Otava guera turco-venexiana

Da Wikipedia, l'ençiclopedia libara.
Va a: navigasion, serca
Otava guera turco-venexiana
Parte de le guere turco-venexiane
Plan Corfou 1688.jpg
Pianta de la sità de Corfù nel 1688, con mostrà le fortificazion
Data: 1714-1718
Posto: Morea (Peloponeso), isole Jonie
Èxito: Vitoria turca
Modifiche teritoriałi: conquista turca de la Morea
Schieramenti
Bandiera della Repubblica di Venezia.gif Republica Veneta Fictitious Ottoman flag 2.png Inpero Otoman
Comandanti
Geronimo Delfin
Johann Matthias von der Schulenburg
Silahdar Damat Ali Pasha

L'otava guera turco-venexiana la xe stà conbatùa tra el 1714 e el 1718 da la Republica Veneta e da l'Inpero Otoman. La xe sta l'ultima guera conbatùa tra le do potenze, e la xe terminà con la vitoria otomana e la perdita del pi grando posedimento veneto in Grecia, la Morea (el Peloponeso de uncuó). Venexia la xe stà jutà da l'intervento austriaco nel 1716, che el ga costreto i turchi a firmar el Tratado de Passarovitz nel 1718, chel ga messo fine a la guera.

La conquista turca de la Morea[canbia | canbia sorxente]

La guera la xe tacà el 9 de dicenbre 1714, quando l'Austria la jera inpegolà in te la guera de sucesion spagnola e quindi i turchi i ga pensà che fusse el momento bon par riconquistar i teritori persi par man dei venexiani in te la guera de Morea (1683-1699). El Gran Visir Silahdar Damat Ali Pasha, nei primi mesi del 1715, el ga radunà un gran esercito de 70 000 òmeni o 80 navi da guera, che le ga provedù subito a ciapar i ultimi posedimenti veneti nel mar Egeo, le isolete de Tinos e Egina.[1]

I venexiani, che no i gavea n'esercito stabile sul posto, i podea contar solo su 8 000 soldai e 42 navi, perlopiù picenine, per cui no i ghe la fasea gnanca a téndar tute le fortificazion che i gavea costruìo nei ani precedenti. In piu la popolazion del posto no la jera mìa contenta del dominio venexian, per cui quando Damat Ali el ga prometesto de rispetar l'incolumità e le proprietà dei greci, i sà messo a darghe grandi rifornimenti ai otomani,[2] mentre inveze i venexiani, che i sperava de reclutar na milizia locale, i xe restà isolà nei so forti.

El 25 de giugno i turchi i ga traversà l'istmo de Corinto, ciapando la sità e fasendo strage dei abitanti[3]. Dopo i sà direto verso Nauplia, che la jera ben proteta da 2 000 òmeni, ma la xe cascà el 20 de lujo dopo soli nóve giòrni de asedio, quando na mina la xe s-ciopà soto el bastion de Palamidi metendo in fuga i difensori e portando un colasso xeneral de la difesa.[4]

I venexiani i ga quindi abandonà i forti de Navarin e de Coron, conzentrandose tuti a Modon. Ma dopo ver spetà inutilmente socorso da la marina veneta comandà da Delfin, i sa reso.[5] Le ultime piazeforti venexiane, conprese le forteze che restava a Candia (Spinalonga e la Suda), le sà reso anca lore, e cussita l'intera Morea la xe stà ciapà dai turchi in solo un zentinaro de giòrni.[2]

L'asedio de Corfù[canbia | canbia sorxente]

Ritrato del conte Schulenburg piturà da Antonio Guardi

Dopo sto sucesso, i otomani i se gà spostà verso le isole Jonie, controlà dai venexiani, e i ga ocupà Santa Maura e el forte de Butrinto di fronte a Corfù. L'8 de lujo 1716 n'armada de 33 000 òmeni la xe sbarcà a Corfù, la pi inportante de le isole Jonie.[6] Dopo na inconclusiva batalia naval el stesso giorno, i otomani i xe avanzà verso la sità de Corfù, asediandola el 19 de lujo.[7] La difesa la jera comandà dal conte Johann Matthias von der Schulenburg, che el gavea zirca 8 000 soldai soto de lu. Grazie a le potenti fortificazion e al corajo e la determinazion dei difensori, la sità la xe però riussìa a resìstar, e dopo na granda tonpesta el 9 de agosto, i otomani a ghè tocà ritirarse.[7]

Intervento austriaco e conclusion de la guera[canbia | canbia sorxente]

Ne l'istà del 1715, l'armada turca la gera drio tacare la Dalmasia: ma la xé stà sconfita e respinta dale trupe venete a Sinj.

Intanto, col suporto finanziario del papa Clemente XI e la Francia che sà fato garante dei posedimenti austriaci in Italia, l'Austria la sà deciso a intervegner. El 13 de avril del 1716 l'enperador Carlo VI el ga rinovà l'aleansa co Venexia e el xe entrà in guera contro i turchi. Ghe xe stà 'ncora calche scontro naval tra Venexia e i otomani, come a Imbros nel giugno 1717 e la batalia de Matapan el mese dopo, ma no le xe stà decisive. Dopo le vitore austriache a la batalia de Petrovaradin nel 1716 6e a Belgrado nel 1718, i turchi i ga dovù firmar el Tratado de Passarovitz, con cui i ghe cedea un bel po' de tere a l'Austria, ma i se tegnea la Morea, mentre Venexia la ga podùo mantegner le isole Jonie.

Fonti[canbia | canbia sorxente]

  • History of the Hellenic Nation, Vol. XI, Ekdotiki Athinon 1975
  • George Finlay. The History of Greece under Othoman and Venetian Domination. William Blackwood and Sons, Londra, 1856

Riferimenti[canbia | canbia sorxente]

  1. Finlay, p. 264
  2. 2,0 2,1 L.S. Stavrianos, The Balkans since 1453, p. 181
  3. Finlay, pp.266-268
  4. Finlay, pp.270-271
  5. Finlay, pp.272-274
  6. J. Norwich, A History of Venice, 579
  7. 7,0 7,1 The history of Corfu at corfuweb.gr