elemento inportante par ricognosser la qualità de la vit.


I fior i è cei, de color verdastro e binadi in infioressenẑe a rejota. La vit salvarega la è dioica (cioè co fior unisessuai portadi da piante diverse), le qualità coltivade le è state seleẑionade par er fior ermafroditi. I fior i à al calice e la corola de 5 toch. Al calice, dopo de la fecondaẑion, al pol restar inte 'l fruto e cossì al fa an anel dintorn de 'l manech de ogni fruto. I petai de la corola i è tacadi te la ẑima. Ogni fior al à inte 4 ovi. I stami i è 5 alternadi a i netari. I fruti i è pomele (garnei) de forma e color diversi: bianchi, giai, viola o negri, binadi in rejote. I à na scorẑa spessa e pruinosa, na polpa de celule piene de suco da 'l qual se ricava al most e an strato de inte che al delimita la zona co inte le ẑiess.

Coltivaẑion[canbia | canbia sorxente]

La pianta de la vit la se adata in genere a anbienti co condiẑion climatiche e de teren tant diferenti, ma de solito, pi che sia par la produẑion de vin, ghe n'è limitaẑion. Le zone de coltivaẑion le à da esser tra al 30° e al 50° grado de latitudine nord e sud, e a na alteẑa de 0-1000m slm. circa. La tenperatura no la à da esser pì bassa de -15 °C. I teren i pol esser de tipi diferenti (da creda a jara). La vit la se adata anca a teren magri e la soporta presenẑe medio-alte de calcare. La mejo esposiẑion la è a sud, pi che sia te i coi. la pianta de la vit la à an ciclo biologico (vita) de la durada de circa 40 ani (ma la pol passar via i 100); par i primi 3 ani la pianta no la rende, al mejo periodo par la produẑion de ua da vin al va da 'l quinto a 'lo vintiẑinquesimo an. No 'l è comunque cossì raro catar vit vece che le fa ancora an bon prodoto. La vit la à an ciclo vegetativo anual dividest in periodi; ogni periodo al ciapa al nome de "fase fenologica".

Usi[canbia | canbia sorxente]

  • Produẑion de vin
  • Produẑion de derivadi da 'l far vin:
    • Most
    • Sgnapa
    • Acido tartarico (par usi agroalimentari)
    • Ojo de ẑiess de ua
    • polpa de ẑarpe (par la alimentaẑion de le bestie)
  • Produẑion de ua da magnar
  • Produẑion de ua seca
  • Produẑion de altre bibite a base de ua
  • Prodoti alimentari:

Usi medicinai[canbia | canbia sorxente]

  • Al decot de foje dovene tolte su da majo a agost, e secade a 'l sol, le à proprietà de sugar su pa r la presenẑa de tanino
  • Le foje fresche par uso esterno le è curative de le malatie de la pel
  • Al decot de foje par uso esterno al serve par bagni, inpachi e lavagi
  • I garnei quasi fati i à proprietà rinfrescante, disintossegante, diuretica, depurativa de 'l sangue, idratante, vitaminica, energetica, contro la acidosi, stimolante par la digestion. I fa ndar a 'l cesso e i fa ben contro i dolor
  • Al mujo de i garnei de ua filtrà al serve par uso esterno par curar pèi grinẑose e come maschera de beleẑa
  • Al vin de ua beest co moderaẑion inte i past, al à na aẑion diuretica, tonica, digestiva e antianemica
  • La ua madura polito magnada come fruta da mensa la gnen doperada par la cura de la ua o anpeloterapia par le persone che à ẑerti malan.

Recente al è al isolament de 'n fenolo conposito derivà da le scorẑe e da le ẑiess, al Resveratrolo che al par er in natura proprietà protetive e contro le mufe inte 'l garnel.

Quałità de ua coltivade[canbia | canbia sorxente]

Fin a sqaxi ła fin de 'l otoxento, tra łe spesie de vide, solke ła Vitis vinifera ła jera coltivada intel vecio continente par ła produsion de ua da vin e da toa. Inte l' Ameriga, prima de rivar i europei, ła jera provabilmente coltivada ła Vitis labrusca. Nonostante ła V. vinfera ła sie spontanea in Europa, łe quałitá de V. vinifera coltivae ancuo xe derevae da vide proveñenti dal medo oriente, el xe łá, defati, che xe scominçiesta ła domesticasion de ła vida, ła cultura de ła vida xe antiga come l'agricoltura. I popoli de l'antighitá (fenici e greci) i gha ciapá łe vide coltivade in medo oriente e i łe gha introduxeste in Eoropa. Tante quałitá coltivade da i greci e xe stae defuxe da i romani, el nome de cualkeduna de qeste poderie reciamar sta orixene (es. greci e grecheti, alianico, aleatico). Anca a Serenisima ła gha securamente introduxest quałitá de ua da ła grecia co ke la dominea su cuei teritori (forse alcune malvaxie, come ła malvaxia de candia). Pol anca eser ke cualke quałitá la sie derevada da l'insenbrament de vide orixinarie de'l medo oriente co vide europee selvareghe. Co ła scoperta de la Mèriga łe qałitá europee e xe stae portae inte'l novo continente. tutavia in çerti anbienti la vida europea no ła riusia a viver. Ła raxon no xe stada capia par tant tenp. Łe raixe de ła vide europea no łe pol rexister a un pedocio che vive inte ła tera de çerte rexon amerigane. Co sto pedocio ciamá fiłosera xe sta introduxest in Europa ne l'otoxento, el gha nixia a defonderse e desfar łe vegne eoropee. Par contrastar el biso łe quałitá de vida europea łe vien dess incalmae sora a quałitá de vide amerigane ke le ga raixe rexistenti a ła fiłosera. I portinesti 'merigani xe par sołito ibridi de Vitis riparia, V. rupestris e V. berlandieri. Oltre a l'incalmo, naltra sołusion xe stada qea de insenbear ła V. vinifera con vide ameregane e asiadighe. I ibridi oteñesti no łi xe bastansa rexistenti a ła fiłosera ma çerti łi xe interesanti par ła rexistensa a łe małatie de orixine amerigana (oidio e peronospora) oltre ke par ła rexistensa al fredo e ła precoçitá.

