Caxa

Da Wikipedia, l'ençiclopedia libara.
Va a: navigasion, serca
Da tradure
Sta pajina o sexion ła xè sta parsialmente tradota da ła łengua itałiana
Te pui contribuir finendo ła tradusion o doparando altre fonti. Nó sta doparar programi de tradusion automatega. Dopara Tradoto da có te ghe finio.
Se inte ła pajina de modifega te cati del testo sconto, controła che el sia ajornà servendote dei cołegamenti a łe «altre łengue» en fondo a ła cołona de sinistra.
No babelfish.svg


Par casa se intende na qualsiasi strutura fissa doperada in modo continuo da 'l on par pararse da i agenti atmosferici; de solito la pol ospitar pì fameje e anca animai. In part la pol coresponder a 'l conceto de unità abitativa conià da 'l Movimento moderno in architetura e la è stata te la storia al primo elemento fabricà, che al è ndat a incider su 'l anbiente natural formando al anbiente costruì de i paess e de le cità.

Tipica casa italjana (quartier Garbatella, Roma)
An ranch in California
Case in Inghiltera

Tipologie[canbia | canbia sorxente]

Al cogol al è la prima forma de casa riparada, scavada te la croda in seguito a fenomeni de erosion, pì che sia marina, fluvial o de 'l giaž.

La tenda, inveže, la conpagna infin da 'l nasser al nomadismo de 'l on e la esiste ancora in diverse forme.

Esenpio de capana

La capana, che la conpariss te 'l Neolitico, al inplica belche al progeto de architetura primitiva; al tipo pì elementar al è an riparo costruì co i ran piegadi a arco e fissadi a 'l teren par le do teste e quindi quatadi da frasche. Al tipo a cuba, inveže, al è pì conplesso e al gnen doperà anca dess da tanti popoi. I materiai i canbia secont al clima e la cultura de la đent: da 'l feltro de i Mongoi a la pel de bufalo de i Sioux a 'l giaž par i igloo de i Inuit.

An tipo particolar de abitažion, anca sto qua de 'l Neolitico, al è costituì da le palafite, cioè da case de legn fate su piataforme sora l'aqua che le poja su pai, a 'l scopo de difesa inte i loch de paluch.

Al uso de 'l legn par le abitažion al è comunque tipico de le aree boschive setentrionai e de 'l estremo oriente, inveže al uso de 'l maton al contradistingue le arre meridionai e orientai.

La costružion de mur de creda, sass e piere la è scominžiada a la fin de 'l Neolitico, te le grandi civiltà de 'l Levante. Qua à scominžià a gner fate sù case co na strutura che no gnerà pì canbiada te i secoi. Le è par la gran part abitažion a uno o pì piani, co 'l quert pian che 'l serve a ciapar l'egua pioana.

Atualmente in Giapone le case le è struturade par i taremot, par stotant le è lidiere e mobili. La senplicità de 'l aredamento, par de pì, la esprime al distacament tra la fameja e 'l mondo esterno, garantendoghe a la casa al significà de 'n loch ideal de riposo.

Comunque va sotolineà che ten sta civiltà, come che al era stat anca ten quela Greca, la era scarsa la atenžion par la casa privata, par la gran part unifamiljar, e era potenžiadi a 'l massimo i edifici publici e coletivi, restadi come capolaori architetonici.

Storia[canbia | canbia sorxente]

De 'l IV secolo a.C. à scominžià a difonderse tipi de case che i ricalca la formažion de la fameja come grupo autonomo. Infin da 'l Medioevo se cata tipi de abitažion monolocal. De solito le è ingrumade una arent a que l'altra aformar quasi de i isolà. Ciapa piei cossì an model abitatiu estendest: da la Mesopotamia a 'l Egito, da Creta a la Grecia.

Adeguandose a 'l anbiente social e climatico, la abitažion mesopotamica la se à svilupà dintorn de 'n cortiu interno desquert, da 'l qual se donde a i diversi anbienti. Le zone le è destingueste polito: a 'l pian tera à logo la vita de i omi, a 'l pian sora viu le femene e i servi.

Al antico Egito inveže al à catà solužion abitative coletive in case comuni fate a pioi, fate sù co matoi gređi e paja, che a de le olte le costituia veri e propri quartier.

