Glosaro de One Piece

Da Wikipedia, l'ençiclopedia libara.
Jump to navigation Jump to search
'Sto artìcoło el 'é scrito doparando ła grafìa dita DECA

1leftarrow.pngVoxe prinsipałe: One Piece.

'Sta chive ła ze na łista parsiałe de i tèrmeni spesìfeghi che i vien doparài inte'l mondo imajinario descrivesto so'l manga One Piece, scrito e dizenjà da Eiichirō Oda.

Anbision[canbia | canbia el còdexe]

L'Anbision (覇気 Haki) ła ze na forsa misterioza che ła pol èsar catà inte onji èsare umano de'l mondo de One Piece. Inte l'edision itałiana de'l manga ła ze ciamà de frente co'l sò nome orizenałe in łengua japoneze, a dir haki. L'Anbision, cofà i Fruti de'l Diàoło, ła confarise de i poteri soranaturałi (par ezenpio poteri extrasensoriałi) ma, a difarensa de i fruti che biò manjarli, 'sta cuà ła ze na caratarìstega tìpega de'l corpo umano che ła pol èsar rezvejada, arlenada e donca potensiada. A se cata tri tipi diversi de Anbision, a segonda de łe capasità che łe pol venjar fora:

  • L'Anbision de ła Percesion (見聞色の覇気 Kenbun-shoku no Haki), anca dita "Tonałidà de l'Oservasion". Chi che'l ze bon de dopararla el se cata co na spesie de sesto senso che'l ghe parmete de anałizar el spasio da rente, in partigołare ła ze asè ùtiłe par catar fora ła prezensa de nemighi e parìgołi vari. Par de pì A ghe ze chi che'l ze anca bon de zviłupar ła capasità de predir el futuro pì imedià (par ezenpio Charlotte Katakuri, el segondo fiol de l'inperadora Big Mom). Savemo che inte ła ciurma de i Capel de Paja A ghe ze Sanji che'l ze un òtemo utiłizador de 'sto tipo de haki, ma anca Luffy, Zoro e Uzop i ga 'sta capasità. El tirador de ła ciurma el ze drio zviłuparla daspò de ła saga de Dresroza, tamentre el capitan el ga desidesto de potensiarla ancura de pì daspò de'l só conbatimento purpio co Katakuri.
  • L'Anbision de l'Armadura (武装色の覇気 Busō-shoku no Haki), anca dita "Tonalidà de l'Armadura". 'Sta capasità chive ła parmete de crear na spesie de armadura a protesion de'l corpo par deféndarse da atachi potenti che i podarìa ferir e far asè mal. A ghe vol na gran potensa par poder infranzarla e, inte'l cazo de un scontro tra du parsone co l'armadura, vinse chi che'l ga 'sto haki pì zviłupà. Na caratarìstega che rende 'sta Anbision asè inportante ła ze coeła de donar ła capasità de contrastar i poteri de alcuni de i Fruti de'l Diàoło, in partigołare de i Rogia che i ga el potere asè eficase de l'intangibiłidà: tràmite ła Tonałidà de l'Armadura A se pol colpir e ferir un Rogia. Via de tut anca cuà val el prinsipio che se anca chełaltro avarsario el dòpara l'haki e łora prevałe coeło pì zviłupà. A ghe ze chi che'l ze bon de trasferir l'armadura anca a ojeti e armi, cofà łe gueriere amàsoni de ła tribù Kuja opur Zoro che'l ze bon de revestir le só spade co ła tonałidà de l'armadura par tajar coeła de chełaltri. Tra i Mugiwara anca Luffy e Sanji i ze boni de doparar l'haki de l'armadura.
  • L'Anbision de'l Re (覇王色の覇気 Haō-shoku no Haki), anca dita "Tonałidà de'l Re Concuistador". Ła ze ła pì ràdega tra tuti i tipi de Anbision parché no ła pol èsar mìa inparada e de fati i ze in puchi (solche uno inte un mełion de parsone) che i ła ga da ła nàsita e, donca, soło łuri i pol potensiarla inte'l corso de ła vita. L'Haki de'l Re dona el potere de'l intimidasion, a dir ła capasità de far pèrdar conosensa a łe parsone che łe ga un scarso senso de vołontà. A ghe ze l'inperador Shanks che'l ga demostrà de poder parfin danejar el spasio da rente doparando 'sta Anbision a'l màsemo łeveło: a revardo el mistro Oda, respondendo a na dimanda de i łetori, el ga spiegà che Shanks el podarìa mandar in zvenimento almanco 100.000 parsone soło co ła potensa de'l só haki[1]. Fin deso, inte'l manga, A se ga podesto catar solche manco de dieze parsonaji che i ga el potere de'l Re Concuistador.

