Thousand Sunny

Da Wikipedia, l'ençiclopedia libara.
Jump to navigation Jump to search
'Sto artìcoło el 'é scrito doparando ła grafìa dita DECA

1leftarrow.pngVoxe prinsipałi: One Piece, Glosaro de One Piece.

Ła Thousand Sunny (サウザンドサニー号 Sauzando Sanī-gō) ła ze na nave imajinaria che ła conpare so'l manga One Piece, scrito e dizenjà da'l mistro japoneze Eiichirō Oda. Inte'l contesto naradivo de l'òpara ła ze ła segonda e atuałe nave de ła Ciurma de'l Capel de Paja, e ła vien anca ciamà senplisemente Sunny. Ła ze stà projetada e costruìa da Franky co'l juto de i mejo mistri d'asa de Water Seven: el carpentier, daspò de vérgheła donà a i Mugiwara, el se ga convinto łu steso a nar rento inte ła ciurma. A confronto de tante altre navi de i pirati ła Sunny no ła ze mìa ła pì granda, soratuto respeto a łe navi de i Cuatro Inperadori, via de tut ła ze de łe dimension juste pa' na ciurma de 9 parsone e co'l tenpo ła se ga demostrà una de łe navi pì vełosi e zgagie che se pol catar pa' i mari. Ła ze stà costruìa da Franky doparando el presiozo e costozo łenjo de'l Àlbaro Tezoro de Adamo che'l ze renomà par èsar rezistente asè. I schei che i ze stà pagài par 'sto łenjo (200.000.000 de Berry) i jera coełi de ła ciurma che inisialmente Franky łi gheva robài a Uzop. Co 'sto tipo de łenjame presiozo jera costruìa anca ła Oro Jackson, a dir ła nave de ła ciurma de Gold D. Roger, el Re de i Pirati .

Descrision[canbia | canbia el còdexe]

Da'l ponto de vista tècnego 'sta nave ła ze un brigantin grando almanco el dopio de coeło che jera ła Going Merry. Ła ga du àlbari bełi alti (un de maistra e un de mezana) che i porta de łe vełe cuadrade e a pupa A ghe ze anca na veła de mezana; ła łinea de'l scafo ła ze asè retondada e ła recorda un mezo sguso de noza. Na caratarìstega tìpega de'l aspeto de ła Sunny ła ze ła połegia che ła ga na fegura granda de łion co ła criniera somejante a i petałi de un fior o anca a i raji de'l sołe: fazendo jirar 'sta criniera cofà un zventołon A se pol far móvar indrìo ła nave. Ła boca de'l łion ła sconde un canon asé potente, ciamà el canon Gàon, che'l se mostra cuande che vien spałancà ła boca. Da rente de ła połegia, una par banda, A se cata łe du àncore che łe ze fate a forma de sata de łion. El projeto de ła Sunny el ga tenjesto conto de łe ezijense de tuti i menbri de ła ciurma de i Mugiwara e donca ła ze ben struturada co spasi e łocałi indóe che onjun el pol pasar el tenpo durando ła navigasion. In partigołare A se cata:

Łocałi inte'l càsaro de pupa[canbia | canbia el còdexe]

  • a łeveło de'l ponte de coverta A se cata un sałon grando ciamà acquarium bar: el ze na sorta de zona lounge co un divano łongo e dadrìo un acuaro indóe che ghe noa rento i pesi pescài da ła ciurma, senpre prunti par èsar cuzinài da Sanji;
  • a'l łeveło suparior A ghe ze ła sała da pranso granda co ła cuzina altretanto granda e ben fornìa; 'sta zona chive ła ze el "renjo" de Sanji che cusì el pol dar sfogo a tuta ła só braura de cogo de ła ciurma. A ghe ze un forno zigante e un frigorìfaro co'l łucheto a conbinasion. I nùmari par vèrzarlo i ze "7326" e 'sta secuensa ła ze conosùa solche da Sanji, Nami e Nico Robin: A sarìa asè parigołozo se Luffy el fuse bon de vèrzar el frigo parché no'l se controła mìa cuande che'l ga fame. De fianco de 'sta zona A ghe ze na stansa co ła funsion de infermerìa e łaboratorio, reservada a Chopper che'l ze el mèdego de bordo;
  • el cuerto de'l càsaro el ze praticàbiłe e 'l ga na zona co łe piante de mandarin de Nami, na fioriera de Nico Robin e un ortezel indóe che Uzop el cultiva łe só semense spesiałi ciamàe Pop Green;
  • in pozision a zbalso sora ła pała de'l timon a ghe ze na sorta de cofa "de pupa" fata e mezasfera indóe che se cata: al łeveło pì baso ła bibłioteca granda de ła ciurma (in partigołare co i testi de Nico Robin e co ła toła da dizenjo pa' łe mape de Nami), a'l łeveło suparior A ghe ze el łocałe co ła vasca da banjo granda (ałimentada co acua calda) che ła vien doparada scuazi solche da łe tuze.

Łocałi inte'l casteło de prora[canbia | canbia el còdexe]

  • a łeveło de'l ponte de coverta A ghe ze i łocałi reservài a i masci de ła ciurma, a dir un stanson grando co i łeti in sospension (picài co łe corde a'l sofito), na toła granda e basa in stiłe japoneze e un sofà;
  • a'l łeveło suparior A se cata i łocałi pa' łe fémane che i ze mejo aredài, co tanto de sałotin co łe poltrone;
  • el ponte suparior el ga ła postasion de'l timon de ła nave co i comandi pa'l dispozitivo ciamà Soldier Dock System.

