Maresina

Da Wikipedia, l'ençiclopedia libara.
Va a: navigasion, serca
Nuvola apps bug2.svg
Maresina
Tanacetum parthenium0.jpg
Na pianta de maresina
Clasificasion sientìfega
Regno: Plantae
Divixion: Magnoliophyta
Clase: Magnoliopsida
Órdene: Asterales
Fameja: Asteraceae
Gènare: Tanacetum
Spece: T. parthenium
Nomenclatura binomiałe
Tanacetum parthenium
(L.) Sch.Bip., 1844
Sinonimi
Matricaria parthenium (L.)
Segui el Projeto Fórme de vita


La maresìna ła xe na pianta (nome sientifego Tanacetum parthenium) deła fameja dełe Compositae o Asteraceae. In inglese ła se ciama feverfew, in todesco Mutterkraut, in taljan matricale o partenio. Ła xe na pianta erbàsea perene, on mucio aromàtega al strucarse, ga foje de contorno ełìtego, fin a 8 cm de łonghesa. Ła se uxa par redure fiebre (varda el nome inglese), tratar dołor de suca, artriti, problemi dijestivi. Na volta ła se doparava par i dolori dełe mestruasion (da qua el nome in todesco e in taljan). Rexentemente ła se ga utilixà par ła cura de ła pełe.

Ła vive specie in alta cołina; conosuda e doparà in cuxina in Val Cianpo e Valdagno, 'ntel Vixentin, ma anca 'ntel Veronexe, sui Lesini e in pianura.

Magnari fati coła maresìna[canbia | canbia sorxente]

Fritołe coła maresìna[canbia | canbia sorxente]

Preparare na pasteła de farina bianca, late, aqua, sałe e na s-cianta de sucaro. Fate łe fritołe, łe se fa desfrizare metendoghe sora, tajà a toketi, una o do foje de maresìna su ogni fritoła xa 'ntel ojo de bojo. Se tira fora łe fritołe, łe se fa sgiosare e sugare su na carta asorbente. Se pol butarghe sora un poco de sucaro semołado e łe se magna subito finke łe xe calde.

Dolxe a ła maresìna[canbia | canbia sorxente]

Ghe vol: 120 g de sucaro semołà, 100 g de fecoła de patate, 10-12 foje freske trità de maresìna, 3 ovi intieri, 50 g de buro, 2 cuciari de graspa, ła scorsa xała gratà de 1 limon, 1 cuciarin de lievito in polvere par dolxi. Mis-ciar ben el sucaro col buro e i rosi dei ovi, xontarghe ła fecoła de patate, ła graspa, el limon e łe foje de maresìna trità. Sbatere łe 3 ciare de ovo e xontarle al paston; ała fine meterghe anca el lievito e versare in na forma da forno e cuxinare a 200° par mexora.

Bigoli coła maresìna[canbia | canbia sorxente]

Far infiapare pian pian in ojo de oliva veneto tanta séola e scałogno tajà a fetełe fine fine, xontarghe qualke giosa de axedo de vin bianco, un mestoło de brodo de połastro e bagnar col vin Dureło. Far bojere par mexora e dopo xontarghe raquante foje de maresìna e qualke toketo de sarda sałada, lasar cuxinar ancora par pochi minuti e dopo pasar tuto pal pasaverdure col disco pi fino. Se buta sta salsa sui bigoli e se ghe grata sora formajo Asiago d'ałevo.