One Piece

Da Wikipedia, l'ençiclopedia libara.
Va a: navigasion, serca
'Sto artìcoło el 'é scrito doparando ła grafìa dita DECA
Covertine de i primi du nùmari orizenałi de l'edision itałiana de One Piece
« A ghe ze robe che no łe sarà mai fermàe: na vołontà ereditada, i sonji de łe parsone e’l pasajo da na era a chełaltra. Fin cuande che ła zente ła gavarà sé de łibartà, ‘ste robe łe durarà par senpre »
(Gol D. Roger - el Re de i Pirati))


One Piece (ONE PIECE - ワンピース Wan Pīsu) el ze un manga scrito e dizenjà da’l mistro japoneze Eiichirō Oda, tut’ora in corso de pubregasion. Co’l tèrmene manga, in tuto ‘l mondo, A se intende i fumeti pubregài solche in Japon, siben che ‘sta paroła in łengua japoneze ła gapia el sinjifegà zenèrego de “fumeto”. Pubregà ła prima ‘olta inte’l ano 1997, rento ła revista japoneze Weekly Shōnen Jump, One Piece ła ze una de łe pì łonghe tra łe serie manga fin deso pubregàe e, pa'l dèsemo ano consecudivo, el se conferma inte'l 2017 cofà el manga pì vendùo in tuto el Japon [1]. Par de pì ‘sto manga chive inte’l ano 2015 el ze entrà inte’l Guiness de i Primadi par èsar ła serie a fumeti (dizenjà solche da un autor) co’l pì grando nùmaro de copie pubregàe: a’l 4 de desenbre 2014 i ga rejistrà 320.866.000 copie [2]. A partir da’l ano 2001 vien pubregada na edision in łengua itałiana da ła caza de edision Star Comics.

A partir da’l 1999 One Piece el ze deventà anca un anime, a dir na serie animada pa’ ła televizion, prodoto da’l studio de animasion japoneze Toei Animation. L’emitente Italia 1 ła ga scumisìa a mandarlo in onda su i só canałi a partir da’l ano 2001. Par de pì ła Toei Animation ła ga produzesto 11 spesiałi tełevizivi, 13 film pa’l sìnema, do cortometraji 3D, un ONA e un OAV (che łe ze edision pa’l marcà home video). Asè zviłupà e fiorente ze el marcà łigà a i zogàtułi, a i videozughi e a tuti i prodoti che a coełi A ghe vien petà chel nome.

Trama[canbia | canbia el còdexe]

« El me tezoro...? Se ło vułì, el ze vostro... A gavì da sercarlo! Mi A go łasà tuto inte un serto posto. »
(Gol D. Roger - el Re de i Pirati)

