Graspa

La graspa (ciamà anca sgnapa o vinasa) l'é on distilado fazesto da i graspi de ua daspò ca i ze sta torcià par far el vin. Inte la distilasion, el vapore 'l va so par i alanbichi, 'l pasa traverso i graspi schisà e 'l se porta via i aromi de le ue. La graspa che se beve la xe fazesta par metà de acua, par on 38-68% de alcol etilego, 'l resto i ze alcol metilego, alcoli superiori, aldeidi, esteri e açidi.

I istoreghi i parla par la prima olta de la graspa inte el 511 in Friul a Cividale, indove che i Burgundi, vegnesti zo da l'Austria, i gavaria scominsià a doparar i alanbichi, che i ghe serviva par distilar i pomi, par distilar i graspi de ua. Un altro scrito da un nodaro de Cividałe, inte el 1451, el parla propio don atrezo par far la graspa.

Diverse sorti de graspa

Łe graspe łe pol esare de diverse sorti:

xovani, da bevere presto e da tegner in contenidori non de legno
invecià, da tegner in boti de ròare almanco par 12 ani
profumà, fate cołe ue de moscato, traminer, mueller-thurgau, ecetera
aromatixà, co drento erbe, raixe o fruti (esenpio sugorigorisia, pancùco, ruta, zenevro, kumo, cornołaro)

Come ła se bee

La sgnapa se pol bererla slissa, da un goto de dimension ridote. La "unità de mesura" par bere la sgnapa la ze al cuchet, che de solito al corespons a 0,05 litri. Ła graspa, oltre che berla lìsia, se pol far anca queło che vien ciamà "el rexentin": o sia dopo magnà, prima se bee el cafè, dopo inte ła stesa chìcara, dove ghè restà i fondi de cafè, se ghe uda na s-cianta de graspa, e co questa se "rexenta" ła chicara. Ełora ła graspa ła ciapa l'aroma del cafè e l'è oncora piesè bona.

La sgnapa come medesina

La sgnapa, par al so contenuto alt de alcool, qualche olta la gnen doperada come desinfetante, anca se par sto scopo cognen doperar al alcool denaturà. Se pol doperarla invese come conservante par serti tipi de fruta come le giasene, le franbole, i pon de sotspecie da fjor, la ua e le farjese. La sgnapa, come ogni alcoolico, la rende na sensasion de calt e par sto motiu la gnen doperada come digestiu o par jutarse a scaldarse fora dopo er ciapà tanto fret o dopo esser stati tanto tenpo sot la pjoa. Par curar rafredor stagni se pol ciapar an goto de lat, scaldarla e desfarghe entro an sculjer de mjel. A sto punto se ghe donta an ters del volume de sgnapa e se beu dò tut te un bocon. Pena fat sto tant, se nda te el let e se se quata polito.

Sgnapa da troi

Se definiss sgnapa da troi quela sgnapa che la gnen produsesta de frodo, o sia senzha er na licenzha de distilazhjon, una de inbotiljament, senzha pagar le tasse, o comunque de scondjon de la autorità statal. Tante olte se trata de sgnape co grado de alcool fat a ocio, magari triste, torgole o che le inzhende. Zherte olte invezhe le pol esser tanto pì bone de quele industriai par la possibilità de sjelder le materie prime, de far corer poco la caljera, de far sgnapa in do passaji (o sia prim cavar al gredo a 20-30%vol, e podopo far la refina par er la sgnapa a 50%vol.). Gnerèe da pensar che la definizhjon "da troi" la fusse ligada al problema de la comercializazhjon, che la nda fata de scondjon, sichè al trasporto se el fa par i troi invezhe che par la viabilità principal. Na seconda spjegazhjon, fursi pi franca, la sarèe che al nome al gnesse dal fato che gnea montà i alanbich fora par le canpagne ten posti sconti. La pena par chi che fea sgnapa desfrodo, difati, dal 1871 la prevedea al sequestro de la atrezhadura e del prodoto e na multa in schei. Ten sta manjera se ruea an controlo al era facile scanpar cossì se perdia prodoto e atrezhadura, ma almanco se sparagnea la multa in schei e la facia.

Wikimedia Commons el detien imàjini o altri file so graspa

Controło de autorità	LCCN (EN) sh85056498 · GND (DE) 4354724-2