A ze pòsibiłe che na parsona no ła sipia mìa bona de rezvejar l'Anbision inte'l corso de ła só vita. E de fati i ze asè puchi i parsonaji de'l manga che i ze boni de doparar almanco un de i tri tipi de Haki. Ancura pì ràdeghi ze coełi che i ze boni de dopararli tuti e tri a'l isteso tenpo (cofà, par ezenpio, el protagonista Luffy). El dòparo de l'Anbision ze na capasità fondamentałe par móvarse e soravìvar inte'l Mondo Novo e anca par poder afrontar i ofisiałi pì alti de ła Marina.

Armi Antighe[canbia | canbia el còdexe]

Plùton[canbia | canbia el còdexe]

Quill-Nuvola.svg
Sta sezion ła xè ancora voda. Jùtene a scrivarla!

Pozèidon[canbia | canbia el còdexe]

Quill-Nuvola.svg
Sta sezion ła xè ancora voda. Jùtene a scrivarla!

Urànus[canbia | canbia el còdexe]

Quill-Nuvola.svg
Sta sezion ła xè ancora voda. Jùtene a scrivarla!

Fruti de'l Diàoło[canbia | canbia el còdexe]

I Fruti de'l Diàoło (悪魔の実 akuma no mi), ciamài anca Frutti del Mare inte ła varsion itałiana de'l anime, i ze de i partigołari fruti da l'orìzene misterioza che i confarise a chi che łi manja de i poteri soranaturałi de vario tipo. El preso da pagar, in canbio de'l potere brincà, el ze ła perdita de ła capasità de noar in acua e anca ła perdita de ła forsa fìzega e de i poteri onji 'olta che se vien in contato co l'acua de mar o co ła Pria de Mar. N'altro ponto débole de i fruti ze che i poteri i pol èsar contrastài cuande che se se scontra co calcun che'l ze bon bon de doparar ła Tonałidà de l'Armadura a levełi alti. Onji èsare umano el pol manjar solche un fruto sinò, se'l proase a manjàrghine n'altro, el só corpo el scioparìa par aria. L'ùnega parsona che ła ga i poteri de du difarenti fruti el ze el pirata Barbanera ma njancura ze stà spiegà 'sta ecesion. Par de pì A ze inposìbiłe catar du parsone vive che łe gapia el isteso potere parché onji potere el resta univogamente łigà a un presizo posesor fin cuande che 'sto cuà el ze in vita: se el more e łora chel fruto el se rejènera e cusita el pol èsar catà e manjà da n'altra parsona. I Fruti de'l Diàoło i ze difarensiài in tri categorìe prinsipałi fondàe so'l tipo de potere che i pol donar: i Paramisha, i Rogia e i Zòan. Rento de onji categorìa A ghe ze de łe ultariori sotocategorìe de difarensiasion.

