Stà cuà ła xè nà voxe en vetrina. Struca cuà par major informasion!

Guera de Morea

Da Wikipedia, l'ençiclopedia libara.
Jump to navigation Jump to search
Guera de Morea
Parte de: de le guere turco-venexiane
PéloponnèseBlouet.jpg
Data1684-1699
LiogoMorea (Peloponexo), Atega, Mar Egeo
Rexultàconcuista venexiana de la Morea
Schieraminti
Comandanti
Francesco MorosiniIsmail Pasha
Mehmed Pasha


La guera de Morea la xe sta conbatua tra el 1684 e el 1699 in Morea (el Peloponexo de ancó), nel Mar Egeo e in Dalmasia tra la Republega Veneta e l'Inpero Otoman. La xe sta la setima de le oto guere conbatue tra Venexia e i turchi, e la ga visto l'ultima espansion teritorial de la Republega Veneta, che a la fine de la guera, col Tratado de Karlowits, la ga goadagnà la Morea e calche toco de la Dalmasia.

Antefati[canbia | canbia el còdaxe]

Venexia, sà da la cuarta Crociata cuando la gavea partesipà a la spartision de l'Inpero Bisantin, la gavea un mucio de isole nel mar Egeo e nel Jonio, più un saco de piaseforti posisionà strategegamente longo le coste de la teraferma greca. Però, co l'espansion de l'Inpero Otoman, durante el XVI e XVII secolo, la ga perdesto tante de cueste, come Cipro e Negroponte a vantagio dei turchi. Tra el 1645 e el 1669, i veneti e i otomani i gavea conbatùo na longa e costosa guera par el poseso de Candia, el pi grando posedimento che ghe jera restà a Venexia ne l'Egeo. Durante sta guera, el comandante venexian Francesco Morosini el sa meso in contato coi Manioti (i abitanti de la penisola de Mani in Morea) e i se ga meso dacordo par conbatar insieme contro i turchi. Elora nel 1659 Morosini el xe sbarcà in Morea e insieme con lori el ga concuistà Kalamata. Però ghè tocà tornar subito a Candia par difendarla, e cusita ghè tocà rinunciar a la spedision in Morea.

File:Sobieski Sending Mesage of Victory to the Pope.jpg
"Sobieski el ghe manda un mesajo de vitoria al papa, dopo la batalia de Viena", cuadro de Jan Mateiko

Nel 1683 xera s-ciopà na nova guera tra l'Austria e i otomani, e un grando esercito turco el ga meso l'asedio a Viena. Se i turchi i gavese concuistà la sità, i gavaria vu le porte verte verso el cor de l'Europa. Par inpedir che sucedese, se ga formà na Liga Santa tra polachi, austriaci e todeschi, i cuali, comandà dal re de Polonia Jan Sobieski, i ga sconfito e fato scapar l'esercito asediante. Elora i venexiani i ga pensà de profitar de sto momento, in cui i otomani i era in crisi, par riconcuistar i teritori de l'Egeo e de la Dalmasia persi ne le guere precedenti. El 25 de apriłe 1684, giòrno de San Marco, la Serenisima la gà dichiarà guera a l'Inpero Otoman.[1]

Sicome i savea de dover far conto solo su le so forse, i venexiani i sà preparà par la guera fasendose dar ajuti finansiari e militari dai Cavalieri de Malta, dal Duca de Savoja, dal papa e dai Cavalieri de Santo Stefano. In più, i ga aruolà un gran numaro de mercenari dai vari stati taliani e todeschi, specialmente la Sasonia e el Brunswick,[2] e i ga organisà na leva dai so stesi teritori in Italia e Dalmasia. Morosini, che el s'avea sà distinto in precedensa e el gavea esperiensa de operasion in Grecia, el xe stà sielto par comandar la flota.[3]

L'ofensiva venexiana[canbia | canbia el còdaxe]

Operasion nel mar Jonio[canbia | canbia el còdaxe]

