Zazpiak Bat

Da Wikipedia, l'ençiclopedia libara.
Va a: navigasion, serca
Zazpiak Bat l'è el stema de Euskal Herria, qua in te la versión atuale.
Zazpiak Bat. Insima, da sinistra a destra, stemi de Navara, Gipuzkoa e Bizkaia. Soto, stemi de Araba, Lapurdi e Zuberoa. Sto ordine el corisponde al dixegno originałe, mentre l' altro ordine (vedi prima imagine) l'è queło più frequente al dì d' ancó.

Zazpiak Bat l'è un moto conià da Antoine Thomson d'Abbadie che l' inegia a l' unificasión de łe sete rejoni de Euskal Herria. El deriva da łe parołe basche zazpi (che vol dir sete) con la xonta del sufiso -ak che el rende el plurałe e bat (che vol dir uno). In veneto el pol esar tradoto con i sete (i' è) uno o sete in uno.

Zazpiak Bat l'è anca el nome del stema de Euskal Herria, dixegnà da Jean Jaugain in tel 1897. El stema el rafigura un scudo diviso in sie parti (tre insima e tre soto) a raprexentar el stema de łe sete rejoni de Euskal Herria (in tel dixegno ła Navara spagnoła e queła francexe, rispetivamente Nafarroa e Nafarroa Beherea, i' è considerè come un' unica rejón).

El stema[canbia | canbia sorxente]

Łe rejoni de Euskal Herria i' è raprexentè in te la versión del stema atualmente più frequente secondo sto schema:

I tre stemi insima, da sinistra a destra

  • Ła rejón de Araba. El so stema el raprexenta na rocia con sora un castel merlà dal qual spunta fora un braso armà de spada drio a colpir un león grifà. Ła rejón l' à adotà sto stema in tel 1332 quando l' à acetà na relasión feudałe con la çità de Portilla.
  • Ła rejón de Bizkaia. El so stema el raprexenta l' Albaro de Gernika che el cuerxe quasi totalmente na croxe łatina cołor argento, el tuto bordà da oto decuse rose su sfondo dorà. Ła croxe l'è el sinbolo de ła rełijón catołica difuxa in te ła rejón, mentre l' Albaro de Gernika (Gernikako Arbola in basco), che el se cata propio in Bizkaia, l'è un sinboło de ła rexistensa basca durante ła Guera civiłe spagnoła.
  • Ła rejón de Gipuzkoa. El so stema el raprexenta tri albari, uno in mexo e do ai lati, de ugual proporsión ai pié dei quali ghe tre onde axure. El so significato l'è el mar cantabrico e ła foresta de pini che cuerxe ła rejón; i alberi i' è tri come łe rejoni prinsipałi de ła Gipuzkoa.

I tri stemi soto da sinistra a destra

  • Ła rejón de Lapurdi. El so stema el raprexenta un león roso che el tien in man na spada su sfondo dorà. Sto qua l' era el stema de ła çità de Ustaritz e l'è stà adotà quando l'è diventà el capołuogo de ła rejón. El raprexenta i antichi visconti che regnava da chełe bande.
  • Łe rejoni de Nafarroa e Nafarroa Behera. El so stema el raprexenta un xmeraldo verde da ndo parte oto brasi de cadene dorè le cui estremità i' è uníe a formar un scudo, el tuto su sfondo roso. Sto stema a partir dal 1212 l' era el sinbolo del Regno de Panplona. Łe cadene i' è quełe che sircondava ła tenda del całifo dei Mori e che i' è stè ciapè da Sancho el Grando in tel 1212 dopo na bataia, mentre el xmeraldo el sinbolixa łe riche spoie che Sancho l' à donà a varie cexe.
  • Ła rejón de Zuberoa. El so stema el raprexenta un león dorà su sfondo roso. L' era el stema del re de Maule.

Riferimenti[canbia | canbia sorxente]

EUSKALERRIKO ARMAK ETA BANDERAK (EU)(ES)(EN)