Monkey D. Luffy

Da Wikipedia, l'ençiclopedia libara.


Voxe prinsipałi: One Piece, Ciurma del Capel de Paja.


Monkey D. Luffy (モンキー・D・ルフィ Monkī Dī Rufi) el ze un parsonajo del manga One Piece, scrito e dizenjà da’l mistro japoneze Eiichirō Oda. A se pol dir che el ze el parsonajo protagonista de l'òpara parché el só roło el ze coeło de caitan de ła Ciurma del Capel de Paja e aspirante sucesor al tìtoło de "Re de i Pirati".

Caratarizasion del parsonajo[canbia | canbia el còdaxe]

Inte ła varsion itałiana de’l anime, in onda so Italia 1, el só nome orizenałe el ze stà modifegà in Rubber (let. “goma” in angleze) siben che sta sielta chive ła gapia creà pì che calche problema de coerensa co ła narasion: de fati el nome conpleto e orizenałe el ze asè inportante parché el contien el cusidito segreto de ła “D” che’l ze un de i ponti càrdene de ła trama. Inte’l manga, invese, el parsonajo el vien ciamà de frente “Luffy” opur “Capel de Paja” o, anca, “Capełaro”. I soranomi i vien purpio da’l capel de paja che Luffy el ga indoso fin da ła só prima aparision: sto capel chive el ghe ze stà regałà, cuande che’l jera un boceta, da’l famozo pirata Shanks che’l ze un de i Cuatro Inperadori e che da tozeto el ze stà novisio inte ła ciurma de’l Re de i Pirati Gol D. Roger. Donca el capel de paja de Luffy el ze purpio coel che doparava Roger da zòvane. Luffy el ze dotà de i poteri spesiałi del Fruto del Diàoło del tipo Gom Gom, poteri che che i ło fa èsar on omo de goma: de fati tuto el só corpo el pol zlongarse e far da ełàstego e anca sorbir scuazi tuti i culpi a ecesion de łe ferìe da arma da tajo. Cuande che ła narasion ła ga scumisià Luffy el jera on parsonajo desconosùo e rełativamente débołe rento el mondo de One Piece ma, col prosédar de ła storia, ła só fama e ła só parigołozità łe ze cresùe esponensialmente tanto che, rivà inte el Mondo Novo, el se cata na reconpensa de 500.000.000 de Berry sol cao. Par de pì el Goerno Mondiałe e ła Marina i ło consìdera na seria manasa al ecuiłibrio połìtego del mondo pa i motivi che:

- el ze fioło de Monkey D. Dragon, a dir el cao de l'Armada Revołusionaria;
- el ze el nevodo de Monkey D. Garp, a dir el "łejendàio" Caitan da Mar Vicario de ła Marina;
- el ze fradeło (mìa de sangue) de Portuguese D. Ace, a dir el fioło naturałe del Re de i Pirati Gol D. Roger;
- el ze fradeło (mìa de sangue) de Sabo, a dir el comandante vicario de l'Armada Revołusionaria;
- el ga conbatùo e sconfito diversi inportanti pirati de i Sete Corsari, a dir: Crocodile, Gekko Moria e Don Quijote Do Flamingo;
- el ga prubregamente sfidà el Goerno Mondiałe durando ła saga de Enies Lobby ordinando al só conpanjo de ciurma Uzop de darghe fogo a ła bandiera del Goerno;
- el ga fato evàdar on stramaro de condanài che i jera stà serài su inte ła prezon de Impel Down;
- el ga tirà un punjio sol muzo a San Charloss, un de i Draghi Sełesti, cuande che el ze stà inte el arsipełago Sabàody, un reato considarà stragrave dal Goerno;
- el ga pubregamente sigà, durando ła Bataja Granda de Marineford, che el vol deventar el futuro Re de i Pirati;
- el se ga pubregamente ałeà col pirata Trafalgar D. Law, che el fa parte de łe Ùndeze Suparnove, par butar zo l'inperador Kaido inte el Mondo Novo;
- el ga sfidà l'inperadora Big Mom, el se ga infiltrà inte el só teritorio par recuperar Sanji (el cogo de ła ciurma) e'l ze stà anca bon de bàtar Katakuri, a dir el segondo fioło de Big Mom e un de i tre zenarałi comandanti de ła ciurma de ła Fameja Charlotte;
- el ga el potere, asè ràdego e straparìgołozo, de l'Anbision del Re Concuistador.

A'l momento no se ze mìa seguri che el Goerno el sipia a conosensa del fato che Luffy el ze fradełastro anca de Sabo, a dir el segondo in comando de l'Armada Revołusionaria. Siben che i trascorsi de Luffy i sipia cusì inportanti e aventurozi A ze da dir che łu el ga senpre conservà el só caràtare inzenuo, istintivo e par serti versi infantiłe. 'Sta chive ła ze na caratarìstega fondamentałe del só parsonajo parché, al aparensa, sia chełaltri parsonaji del manga che i łetori istesi i ga l'inpression che Luffy el sipia a tuti i efeti un baucheto bon solche de manjar, ciapar a bote i nemighi e far el senpioldo co i só conpanji de ciurma. Via de tut A se pol dir che el caràtare del protagonista el pol variar a segonda de ła situasion, de fati l'autor Oda, cuande che ghe ze momenti de màsema tension e parìgoło, el fa venjar fora da Luffy un atejamento profondo e par serti versi mauro e responsàbiłe: el tìpego atejamento che tuti i se spetarìa dal futuro Re de i Pirati. E de fati Luffy, purpio in virtù de 'sto só łato sconto, el ze bon de stravolzar ła situasion a só favor cuande che el se cata in momenti bruti.

Storia de Luffy[canbia | canbia el còdaxe]

Cuande che ła narasion de One Piece ła scumisia Luffy el ga solche 17 ani e ’l deside de ciapar el mar da soło salpando da’l viłajo de Foosha, inte l’ìzoła Dawn de’l Mar Orientałe, par deventar el Re de i Pirati. Siben che no’l gapia njancura na ciurma, łu el ze dotà de i poteri spesiałi del Fruto del Diàoło del tipo Gom Gom ma, soratuto, de na gran forsa de vołontà.

Varda anca[canbia | canbia el còdaxe]

Note[canbia | canbia el còdaxe]

  1. One Piece, Vołume 52.


Controło de autoritàVIAF (EN59145541828996601716 · LCCN (ENn2015074547 · WorldCat Identities (ENn2015-074547
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Monkey_D._Luffy&oldid=1111776"