A metà de giugno del 1684, la flota veneta la xe partìa da l'Adriatico verso le isole Jonie. El primo obietico el xe sta l'isola de Santa Maura (Leucade), che la sa rendesto, dopo un breve asedio de sedese giòrni, el 6 de agosto 1684. I venexiani, jutà da iregolari greci, i xe sbarcà su la teraferma greca, atacando la costa de l'Acarcania. Bona parte de la xona la xe finìa presto ne le mane dei venexiani. I ultimi bastioni otomani, i forti de Prevesa e Vonisa, i xe cascà a la fine de setenbre.[4] Sta prima vitoria la jera inportante par i venexiani mìa solo par el morale dei soldà, ma anca parché cusita i se ga asicurà le comunegasion con Venexia, i ga inpedìo ai Otomani de minaciar le isole Jonie o de trasportar trupe tramite la Grecia de l'ovest verso la Morea, e anca parché sti succesi i ga dato ai greci el corajo de colaborar coi veneti contro i otomani.

La concuista de la Morea[canbia | canbia el còdaxe]

Medaja del 1688, in onor de la concuista de la Morea a opera de Morosini e de la so elesion a Doxe de Venexia

Anvedose sicurà el teritorio de drio de lu durante l'ano prima, nel 1685 Morosini el ga meso i oci su la Morea, in do che i greci, in particolar modo i Manioti, i ga scuminsià a mostrar segni de ribelion e i gavea contatà Morosini, prometendoghe de solevarse in so ajudo. Ismail Pasha, el novo comandante militar de la Morea, el l'à savù e el ga invadesto la penisola de Mani con 10 000 òmeni, rinforsando i tri forti controlà dai otomani, e fasendose dar dei ostagi dai Manioti par esar sicuro de la so lealtà.[5] De conseguensa, i Manioti no i sà moso cuando, el 25 de giugno 1685, l'armada venexiana, forte de 8.100 òmeni, la xe sbarcà davanti al vecio forte venexian de Coron metendoghe l'asedio. El castel el sà areso dopo 49 giòrni, l'11 de agosto, e la guarnision la xe stà masacrà. Dopo sta vitoria, Morosini el ga inbarcà i so soldai verso la sità de Kalamata, par incorajar i Manioti a ribelarse. L'esercito veneto, rinforsà da 3 300 sàsoni e soto el comando del general Degenfeld, el ga batùo na armada turca de presapoco 10 000 òmeni fora da Kalamata el 14 de setenbre, e a la fine del mese tuta la penisola de Mani e bona parte de la Mesenia la jera soto el control venexian.[6][7]

Ne l'otobre del 1685, l'armada veneta la xera ritornà su le isole Jonie par pasar l'inverno, cuando xe s-ciopà na pestilensa, roba che sarìa capità regolarmente nei ani sucesivi, fasendo dei grosi busi ne l'esercito veneto, specialmente tra i contingenti todeschi. In te l'avril de l'ano dopo, i veneti i ga respinto un ataco otoman che minasava la penisola de Mani, e i ga ricevù rinforsi dai Stati de la Cesa e da la Toscana. El maresial svedese Otto Wilhelm Königsmarck i lo ga nomenà capo de le forse de tera, mentre Morosini el mantegnea el comando de la flota. El 3 de giugno Königsmark el ga ciapà Navarin, e el ga meso l'asedio a la fortesa de Navarin. Na spedision de socorso comandà da Ismail Pasha la xe sta sconfita el 16 de giugno, e el giòrno dopo el forte el se ga rendesto. La guarnision e la popolasion musulmana i la ga trasportà a Tripoli.[8] El 7 de lujo xe sta la olta de Modon, dopo che un gran bonbardamento el gavea butà so i muri del forte, e i abitanti i xe sta anca lori portà a Tripoli.[9] Elora i venexiani i xe ndè vanti verso Argo e Nauplia (Napoli de Romània), che la jera la sità pi inportante de la Morea.

