Caza

Ła caxa o ca' se intende na qualsiasi strutura fisa doperada in modo continuo dal on par pararse da i agenti atmosferici; de solito ła pol ospitar pì fameje e anca bestie. In part ła pol coresponder al conseto de unità abitativa conià dal Movimento moderno in architetura e ła ze stada inte ła storia al primo elemento fabricà, che al ze ndat a incider su el anbiente natural formando al anbiente costruì dei paess e de le cità.

Tipica casa italjana (quartier Garbatella, Roma)

Apartamenti a Firense

An ranch in California

Case in Inghiltera

Tipołozie[canbia | canbia el còdaxe]

Al cogol al ze la prima forma de casa riparada, scavada te la croda in seguito a fenomeni de erosion, pì che sia marina, fluvial o del gias.

La tenda, invese, la conpagna infin dal nasser al nomadismo del on e la esiste oncora in diverse forme.

Esenpio de capana

La capana, che la conpariss te el Neolitico, al inplica belche al progeto de architetura primitiva; al tipo pì elementar al ze an riparo costruì co i ran piegadi a arco e fissadi al teren par le do teste e quindi quatadi da frasche. Al tipo a cuba, invese, al ze pì conplesso e al gnen doperà anca dess da tanti popoi. I materiai i canbia secont al clima e la cultura de la zent: dal feltro dei Mongoi a la pel de bufalo dei Sioux al jaso par i igloo dei Inuit.

An tipo particolar de abitasion, anca sto qua del Neolitico, al ze costituì da le palafite, o sia da case de legn fate su piataforme sora l'aqua che le poja su pai, al scopo de difesa inte i loch de paluch.

Al uso del legn par le abitasion al ze comunque tipico de le aree boschive setentrionai e del estremo oriente, invese al uso del maton al contradistingue le arre meridionai e orientai.

La costrusion de mur de creda, sass e piere la ze scominsiada a la fin del Neolitico, te le grandi civiltà del Levante. Qua ga scominsià a gner fate sù case co na strutura che no gnerà pì canbiada te i secoi. Le ze par la gran part abitasion a uno o pì piani, co el quert pian che el serve a ciapar l'egua pioana.

Atualmente in Giapone le case le ze struturade par i taremot, par stotant le ze lidiere e mobili. La senplicità del aredamento, par de pì, la esprime al distacament tra la fameja e el mondo esterno, garanténdoghe a la casa al significà de un loch ideal de riposo.

Comunque va sotolineà che ten sta civiltà, come che al era stat anca ten quela Greca, la era scarsa la atension par la casa privata, par la gran part unifamiljar, e era potensiadi al massimo i edifici publici e coletivi, restadi come capolaori architetonici.

Storia[canbia | canbia el còdaxe]

De el IV secolo a.C. ga scominsià a difonderse tipi de case che i ricalca la formasion de la fameja come grupo autonomo. Infin dal Medioevo se cata tipi de abitasion monolocal. De solito le ze ingrumade una arent a que l'altra aformar quasi dei isolà. Ciapa piei cossì an model abitatiu estendest: da la Mesopotamia al Egito, da Creta a la Grecia.

Adeguandose al anbiente social e climatico, la abitasion mesopotamica la se ga svilupà dintorn de un cortiu interno desquert, dal qual se donde a i difarenti anbienti. Le zone le ze destingueste polito: al pian tera ga logo la vita dei omi, al pian sora viu le femene e i servi.

Al antico Egito invese al ga catà solusion abitative coletive in case comuni fate a pioi, fate sù co matoi grezi e paja, che a de le olte le costituia veri e propri quartier.

Par quel che reguarda la casa romana, derivada da la casa greca e da quela etrusca, la era destribuida dintorn de un o do cortii (atrium e peristilium) e la se dividea te na part adibida a la vita privata e te na part par la vita publica.

Co el Medioevo la ze tornada la abitasion unifamiljar, colegada anca a le atività produtive (magazin, boteghe) situade de solito al pian tera.

