Casa rural

Da Wikipedia, l'ençiclopedia libara.
Jump to navigation Jump to search
Sto articol al é scrit in belumat

La casa rural la è an conplesso de costružion adibide a casa, porteghi, cede, staoi e altre struture acessorie situada in canpagna.

Proprietà[canbia | canbia el còdexe]

Quei che i viu te la casa rural e i laora i teren dintorn incoi te la gran part de i casi i è paroi, ma infin a qualche diesina de ani fa i era coloni (ten sto caso la ciapa al nome de colonìa), e i laorea al fondo par cont de 'n paron dandoghe come afit na fražion de 'l racolt.

An caso particolar al era representà da le colonìe de 'l ospedal de Feltre te la zona de Polir (Žess), donade da 'n sior vertoluss de 'l posto e vendeste na diesina de ani fa.

Ten tuti e doi i casi la casa la è abitada da na fameja pitost slargada, aonde che comanda al pì vecio che al se destinguea parchè al ea sù le stcione.

Strutura[canbia | canbia el còdexe]

In età romana la casa rural a tuti i efeti no la esistea come che la intendon dess parchè a tuti i efeti la ghe somejea pì a na vila. la casa ligada a 'l fondo che on dess a quei ani la ghe somejea fursi pì a na capana pitost granda, o comunque a 'n edificio fat par la gran part de legn, canoi e paja. I animai e la đent i condividea al stesso spažio. Su 'l fenir de la epoca romana le proprietà pì pižole le à scominžià a pojarse par scopi difensivi a quele pì grande, dando origine a 'n sistema de paroi e coloni. Probabilmente su 'l fenir de 'l Medioevo la casa rural la à cognossest i primi canbiament, deventando de mur de sass e avendo na žerta division de 'l spažio abitatiu in modo da separar la abitažion da la atività. Na seconda metamorfosi se la à abuda co la introdužion de 'l sorch. Le prime qualità difati le ea problemi a inmadurir la panocia, sichè se à rendest indispensabile costruir case co pioi grandi oltadi a meodì par secar le panoce. De sta epoca è nassest le case rurai tipiche belumate, longhe e strete co na anpia facia a meodì. Al staol e i portreghi i podea esser arent a la casa e costituir an tut un, o senò i podea esser da la banda oposta. I pjoi i pol esser fati a mensola (stile feltrin) o cenesti sù da pilastri (stile belumat), e la scala la era rigorosamente esterna e co la prima ranpa de piera. Par querder al piol ghe n'era do solužion: quela che se cata pì da spess la consistea te 'l slongar al quert de la casa, ma qualche olta gnea fat an quertol aposta destacà da quel de la casa e co na pendenža diversa. Dopo la secona guera mondial la casa rural la è gnesta pì conpata e è sparì i tradižionai pjoi e la scala esterna. A 'l dì de incoi la casa de 'l contadin la è de solito unifamiljar e la è conpletamente destacada da 'l staol e da i locai de la atività agricola.

La casa rural tradižional se la è a ridoss de 'n paess la ciapa de le altre carateristiche identificative, e la so realtà la ciapa al nome de cortiu.

Varda anca[canbia | canbia el còdexe]