Par quel che reguarda la casa romana, derivada da la casa greca e da quela etrusca, la era destribuida dintorn de un o do cortii (atrium e peristilium) e la se dividea te na part adibida a la vita privata e te na part par la vita publica.

Co 'l Medioevo la è tornada la abitažion unifamiljar, colegada anca a le atività produtive (magazin, boteghe) situade de solito a 'l pian tera.

A esigenže de difesa e de vita comunitaria respondea anca i monasteri nassesti durante al alt Medioevo, fondadi su la conpresenža de le abitažion (le celule de i monaci dintorn de 'l chiostro), de la vita social e de la oražion (refetorio e cesa) e de 'l laoro, principalmente agricol. Dintorn de ste struture entro poch e nassest anca comunità de abitanti.

De 'l Rinassiment, drio le tendenže culturai de 'l epoca, la casa la se à configurà su 'l model de quela romana, co i cortii de sagoma retangolar o quadra; la residenža comune la se à cenest de 'l tipo unifamiljar e missiada a funžion comerciai.

La situažion no la è canbiada durante la età baroca infin che, a partir da la fin de 'l XVIII secolo, à scominžià a nasser case plurifamiljari su pì piani, in risposta a le esigenže de na popolažion urbana in aumento continuo. Dopo, co la rivolužion industrial, è saltà fora al problema de la abitabilità par le masse che se spostea verso le cità.

La prima cità aonde che, durante al Otožento, se à afermà an tipo de abitažion proletaria al è stat Londra, co i cosideti slums. Siben che tuti i li descrive come monolocai poch igienici e pižoi, in realtà i era an pass in'anž par l' epoca parchè i cenea cont de tuti i bisogn de i abitanti che alora gnea reputadi necessari: par crear sti quartier prim de tut gnea organizà al teritorio co strumenti urbanistici, e le varie case le era dotade de an cesso, de 'n piol, de 'n giardinet aonde far smatedar i pupi e sugar i vestì. Le case inoltre le era dotade de camin conpagni de quei moderni in modo che la đent la esse podest scaldarse senža ndar a ristcio de petarghe fogo a la casa.

Al problema abitatiu te la società de massa al è stat afrontà te i primi ani de 'l novežento da architeti de 'l Modernismo. Deogražia de 'n cimento armà se pol far sù abitažion che le canbia in raporto a le esigenže. Da qua anca al intaresse par la prefabricažion, che la consent la variabilità de i spaži e la costružion svelta. La risolve , in parte, anca la richiesta de case par pochi schei ma tante olte la se cata a far i conti co na žerta inconpatibilità anbiental e co ecosistemi e paesagi.

Tipi de casa[canbia | canbia sorxente]

Al model base de casa la è quela unifamiljar, cioè an edificio adibì a la residenža de na unica fameja, casomai afiancada da spaži par al deposito de merci e machine o eventualmente de ricoveri par i animai. Al rapresentante pì infimo de sta categoria, che dess al è in disuso, al è al casin. Da sta tipologia se pol passar a la vila, che la è na casa unifamiljar particolarmente lussuosa co, tacadi o destacadi, na serie de edifici che i ghe è funžionai, come depositi, staoi e alogi par la servitù. La presenža de fameje grande la à portà a la formažion de 'l cortiu, na specie de unità produtiva che la conprende una o pì fameje ligade da 'n vincol de parentado e tute le so atività produtive. Da la framentažion de 'l cortiu, o pì da spess da 'l bisogn de sgrandar do case unifamiljari, o ancora da na progetažion fata a posteriori, pol nasser le case a stcera, aonde che ogni un al è paron de 'n toch che al và da le fonde a 'l quert. Se al partižionament al gnen fat in orizontal, se parla de apartamenti. Na costružion che la supera an žerto numero de apartamenti la gnen ciamada condominio, e, cressendo ancora, gratacielo. Par indicar an condominio o an palaž tante olte se dopera la parola "residence".

