Piasa de ła Fruta

	PPiasa de ła Fruta
	Piasa de ła Fruta inte un jórno de marcà
Dati
Sorte	Piasa
Pozision
Rejon aministrativa	Pàdoa (Itàlia)
	45°24′27″N 11°52′31.08″E

(VEC)
«Sono dalla parte Australe, & Aquilonare dell'istesso palazzo due belle, e capaci piazze; una chiamata del vino, l'altra delli frutti, ambedue circondate da belle, & honorate fabbriche de' particolari»

— Angelo Portenari, Della Felicità di Padova, 1623

Piasa de ła Fruta (ofisialmente Piazza dei Frutti) ła xe una de łe piase prinsipałi de Pàdova. Ła se cata visin al Pałaso de ła Raxon, da quel'altra parte del pałaso respeto a Piasa de łe Erbe, co ła cuałe ła xe ligada traverso el Volto de ła corda e un toco de via Fiume. Via San Clemente ła conéte co Piasa dei Siuri (nord-est), méntre, da st'altra parte se cata via Oberdan che ła porta al Liston, pasando in fianco a Pałaso Moroni.

Ła fiancada sud de ła piasa ła xe squaxi del tuto ocupada dal Pałaso de ła Raxon. Łe scałinade da łe cuałi se intra łe se ciama Scała de łe Erbe e dei Oxei par via dei produti che ghe vegnéva vendui de vanti.^[1] Intaresante xe el Volto de ła Corda, el pasajo par st'altra piasa, indove i vegnéva punidi i marcanti dexonesti a culpi de scuria. Su łe laste de piéra bianca, daspò ghe xe łe insixion de łe antighe mexure padovane, sénpre par recordar ai marcanti de no stare a inbrojare.^[2]

'Ndando verso el Liston se cata ła Tore dei Ansiani edifisio in quarełi del duxento che el fa parte del conpleso de Pałaso Moroni: qua se desvolxeva el conséjo dei veci raprexentanti de łe corporasion e del pòpoło.^[3] El Peronio el xe n'altro inportante monumento de ła piasa: se trata de na cołona decorada co un capiteło e sormontà da na piràmida pontìa. El só nome el vegne fóra dal latin perones, che'l'éndega i sòcołi che i se vendéva sóto.^[1]

Respeto a Piasa de łe Erbe, Piasa de ła Fruta ła ga un marcà pi variegà, in quanto no ghe se vénde sóło che fruta e verdura, ma anca vestidi e robe de altro gènare. In utuno ghe vegne vendue anca łe róste, cote sul moménto, méntre visin al'Epifania ghe xe bancarełe de dulsi.

Piasa de ła Fruta, infin, ła xe conosuda par èsare stada el lógo del'ùltimo comisio del segretario del Partio Comunista Italiano Enrico Berlinguer, el 7 de zugno 1983. A metà del'intervento, el xe stà colpio da n'ictus che ło ga fato morir quatro jurni daspò.

Note

Vóxe ligae

[Padovanet-1] 1,0 ^1,1 Piasa de ła Fruta su Padovanet.it

[2] Pałaso de ła Raxon su Padovanet.it

[3] Pałaso Moroni su Padovanet.it

[1]

[2]

[3]