Leon de San Marco

Par leòn de San Marco o leòn marciano o leòn alàdo se intende ła raprexentasion simbołica de San Marco vangełista rafigurado in forma de leòn alàdo. Altri ełementi presenti in varie combinasioni presenti xe: l'aureola in testa e un libro e na spada tra le zate.

El leòn de San Marco xe un secołar simboło de ła sità de Venezia, de a so antiga Republica e atual simboło del Comùn e de ła Proìnsia, noché de ła Regiòn Vèneto e de numerosi altri enti ed aministrasioni siviłi e miłitari.

El leòn marcian el compare in bandiere, gonfałoni, stemi, statue e schei. El compare anca ne ła bandiera navałe sia mercantiłe che miłitare de ła Republica itałiana.

Letùra de l'imagine

Significado

A rapresentasion de San Marco in forma de leòn alado a xe na tipica iconografia cristiana derivante da e visioni profetiche contegneste inte el libro de l'Apocałise de San Zuane vanxełista. El leon el xe defati uno dei cuàtro esseri viventi descriti inte el libro come posti arente al tròn de l'Onipotente ed intenti a cantàrghine le lodi, da po' scelti come simboli dei Cuàtro Vanxełisti. El leòn el xe associàdo a Marco in funsion de e paroe co e quali scumisia el so Vangelo in riferimento a San Zuane Batista:

(VEC)

«Inisio del vangelo de Gesù Cristo, Fio de Dio. Come ca xe scrito inte el profeta Isaia: "eco, mi mando el me messaggero davanti a ti, lu el ti prepararà la strada.
Vose de uno che ziga inte el deserto: preparè la strada del Signor, indrizzè i sui sentieri". »

— Vanxeło secondo Marco 1,1-3

El Batista xera vestìo in tel'imaginario cristian co una pèl de leòn e la frase 'vangelica de la vose che ziga inte el deserto la riciamava l'idea de un rugito inte el deserto.

El leòn el simboleggia anca la forsa de a paroa de l'Evangelista, le àle l'elevasion spirituale, mentre l'aureoła xe el tradisionale simbolo cristian de a santità.
El libro, simbolo del Vanxeło, in tea magior parte de e rapresentasioni venesiane el se presenta verto recando solitamente la scrita latina PAX TIBI MARCE, EVANGELISTA MEVS ("Pàse a ti, Marco, evangelista mio") che secondo un'antichisima tradision de e Venesie un àngiolo el g'avarìa rivolto al Santo, nàufrago inte e lagune, preanunciandoghe che in cuèle tere g'avarìa catà un dì riposo e venerasion el so corpo.
Tutavia el simbolo leonin el esprimèa anca el signifegà aràldego de maestà e potensa (trato sto ultimo sotolineà sora-de-tuto da a còa felina alsà), mentre el libro ben el esprimèa i conceti de sapiensa e de pase e l'aureola a conferiva un'imagine de pietà religiosa. La spada, oltre a l'òvio signifegà gueresco, a xe invese anca simbolo de justisia e defati a xe ricorente inte e rapresentasioni antropomorfe e non de a Justisia.
Xera dunque simbolicamente presenti tuti i caratteri con cui Venesia la ama pensar e descrivare sé stessa: maestà, potensa, saggezza, justisia, pase, forsa militare e pietà religiosa.

Numerose le interpretasion posibili riguardo la combinasion tra spada e libro:

el solo libro verto el xe ritegnesto simbolo de a sovranità de o Stato (numerose le rafigurasioni dei dogi inzenocià davanti a tale rapresentasion);
el solo libro serado el xe invese ritegnesto simbolo de a sovranità delegada e quindi de e publiche magistradure;

el libro verto (e la spada in tera non visibile) el xe ritegnesto simbolo de a condision de pase par a Serenisima;^{[Fonte nesesària]}

el libro serado e la spada impugnada i xe invese ritegnesti simboli de a condisione de guera;^[1]
el libro verto e la spada impugnada i sarìa infine simbolo de a publica justisia.

Tutavia tali interpretasioni no e xe universalmente acetade e la pi difondesta interpretasion a se limita a ritegner el libro verto simbolo de pase e queo serado con spada simbolo de guera^{[Fonte nesesària]}

. Rare, ma presenti, xe anca rafigurasioni del leòn privo sia del libro, che dea spada, che talvolta de l'aureola (sora-de-tuto ne a statuaria).

No xe rare le rapresentasion in cui el leòn el posta le zate davanti su una tera inte ła cuała de frecuente compare anca na sità turrita e quele posteriori su l'àcua: tale particolare rapresentasion la intendèa indicar el saldo potere de Venesia su a tera e sul mar.