Ła storia de One Piece ła scumisia co ‘sta fraze pronunsiada da’l "Re de i Pirati" Gol D. Roger poco prima de èsar justisìa da ła Marina inte’l patìboło de ezecusion: in cheła ocazion Roger el conferma l’ezistensa de’l tezoro ciamà purpio One Piece e, dizendo cusì, el scaena ła cusidita "Era de ła Piratarìa". Siben che ła storia de’l manga ła ciapa rento un stramaro de parsonaji e de situasion A se pol dir che’l protagonista asołuto de l’òpara el ze un tozatel de njanca vinti ani che’l se ciama Monkey D. Luffy. Ła narasion ła scumisia co łu che’l ciapa el mar pa’ ła prima ‘olta in serca de’l mìtego tezoro One Piece. A partir da i primi capìtułi Luffy el scumisia a catar vari conpanji de aventura, tuti cuanti co na abiłità partegołare, che i ndarà a costituir ła Ciurma de’l Capel de Paja (Mugiwara in orizenałe japoneze), ciamà cusì purpio in onor de’l capel de paja che Luffy el ga indoso sin da’l primo epizodio. Daspò de vinti ani de pubregasion regołare njancura no se sa mìa che cosa che’l sipia el tezoro One Piece, siben che ła só ezistensa ła ze stà confarmada da Gol D. Roger e anca da n’altro strainportante pirata ciamà Barbabianca. Roger el ze stà ciamà “Re de i Pirati” parché, co ła só ciurma, el ze stà el primo a concuistar tuta ła Łinea Granda. A'l ponto de ła narasion che’l coresponde a’l vołume n°82 A savemo che Luffy e i primi menbri de ła ciurma i ze partii da’l Mar Orientałe, i ze entrài inte ła Łinea Granda, i ga traversà tuta la prima parte anca dita el Paradizo ciapando rento man man altri menbri, fin che i ze stài sconfiti inte un scontro contra de ła Marina na ‘olta che i jera rivài a’l confin con ła Łinea Rosa, pronti par pasar inte’l Mondo Novo. A sèito de ciò i ze stài sparpanjài in jiro pa’l mondo per du ani, par poderse cusì arlenar e mejorar. Daspò de el salto de du ani, e de i avenimenti de ła Bataja Granda de Marineford, i Mugiwara i se ga catà tuti insenbre pa retornar a navegar inte'l Mondo Novo. Chive i ga vuo ocazion de scontrarse co’l pirata Don Quijote Do Flamingo (ex de i Sete Corsari) e i ze drio pa' intrigarse co un de i Cuatro Inperadori. L’autor Oda el ga declarà che, rivài a ‘sto ponto, l'òpara ła ze sirca a’l 70% de ła narasion [3]. Donca A ghe vorà ancura de i ani vanti de rivar a ła fine de ła storia.

Anbientasion[canbia | canbia el còdexe]

El manga el ze anbientà inte un contesto jeogràfego e tenporałe de pura fantazìa siben che A se pol catar fasilmente tuti i refarimenti stòreghi, jeogràfeghi e łetarari che a coełi Oda el se ga ispirà.

Contesto tenporałe[canbia | canbia el còdexe]

El manga el ze anbientà inte na època che no ła ga corespondensa co’l mondo reałe, de fati A vien raprezentada na realtà co na tecnołozìa che ła pol senbrar a'l isteso tenpo sia vecia che moderna. Par ezenpio łe navi łe va tute a veła, l’ùnego treno visto el va a vapor, ła zente ła scrive a man, A no ghe ze automòbiłi o aeroplani. Parò, de raverso, A se cata el dòparo de ła corente ałètrega, de i tełèfoni e de łe tełecàmare (siben che i funsiona grasie a na spesie de grosi sciozi ciamài sciozòfoni e sciozocàmare ), de i fax, de i raji łàzer e de na siensa mèdega ben zviłupada. In onji cazo par One Piece A no sarìa mìa coreto parlar de na anbientasion de’l tipo steampunk.

Contesto jeogràfego[canbia | canbia el còdexe]

Exquisite-kfind.png Par saverghene de pì, varda ła pajina Jeografìa de One Piece.

El mondo de One Piece el ze asè diverso da'l mondo reałe anca da'l ponto de vista jeogràfego e morfołózego. A ghe ze senpre un globo terestre ma ła dispozision de i continenti e de łe acue ła ze conpletamente reinventada da l'autor Oda. Anca ła cosmołozìa de'l mondo ła ze tuta diversa da coeła reałe de fati, inte'l Àlbaro de ła Conosensa de l'ìzoła de Ohara, l'autor el ga dizenjà un mapamondo co un pianeta somejante a ła Tera e che'l ga sie łune che ghe orbita intorno, e onjuna de 'ste sie łune ła ga un só satèłite orbitante. El globo terestre de One Piece el se prezenta tuto recoverto de acua co un stramaro de ìzołe e arsipèłaghi sparpanjài so tuta ła suparfisie. L'ùnega tera emersa che ła se configura cofà un continente ła ze ła cusidita Łinea Rosa che ła traversa el globo inte'l senso łonzitudinałe "tajàndoło" in du parti cofà el Meridian de Greenwich. In corespondensa de ła łinea de l'ecuatore A se cata na fasa de mar ciamada ła Łinea Granda. 'Sta chive ła ze dividesta in du parti parché ła se incroza co ła Łinea Rosa: ła prima metà ła ze ciamà el Paradizo, tamentre ła segonda ła ze ciamà el Mondo Novo. Se considaremo ła Łinea Rosa e ła Łinea Granda cofà de i ełeminti de confin e łora vien fora che'l resto de’l spasio de'l pianeta el ze costituìo da cuatro triàngułi sfèreghi che i coresponde a i Cuatro Mari: el Mar Orientałe (East Blu), el Mar Osidentałe (West Blu), el Mar Meridionałe (South Blu) e'l Mar Setentrionałe (North Blu). Łe ciurme de i pirati de i Cuatro Mari łe ze manco parigołoze e potenti de coełe de ła Łinea Granda. El protagonista Monkey D. Luffy el provien da l’ìzoła Dawn inte’l Mar Orientałe. Chełaltri menbri de ła Ciurma de’l Capel de Paja i provien da ìzołe sparpanjàe intra tuti e cuatro i Mari a ecesion de'l mèdego de bordo Chopper, che'l ze nativo de l'ìzoła de Drum inte ła prima metà de ła Łinea Granda.