A esigense de difesa e de vita comunitaria respondea anca i monasteri nassesti durante al alt Medioevo, fondadi su la conpresensa de le abitasion (le celule dei monaci dintorn del chiostro), de la vita social e de la orasion (refetorio e cesa) e del laoro, principalmente agricol. Dintorn de ste struture entro poco e nassest anca comunità de abitanti.

De el Rinassiment, drio le tendense culturai del epoca, la casa la se ga configurà su el model de quela romana, co i cortii de sagoma retangolar o quadra; la residensa comune la se ga cenest del tipo unifamiljar e missiada a funsion comerciai.

La situasion no la ze canbiada durante la età baroca infin che, a partir da la fin del XVIII secolo, ga scominsià a nasser case plurifamiljari su pì piani, in risposta a le esigense de na popolasion urbana in aumento continuo. Dopo, co la rivolusion industrial, ze saltà fora al problema de la abitabilità par le masse che se spostea verso le cità.

La prima cità aonde che, durante al Otosento, se ga afermà an tipo de abitasion proletaria al ze stat Londra, co i cosideti slums. Siben che tuti i li descrive come monolocai poco igienici e pisoi, in realtà i era an pass in'ans par l' epoca parchè i cenea cont de tuti i bisogn dei abitanti che alora gnea reputadi necessari: par crear sti quartier prim de tut gnea organizà al teritorio co strumenti urbanistici, e le varie case le era dotade de an cesso, de un piol, de un giardinet aonde far smatedar i pupi e sugar i vestì. Le case inoltre le era dotade de camin conpagni de quei moderni in modo che la zent la esse podest scaldarse sensa ndar a ristcio de petarghe fogo a la casa.

Al problema abitatiu te la società de massa al ze stat afrontà te i primi ani del novesento da architeti del Modernismo. Deograsia de un cimento armà se pol far sù abitasion che le canbia in raporto a le esigense. Da qua anca al intaresse par la prefabricasion, che la consent la variabilità dei spasi e la costrusion svelta. La risolve , in parte, anca la richiesta de case par pochi schei ma tante olte la se cata a far i conti co na serta inconpatibilità anbiental e co ecosistemi e paesagi.

Tipi de casa[canbia | canbia el còdaxe]

Al model base de casa la ze quela unifamiljar, o sia an edificio adibì a la residensa de na unica fameja, casomai afiancada da spasi par al deposito de merci e machine o eventualmente de ricoveri par i animai. Al rapresentante pì infimo de sta categoria, che dess al ze in disuso, al ze al casin. Da sta tipołozia se pol passar a la vila, che la ze na casa unifamiljar particolarmente lussuosa co, tacadi o destacadi, na serie de edifici che i ghe ze funsionai, come depositi, staoi e alogi par la servitù. La presensa de fameje grande la ga portà a la formasion del cortiu, na specie de unità produtiva che la conprende una o pì fameje ligade da un vincol de parentado e tute le so atività produtive. Da la framentasion del cortiu, o pì da spess dal bisogn de sgrandar do case unifamiljari, o oncora da na progetasion fata a posteriori, pol nasser le case a stcera, aonde che ogni un al ze paron de un toco che al và da le fonde al quert. Se al partisionament al gnen fat in orizontal, se parla de apartamenti. Na costrusion che la supera an serto numero de apartamenti la gnen ciamada condominio, e, cressendo ancora, gratacielo. Par indicar an condominio o an palas tante olte se dopera la parola "residence".