Na vecia ilustrasion de Nauplia, o Napoli de Romània

L'armada veneta, forte de 12 000 òmeni, la xe sbarcà intorno a Nauplia tra el 30 de lujo e el 4 de agosto. Königsmarck el ga condoto subito un asalto contro la colina de Palamidi, che in alora no la jera fortificà, da cui se domina la sità. Anca se i venexiani i xe sta boni de ciapar Palamidi, la so posision la sa fato conplicà cuando un esercito de socorso otoman de 7 000 soldai comandà da Ismail Pasha el xe rivà a Argo. I veneti i xe sta boni de ciapar Argo e parar via Ismail fin a Corinto, ma dal 16 de agosto, par do stimane ghè tocà continuamente respìnsar i atachi de le forse de Ismail Pasha, conbatar contro le sortìde de la guarnision otomana asedià a Nauplia e in tuto cuesto se ga meso anca na nova epidemia. El 29 de agosto 1686 Ismail Pasha el ga atacà l'acanpamento veneto, ma el xe sta duramente batùo. Co la sconfita de l'esercito de socorso, a cuei de Nauplia a ghè tocà réndarse el 3 de setenbre.[10] Le notisie de sta granda vitoria le xe sta ricevù a Venexia con gran gioja e festegiamenti. Nauplia la xe deentà la pi granda base dei venexiani, mentre Ismail Pasha el se ga ritirà in Acaja dopo ver rinforsà le posision de Corinto, da in do se controlava el pasagio verso la Grecia sentral.[11]

Nonostante le perdite dovùe a le peste durante l'autuno-inverno del 1686, le forse de Morosini le xe tornà al conpleto grasie a nove trupe de mercenari de l'Hannover rivà ne la primavera 1687. Cusita Morosini el ga podesto móarse contro l'ultimo grando bastion otoman ne la Morea, la sità de Patraso e el forte de Rion, che insieme al forte simelo de Antirion el controlava l'entrada al Golfo de Corinto. El 22 de lujo 1687 Mororini, con 14 000 soldai, el xe sbarcà fora de Patraso, do che s'avea sistemà el novo comandante otoman, Mehmed Pasha. cuesto, co n'armada granda più o meno conpagna, el ga atacà i veneti 'pena che i xe sbarcà, ma el xe sta sconfito e ghè tocà ritirarse. A sto punto tra i otomani se ga sparso el panico, e i venexiani i ga podùo, in póchi giòrni, ciapar la sitadela de Patraso e i forti de Rion, Antirion e Lepanto sensa nisuna oposision, parché i xera stai abandonà da le trupe che i le ocupava. Sta nova vitoria la ga provocà na gioja granda a Venexia, e a Morosini e ai so uficiai che xe sta tributà grandi onori. A Morosini i ghe ga dato el titolo de "Peloponesìaco", e ne la sala del Consiglio dei X i ga meso un so busto de bronso, na roba mai sucesa prima par persone 'ncora in vita.[12] A sta vitoria ga fato seguito la concuista de le ultime piasaforti otomane in Morea, conpresi Corinto, ocupà el 7 de agosto,[13] e Mistrà, che la sa reso poco dopo, senpre in agosto. La Morea la jera ormai tuta soto el controlo veneto, e solo el forte de Malvasia (Monemvasia) nel sudest el continuarà a tegner bota fin al 1690.[14]

La canpagna contro de Atene e Negroponte[canbia | canbia el còdaxe]

Dopo che ste vitore le gavea spasà via i turchi da la Morea, Morosini el ga decidesto de spostarse ne la Grecia sentral, specialmente contro le piaseforti otomane de Tebe e de Calcide su l'isola de Negroponte. cuindi, el 21 de setenbre 1687, l'armada de Königsmark, forte de 10.750 òmeni, la xe sbarcà a Eleusina, intanto che la flota veneta la entrava al Pireo. I turchi i ga sgonbrà in presia la sità de Atene, ma la guarnision e bona parte de la popolasion i se ga ritirà su la vecia acropoli. I venexiani i ga tacà cuindi co l'asedio de l'acropoli, che nonostante el sia ndà vanti solo sié giòrni, el ga provocà dani mia da scherso ai veci monumenti. Prima i otomani i ga butà so el tenpio de Athena Nike par farghe na bateria de canoni, ma el dano pi groso el xe la distrusion del Partenon. I turchi i doparava el tenpio come deposito de munision, e cuando, la sera de 26 de setenbre 1687, na bonba de mortaro la xe cascà su l'edificio, l'esplosion che sa scadenà la ga fato vegner so tuto un cuerto e un bel toco dei muri.[15]