Parsonaji de One Piece[canbia | canbia el còdexe]

Exquisite-kfind.png Par saverghene de pì, varda ła pajina Parsonaji de One Piece.

Se’l protagonista de l’òpara el ze Monkey D. Luffy, capitan de ła Ciurma de’l Capel de Paja, via via che ła storia ła prosede A se zonta un stramaro de parsonaji che i pol èsar ingrumài in ‘ste categorìe:

Pirati[canbia | canbia el còdexe]

I pirati i ezisteva dezà vanti de Gol D. Roger ma, daspò de ła só declarasion pùbrega revardo el tezoro ciamà One Piece (fazesta inte’l patìboło de ezecusion), A se pol dir che da chel momento ze scumisià ofisialmente "l'Era de ła Piratarìa". A se cata łe ciurme de pirati dezà inte łe acue de i Cuatro Mari, indóe che i tende a far i sparonsoni tra łe popołasion de łe varie ìzołe e co ła Marina che parò A ghe tien bota. A partir da’l Paradizo de ła Łinea Granda A se cata ciurme asè pì potenti e organizàe e par 'sto motivo tante ìzołe łe ze sote el controło direto de i pirati, soratuto de coełi che i apartien a i Sete Corsari. El Mondo Novo el ze goernà solche da i Cuatro Inperadori, donca se na ciurma ła vol soravìvar in 'ste acue o ła se sotomete a un inperador opur A ghe toca sfidarlo. Scuazi tuti i pirati pì forti i ze dotài de i poteri spesiałi derivanti da'l fato de ver manjà un partigołare Fruto de'l Diàoło e, a'l isteso tenpo, i ze anca boni de doparar łe varie forme de Anbision.

Ciurma de'l Capel de Paja[canbia | canbia el còdexe]

Exquisite-kfind.png Par saverghene de pì, varda ła pajina Ciurma de'l Capel de Paja.

Ła Ciurma de'l Capel de Paja (麦わらの一味 Mugiwara no ichimi) ła ze ła ciurma protagonista de One Piece. Ła ze capitanada da Monkey D. Luffy. A'l momento (vołume n°82) 'sta ciurma ła ze conposta da 9 menbri. Onjun de łuri el ga na partigołare braura inte un spesìfego canpo. Ła ze una de łe pì forti intra coełe che łe nàvega inte ła Łinea Granda, e de fati, Luffy e Zoro i ze rento la łista de i pì parigołozi pirati de ła nova jenerasion conosùi anca co'l nome de łe Ùndeze Suparnove. Tuti i só menbri i ga na reconpensa so'l cao, mesa su da'l Goerno Mondiałe, e a'l momento la soma de łe tute łe reconpense de i Mugiwara ła ze rivà a ła nodévołe sifra de 1.570.000.100 Berry.

