Fołina

Fołina

Follina (it)
Pozision
45°57′N 12°07′E45°57′N, 12°07′E (Folina o Fuina)
Stato	Itàłia
Rejon	Vèneto
Provinsa	Trevizo
Capitałe	Follina (it)
Popołasion
Totałe	3 535 (2023)
Densità	146,8 hab./km²
Zènaro	1 874 (%53)   (%50,5) 1 784
Idioma	Italian, vèneto
Zeografia
Àrea	24,08 km²
Altitùdene	191 m
Rente a	Cizon de Valmarin   Fara de Sołigo Pieve de Sołigo Borgo Valbeƚuna   Miane
Dati istòreghi
Dì festivo	Festa patronałe
Patrono	Pentecoste
Organizasion pułìtega
Menbro de	I borghi pì bełi de Itàlia
Còdazi de identifegasion
Còdaze postałe	31051
Còdaze de matricołasion	TV
Fuzo oràrio	UTC+1 UTC+2
Clasifegasion climàtega	clima subtropegałe ùmido
Prefiso tełefònego	0438
ID ISTAT	026027
Còdaze catastałe de Itàlia	D654
Sito web	comune.follina.tv.it

Folina (o Fulina) (AFI: [foˈliːna] [fuˈiːna]) l'é un comun de 3526 abitanti de la provincia de Treviso.

L'é un centro cultural e turistico ativo, gracie anca a la so apartenença al grupo dei Borghi più Belli d'Italia, e intel 2021 l'à cjapà la Bandiera Arancione dal Touring Club Italiano. L'é anca na sede industrial e artesanal.

Geografia fisica

El teritorio de Folina, co na area de 24,08 km², l'é logà inte l'Alta Marca, pi precisamente inte la secion final de la Valada, la val che la à par confin le Prealpi Belumate verso nord e le rive co el fiume Soligo verso sud. L'é giust verso Folina (sote la riva de Roncavaçai) che el Soligo el scumincia ndar verso sud intel Cuartier de la Piave par pò terminar entro la Piave stessa, a meda via intrà Faldé (Sarnaja) e Santa Ana (Susegana).

El comun l'é a 40 km da Treviso, a 14 km da Valdobiaden e a 16 km da Vitorio; el se loga a na altitudine de 191 metri s.l.m.

El confina verso su co la Provincia de Belun (co el comun de Borgo Valbeluna), verso matina co Cison, verso dó co Pieve (verso matina) e co Fara (verso sera) e verso sera el confina co Miane.

El comun l'é cjapà entro inte la DOCG de le Rive del Proseco e el fa part de la Union Montana de le Prealpi Trevisane.

Storia

La civiltà la à fat la so conparsa bel che inte l'epoca de la Preistoria (certi reperti i é vecji de 120'000 ani), e de l'epoca romana i é certi i resti de na stradela a codolà (in banda de le Val Bianche sote Pradaràdego) che calchiduni l'à identificà co la Via Claudia Augusta Altinate.

Verso la metà del XI secol i se à insedià a Folina i cistercensi: la ghe é stata atribuida l'introducion de l'arte de le lane inte la Valmaren, come anca la costrucion de l'Abacia de Folina. El toponimo "Folina", l'é ligà a la foladura (la lavoracion de la lana): l'é derivà dal verbo del latin medieval *fullare.

Intel 1436 la Republica Veneta la dona a Brandolin III e al Gatamelada del feudo de Valmaren; intel 1439 el Gatamelada el ghe dà la so part a Brandolin. El feudo el restarà inte le man dei Brandolin fin al 1797.

Intel 1680 Folina la fa un salt de cualità, dal pont de vista de l'economìa, dovest a la fondacion de la manifatura del bressan Francesco Fadda, che la é stata una de le prime in Italia a proar imitar le stofe inglesi e olandesi, pi fine e lidiere.

Gracie a l'esperiença pilota de Fadda i vien creadi – verso el 1740 – i lanifici Tron e Stahl e pi tardi cuel del Col(l)es. Inte le fabriche i laora esperti foresti che i ghe dà força a la vocacion manifaturiera de Folina.