Difarenti versioni del Liòn de San Marco

L'imagine del Liòn de San Marco la pode essere rapresentada in do diverse posisioni:

andante, overo quando se pode vedere par intero el corpo del leòn de profilo: tipica rafigurasion presentada nei gonfaloni e ne e grandi statue, dove ghe xera abondansa de spasio par riportar la rapresentasion completa;
in moèca, in cui invese vien rapresentado el leòn frontalmente e cucià, asumendo un aspetto che par la forma de e àle el ghe someia a queo che in 'talian se ciama "granchio" (ed in venesian moèca el xe apunto el nome dei granchi picenini in periodo de muta): na forma più utile da utilizzar nei stemmi e nei sigilli, dando na rapresentasion pi racòlta.

El simbolo del Regimento Lagunari Serenisima (deto MAO) el xe rapresentado da un Leòn de San Marco in moèca in tea so version da guera (quindi Vangelo serado e spada alsà), a cui fa da cornìsa do pi moderni fusìli.

El liòn marciano in tei gonfaloni de a Republica Serenisima

Voxe prinsipałi: Venesia, Republica de Venesia.

El pi antigo gonfalon e simbolo de Venesia el xera probabilmente costituìdo da na cròse dorada in campo azuro (i colori de l'Impero Bizantìn, de cui a sità a feva formalmente parte).

Co a traslasion in sità del corpo de l'evangelista San Marco e la so adosion a santo patrono de a sità e de o Stato, se ga tacà rafigurar el santo in figura umana nei stemmi e nei gonfaloni publici.
Le prime rafigurasioni de San Marco in forma de leòn alado le xe stàde adotade inte el 1261^[2], quando co a caduta de l'Impero Latin Venesia la ga streto magiori raporti con l'Egito, tera el cui sultan, Baybars, el inalsava un leòn passante quale stemma, e el porto de Alessandria d'Egito, sità de cui el santo el xera stado primo vescovo. In sta epoca la rafigurasion preminente la xera quea del leòn in moèca.
A metà del XIV secolo se ga tacà po ad esporre gonfaloni nei quali campegiava el classico leòn marciano passante con libro e spada. Ne a stessa epoca tale iconografia la xe stada in generale adotàda quale simbolo de o Stato.
El gonfalòn el presentava el leòn marciano su campo azuro bordàdo de cròsi e decorasioni dorade su fàscia rossa. Le sie fiame e rapresentava i sie sestieri de a sità (ancuo, ne l'atuale gonfalòn de a Regiòn Veneto, compare invese na fàscia par ciascuna provincia).
Le nave de a flota e usava invese esporre o stesso gonfalòn, ma con campo rosso (come ne l'atuale gonfalòn de a sità de Venesia).

El leòn marciano el compariva po inquartàdo anca inte el tricolòr de l'efìmera Republica de San Marco, durante i moti risorgimentài del 1848.

El xe stàdo inoltre utilizado par la bandiera de e Isole Ionie, antigo posedimento venesian, soto protetorado inglese prima come Republica de e Isole Jonie (1800-1807 e 1815-1817) e sucesivamente come Uniòn de e Isole Jonie (1817-1864). Ne a bandiera de sti do Stati el leòn el tegnèva na Bìbia serada su sète frecce che simbolegiava le sete ìzołe (Corfù, Cefalonia, Zante, Santa Maura, Itaca, Cerigo e Paxos). Ne a bandiera de l'Uniòn xe stàda xontà inte el cantòn la Union Flag britanica.^[3]

Imagini

Statue, dipinti e schei:

El leòn de San Marco presente su a colonna de piazza San Marco a Venezia.
El leòn alado su la faciàda de Palazzo Ducale.
Leòn alado in Campo Manin.
Leòn marciano a Vicensa.
El leòn su una colonna de piazza Erbe a Verona
Osella venesiana.
Leòn de San Marco ne l'iconografia religiosa.

Bandiere e stemi:

Bandiera navale de la Serenisima e atuale gonfalòn de la Sità de Venesia.
Bandiera de la Serenisima, version con spada e libro serado, con leòn pogiante su a teraferma.
La bandiera de la Republica de San Marco.
Stemma de la Provincia de Venesia.

Stemma de la Provincia de Venesia.
Gonfalòn de la Regiòn Veneto.
Bandiera de la Marina Mercantile
Bandiera de a Marina Militare
Stemma araldico de la Regia Marina
Stemma araldico de la Marina Militare
Recto del Jack de la marina 'taliana.
Verso
Stemma de l'Aeronautica Militare Italiana, con leòn in moèca.
La bandiera de l'Uniòn de e Isole Jonie soto protetorado britanico, 1817-1864.