I Sete Corsari[canbia | canbia el còdexe]

Exquisite-kfind.png Par saverghene de pì, varda ła pajina Parsonaji de One Piece#Ciurme de i Sete Corsari.
« A ghe ze un puche de robe che vurìa far, par ezenpio ła scansełasion de i Sete Corsari »
(Fujitora - Capitan da Mar de ła Marina)

I Sete Corsari (王下七武海 Ōka Shichibukai, let. "I Sete Nòbiłi Condotieri de'l Mar", voltà co'l tèrmene La Flotta de i Sette inte l'edision itałiana de'l manga) i costituise na organizasion de pirati che i ga asetà de sotostar a i òrdeni de’l Goerno Mondiałe in canbio de na imunidà łegałe: stà condision chive łi fa èsar a tuti i efeti de i corsari. De conseguensa łe varie atività criminałi portàe vanti da ‘sti pirati łe resta inpunìe parché ła Marina, che ła depende anca eła da'l Goerno, no ła va a contrastarli siben che pì de calcun, tra i alti ofisiałi, no'l ze par njente in acordo co 'sto sistema. Ła Ciurma de’l Capel de Paja fin deso ła se ga scontrà o ła ga vuo a che far co scuazi tute le ciurme che łe ze, o łe ze stàe, rento i Sete Corsari e par 'sto motivo ła ze tenjesta soto ocio co gran atension da'l Goerno Mondiałe: de fati i Sete Corsari i ze considarài asè inportanti per mantenjar l'ecuiłibrio mondiałe e, inte'l cazo che calcun ndase a sconbinar 'sto sistema, podarìa èsar mesa in dubio l'autoridà stesa de'l Goerno.

I Cuatro Inperadori[canbia | canbia el còdexe]

Exquisite-kfind.png Par saverghene de pì, varda ła pajina Parsonaji de One Piece#Ciurme de i Cuatro Inperadori.

I Cuatro Inperadori (四皇 Yonkō) i ze i comandanti de łe cuatro ciurme de pirati pì forti in asołuto inte'l mondo de One Piece e i dòmina incontrastài tuto el Mondo Novo. Onji inperador el ze considarà na parsona asè forte e parigołoza, e solche in puchi i se azarda a sfìdarli o a mancàrghe de respeto. L'ezistensa de i Inperadori ła ze stà revełà da Monkey D. Garp inte'l finałe de ła saga de Enies Lobby. A savemo donca che i Cuatro Inperadori i ze ‘sti cuà:

- Shanks “El Roso”
- Charlotte Linlin “Big Mom” (let. “Ła Mamona”)
- Kaido “de łe Sento Bestie”
- Marshall D. Teach “Barbanera”

Prima de ła Bataja Granda de Marineford a’l posto de Barbanera el jera inperador Edward Newgate “Barbabianca”, conosesto par èsar l’omo pì forte de’l mondo e copà in cheła bataja purpio da'l pirata Barbanera. Un puchi de ani indrìo Barbabianca el gheva sintìo ła spiegasion de'l segreto de'l One Piece ciacołando de parsona co Gol D. Roger, ma no’l se ga mai intaresà par catarlo. A savemo anca che Shanks, da zóvane, el jera stà novisio inte ła ciurma de’l Re de i Pirati e donca pol èsar che anca łu el conosa calcosa. A no savemo mìa se Big Mom e Kaido i sipia a conosensa de ła verità so'l One Piece, par serto savemo che i ze drio nar in serca de i misteriozi Road Poneglyph che i serve par catar ła diresion justa par l'ìzoła de Raftel, indóe che se pensa che ghe sipia el tezoro. I Cuatro Inperadori i ze paroni asołuti de’l Mondo Novo, njanca ła Marina ła ze bona de contrastarli, siben che nisun de łuri el sipia bon de prevałer sora de chełaltri. I convive su che’l toco de mar in virtù de un dełicato ecuiłibrio che'l stà in piè a mezo de ałeanse co chełaltre ciurme, ma anca a mezo de crìmini e de tramaci małavidozi.

Łe Ùndeze Suparnove[canbia | canbia el còdexe]

Exquisite-kfind.png Par saverghene de pì, varda ła pajina Parsonaji de One Piece#Ciurme de łe Ùndeze Suparnove.

