Val Pozina
rimandamento da Val Poxina
  | ||||
| ||||
|
| ||||
Ła Val Poxina ła xe na vałe de łe Prealpi Venete, tuta in Veneto, provinça de Vicensa.
Ła ciapa el nome dal fiume Posina, ke'l nase poco soto el paso de ła Borcoła (1200 m), ke divide el Pasubio a ovest dal monte Borcołeta a est. Da qua ła core verso est, sud-est, par finire 'nteła Valdastego ad Arsiero. Suła destra idrografica ła xe sarà dal Pasubio, dal Monte Alba e dal Novegno ke i ła divide da ła Val Leogra e da ła pianura, suła sinistra el Monte Borcołeta, el Coston, el Monte Majo, ła Gamonda i ła tien distinta da ła Val de Laghi. I cołegamenti coła Val Teragnoło (Trentin) e ła Val Leogra i xe costituidi rispetivamente dal Paso de ła Borcoła e dal Paso Xomo.
Dopo aver pasà i paesi de Poxina e de Fusine, el fiume, a Castana, el riceve, da sinistra, el torente Zara (confluensa de ła Val de Laghi, ke in keł'ultimo trato ła se ciama Val del Fero). Pi vanti ła vałe se strenxe in na goła skisà da sud dal Monte Priaforà (el posto se ciama Strenta). Dopo de questa, senpre da sinistra, ghe xe ła confluensa de ła Val Riofredo in locałità Cornołò. Pi vanti, dopo naltra parte pitosto streta (Stancari), ła vałe ła sboca ad Arsiero 'nteła Valdastego.
Flora[canbia | canbia el còdaxe]
Ła Val Posina, co 2000–2500 mm de precipitasion ogni ano, ła xe verdisima e piena de pra e albari. Se trova el castagno, el cornołaro, el noxełaro, el carpano moro, el fràsene, el ròare, el fagaro. A quote pi alte se trova el pino, ł'albeo, el tana, el larese, el pino mugo, el xenevro. Sui pra e tacà łe contrà se trova bar de lanpon, ruse, lovertin,stropaculi, ortighe, el pisacan, ła maresina, ła pianeła de ła Madona e el ciclamin.
Sul Pasubio se trova el rododendro, ła gensiana e ła steła alpina.
Fauna[canbia | canbia el còdaxe]
Mamìferi[canbia | canbia el còdaxe]
Fra i mamìferi selvadeghi, va ricordà el camosio, el caoriol, el cervo, ła volpe, el ghiro, el cinghiałe, el martareło, el liévore, el schirato, ła marmota ( Val sorapache sul Pasubio, acròcoro in sima al Novegno).
Oxełi[canbia | canbia el còdaxe]
Fra i oxełi, se pol vedare ł'aquila real, ła cornacia, ła pojana, el gavinel, el galo sedron (Pasubio, cresta Monte Borcołeta - Coston), el francolin, ła pernixa bianca (Pasubio: Forni alti), ła soèta, el corvo inperial, el pigoso moro.
Bisi[canbia | canbia el còdaxe]
Fra i bisi ghe xe el carbonaso e ła vipera.
Pesi[canbia | canbia el còdaxe]
'Ntełe aque del Posina se pesca ła trota fario e el marsón.