Giovanni Battista Belzoni

Da Wikipedia, ła ençiclopedia lìbara.

Giovanni Battista Belzoni (Padoa, 15 novembre 1778 - Nigeria, 3 dicembre 1823) el xe sta un esplorador veneto e pioniere de l'archiologia. El xe ritegnudo uno dei primi egitologi.

El xera nato a Padoa al tenpo de la Republica Veneta, ma nel 1803, par evitar de vegner aruolà ne l'esercito de Napoleon, el xe scapà in Inghiltera, dove el se mantegnea fasendo l'"uomo forzuto" in un circo (l'era un mauton grando e grosso, alto du metri e forte come un toro). Dopo ver viajà un fià par l'Europa, el xe rivà in Egito, dove el ga scominzià a interesarse de archiologia. Tra le so varie scoperte, in pochi ani el ga riportà a la luce el tenpio de Abu Simbel, el ga descoverto la zità de Berenice, el ga esplorà la Valle dei Re catando la tonba de Seti I, una de le pi bele de la val, e el ga catà l'ingresso a la piramide de Chefren, tuto questo portando a Londra un mucio de reperti.

Tornà in Inghiltera nel 1819, el ga scrito e publicà le so memorie, dove el contava tute le so grandi descoverte. El xe morto de disenteria nel 1823 in Nigeria, vizin a Timbuctù, finché el xera drio pareciar na spedizion par ndar in zerca de le sorgenti del Nilo.