El lato sud del Partenon, chel ga ricevùo i dani pi gravi de l'esplosion del 1687

Nonostante la gran distrusion provocà da l'esplosion e la perdita de sirca dosento òmeni, i turchi i xe ndà drio a difendar el forte finché un tentativo de socorso da parte de l'esercito otoman de Tebe el xe sta respinto el 28 de setenbre. Alora i se ga rendesto, a condision de esar trasportà a Smirne.[16] Pur avendo ciapà Atene, la posision de Morosini no la jera mìa sicura. I otomani i stava muciando n'armada a Tebe, e la so cavaleria la controlava ancora l'Atega, lasandoghe ai veneti solo i dintorni de Atene. In dicenbre, el contingente de 1.400 soldai de l'Hannover el xe dovù partir, e na nova ondata de peste durante l'inverno la ga indebolìo 'ncora de pi le forse venete.[17] Per cui a Morosini a ghè tocà ritirarse de novo in Morea in avril. I venexiani i sa portà via con lori un mucio de robe antiche, come la statua del Leon del Pireo, che uncuó el se cata davanti a l'entrada de l'Arsenal de Venexia.[18] In seguito al ripiegamento de Morosini, molte migliaja de Greci, che i gavea paura de le vendete turche, i xe scapai in Morea e ne le isole visine.[19]

Comuncue nel giugno 1688 Morosini, che intanto el xera sta eleto Doxe de Venexia, el xe sbarcà a Calcide su l'isola de Negroponte e el ga meso l'asedio. I venexiani i gavea meso insieme un bel esercito, 13 000 òmeni più altri 10 000 marinai, contro el presidio otoman de 6 000 soldai, che i ga resistìo con determinasion. La flota no la xe sta bona de blocar conpletamente la sità, parmetendoghe a le forse de Ismail Pasha de rifornir el castel asedià 'traverso el streto de Euripe. I veneti e i so aleà i ga soferto gravi perdite, specialmente par via de n'antra bota de peste, che el 15 de setenbre la se ga portà via anca el general Kònigsmark. Dopo n'ultimo asalto el 12 de otobre, che el sa dimostrà un costoso falimento, Morosini el ga dovesto acetar la sconfita.[20] El 20 de otobre l'armada veneta, avendo perso in tuto 9 000 soldai, la ga lasà Negroponte direta a Argo. El falimento a Negroponte el ga vu gravi ripercusion nel canpo venexian. I ultimi mercenari todeschi i xe partìi ai primi de novenbre. Morosini el ga tentà un ataco su Monemvasia nel 1689, ma par problemi de salute a ghe tocà tornar a Venexia póco dopo.[21] Sto fato el ga segnà la fine de l'ofensiva veneta, e l'inisio de na serie de contratachi otomani, che i ga vu suceso anca se no i xe stà decisivi.

La controfensiva dei otomani[canbia | canbia el còdaxe]

Le sconfite consecutive in Ongaria contro i austriaci e in Morea contro i venexiani le ga vu gravi ripercusion a Costantinopoli. El soldan Mehmed IV el xe sta deposto nel 1687 par far ndar su so fradel Soliman II. A sto punto i otomani i gavarìa anca vosù n'acordo de pace, ma subito dopo xe s-ciopà la Guera dei Nove Ani tra i Asburgo (e altri aleati) e Luigi XIV de Francia. I austriaci i ga dovù cuindi cavar na parte de le so forse da l'Ongaria par conbatar i francesi, incorajando i otomani a tornar a la carega. Soto l'abile comando del novo Grand Visir, Köprülü Fasıl Mustafa Pasha, i otomani i ga lancià na controfensiva.[22] Comuncue, sicome i sà rivolto pi che altro verso l'Austria, no i ga mai vu forse in bisogno par riguadagnar i teritori ciapà dai venexiani.

