Eiichirō Oda

Da Wikipedia, l'ençiclopedia libara.



Eiichirō Oda (尾田 栄一郎 Oda Ei'ichirō; Kumamoto, 1º zenaro 1975) el ze un mangaka, a dir in łengua japoneze “autor de fumeti”, tra i pì popołari e sełebrài in tuto el mondo grasie, prinsipalmente, a’l suceso che el ga vuo e che’l ze drio ver ancura deso co’l manga One Piece.

Cuande che’l jera bocia el ze stà ispirà da’l manga Dragonball (dizenjà da’l mistro Akira Toriyama), da’l manga Hokuto no Ken (in itałian conosesto co’l nome Ken il Guerriero), mentre ła pasion pa’ i pirati ła ghe ze nasesta vardando ła serie animada tełeviziva de Vichi el vikingo [1].

Oda el ga scumisìa a dizenjar i manga a partir da’l 1992, donca co’l jera ancura un tozatel, e ła só prima òpara ła se ciamava Wanted. Inte łe òpare Monsters (1993) e Romance Dawn (1996) i fa ła só conparsa parsonaji e temàteghe che daspó i venjarà zviłupài purpio su One Piece. Tute łe òpare autoconcluzive che’l vea prodoto vanti de One Piece łe ze stàe pubregàe inte’l 1998 inte ła racolta intitołada One Piece Wanted!.

A partir da’l 1997 Oda el scumisia a pubregar el manga One Piece, na òpara ancura deso in via de pubregasion e che da vinti ani a sta parte ła ze deventà l’obietivo de ła só vita. De fati i capìtułi de One Piece i vien pubregài in Japon onji setimana costantemente da vinti ani e donca, par starghe drio a sti ritmi de pubregasion, a Oda ghe toca łaorar scuazi 20 ore al dì, sete dì su sete, in baze a cuanto che’l ga declarà su varie intarviste a i jornałi japonezi [1]. Par de pì, anca se’l ga a despozision na scuadra de asistenti, el groso de’l łaoro de inpostasion e dizenjio de łe vinjete ło fa łu in parsona parché el vol aver el controło totałe de ła só òpara.

Curiozidà[canbia | canbia el còdaxe]

So ła parsona de Oda A se sa tanto poco parché el ze un omo asè schivo e reservà, donca asè ràdeghe łe ze łe só intarviste e łe aparision pùbreghe spesialmente in tełevizion. A onji modo, so ła baze de calche intarvista che i ghe ga fato a łu, o a i só editori, A ze venjesto fora che’l ze un gran apasionà de łe graełade de carne co i amighi e che purpio ła carne ła ze el só manjar prefarìo, un ciaro refarimento a Monkey D. Luffy, a dir el protagonista de One Piece [2]. Par de pì savemo che Oda el ze nativo de ła prefetura de Kumamoto, a dir na zona del Japon che inte el 2021 ła ze stà colpìa da un forte taramoto che el ga cauzà 49 morti e un stramaro de dani. E a zunjo del 2021 l'aministrasion de ła prefetura ła ga revełà che el mangaka de One Piece el ga versà, traverso de do donasion, un totałe de 800 mełioni de yen pa' finansiar ła recostrusion daspó del taramoto, na sifra che ła coresponde a sirca 6.300.000 euro [3].

Varda anca[canbia | canbia el còdaxe]

Note[canbia | canbia el còdaxe]

  1. 1,0 1,1 10 cose curiose su Eiichiro Oda che probabilmente non conoscevi (ligo ronpesto dispunìbiłe in Internet Archive; védarse el istòrego, la prima version e ła ùltema).
  2. Intervista all’editor Suguru Sugita Archivià il 5 de zunjo 2016 in Internet Archive.
  3. Oda dona 7,2 milioni di dollari dopo il terremoto di Kumamoto (ligo ronpesto dispunìbiłe in Internet Archive; védarse el istòrego, la prima version e ła ùltema).


Controło de autoritàVIAF (EN19898231 · ISNI (EN0000 0000 8362 488X · El vałore MODV261695 de SBN no el xe mija bon. · Europeana agent/base/148684 · LCCN (ENnb2007009259 · GND (DE128519320 · BNF (FRcb14427704t (data) · BNE (ESXX1493172 (data) · NLA (EN40352036 · NDL (ENJA00676651 · WorldCat Identities (ENnb2007-009259
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Eiichirō_Oda&oldid=1157433"