La casa veneta in senso stret[canbia | canbia el còdaxe]

Da un punto de vista costrutiu la casa veneta la ze fata te la gran part dei casi a seti de mur a sass o matoi. Dopo la ultima guera ze nassest le prime case co la strutura portante de cimento armà e i mur de tanponament de matoi. Al involucro al ze quasi senpre scatolar. Spostandose verso al Nord del Veneto i mur i gnen doperadi senpre pì bassi, assàndoghe spasio al legn. Te le case tradisionai le finestre le ze pitost strete (ca. 90 cm) e le ga i scuri. A el primo pjan le pol esser quadre co le inferiade. I quert de solito i ze spioventi a do falde, dotadi da spess de luminer. Rilevante la ze la presensa te le case rurai dei pioi de legn, incastradi a mensola o pojadi a pilastri esterni, che i gnea doperadi par secar le panoce de sorch. Tipica la scala esterna de legn co la prima ranpa de piera. Le case citadine tradisionai le ze quele del Rinassiment, sensa pjoi e decorade par de fora. A el pjanteren le ga na rientransa fata a archi aonde che na olta i artigiani i se tirea par vender la so marcansia.

In quant a division del spasio abitatiu, coesiste tuti i modei visti prim. De solito in canpagna prevalea al cortiu e le vile. Da el sfaldament del cortiu nassea case a stcera. Dopo la guera ze calà forte al costo de le case, sichè ze nassest la tipołozia unifamiljar, che tante olte la gnen dividesta in apartamenti. Le ultime case che gnen fate sù le ze unifamiljari e pisole, e no le pol gner divideste in ulteriori unità abitative. De solito le ze larghe e basse, anca siben che le ocupa tanto spasio e le sfruta pedo al calor del riscaldament.

Stanse[canbia | canbia el còdaxe]

La casa moderna normalmente la ze senpre dividesta in pì anbienti mediante partision interne. La sielta e la disposision de ste qua la dipende essensialmente dal tipo de costrusion che se va a analizar. Quele che se cata senpre le ze la cosina (insieme o separada da la sala da pranzo), al bagno (anca se ten serti casi se cata oncora al cesso), una o pì canbere. Par aprofondir sto argomento al ze mejo consultar le voci colegade a sta pagina.

La "casa" in psicołozia e siense sociai[canbia | canbia el còdaxe]

La casa no la ze solche al posto fisico costruì e abità da i omi. La ze anca na representasion sinbolica doperada da spess in psicołozia. Difati, al livel psicologico fondo, la casa la va a costituirse come le fonde stesse de la vita psichica de un individuo, e par sto tanto al "esser a casa" al equival al "esser intieri a livel psicologico". Sto doperar la "casa" in senso metaforico al ze stat doperà da Renos K. Papadopoulos par la analisi e al tratament dei rifugiadi, i quai i se cata a esser tuti acomunadi sensa distinsion, pì che da un trauma, dal abandono doloross de la so casa e dal tentatiu de recuperarla. Secont le parole de Papadopoulos, «la casa no la ze solche an posto, ma anca al fass de sentimenti che ghe ze associà.» E essendo, par de pì, il posto aonde che i oposti i gnen fati coesister e aonde ceh i ze cenesti in equilibrio, o calmadi, la "casa" la va a definirse come la matrice stessa de la sojetività. La asion sinbolica realizada da la "casa" su la vita psichica dei individui la se riflet anca su quela social, ndando a representar an insieme che al riuniss, e in parte al sovrapone, tre setor: oltre che quel intrapsichico, anca quel interpersonal e quel sociopułìtego. De conseguensa, co se pers la "casa" se pers o se desfa anca le so funsion de organizasion e de conteniment e sto tanto al pol portar a la frantumasion dei tre livei: individual-personal, familjar-coniugal e socio-econòmego/cultural-pułìtego. La ze sta destruturasion che te i rifugiadi la porta, secont la analisi del Papadopoulos, al disorientament nostalgico.^[1]

An nantra funsion inportante de la casa la ze quela de fornir na base coerente a la storia de le fameje. Na storia che no la ga valor obietiu ma ch ela ordina e la rende coerente tuti i momenti che i individui i ga vivest, da quei pedo a quei mejo. ten sto modo i gnen fati esser conprensìbiłi a tuti e i dà, a i ator de quei stessi avegnimenti, an senso de continuità e prevedibilità.