Thabo Mbeki

Da Wikipedia, l'ençiclopedia libara.
Va a: navigasion, serca
Thabo Mvuyelwa Mbeki

Thabo Mvuyelwa Mbeki el xe el Presidente del Sudafrica. El xe el secondo presidente da la fine de l’apartheid.

Infansia[canbia | canbia sorxente]

Thabo Mbeki, on xhosa, el xe el fiol de Govan Mbeki (1910-2001) ono de i primi menbri de el Congreso Nasional Africano (ANC) e del Partito Comunista del Sudafrica. Mbeki el ga studià a Lovedale e a Umtata. A quatordesani el zoino Thabo el xe entrà en te l’ANC. Dopo la scola, el xe ndà a vivare a Johannesburg do el laoraa co Walter Sisulu, ono de i capi de l’ANC. Co la polisia la ga arestà Nelson Mandela e so pare, Mbeki el xe stà mandà a l’estero da i dirigenti de l’ANC. El starà en esilio par 28 ani.

Esilio[canbia | canbia sorxente]

Mbeki el ga visù en Inghiltera par studiar economia a l’Università del Sussex. El xe anca ndà en te l’Union Sovietica par far la preparasion militare. El ga anca visù en Botswana, Swaziland e Nigeria. Ma el so laoro prinsipale el xe stà a la baxe de l’ANC a Lusaka, en Zanbia. Mbeki el ga scominsià de i programi radio da Lusaka en tel 1976, dopo i fati de Soweto. I programi i mirava a tegnar unii i ativisti en Sudafrica par darghe na diresion unical a le atività de l’ANC. En tel 1984 Mbeki el xe stà nomenà capo del dipartimento de l’informasion de l’ANC, par pasar al dipartimento de le atività internasionali en tel 1989. En sto ultimo ruolo el xera sotoposto solo a l’autorità de Oliver <tambo, presidente de l’ANC. Mentre chel xera en esilio, so fradel Jama Mbeki el xe stà copà da emisari del governo del Lesotho en tel 1982, e so fiol Kwanda el xe stà copà co el provava a lasar el Sudafrica par ndar da so pare. En tel 1985 Mbeki el xera el capo de la delegasion che la ga incontrà i rapresentanti de la comunità finansiaria del Sudafrica. E en tel 1989, el ga direto i coloqui co el governo de Pretoria. Al so ritorno da l’esilio, Mbeki el xe diventà el vice-presidente del Sudafrica soto Nelson Mandela. En tel disenbre 1997 el xe diventà presidente de l’ANC e en tel giunio 1999 presidnete del Sudafrica.

Politego[canbia | canbia sorxente]

Mbeki durante on comisio

Thabo Mbeki el xe preso diventà ona de le figure pi inportanti de la politega africana. El ga participà a vari dialoghi de pace internasionali (co el Ruanda, Burundi, Costa d’Avorio e la Republica Democratica del Congo), e el xe stà a capo de l’Union Africana e de altri organismi africani. En te la politega nasionale, Mbeki el senbra esar on conservatore che ama insegnarghe a i so dirigenti traverso i articoli chel scrive par el boletin de l’ANC. Mbeki el preferise parlar a la gente traverso el giornal de l’ANC che no usando altri mass media. El ghe piase navigar en internet, e speso el sita quell chel lexe so i siti chel visita. Le so carateristiche de omo e de politego, da na parte i lo mete rente de la zente, che no la vol sentir politeghi masa dificili, da l’altra i lo espone al ridicolo. Mbeki el ga sostegnù che l’AIDS no la xe causada da el virus HIV. La question de l’AIDS el lo ga fato pasar par mato (el 18% de isudafricani i ga l’AIDS o i xe HIV positivi) e i so colaboratori i ga fategà non poco par metare la storia a tasar. Anca so la situasion en Zinbabwe Mbeki el ga mostrà na mancansa de giudisio. El continua a sostegnar che bisogna fare picoli pasi par arivar al canbiamento. Mbeki el sostien che el Zinbabwe el ga jutà l’ANC al tenpo de la lota contro l’apartheid, e che deso el Sudafrica el ga da jutare el presidente Mugabe. El se desmentega de dire che i zinbabweani i ga jutà el Sudafrica e che deso el saria ora che el Sudafrica el aiutase i zinbabweani.

Lote interne[canbia | canbia sorxente]

Zuma[canbia | canbia sorxente]

El primo vice-presidente de Thabo Mbeki, Jacob Zuma, el xe stà acusà de corusion e de verghe stuprà na dona. Mbeki el ga parà via Zuma dal governo (2005). Zuma el xe stà catà inosente de lo stupro, visto che el giudice el ga riconosù che la dona la xera consensiente. Zuma el ga ancora da diffendarse da le acuse de corusion.

Crisi energetica[canbia | canbia sorxente]

Dopo ani de problemi energetici en te la region del Capo, el governo el sa catà costreto a introdure el rasionamento de l’energia eletrica en tuto el paexe dal genaro 2008. Alcune miniere le ga serà par la mancansa de energia. La crisi la xe dovuda a la cresita de la doamnda – co varie sità colegade a la rete nasionale dopo la fine de l’apartheid – e la mancansa de nove sentrali. La Eskom – la conpagnia de profusion eletrica – la ga speso domandà nove sentrali en te i ltimi diexe ani, ma el governo nol ga scoltà.

Criminalità[canbia | canbia sorxente]

Da ani i sudafricani i se lamenta de la criminalità. El taso de criminalità el xe sempre stà alto tra la popolasion nera, mentre el xera inesistente tra i bianchi. Ancò la criminalità no la conose confini. Mbeki el se ga rabià co i giornalisti che parla de criminalità parché el dixe che el governo el sta laorando e che el livel el xe en diminusion. La verità (sostegnuda anca dal Grupo de Revision de i Capi de Stato Africani – Peer Revision Committee) la xe che el Sudafrica el ga pi de 50 omicidi al giorno e na violensa sesuale ogni trenta secondi.

Futuro[canbia | canbia sorxente]

Mbeki el sta servendo el so secondo mandato da presidente, e el dovarà lasar el osto al so sucesor a la fine de sto mandato. En tel 2007, durante la campagna par l’elesion del presidente de l’ANC, el se sa candidà par la tersa olta. El 18 disenbre 2007 el ga perso el voto finale mentre che Jacob Zuma el xe diventà el novo presidente, metendo na ipoteca so la so candidatura par la presidensa del Sudafrica.