Le asion de Limberakis Gerakaris[canbia | canbia el còdaxe]

Nel 1688, i turchi i ga decidesto da farse jutar da un pirata maniota, Limberakis Gerakaris, che l'era in preson a Costantinopoli. I lo ga molà, i ga dato el titolo de "Bey de Mani" e i ga parmeso de reclutar calche sentinaro de òmeni e de unirse a l'esercito otoman a Tebe.[23] Gerakaris el gavaria sugà un ruolo inportante ne le ultimi fasi de la guera, parché le so ardite e devastanti scoribande contro i teritori controlà dai venexiani le xe stà na gran menasa e na continua fonte de perdite par le risorse de la Republega.

Malvasia (Monemvasia in greco) in te na ilustrasion del 1680

In chel'epoca, na larga banda de "tera de nisuni" la se stendea par la Grecia sentral, tra le piaseforti otomane a est e i teritori venexiani a ovest. Na gran parte de l'interno montagnoso de la Focide e de l'Euritania l'era ne le mane de grupi de bande armà conposte da greci, albanesi e dalmati disertori de l'esercito veneto. Gerakaris el ga prima sercà de convìnsar sta sente a métarse al servisio dei otomani, ma nol ghè riusìo. Nel 1689, el ga fato la so prima incursion contro Misolungi, con na forsa mista de 2 000 turchi, albanesi e greci. L'ano dopo, le forse otomane le ga invaso la Grecia sentral, e anca se le xe stà respinte a Lepanto, le ga ristabilìo el controlo otoman su l'interno.[24] Comuncue nel steso periodo i venexiani i ga ciapà Monemvasia, l'ultimo bastion otoman in Morea.

Nel 1692, Gerakaris el ga fato da apripista par na invasion otoman de la Morea. El ga ciapà Corinto, e asedià inutilmente Acrocorinto e Argo, prima che ghe tochese ritirarse parché era rivà dei rinforsi venexiani. Tutavia, dopo altre invasion verso la Morea nel 1694 e 1695, Gerakaris el ga molà i turchi e el xe pasà da la parte dei venexiani. Però el tratamento brutale che el ghe riservava a la popolasion civile e la so posision autoritaria come Bey de Mani no la podea esar soportà tanto in longo da venexiani. Dopo che Gerakaris el gavea selvagiamente sachegià Arta ne l'agosto 1696, i venexiani i lo ga arestà e meso in preson a Brescia.[25]

Operasion in Epiro e ataco venexian su Candia[canbia | canbia el còdaxe]

sercando de jutar i greci de Himara, che i se gavea ribelà ai turchi, e dopo calche succeso ne l'Albania del nord e in Montenegro, la flota veneta la ga lancià n'ataco contro el porto e fortesa otomana de Valona. L'asedio, durà da l'11 al 18 de setenbre 1690, el xe riusìo, e el ga portà a la difusion de la rivolta in te la xona. Però nel 1691 i otomani i ga scadenà na controfensiva, e entro el 14 de marso i gavea riconcuistà tuta la xona.[26]

Nel 1692 na flota venexiana soto Domenico Mocenigo la ga atacà Candia, metendoghe l'asedio a la so capital omonima, intanto che i cristiani de l'isola i se ribelava ai otomani. Nonostante cuesto, el tentativo de libarar Candia el xe falìo. I otomani i ga podùo parfin ciapar la fortesa veneta su l'isoleta de Granbusa grasie a un tradimento.

I ultimi ani de guera[canbia | canbia el còdaxe]

Sperando de ridarghe fià a la causa veneta, Morosini in persona el xe tornà in Morea nel 1693. Però ormai l'era vecio, el no ga pi podesto dimostrar la so abilità. El xe morto a Napoli de Romania el 16 de senaro 1694. El so sucesor Antonio sen, sensa scoltar el consiglio dei so uficiai, el ga condoto na spedision contro la ricca isola de Chio, rente la costa de la Turchia. L'isola i la ga ciapà fasilmente, ma la risposta turca la xe stà rapida e masicia, costrinsendo i veneti a na ritirata umiliante.[27]

I otomani i sa fato corajo e i ga sercà de novo de invàdar la Morea, ma i xe sta batùi dal general Steinau e ghe tocà tornar a la so base a Tebe. Nel steso periodo, Steinau el ga convinto Gerakaris a pasar da la parte dei venexiani (come xe sà sta dito).[28]

Operasion navali ne l'Egeo[canbia | canbia el còdaxe]

Ghe xe sta diversi scontri navali tra le flote aversarie, come a Lesbo nel 1690, a Capo Kara Burun nel 1695, a Andros nel 1696, a Lemno nel 1697 e a Samotracia nel 1698. Tuti ste batalie le xe stà pero in xeneral mìa decisive e no le gà alterà la balansa de le forse in canpo.

