Pałaso de ła Raxon

Da Wikipedia, l'ençiclopedia libara.
Jump to navigation Jump to search
Pałaso de ła Raxon visto da piasa de ła Fruta

El Pałaso de ła Raxon, ciamà in sità semplicemente "el Sałon", el xé un pałaso in centro a Padova che'l se trova tra Piasa de łe Erbe e piasa de ła Fruta. Costruio in origine nel 1219, el gà ciapà ła so forma atuałe nel 1309. El pian superiore xé ocupà da una dełe più grandi sałe pensii d'Italia, che gera stà al'epoca ła più granda del mondo; ła misura circa 80 metri par 27 e ła gà na altesa de quasi 40 metri, col sofito de legno a carena de nave roversà. El fa parte del Pałaso Comunałe de Padova. El pian superiore, el sałon vero e proprio, vien uxà par mostre de arte e queło inferiore, conosuo a Padova come "soto el sałon", xé destinà a atività comerciai de generi alimentari.[1]

Storego[canbia | canbia el còdaxe]

Xà nel 1166 esisteva sul sito un edificio a un piano soło che gaveva funsion publiche costruio sułe rovine de precedenti edifici de epoca romana, dei quai ghe xé tutora tracia. Ła prima reaixasion moderna risałe al 1219 e ła ospitava tribunali e ufici finansiari, destinasion che ła gavaria conservà anca in età comunae, durante ła signoria Cararexe e soto ła dominasion venesiana, fin al 1797. El pałaso el xé stà comunque sempre anca sede de comerci, e el Comune gà sempre regołà e proteto łe atività comerciai.[1]

Interno del sałon

Ła forma atuałe ła xé opera de frate Giovanni dei Eremitani, che tra el 1306 e el 1309 el gà fato costruire ła grande volta in legno a dó całote, el porticato e łe loge che cuerxe łe scałe. El teto xé stà rifato a capriate in legno de larice e co ła copertura in piastre de piombo. Se rivava al piano superiore co quatro diverse scałe che łe ciapava el nome dal marcà sotostante: ła Scała dei osei e queła de ła fruta in Piasa de ła Fruta e quełe dei feri lavorai e del vin in piasa de łe Erbe. Se pensa che in epoca comunae ghe sia stà un pasajo soprelevà che cołegava ła logia picoła col pałaso de fronte, l'atuae Pałaso de łe Debite, che a chel tempo el gera na prexón. Ghe xé invese 'ncora el pasajo che cołega al pałaso comunałe. I afreschi originai dełe sałe superiori gera stà fati da Giotto a partire dal 1306 ma i xé stà distruti da un incendio nel 1420. Inisialmente ła parte superiore gera divixa in 3 grandi sałe, e xè stà co' ła ricostrusion dopo l'incendio del 1420 che el pałaso xè sta riverto co' el gran sałon unico, co' i muri che se poxava su archi e piłastri con volte a crociera, su progeto del'architetto Bartołomeo Rizzo.[1]

El 17 agosto 1757 un potente turbine gà distruto el teto e gà scovercià el pałaso. Ła ricostrusion se deve a Bartołomeo Ferracina, un orołogiaro e ingegnere de ła Serenisima famoso pa' 'ver fato costruire el rełojo de piasa San Marco a Venesia e ricostruire a Basan el Ponte Vecio progetà da Andrea Paładio. Nel 1797, co ła conquista de Venesia da parte del'exercito francexe guidà da Napoleon Bonaparte, xé sta trasferii i tribunali del Pałaso e el Sałon xé stà destinà a grandi riunion, ricorense e feste popołari.[1]

Careteristeghe[canbia | canbia el còdaxe]

Medajon dedicà a Belzoni, meso sora ła porta del coridoio che cołega el sałon col Pałaso Comunałe

A prima vista el sałon pare retangołare, ma in realtà i quatro lati gà misure difarenti, forse par starghe drio ai canałi che girava intorno al pałaso. El teto xé in legno co na forma de arco a sesto acuto. Łe pareti del sałon xé decorà co' circa 500 afreschi co' motivi astrologici, sogeti rełigiosi e figure ałegoriche. A rifare i afreschi de Giotto distruti nel'incendio del 1420 xé stà Nicolò Miretto e Stefano da Ferrara. I afreschi xé divisi in tre xone orixontai e in dodexe verticałi, ripartii in oltre trexento riquadri. Oltre ai temi astrołogici e religioxi de cui ła magior parte dei afreschi trata, speso xé rafigurà el leon de ła Serenisima, che gaveva conquistà Padova qualche ano prima del 1420. Nel pavimento del sałon ghe xé na strisa bianca e nera che raprexenta el 12° meridiano che pasa par Padova.[1]

Altri afreschi xé stà xontai più tardi, insieme a monumenti come na lapide tombałe romana, da alcuni atribuia al poeta padovan Tito Livio, e el medajon del Setecento dedicà al'esploratore padovan Giovanni Battista Belzoni. Ghe xé anca ła Piera del Vituperio, dita anca del faimento, un bloco de porfido nero su cui na volta vegneva fati sentare i debitori insolventi e i faii, che i restava in camixa e mudande e i doveva publicamente rinunciare ai so' averi prima de 'ndare in exilio. Se i tornava sensa el consenso dei creditori, i doveva sentarse da novo su ła piera del Vituperio e ghe vegneva tirà tre seci de acqua. Dentro al sałon ghe xé un gran un cavało de legno che nel 1837 xé stà regałà al Comune dała nobiłe fameja Capodilista, i cui antenati ło gaveva fato costruire nel 1466. Se gà creduo pa tanto tempo che el cavało fuse stà fato dal Donateło, che sempre a Padova el ghe ne gaveva fato n'altro molto somejante, queo del Gattamelata davanti ała cexa del Santo. Tra łe altre robe dentro al sałon, ghe xé rełoji, meridiane, altri strumenti par misurare el tempo e un pendoło de Foucault.[1]

Marcà in piasa de łe Erbe

Sul lato orientałe del sałon ghe xé el coridojo che porta al Pałaso Comunałe e soto ghe xé fra i do pałasi el Vòlto deła Corda, grande arco costruio nel 1277 che mete in comunicasion piasa de łe Erbe e piasa de Ła Fruta. El volto gà ciapà sto nome parché qua soto vegneva colpii su ła schina co na corda i buxiari, i faii, i imbrojoni e i debitori insolventi. L'angoło soto al volto el se ciama canton dełe buxie parché là se incontrava i comercianti. Ghe xé ncora soto al volto łe vece misure padovane scolpie suła piera bianca che impediva ai venditori de imbrojare i clienti.

Atività comerciai[canbia | canbia el còdaxe]

Al piano tera ghe xé ncora, come che e ghe sempre stae, e boteghe sopratuto de generi alimentari, che łe conserva l'antico fascino. I prodoti che vien vendui i xè de soito de alta quaità e i riva da tuta Italia, oltre a diversi prodoti locai tipici. Łe piase de ła Fruta e de łe Erbe xé piene de bancarełe che forma dó dei marcà più originai e frequentai de Padova.

Note[canbia | canbia el còdaxe]

  1. 1,0 1,1 1,2 1,3 1,4 1,5 Palazzo della Ragione . Lingambo vardà el 20 marso 2010.

Altri projeti[canbia | canbia el còdaxe]

Controło de autoritàVIAF (EN130942425 · ISNI (EN0000 0001 2158 2765 · LCCN (ENnr91027281 · WorldCat Identities (ENnr91-027281
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Pałaso_de_ła_Raxon&oldid=796154"