Ai 12 de majo del 1797 la cai la Republica de Venecia e Folina la ghe va drio a tut el resto del Veneto, drio pasar sote la dominacion de l'Arciducà d'Austria par via dei acordi stabilidi dal tratà de Canpoformio.

Intel 1813 el nas a Folina, intel palaç del '700 logà visin de l'Abacia, Jacopo Bernardi, leterà, eclesiastico, pedagogista e patriota co idee liberai. In cualità de capelan militar l'é stat a Venecia par la restaurada Republica de San Marco cuande che ghen é stat l'assedio del 1848/1849. Là lu l'é deventà amigo de Daniele Manin, Angelo Mengaldo e Nicolò Tomaseo. Menbro influente de inportanti istitucion de carità, dopo de na vita de studi l'é mort a Folina intel 1897.

Ai 30 de dicenbre del 1819 la cjesa de Folina la vien elevada a Parrocchia, col titol de Cjesa Arcipretal, gracie al vescovo cenedes Joani Benedet Falier. Fin a cuel momento, la era stata na curacìa che la dependea da Valmaren. El primo arciprete l'é stat don Giobata Botesele da Cosanmartin.

Intel 1865 la vien fondada a Folina la prima società de mutuo socorso e istrucion dei operai de la provincia.

Inte la seconda metà de l'Otocento l'industria de le stofe de Folina la vien colpida da na crisi assé fissa e intel 1891 nissun lanificio el sarà pi vèrt.

Ai 9 de novenbre del 1917 el scumincia a Folina l'An de la Fan; el paese el vegnarà liberà sol che ai 29 de otobre del 1918.

Inte l'an de ocupacion austriaca la à risaltà la figura del piovan de Anacleto Milani, prior de l'Abacia de Folina e anca sindaco del paese. Lu el se à inpegnà par jutar la dent contro le cativerie dei invasori, drio curar pupii, maladi, mutiladi e diversamente abii. Dopo, finida la guera, el se à anca ocupà dei gran restauri del conplesso monastico cistercense, scuasi destrut da le bonbe, dal passar del tenp e da le donte fate intei secoi, par portarlo da novo al vecjo splendor. I laori de restauro i é tacadi dó intel 1921.

Ai 26 de agosto del 1944, inte la Resistença, i à processà Mario Min e Eraclea Zanette, che po i é stati copadi. Pochi di pi vanti, intei primi de setenbre, la piaça la é anca testimone de l'esecucion de do partigiani (Marco Tenpesta e Armando Fornasier) da parte dei todeschi che, drio portar vanti el restelament da Pieve verso la Valada Trevisana, a Folina i ghe vea da poc dat fogo a na vintina de case e a 45 stale.

Ai 5 de majo del 1968 ghen é la inauguracion del comun novo, progetà da l'arch. Schiavet da Conajan. Intei ani Otanta, invence, la vien fata su la scola media "Antonio Fogazzaro". In pi, el Comun el conpra el vecjo colejo "San Giuseppe", co anca el cinema e el palaç vecjo del comun, e el ghe costruis sora el parco e i inpianti sportivi.

Intrà i ani '90 e i ani '00 i vien fati su la casa de riposo, l'auditorium e la biblioteca. La vien anca scuminciada na gran opera de ricualificacion urbana e infrastrutural. El svilupo produtivo el seita sença fermarse e el crea un numero bel alt de posti de laoro.

Intel decenio 2014-2024 la promocion turistica de Folina, dal 2017 menbro de l'Associazione dei Borghi più Belli d'Italia, la deventa de proporcion nacionai e internacionai intel sencj de la cultura e de la spiritualità. El violinista Uto Ughi, che l'à anca fat an bon numero de concerti inte l'Abacia, intel 2015 l'é stat insignì co le Cjave de la Cità de Folina. Intel 2017, par le celebracion nacionai pai 100 ani de la Prima Guera Mondial, col patrocinio de la Presidença del Consejo dei Ministri, i é stati fati i concerti Quartetti Ungarettiani e Il Galateo in Bosco, co musiche de Mirco de Stefani, dedicadi a Ungareti e Zanzoto. Intel 2021, par le celebracion dei 700 ani da la nassita de Dante Alighieri e dei 100 ani da la nassita de Zanzoto, i é stati eseguidi da l'ensemble polifonico "Odhecaton" el Canto XXXIII del Paradiso e Dove io vedo, scrivesti da De Stefani. Intel 2022 Folina la à ospità la 22^ assenblea nacional dei Borghi più Belli d'Italia, e par sta ocasion i Odhecaton i à sonà le Canzoni dal Monte Ventoso de De Stefani, scriveste su testi del Petrarca. Col patrocinio del Parlamento Europeo, intel majo 2024 i Odhecaton i sona i Cori di Boezio, scrivesti senpre da De Stefani pai 1500 ani del De Consolatione Philosophiae de Severino Boezio, opera assé inportante par la cultura europea.