Concluxion[canbia | canbia el còdaxe]

mapa de el regno de Morea

El Tratado de Karlowits, firmà nel senaro 1699, el ga confermà a Venexia i posedimenti de Cefalonia e de la Morea con l'isola de Egina, che la xe sta organisà nel Regno de Morea, spartìo in cuatro provinse: Romània con capitale Napoli de Romània (Nafplion in greco), Laconia con capitale Malvasia (Monemvasia), Mesenia con capitale Navarino, e Achea con capitale Patraso. La guera la gavea comuncue creà na crisi demografega e economega ne la Morea.[29] I venexiani i ga sercà de afrontar el problema, ma no i xe sta boni de goadagnarse la fiducia dei greci, che i jera bituà a un serto grado de autonomia soto i Turchi e no ghe 'ndasea tanto a genio la burocrasia veneta. I venexiani inoltre i sa meso a tacar su un mucio de opere de fortifegasion, bona parte de le cuali le se pol vedar 'ncora deso. Però a la fine dei conti, Venexia la xera masa indebolìa par far valer la so autorità, e sà nel 1715 i turchi i ga podù riconcuistar velocemente la Morea nel corso de l'otava guera turco-venexiana.

Fonti[canbia | canbia el còdaxe]

  • History of the Hellenic Nation, Vol. XI, Ekdotiki Athinon, 1975
  • George Finlay. The History of Greece under Othoman and Venetian Domination. Londra, William Blackwood and Sons, 1856
  • Pinselli, Eric G. L. (2003), Venise et la Morée: du triomphe à la désillusion (1684-1718), https://hal.archives-ouvertes.fr/tel-01287498/document

Riferimenti[canbia | canbia el còdaxe]

  1. Finlay, p. 205-206
  2. I regnanti de la Sasonia e del Brunswiki i ga acetà nel dicenbre 1684 de fornir ognuno 2400 òmeni. Ste trupe, 2500 òmeni de l'Hannover e 3,300 Sàsoni, i xe rivà in Grecia nel 1685. Finlay, pp.210-211
  3. History of the Hellenic Nation, p. 19
  4. Finlay, p. 209
  5. Finlay, pp. 211-212
  6. History of the Hellenic Nation, p. 23
  7. Finlay, pp. 213-214
  8. Finlay, p. 215-216
  9. Finlay, p. 216
  10. Finlay, p. 218
  11. History of the Hellenic Nation, p. 24
  12. Finlay, p. 220
  13. Finlay, p. 221
  14. History of the Hellenic Nation, p. 25-26
  15. History of the Hellenic Nation, p. 27-28
  16. Finlay, p. 223
  17. Finlay, p. 224
  18. In calche caso, sta opera de sachegio de statue e monumenti la ga portà a strusiàrghene calcheduna: la statua de Poseidon e el carro de Nike i xe ndà roti finché dei operai i sercava de cavarli dal fronton osidental del Partenon.
  19. History of the Hellenic Nation, p. 29
  20. Finlay, pp. 227-228
  21. History of the Hellenic Nation, p. 29-30
  22. L.S. Stavrianos, The Balkans since 1453, p. 174
  23. Finlay, pp. 230-231
  24. Finlay, p. 231
  25. History of the Hellenic Nation, p. 32
  26. History of the Hellenic Nation, p. 31-32
  27. Finlay, p. 232
  28. Finlay, p. 233
  29. Finlay, p. 234



Controło de autoritàLCCN (ENsh2015000929
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Guera_de_Morea&oldid=887383"