In bona sostansa, inte l'Eoropa xe nadiva na soła speçie de vide, ła V. vinifera e ła ga vest ne inportansa agronomega grandiosa fin da co esiste ła agricoltura. Inte łe Mèrighe inveçe xe nadive tante speçie de vide, ma nisuna la ga vest inportansa par łe coltivasion fin al arivo de i eoropei. Anca co l'arivo de i coloni no xe sta mese in coltura łe vide merigane, i eoropei łi ga preferest coltivar a sołita V. vinifera entrodota da el vecio continente. Ła quałità Norton ła xe un caso de ibridasion spontanea tra vide eoropea e na vide ameregana V. cinerea, ła da ua de na çerta quałità e xe provabilmente una de łe pì vecie quałità de ibrido a esar coltivde.

El intarese par łe vide amerigane el nase co Thomas Munson (1843-1913)che el ga catałoga tantisime speçie e el ga crea tantisimi ibridi. Anca ose lu el ga łavora soratut su quałità par far ùa da vin, e so qualità pì apresade xe stae i potainesti utiłixai inte l'Eoropa par far fronte a ła filosera.

I ibridi de Munson i xe stai uxai in Ameriga par far novi ibridi, Elmer Sweenson (1913-2004) ad exenpio el ga doperà tanto łe qualità de Munson.

Munson el ga tentà ła ibradasion tra do subgeneri de Vitis, el gruppo Euvitis cui fa parte łaV. vinifera e ła maggior parte de chealtre speçie e ła Muscandina cui fa parte poche speçie come ła V. rotundifolia V. munsoniana. Tale incroxo xe bastansà difiçile par el diverso numero de cromosomi, 2n=38 in Euvitis, 2n=40 in Muscandina. Munson se iluse de verghea fata ma in realtà no el riusì, i so ibridi xe in realtà autoimpolinasion de V. rotundifolia. El primo a riusir inte l' intento xe sta Peter Wylie che incroxò na V. vinifera par na V. rotundifolia. Ancuo ła V. rotundifolia desta gran interesse par e so rexistense ałe prinçipałi małatie.

Inte l'Eorapa ga łavora al scominsiar del secoło i fransexi, come Albert Sibel (1844-1936), che el ga otegnest un numaro smisurà de quałità, molto usae da i ibridadori dopo de lu, Pierre Marie Alexis Millardet (1838-1902), Francois Baco (1865-1947) e so fiol Maurice Baco, Georges Couders, Eugene Kuhlmann(1858-1932), Jean Louis Vidal, Victor Ganzin, Jean Fancois Ravat, Bertile Seyve e Joannes Seyve(1900-1966), i cui mejo risultadi xe stai quei otegnesti co Victor Villard. In seguito in Fransa xe sta anbandonà sta strada, mentre ga continuà a łavorarghe i todeschi (inte łe stasion de Friburgo e Geisenheim) e i Ongarexi.

De reçente xe sta doparà anca vide axiatige par far ibridi. Ła idea xe nasesta da ł'oservasion che l'arrivo de ła peronospora in Axia colpia solke ła V. vinifera e no e vide selvadeghe. Intel 1936 i rusi Potapennko e Zakharova incroxa na V. vinifera co połine de ne V. amuriensis otegnendo Zarja Severa e Severnj. Da qua xe vegnest fora quałità come ła Rondo e el Solaris.

Lista de łe quałità de ua da vin[canbia | canbia sorxente]

V. vinifera:

PIWI (ibridi produtori dereti):

Qualità de ua da magnar[canbia | canbia sorxente]

V. vinifera Vinifera:Italia; Lugliatica; Moscato; rejina; vinifera x lambrusca V. vinifera lambrusca:Fraga; Isabela; Mericana; Mericana bonoriva; Mericana bianca; Mericana bianca bonoriva;

Pagine colegade[canbia | canbia sorxente]