La casa veneta in senso stret[canbia | canbia sorxente]

Da 'n punto de vista costrutiu la casa veneta la è fata te la gran part de i casi a seti de mur a sass o matoi. Dopo la ultima guera è nassest le prime case co la strutura portante de cimento armà e i mur de tanponament de matoi. Al involucro al è quasi senpre scatolar. Spostandose verso al Nord de 'l Veneto i mur i gnen doperadi senpre pì bassi, assandoghe spažio a 'l legn. Te le case tradižionai le finestre le è pitost strete (ca. 90 cm) e le à i scuri. A 'l primo pjan le pol esser quadre co le inferiade. I quert de solito i è spioventi a do falde, dotadi da spess de luminer. Rilevante la è la presenža te le case rurai de i pioi de legn, incastradi a mensola o pojadi a pilastri esterni, che i gnea doperadi par secar le panoce de sorch. Tipica la scala esterna de legn co la prima ranpa de piera. Le case citadine tradižionai le è quele de 'l Rinassiment, senža pjoi e decorade par de fora. A 'l pjanteren le à na rientranža fata a archi aonde che na olta i artigiani i se tirea par vender la so marcanžia.

In quant a division de 'l spažio abitatiu, coesiste tuti i modei visti prim. De solito in canpagna prevalea al cortiu e le vile. Da 'l sfaldament de 'l cortiu nassea case a stcera. Dopo la guera è calà forte al costo de le case, sichè è nassest la tipologia unifamiljar, che tante olte la gnen dividesta in apartamenti. Le ultime case che gnen fate sù le è unifamiljari e pižole, e no le pol gner divideste in ulteriori unità abitative. De solito le è larghe e basse, anca siben che le ocupa tant spažio e le sfruta pedo al calor de 'l riscaldament.

Stanže[canbia | canbia sorxente]

La casa moderna normalmente la è senpre dividesta in pì anbienti mediante partižion interne. La sielta e la disposižion de ste qua la dipende essenžialmente da 'l tipo de costružion che se va a analizar. Quele che se cata senpre le è la cosina (insieme o separada da la sala da pranđo), al bagno (anca se ten žerti casi se cata ancora al cesso), una o pì canbere. Par aprofondir sto argomento al è mejo consultar le voci colegade a sta pagina.

La "casa" in psicologia e sienže sociai[canbia | canbia sorxente]

La casa no la è solche al posto fisico costruì e abità da i omi. La è anca na representažion sinbolica doperada da spess in psicologia. Difati, a 'l livel psicologico fondo, la casa la va a costituirse come le fonde stesse de la vita psichica de 'n individuo, e par sto tant al "esser a casa" al equival a 'l "esser intieri a livel psicologico". Sto doperar la "casa" in senso metaforico al è stat doperà da Renos K. Papadopoulos par la analisi e al tratament de i rifugiadi, i quai i se cata a esser tuti acomunadi senža distinžion, pì che da 'n trauma, da 'l abandono doloross de la so casa e da 'l tentatiu de recuperarla. Secont le parole de Papadopoulos, «la casa no la è solche an posto, ma anca al fass de sentimenti che ghe è associà.» E essendo, par de pì, il posto aonde che i oposti i gnen fati coesister e aonde ceh i è cenesti in equilibrio, o calmadi, la "casa" la va a definirse come la matrice stessa de la sojetività. La ažion sinbolica realizada da la "casa" su la vita psichica de i individui la se riflet anca su quela social, ndando a representar an insieme che al riuniss, e in parte al sovrapone, tre setor: oltre che quel intrapsichico, anca quel interpersonal e quel sociopolitico. De conseguenža, co se perž la "casa" se perž o se desfa anca le so funžion de organizažion e de conteniment e sto tant al pol portar a la frantumažion de i tre livei: individual-personal, familjar-coniugal e socio-economico/cultural-politico. La è sta destruturažion che te i rifugiadi la porta, secont la analisi de 'l Papadopoulos, a 'l disorientament nostalgico.[1]

An nantra funžion inportante de la casa la è quela de fornir na base coerente a la storia de le fameje. Na storia che no la à valor obietiu ma ch ela ordina e la rende coerente tuti i momenti che i individui i à vivest, da quei pedo a quei mejo. ten sto modo i gnen fati esser conprensibili a tuti e i dà, a i ator de quei stessi eventi, an senso de continuità e prevedibilità.

Varda anca[canbia | canbia sorxente]

Note[canbia | canbia sorxente]

  1. K.R Papadopoulos (a cura di). L'assistenza terapeutica ai rifugiati. Roma, Edizioni Magi, 2006.

Altri progeti[canbia | canbia sorxente]


Colegamenti foresti[canbia | canbia sorxente]