Łe Ùndeze Suparnove (11人の超新星 Jūichinin no Chōshinsei) łe costituise un grupo de pirati de ła nova jenerasion che, rivàe inte'l arsipèłago Sabàody vanti de'l salto de du ani, łe gheva so'l cao na reconpensa suparior a i 100 mełioni de Berry. Daspò de du ani da ła Bataja Granda de Marineford A se cata tuti 'sti parsonaji inte'l Mondo Novo co łe reconpense che łe ze ndàe suzo anca de tanto. Łe Ùndeze Suparnove, insenbre co'l neoinperador Marshall D. Teach “Barbanera”, łe ze aromai consideràe co'l tèrmene de ła "ła pezo jenerasion" (最悪の世代 Saiaku no seda) parché łe ze drio crear cazin inte łi dełicati ecuiłibri che fin deso i gheva tenjesto in piè el mondo de One Piece. Da cuande che łe ze inte'l Mondo Novo calcune de łe Ùndeze Suparnove łe ga streto de łe partegołari ałeanse intra de łure (par ezenpio come che i ga fato i Capel de Paja co ła ciurma de i pirati Heart capitanài da Trafalgar D. Water Law) opur łe se ga sotoposto a un de i Cuatro Inperadori.

Marina (One Piece)[canbia | canbia el còdexe]

Exquisite-kfind.png Par saverghene de pì, varda ła pajina Parsonaji de One Piece#Parsonaji de ła Marina.

Ła Marina (海軍 Kaigun) ła ze na organizasion miłitar sote el controło de'l Goerno Mondiałe e ła ga el cònpito de mantènjar ła paze e l’òrdene inte i mari, soratuto contrastando el mondo de ła piratarìa. A se pol dir che ła Marina de One Piece ła ze na sorta de “połisìa de mar” in considerasion de'l fato che i vari Renji, sparpanjài pa' łe ìzołe de i mari, i ga dezà a servisio i só corpi de vardia, o anca de i veri e propi ezèrsiti, che i ga jurezdision so'l teritorio spesìfego de chełe nasion. El Goerno Mondiałe el dòpara ła Marina, insenbre co i Sete Corsari, par seitar i purpi obietivi e mantènjar el difìsiłe ecuiłibrio co’l strapotere de i Cuatro Inperadori. In cao de ła Marina A ghe ze un Capitan Zenerałe da Mar (Grandammiraglio inte ła varsion itałiana) che'l ze Sakazuki anche dito Akainu (let. “El Can Roso”). Sote de Akainu A ghe ze tri Capitani da Mar (Ammiragli inte ła varsion itałiana) che i ze reconosùi par èsar asè forti tanto da poder tènjar el confronto almanco co un de i Inperadori. El nono de’l protagonista Luffy el ze Monkey D. Garp, a dir un Capitan da Mar Vicario (Vice Ammiraglio inte ła varsion itałiana) sèłebre e respetà pa’ ła só gran forsa e anca parché, ani indrìo, el ga conbatùo a ła pari njente manco che co’l Re de i Pirati. Cofà che ze pa' i pirati anca tra i ofisiałi pì forti de ła Marina A ghe ze chi che ga i poteri derivài da i Fruti de'l Diàoło e, in partigołare, i Capitani da Mar. Par de pì i ofisiałi alti che i nàvega pa'l Mondo Novo i ga da saver doparar anca l'Anbision se i vol tenjar bota co łe ciurme de chełe acue.

Goerno Mondiałe[canbia | canbia el còdexe]

Exquisite-kfind.png Par saverghene de pì, varda ła pajina Parsonaji de One Piece#Parsonaji de'l Goerno Mondiałe.