Sinboi

El stema e el gonfalon i é stadi concedesti col D.P.R. dai 6 de otobre 1953. Se lede testuai parole:

«Troncato: il primo di rosso, al follo antico d'argento che compie la follatura di un drappo d'azzurro, il secondo d'argento alla torre civica di rosso, uscente dalla punta, finestrata del campo, caricata di un quadrante d'argento di antico orologio veneto, con sfere e ore di nero. In basso attraversante la torre, la scritta in nero A FVLLONIBVS. Ornamenti esteriori da Comune.»

El gonfalon l'é un drapo de celestin.

Monumenti e loghi de interesse

Abacia de Santa Maria

La abacia la à origini vecje assé: la vien meçonada par la prima olta intel 1127, cuande che un certo Bernardo di Follina el ghe à vendest tre canp a un tal Arpone. Intel XII sècol la é stada gestida da i cistercensi, che i dipendea dai monasteri de Chiaravalle e de Cîteaux. Intel secolo dopo, gracie a na gran donacion, la basilica la à cjapà senpre pi força e poder, ma intel 1388 le lote infrà le fameje dei Sforça e dei Visconti contro el Regno de França, che i se scontrea coi monaci de Chiaravalle, le à portà l'abacia inte na fase de decadença. Intel 1448 el governo el ghe à domandà a Papa Nicolò V che l'orden monastico el vegnesse serà dó, par far deventar la cjesa na comenda. Pi vanti, gracie a Piero Barbo, la cjesa la é passada ai benedetini, e pò l'é stada declassada da novo a curacia intel 1771 da la Serenìsima, e i so beni i é stadi trasferidi a Muran inte la cjesa de San Stèfen.

La strutura in gotico cistercense la é un dei mejo esenpi de tut el Veneto. L'interno l'à tre navade co un sofit fat a capriade in lencj in vista, e la conserva un afresco de Francesco da Milan che el mostra la Madona col Banbin intrà do santi e el comitente. In pi, la conserva un crocefis de lencj de la Età Baroca pregià assé.

Sacrario austro-ungarico

Folina, logada d'arente de la linea de conbatiment de la Prima Guera Mondial, intel novenbre del 1917 la é stada cjapada da i austriaci. El colejo salesian che el ghen era al tenp l'é stat trasformà in ospedal militar de juto al Feldspital 1505, che l'era stat fat su là dal vecjo lanificio Andretta. El lanificio, pò, l'é stat trasformà inte la casa de riposo de San Giuseppe, onde che i rivea i feridi che i vegnea da la prima linea, che cuà i morisea par le feride de le armi da fogo. I vegnea sepulidi intel spacio par da drio, che l'é deventà cimitero militar. El logo l'é stat serà su co na recincion e schermà da un mur. L'an dopo, là i é stati sepulidi 900 soldadi de varie nacionalità morti inte la Guera. Fenì el conflito, certi corpi i é stati spostadi inte i so loghi de nassita; le é stade messe dó lapidi che le indica i posti de sepoltura, drio trasformar el cimitero provisorio in cimitero militar.