  • Paramisha (超人系 Paramishia): i ze ła categorìa pì granda de i Fruti de'l Diàoło e i dona un potere soranaturałe che'l pol revardar na spesìfega capasità de'l corpo, o jenerar na partigołare sostansa, opur infruensar l'anbiente o chełaltre parsone. A difarensa de chełaltre du categorìe i Paramisha no i dona ła capasità de muar el propio corpo inte n'altro ełemento o inte na creatura extraumana. A ghe ze na variedà granda de poteri che se pol brincar co 'sto fruto e i stesi posesori i pol métarghe ani par capir in pien łe potensiałidà de'l fruto che i ga manjà. El difeto prinsipałe de i Paramisha ze che el corpo de'l posesor el resta senpre umano e donca co'l riscio de èsar ferìo seriamente. Par de pì ghe ze da tenjar conto che, siben che se posa catar un stramaro de capasità anca asè stranbe o parigołoze, A no ze mìa tanto difìsiłe intuir el ponto dèbołe de un partigołare potere, donca i conbatenti pì forti, esperti e astuti i pol neutrałizar sensa tanti problemi el vantajo donà da 'sti fruti. Via de tut A ghe ze stà parsonaji cofà l'inperador Barbabianca che'l gavéa i poteri devastanti de'l fruto Paramisha Gura Gura che, in conbinasion con łe só capasità fìzeghe soraumane, i fazéa de łu l'omo pì forte de'l mondo e anca un aversario scuazi inposìbiłe da bàtar. El potere de'l Gura Gura de Barbabianca el ze stà brincà (co na tècnega misterioza) da'l pirata Barbanera, che dezà de suo el gheva i poteri de un fruto Rogia. Anca l'inperadora Big Mom ła ga i poteri de un Paramisha, a dir el Soul Soul. E, soratuto, anca el protagonista Monkey D. Luffy el ga manjà un fruto de 'sta categorìa, a dir el Gom Gom, brincando ła capasità de èsar un omo co'l corpo che'l se conporta cofà ła goma: no'l ze un potere de par se steso devastante ma Luffy el ga inparà a sfrutarlo inte'l modo justo e donca co'l tenpo el ze deventà asè eficase.
  • Rogia (自然系 Logia): ła ze ła categorìa pì presioza parché 'sti fruti i ghe i ze asè ràdeghi e i poteri che i dona i ze tra i pì eficasi e resercài. Caratarìstega prinsipałe de 'sti fruti ze che i dona la capasità de muar tuto el corpo inte un spesìfego ełemento naturałe cofà giaso, fogo, gas, łuze, magma etc... El doparador de un Rogia, podendo muar ła strutura mołecołare de'l propio corpo, el deventa de fato intangìbiłe e, donca, no'l pol njanca èsar ferìo. Fin tanto che ła storia ła jera anbietà inte'l Paradizo de ła Łinea Granda i parsonaji co'l potere de i Rogia i jera, in pràtega, inbatìbiłi. Daspò che ze stà introdota l'Anbision, so'l fenir de ła prima parte de'l manga, A se ga capiò coel che'l ze el ponto débołe de i Rogia, a dir che l'intangibiłidà ła ze contrastada da ła Tonałidà de l'Armadura. Posto che inte'l Mondo Novo tuti i parsonaji pì forti i ze boni de doparar l'Armadura A se capise che in chel toco da mar i scontri no i ze mìa tanto sinplisi njanca par i posesori de i poteri Rogia. A se pol catar tra i parsonaji pì forti de'l manga purpio coełi che i ga manjà 'sto tipo de fruto, in partigołare: du de i tri atuałi Capitani da Mar de ła Marina considerando anca che l'ex Capitan da Mar Kuzan el ze un Rogia e, soratuto, l'inperador Barbanera, che'l ga i poteri tremendi de'l fruto Rogia de'l tipo Dark Dark che'l ze un de i pì potenti e parogołozi fruti in asołuto, par da pì in conbinasion co'l altretanto tremendo Paramisha de'l tipo Gura Gura.
  • Zòan (動物系 Zon): i ze un tipo de fruto che confarise, a chi che ło manja, el potere de muar inte un partigołare tipo de animałe in tri modałidà difarenti: forma soło umana, forma mista omo/animałe, forma soło animałe. Un fruto Zòan el dona el vantajo de zvliłupar forsa, rezistensa fìzega e sensi desizamente soraumani e proporsionài a coełi de ła bestia che ła coresponde a che'l fruto; donca ze ciaro che i pì eficasi in 'sto senso i ze i Zòan che i fa muar inte un predador carnìvoro, a dir un tipo de animałe asè potente, parìgołozo e fato aposta pa'l scontro fìzego. El parsonajo de Chopper el ga manjà un fruto Zòan de'l tipo Homo Homo e, donca, da animałe el se ga muà inte un ésare umano ciapando rento tute łe forme intermedie, via de tut se 'sto fruto el fuse stà manjà da un omo vero e łora cheła parsona ła sarìa restà conpanja perdendo, paró, ła capasità de noar par senpre. I fruti Zòan, donca, i ze asè eficasi inte'l conbatimento corpo a corpo e cuande che ghe ze da sfrutar determinade doti fìzeghe ma, pa'l resto, i ze considarài un tipo de fruto bastansa banałe. Via de tut A ghe ze na sotocategorìa asè intaresante par via de i poteri soranaturałi che ła pol donar: A se trata de i cusiditi Zòan Mitołòzeghi che i ze ancura pì ràdeghi de i fruti Rogia. E de fati i posesori de i poteri de 'sti fruti partigołari i ze tra i pì forti tra coełi visti fin deso so'l manga. A se pol recordar, par ezenpio, Marco "Ła Fenise", ex comandante de ła prima armada de l'inperador Barbabianca, che'l ga manjà purpio el Fruto de ła Fenise brincando cusì ła capasità de rejenerar łe ferìe e i dani de'l só corpo. Anca Sengoku, che'l ze stà Capitan da Mar Zenarałe de ła Marina, el ga manjà el fruto Homo Homo modeło Buddha che'l ghe parmete de trasformarse inte un Buddha zigantesco in grado de emétar tremende onde de enerzìa da i palmi de łe man.