El Goerno Mondiałe (世界政府 Sekai Seifu) el se ciama cusì parché ła ze l’organizasion che ła goerna el mondo de One Piece. El só cuartier zenarałe el ze a Marijoa inte ła Łinea Rosa. El ze stà fondà 800 ani vanti de ła narasion, da 20 nasion vinsenti che łe gavéa sconfito un misteriozo Renjo Antigo che de coeło A se conose tanto poco. I disendenti de 'sti vinti Renji i costituise ła casta de i Draghi Sełesti. El Goerno el ze struturà cofà na confederasion de 170 renji sparpanjài in tuto el mondo. Onjun de ‘sti renji el mantien na forte autonomìa e indipandensa ma pa’ łe coestion intarnasionałi i pol cołaborar tra de łuri tràmite el Goerno. In cao de ła jerarchìa de’l Goerno A ghe ze i Sincue Astri de Saviesa, a dir sincue misterioze parsone che, par comandar e mantènjar l’ecuiłibrio mondiałe, łe ga a despozision ła Marina, i Sete Corsari e anca el Cypher Pool, a dir na sorta de połisìa segreta che ła ga jurezdision so i cazi “pułìteghi”. De fati ła preocupasion granda de i Sincue Astri de Saviesa ła ze coeła de mantènjar el siłensio, pa’ no dir ła censura totałe, so i fati revardanti el Sècoło Vodo, a dir el parìodo che in coeło A se pensa che’l sipia stà anientà el misteriozo Renjo Antigo. Par tuti ‘sti motivi A vien fora, asè de frente, che l’operar de’l Goerno no l’è mìa tanto spiero e ansi, in tałuni cazi, A se pol dir che’l sèita de łe sielte asè discutìbiłi da’l ponto de vista ètego, pa’ no dir criminałi. Anca par 'sta razon ła Ciurma de’l Capel de Paja pì de calche ‘olta ła se ga meso contra el potere mondiałe. A onji modo el nemigo prinsipałe de’l Goerno resta ła cusidita Armada Revołusionaria.

I Draghi Sełesti[canbia | canbia el còdexe]

I Draghi Sełesti (天竜人 Tenryūbito) i ze i disendenti de i vinti Renji che i gheva fondà el Goerno Mondiałe e inte'l manga i ze anca conosesti co'l nome de "Nòbiłi Mondiałi". I ze conparsi ła prima 'olta durando ła saga anbientada inte'l arsipełago Sabàody e el mistro Oda no'l ga mai scondesto ła só antipatìa par 'sti parsonaji chive: de fati i ze stài prezentài durando una de łe tante aste indóe che se vende èsari viventi caturài e prunti par èsar doparài cofà de i sciavi. I Nòbiłi Mondiałi i se deverte a cronpar sciavi e i costuma marchiar a fogo ła schina de 'sti chive co'l sinboło de'l "Sòcoło de'l Drago che'l cavalca el Sieło" che'l raprezenta el potere e'l prestizo de 'sta casta. I Draghi Sełesti no i fa nisun tipo de łaoro e no i ga nisuna abiłità e donca ła só richesa e'l só enorme potere i deriva solche da ła pozision che i ga par censo. I vive conpletamemte fora da ła realtà e i consìdara cofà inferiori tuti coełi che no i apartien a ła só casta: de fati i ze dizenjài co na spesie de boła de vero so'l cao, cofà un casco, che ła ghe serve par respirar l'aria de na bònboła parché łuri no i vol umiłiarse a respirar ła istesa aria de łe cusidite parsone comuni. N'altra caratarìstega che łi distingue da tuti ze che i vive inte ła Tera Sacra de Marijoa che ła ze l'ùnega zona abitada de ła Łinea Rosa indóe che ghe ze anca ła sede de'l Goerno Mondiałe. Par tuti 'sti motivi i Nòbiłi Mondiałi, pur no vendo mìa partigołari poteri o abiłità, i ga un potere grando sora el Goerno e ła Marina: de fati se i se sinte in parìgoło i pol ciamar parfin un Capitan da Mar in parsona che'l venja a deféndarli, opur i pol dispor come che i vol de ła CP0, a dir ła scuadra più forte rento ła Cypher Pool. Savemo anca che el só potere el stà sora de coeło de chełaltri renjanti e parfin sora de coeło de i Sincue Astri de Saviesa. El pirata Don Quijote Do Flamingo, che'l fazéa parte de i Sete Corsari fin cuande che'l ze stà sconfito da i Mugiwara, el provenjéa de na fameja de Draghi Sełesti che ła gavéa perso el tìtoło nobiłiare. El protagonista Monkey D. Luffy, inte'l epizodio de l'asta de sciavi inte'l arsipèłago Sabàody, no'l se ga mìa fato scrúpoło de tirarghe un bel punjio so'l muzo a San Charloss, un de i Draghi Sełesti, e 'sto tipo de asion, oltra che èsar un viłipendio mìa asetàbiłe pa' i Nòbiłi, ła ze considarà de na gravità asołuta da'l Goerno Mondiałe.