Intel 1943 i à spostà antri corpi in antri cimiteri militari, ma no i à podest continuar par via de l'armisticio dei 8 de setenbre. Intel 1970 na ordinança la à serà el cimitero par poder spostar tuti i corpi intei sacrari militari. Intel 2004, però, svariadi corpi i restea ancora sote tera: l'aministracion comunal de Folina, drio farse dar na man dal grupo alpini local, la à tirà fora 78 corpi, la à recuperà le lapidi e la à fat su, anca gracie a le dite locai che le à fornì materiai e schei, un monument progetà da Paolo Portoghesi. El 26 de otobre del 2008 i é stati mesi inte le urne i resti de 50 soldadi italiani e tanaltri striaci.

Cjesa de San Tomio

La é logada intel nord-est del teritorio comunal e la à origini vecje: la vien difati meçonada in certi documenti che i parlea de le cjese canpestri che le dipendea da l'Abacia de Folina. L'edificio l'é in condicion triste: el se presenta co na façada intonacada de bianc co do monofore a medaluna. Entro i era logadi na acuasantiera del XIV secolo e tanti aredi sacri, tuti robadi. I resta sol che do afreschi, de autor e de epoca incerti.

Cjeseta de San Clemente

Sto edificio picjenin al é logà intel sud-est del comun, in posicion soraelevada. La é anca ela de origini antiche: la vien mençonada co la cjesa de San Tomio in certi documenti del secolo XII. I esterni de la cjesa i é assé senplici, in stile tardo gotico rural, co do monofore a medaluna logade su par la banda çanca. El canpanilet a vela l'é datà 1631. Entro la é logada na pala de altar datada 1628.

Fontaniç de Santa Scolastica

L'é logà a 150 metri da l'Abacia, verso sera, e l'é n'esenpio particolar de fontaniç carsico: l'acua, difati, no la vien fora da na caverna ma da un gran lago sote tera, che intei tenp de piena el descarga su par la strada che la passa in banda del fontaniç. L'é considerà un logo assé inportante par Folina, parché che l'acua che la vien fora da cuà la fea ndar tuti i lanifici del paese. Có el se à sugà, intel 1897 e intel 1987, l'é stat un gran disastro par Folina. El problema el se à risolvest in modo miracolos cuande che la popolacion la à pregà la Madona e l'acua, dopo poc, la à tornà a vegner fora bela fissa. Intel fontaniç, siben che i apie fat laori par far su na central idroeletrica picjenina, la resta e la vif na popolacion de ganberi de la specie Austropotamobius papilles, gracie a le acue bele nete e ossigenade assé.

Società

Evolucion demografica

Abitanti censii

Etnie e minorance foreste

Ai 31 de dicenbre del 2022 i foresti che i stea intel comun i era 241, el 6,9% de la popolacion. I grupi pi numerosi i é sti cuà:

1. Romania 54
2. Maroco 46
3. Macedonia del Nord 41
4. Senegal 13
5. Albania 12

Lengue e dialeti

A Folina i é parladi el talian e el veneto. La parlada de Folina la é pi ligada al belumat siben che el paese el sonpie logà inte la Valsana.

Infrastruture e trasporti

L'autostrada pi d'arente l'é la A27: el casel pi visin de Folina l'é cuel de Vittorio Veneto Nord, che l'é lontan pi o manco 16 km.

La stacion dei treni pi d'arente l'é senpre logada a Vitorio: la é la omonima stacion, logada su par la linea Ponte-Conajan.

Aministracion

Sindaci dal 1995

Periodo		Primo citadin	Partido	Carica	Note
23 april 1995	13 duncj 1999	Renzo Tonin	Lista civica	Sindaco
13 duncj 1999	13 duncj 2004	Renzo Tonin	Centro-çanca	Sindaco
13 duncj 2004	7 duncj 2009	Marcello Tomasi	Lista civica	Sindaco
7 duncj 2009	25 majo 2014	Renzo Tonin	Lista civica	Sindaco
25 majo 2014	26 majo 2019	Mario Collet	Lista civica	Sindaco
26 majo 2019	10 duncj 2024	Mario Collet	Lista civica	Sindaco
10 duncj 2024	in carica	Paola Carniello	Lista civica	Sindaco

Gemelaji

• Wipfeld

Altri projeti

Altri progetti

• Wikimedia Commons

• Wikimedia Commons el detien imàjini o altri file so Fołina
• el detien schemi gràfeghi so