Log Pose[canbia | canbia el còdexe]

Un Log Pose (記録指針 Rogu Pōsu) el ze un tipo partigołare de busoła che'l vien doparà solche inte ła Łinea Granda a motivo de łe anomałìe manjèteghe che łe ze tìpeghe de 'sta fasa de mar e che łe fa zbałar na bùsoła normałe. El log pose invese, cuande che se ze fermi inte un łogo, el se manjetiza co'l canpo manjètego de l'ìzoła che ła ze pì da rente e donca el tende a senjar senpre cheła presiza diresion fin tanto che no se ze rivài. El tenpo de manjetizasion el pol variar da calche dì fin a un ano intiero. Cuande che se scumisia a navegar inte ła Łinea Granda ze donca posìbiłe desìdar tra sete parcorsi diversi che i depende da coeła che ze ła ìzoła che se cata par prima parchè daspò tute chełaltre łe vien in secuensa par via de i canpi manjèteghi che i se rencore un daspó de chełaltro. A onji modo, a presìndar da coeła che ła ze ła partensa, i sete posìbiłi parcorsi i porta tuti a'l isteso ponto finałe che parò no ła ze l'izoła de Raftel, posto che par rivar łive serve łe informasion che łe ze scolpìe inte łi Road Poneglyph. Par navegar inte'l Mondo Novo A ze obrigatorio doparar par fin tri log pose contenporaneamente par via de i problemi manjèteghi che i ze ancura pì ezasperài che inte'l Paradizo: depende da l'espariensa e da ła braura de'l navigador capir coała che ła ze ła pì afidàbiłe de łe tri diresion indicàe.

L'Eternal Pose (永久指針 Etānaru Pōsu) el ze un tipo spesiałe de log pose che'l ze stà manjetizà fiso so na serta ìzoła e donca el ìndega senpre cheła diresion.

Navi[canbia | canbia el còdexe]

Oro Jackson[canbia | canbia el còdexe]

Quill-Nuvola.svg
Sta sezion ła xè ancora voda. Jùtene a scrivarla!

Going Merry[canbia | canbia el còdexe]

Ła Going Merry (ゴーイングメリー号 Gōingu Merī-gō), ciamà anca senplisemente ła Merry, ła ze stà ła prima nave ofisiałe de ła Ciurma de'l Capel de Paja, sostituìa in sèito da ła Thousand Sunny. Inte łi primi capìtułi, vanti de ver 'sta nave, Luffy Zoro e Nami i gavéa doparà na barcheta picenina par móvarse inte'l Mar Orientałe. Ła Merry ła ghe ze stà regałà da Kaja, na amiga de Uzop che ła vive inte'l Viłajo de Shirop, a'l tèrmene de'l scontro de i Mugiwara co ła ciurma de'l pirata Kuro. Da'l ponto de vista tècnego ła jera na caraveła a un soło àlbaro co ła veła triangołare, da ła łinea conpata e zgagia in navigasion. Ła gheva solche du canoni: un a prora e un a pupa. Fin tanto che ła ciurma ła jera de 5-6 menbri ła nave ła podéa ofrir spasi e łocałi pa' star tuti bastansa còmodi. Ła Merry ła ga conpanjà Luffy e i conpanji da'l Mar Orientałe fin rento de ła Łinea Granda, par dir che co 'sta nave i ze stài boni anca de rivar so i Mari de'l Sieło durando ła saga de Skypiea. In cheła ocazion ła caraveła la gheva reportà de i dani bastansa seri e donca la gavéa da èsar reparada inte łi cantieri navałi de Water Seven, indóe che ghe łaora i mejo mistri d'asa de'l mondo. Maldestin i carpentieri i ga comunegà che ła nave ła gavéa da èsar dezmantełada parché non ła jera pì segura pa' nar so'l mar, e 'sta storia ła ga scaenà ła reasion rabioza de Uzop che no'l condividéa 'sta desizion parché, fin a chel momento, el se jera senpre sintìo łu el responsàbiłe de ła Merry e 'l ghe gavéa pensà senpre łu a taconarla su a ła bona. Da cuanto che'l jera inrabià el ga parfin mołà ła ciurma pa' un serto tenpo. Via de tut ła Merry ła ze reconparsa so'l fenir de i eventi de Enies Lobby guidada da'l só Klabautermann, a dir un spìrito misteriozo che'l incarna l'ànema de onji inbarcasion. A'l tèrmene de 'sta aventura i Mugiwara i ga meso su un funerałe vichingo pa' sałudar e rengrasiar ła Merry e co coeło ła ze stà bruzà definitivamente, un de i epizodi pì comoventi de tuto el manga. Via de tut Franky el ga recuperà ła połegia de ła caraveła, a forma de testa de piègora, e ła ga redoparada inte un barchin a vapor che'l serve cofà mezo vełose da zbarco pa' ła Thousand Sunny, de fati 'sto barchin el vien ciamà purpio Mini-Merry.