L'Armada Revołusionaria[canbia | canbia el còdexe]

Exquisite-kfind.png Par saverghene de pì, varda ła pajina Parsonaji de One Piece#Parsonaji de l'Armada Revołusionaria.

L'Armada Revołusionaria ((革命軍 Kakumei gun) ła ze na organizasion forałeje che ła ga l'obietivo de butar zo el Goerno Mondiałe e i Renji che a coeło i ze łigài. Ła ze tanto segreta cuanto potente e par 'sto motivo ła ze considerada asè parigołoza da łe autoridà mondiałi, a'l isteso łeveło de łe pì forti Ciurme de i Pirati. A se pol dir che'l Goerno el consìdara i menbri de l'Armada cofà de i veri e propi teroristi. In cao de 'sta organizasion A ghe ze Monkey D. Dragon, a dir só pare de'l protagonista Monkey D. Luffy, un parsonajo misteriozo cofà l'organizasion istesa. Ła baze de l'Armada ła se catava inte l'ìzoła de Baltigo inte ła Łinea Granda siben che, inte łi ùltemi capìtułi, ze venjesto fora che ła ze stà descoverta da i pirati de Barbanera e daspò anca da ła Marina e donca ła ze stà dezbandonà par senpre da i Revołusionari. L'operar de l'Armada Revołusionaria el ze de'l tuto fora da łe règołe e da ła łeje cofà coeło de i Pirati ma, a difarensa de 'sti ùltemi, i Revołusionari i sèita obietivi puramente połìteghi e mìa de richesa o dominio so i mari. Donca, anca par 'sto motivo, no i se mete mai in conpetision co łe Ciurme Pirata. El comandante vicario de l'Armada el ze Sabo, a dir el fradełastro de Monkey D. Luffy e de Portuguese D. Ace. N'altro de inportante el ze Emporio Ivankov anca dito Iva, un parsonajo asè stranbo ma anca tanto forte e asè łigà a Dragon. Iva el ze stà de gran juto a Luffy sia durando ła saga de [[Impel Down e sia durando coeła de ła ła Bataja Granda de Marineford. Par de pì el ga arlenà el cogo Sanji durando i du ani de arlenamento.

Termenołozìa de One Piece[canbia | canbia el còdexe]

Exquisite-kfind.png Par saverghene de pì, varda ła pajina Glosaro de One Piece.


Curiozità e misteri de One Piece[canbia | canbia el còdexe]

El Sècoło Vodo[canbia | canbia el còdexe]

Quill-Nuvola.svg
Sta sezion ła xè ancora voda. Jùtene a scrivarla!

El Renjo Antigo[canbia | canbia el còdexe]

Quill-Nuvola.svg
Sta sezion ła xè ancora voda. Jùtene a scrivarla!

El segreto de ła “D”[canbia | canbia el còdexe]

Quill-Nuvola.svg
Sta sezion ła xè ancora voda. Jùtene a scrivarla!

El salto de du ani[canbia | canbia el còdexe]

Quill-Nuvola.svg
Sta sezion ła xè ancora voda. Jùtene a scrivarla!

Varda anca[canbia | canbia el còdexe]

Note[canbia | canbia el còdexe]

  1. One Piece fa la storia: è il manga più venduto da ben 10 anni.[1]
  2. One Piece entra nel Guinness World Records.[2]
  3. One Piece è al 70 per cento.[3]