Ponte de coverta[canbia | canbia el còdexe]

  • el ponte de coverta el ze curiozamente revestìo de erba cusì da somejar a un jardin, de fati A se cata anca un sìvoło che'l vien zo da'l casteło de prora e na altałena montada so un albareto;

Łocałi sote el ponte de coverta[canbia | canbia el còdexe]

  • in zona prodiera A ghe ze na stiva che ła contien el magazen pa' armi e recanbi, in partigołare A ze imagazenà na serta cuantità de łenjo de'l Àlbaro Tezoro de Adamo che'l pol servir pa' łe reparasion;
  • in zona sentrałe A ghe ze el vano grando rotante che'l serve pa'l Soldier Dock System;
  • in zona de pupa A ghe du stanse specułari: una ła ze ła cusidita Uzop Factory, a dir l'ofisina parsonałe de Uzop, chełaltra ła ze ła stansa de Franky pa' ła reserca e'l zviłupo de łe armi; in ùltema A se cata ła "Stansa de l'Enerzìa" indóe che ghe ze i bariłoti de Cola che i ałimenta i dispozitivi vari de ła Sunny. Donca ła nave ła dòpara ła Cola cofà carburante a'l isteso modo de Franky che ła dòpara par ałimentar el propio corpo robótego.

Cofa de'l àlbaro de maistra[canbia | canbia el còdexe]

  • so ła ponta de'l àlbaro A se cata na cofa coverta a forma de mezacùpoła indóe che ghe ze un tełescopio e na pałestra (co tanto de pezi) che de sołito ła vien doparada da Zoro.

Soldier Dock System[canbia | canbia el còdexe]

El Soldier Dock System (ソルジャードックシステム Sorujā Dokku Shisutemu) el ze un sistema che'l ze stà inventà da Franky e 'l consiste inte un vano grando sircołare, posto in zona sentrałe soto el ponte de coverta, che'l ze dividesto in sie gaoni (ciamài dock inte'l manga orizenałe e anca canali inte ła varsion itałiana) e onji gaon el contien un partigołare dispozitivo. El vano sircołare el ga ła capasità de rodar e in 'sto modo onji gaon el pol mòvarse fin che el se ałinea co i du fori tondi: un inte ła murada de sanca e un in coeła de drita. I fori tondi i ga un mecanizmo de avertura a sarasinesca e donca i dispozitivi rento i gaoni i pol nar fora in mar a cupie de du a ła volta. I comandi par desidar coało gaon el ga da vèrzarse i ze posti so'l timon a prora de ła nave. Tuto 'sto sistema el ze ałimentà co ła Cola de ła "Stansa de l'Enerzìa". Daspò de'l salto de du ani Franky el ghe ga zontà de i dispozitivi canbiando ła configurasion che, pa'l momento, ła ze 'sta chive:

  • gaon n°1: el contien el Shiro Mokuba de Nami (ciamà anca waver), na sorta de moto da acua co'l propulsor a idrojeto;
  • gaon n°2: el contien ła Mini-Merry, a dir un barchin a vapor che'l serve cofà mezo vełose da zbarco; el se ciama cusì parché Franky el ga doparà ła połegia co ła forma de testa de piègora che ła jera instałada inte ła Going Merry;
  • gaon n°3: el contien el Shark Submerge III, a dir un sotomarin ceo fato a forma de scuało, che'l pol contenjar fin a tri parsone e che'l pol nar sote acua fin a 5.000 metri de profondità;
  • gaon n°4: el contien el Black Rhino FR-U IV, a dir na motosicreta somejante a un rinoseronte;
  • gaon n°5: el contien el Brachio Tank V, a dir un caro armà somejante a un brachiozàuro;
  • gaon n°6: el contenjudo el ze ancura sconosùo.

El Black Rhino FR-U IV e 'l Brachio Tank V i ze stài introdoti daspò de'l salto de du ani e, durando ła bataja finałe inte l'Ìzoła de i Òmeni Pese, Franky el ga mostrà che i pol conbinarse insenbre pa' formar un roboton grando piłotà purpio da łu, el "Zenarałe Franky" (フランキー将軍 Furankī Shogun).

Altri dispozitivi e armi[canbia | canbia el còdexe]

  • el Coup de Burst: el consiste inte un colpo de propulsion sparà da'l tubo grando de scapamento che'l ze a pupa, el ze talmente viołento che'l pol łansiar ła Sunny a pì de un chiłòmetro de distansa. Onji 'olta che'l vien doparà el consuma tri bariłoti de Cola;
  • el canon Gàon: el funsiona co'l jeto viołento che'l vien sparà da la boca de'l łion a prora, el ze potente asè ma onji 'olta che se ło dòpara el consuma sincue bariłoti de Cola: tri pa'l culpo e du pa stabiłizar el rencuło; normalmente el vien manovrà da Uzop che'l ze tirador e artełier;
  • ła Chicken Voyage, a dir ła manovra de doparar ła criniera de'l łion cofà un zventołon pa' far nar a marcia indrìo ła nave.

Oltra de tut A ghe ze instałà un totałe de sie canoni normałi: cuatro a prora e du so łe murade de pupa.

Varda anca[canbia | canbia el còdexe]