Thousand Sunny[canbia | canbia el còdexe]

Exquisite-kfind.png Par saverghene de pì, varda ła pajina Thousand Sunny.


Poneglyph[canbia | canbia el còdexe]

I Poneglyph (歴史の本文Pōnegurifu, let. "Testo de ła Storia", voltà co'l tèrmene Poignee Griffe inte l'edision itałiana de'l manga) i ze de łe stełi ziganti de pria a forma de cubo sparpanjàe in tuto el mondo de One Piece. In totałe savemo che ghe ne ze 30 de 'ste stełi e savemo che łe ze stàe fate su da i avi de ła fameja Kozuki, durando el Sècoło Vodo, doparando un materiałe indistrutìbiłe e co na tècnega de insizion sconosùa. Onji stełe ła ga de łe iscrision fate inte na łengua misterioza che ła podarìa èsar coeła doparada inte'l Renjo Antigo. Donca desifrar i testi de i Poneglyph ła ze na grave viołasion de ła łeje de'l Goerno Mondiałe e trazgredirla sinjìfega risciar parfin ła pena de morte. Nico Robin, l'archeòłoga de i Mugiwara, ła ga na reconpensa so'l cao e ła ze resercada da'l Goerno purpio parché ła ze restà l'ùnega parsona a'l mondo che ła ze bona de łèzar e capir el sinjifegà de 'sti testi misteriozi. E chi che'l ze bon de seitar tute 'ste informasion el pol catar el modo de rivar inte l'ìzoła de Raftel a'l tèrmene de'l Mondo Novo, a dir indóe che se dize che ghe sipia el tezoro One Piece e ła spiegasion de ła storia vera de'l mondo. Fin deso solche Gol D. Roger, el Re de i Pirati, el ze stà bon de conpletar 'sta inpreza siben che no'l gavese ła conosensa de ła łengua antiga. Silvers Rayleigh, el capitan vicario de ła ciurma de'l Re de i Pirati, el ga parò spiegà a i Mugiwara che Roger el gheva un misteriozo potere che'l ghe fazéa sintir "ła voze" de łe robe. I Poneglyph i ze spartii in tri categorìe che łe se difarensia in baze a'l tipo de informasion che ła vien reportada so i testi de łe iscrision:

  • Poneglyph diresionałi: i ze 17, de cołor blè scuro, e i ze ciamài cusita parché i contien łe informasion par catar ła pozision de chełaltri Poneglyph "informadivi", a dir i Real Poneglyph.
  • Real Poneglyph (真の歴史の本文(リオ・ポーネグリフ) Rio Pōnegurifu; let. "El Testo de ła Vera Storia"): łe ze 9 stełi de pria de cołor blè scuro che łe reporta informasion inèdite so ła storia antiga e in partigołare so'l parìodo misteriozo de'l Sècoło Vodo opur so łe Armi Antighe. Par 'sto motivo i ze considarài cofà Poneglyph "informadivi". Pararìa che Gol D. Roger, inte l'ìzoła de Raftel, el gapia catà l'ùltemo Real Poneglyph che'l reasume in modo ciaro e conpleto tuti i dati reportài so chełaltre prie.
  • Road Poneglyph: i ze solche cuatro de 'sto tipo e i se difarensia da tuti chełaltri parché i ze de cołor roso. I testi insizi so 'sti Poneglyph i reporta łe informasion par catar ła misterioza ìzoła de Raftel: de fati onjuna de 'ste cuatro prie ła spiega la diresion par catar na spesìfega ìzoła e donca, ciapando na mapa e incrozando łe łinee a partir da 'ste cuatro ìzołe, A ze posìbiłe capir la pozision de Raftel. Par 'sto motivo i ze asè presiozi e asè resercài da tuti i pirati e savemo par serto che: un ło ga l'inperadora Big Mom, n'altro ło ga l'inperador Kaido e n'altro ancura el ze inte l'ìzoła de Zou custodìo da ła tribù de i Vizoni. A no se sa njancura indóe che sipia el cuarto.

Pria de Mar[canbia | canbia el còdexe]

Ła Pria de Mar (海楼石 Kairōseki, let. "Pria de'l Osèano", voltà co'l tèrmene Agalmatolite inte l'edision itałiana de'l manga) ła ze na sostansa naturałe asè ràdega e misterioza che ła se pol catar inte'l mondo de One Piece. Ła vien considarà cofà un tipo partigołare de pria siben che ła vien łaorada e modełada cofà un metało. Oltra che èsar asè dura e rezistente ła ga ła caratarìstega de "emanar" ła istesa enerzìa de'l mar, donca cuande che ła vien tocada da na parsona che ła ga manjà un Fruto de'l Diàoło ła provoca su de łu l'efeto conpanjo de'l acua de mar, a dir coeło de zmorsarghe i poteri e ła forsa. Par 'sto motivo ła Marina ła dòpara łe manete fate de Pria de Mar cuande che ła ga da arestar calcun che'l ga i poteri de i fruti e, a onji modo, ła dòpara 'ste manete co tuti parché el materiałe el ze indistrùtìbile e bon anca par chi che'l ga na gran forsa fìzega. De 'sta sostansa ze fato anca el partigołare baston doparà da'l Capitan da Mar Vicario Smoker, ma co na inpunjadura revestìa de n'altro materiałe parché anca 'sto ofisiałe el ga i poteri de i fruti. Ła Pria de Mar ła ze doparada, senpre da ła Marina, par revestir el fondo de łe só navi cuande che łe ga da pasar traverso de łe Fase de Bonasa, pa'l motivo che l'enerzìa del mar, emanada da ła sostansa, ła tien chieti i mostri marini che inpesta chełe acue, almanco pa' un poco de tenpo.

Reconpense[canbia | canbia el còdexe]

Quill-Nuvola.svg
Sta sezion ła xè ancora voda. Jùtene a scrivarla!

Sciozòfono[canbia | canbia el còdexe]

Quill-Nuvola.svg
Sta sezion ła xè ancora voda. Jùtene a scrivarla!

Vałute monedarie[canbia | canbia el còdexe]

Berry[canbia | canbia el còdexe]

I Berry (ベリー Berī) i ze ła vałuta monedaria doparada scuazi dapartut inte'l mondo de One Piece. Inte ła varsion itałiana de'l anime i ze ciamài anca Danari. I Berry i ze disponìbiłi sia soto forma de banconote de carta che sotoforma de monèe de metało. I taji de carta i pol èsar da 10.000, 5.000 e 1.000 Berry, tamentre łe monèe łe ze da 500, 100, 50, 10, 5, 1 Berry. Pa' far un ezenpio de'l vałor de i Berry A se pol considarar che i Mugiwara i jera prunti a spéndar anca 200.000.000 de Berry par cronpar na nave nova a Water Seven, donca A ze posìbiłe che ghe sipia na serta corespondensa de 'sta vałuta virtuałe co ła cuotasion reałe de'l Yen japoneze.

Extol[canbia | canbia el còdexe]

L'Extol (エクストル Ekusutoru) ła ze ła vałuta monedaria doparada a Skypiea. Un Berry el val sirca 10.000 Extol.

Note[canbia | canbia el còdexe]

  1. One Piece, SBS Vołume n°65.

Varda anca[canbia | canbia el còdexe]