Staol
Al staol o stalón al ze an anbiente quert e serà su tuti quatro i lati aonde che gnen cenest le bestie, in particolar le vache, ma anca le Sede e le caore.
De solito al ze ligà a altri edifici (case o casere) e a un teren (come te el caso de la majolera). No manca comunque le ecesion, come i staoi moderni e serti del passà aonde che al teren al pol esser distante o aderetura no esserghen.
Al staol de la casa rural
[canbia | canbia el còdaxe]Te la casa rural de solito al ze tacà a la casa. te el cortiu pol valer la stessa regola o senò al pol ciapar la part manco insolada insieme dei porteghi aonde che gnen cenest i machinari. Normalmente al spasio sora al staol al gnen doperà come fjenil. De solito al ze fat de seti murari de sass. Al fjenil al pol er la stessa strutura (però co finestroi grandi par assar passar l'aria) o senò al pol esser fat sù a pilastri. I mur, se i ze de tanpponament, i pol er tuta la serie de buss par ariedar al fjen. Resta da dir che te la part alta de la provincia de Belun i fjenii i ze de legn. Al staol tradisional al ga na porta pitost granda, de solito a do ante.le finestre le ze pisole e qualche olta sensa vieri. La pavimentasion la ze de codolà e raramente de matonele. Aonde che resta al cul de le vache ghe n'è an buss che se ciama foss aonde che gnen ingrumà la grassa, la pessina e le foje doperade par starnir. Arent al mur ghe n'è la cripia aonde che che gnen dat da magnar a le vache. A el tolon de la cripia gnen ligà le vache co na cadena. Par evitar che le vache le se cate da dir par al magnar le gnen divideste a doi a doi co un divisorio de tole. Serti staoi veci i ga la cripia fata da na griglia de legn sù alta in modo le le vache par magnar ghe toche slongar al col. Ten sta maniera no le grata i corn sù par al mur e no le se porta via al magnar. Par bere le vache le gnea portade te na posa o te na fontana fora del staol. Co la introdusion dei aquedoti se ga podest dotar le cripie de abeveratoi. A separar al staol dal fjenil pol esserghe na cuba de sass o na soleta de legn co i trau pojadi te i murjoi. Serti soler i ze stati rinpjasadi da le solete de ciment e matoi. Pena sot la ciusura orizontal gnea fat un o pì buss te el mur par crear an rigiro de aria in modo da limitar la condensa. De istà la porta la gnen assada verta par rafredar al staol e par assar che le sesile le ndae a far al nit de entro. Sti osei i ze inportanti parchè i magna tanti biss e anca le mosche che beca le vache. Na costrusion ligada al staol quasi senpre presente la ze la concimaja.
Al staol de la majolera
[canbia | canbia el còdaxe]Te el caso de na majolera al staol de solito al ze destacà da la casera. Ten sto caso co la parola "staol" se gnen a indicar tut al stabile costituì dal staol vero e proprio e dal fjenil. De solito manca la concimaja. Se el staol al ze vert su el lato e no el ga al fjenil al ciapa al nome de pendana.
Al staol modern
[canbia | canbia el còdaxe]Al staol modern al gnen fat sù distante da le abitasion par motivi igienici e giuridici. De solito al se svilupa su un unico pjan e al ze fat sù co na strutura portante de cimento armà e mur de tanponament de vario tipo. Colegadi al staol gh en'è la sala de mungitura, silos, altri depositi de roba da magnar par le vache (ceroso e bale de fjen) e la concimaja. La porta la ze granda assei da far passar an trator e le finestre le ze grande par garantir na bona aerasion de istà. La pavimentasjon la ze de piastrele o industrial, e te el paviment ghe n'è do buss par ogni fila de vache: un drio al cul (al foss) e un davanti a la testa (che el serve da cripia). Le bestie le ze fissade a na strutura de fer zingà. Le vache no le gnen starnide co le foje o co el starun ma co la paja. Esiste aderetura staoi aonde che le vache le se buta do su un tapeto de plastica. La grassa dal foss la gnen portada te la concimaj adiretamente da nastri trasportadori. Te i ultimi staoi i animai no i ze gnanca pì ligadi, ma i pol moerse liberi come che i ol, ndar a striarse su spasole rotanti e ndar a farse molder te na machina automàtega quando che i ol. Par evitar al fenomeno fastidioss de le mosche no se ricor pì a le sesile ma a i desinfetanti chimici. Serti staoi i ga aderetura an sistema automatizà par darghe da magnar a le bestie.