Fresarìa

Da Wikipedia, l'ençiclopedia libara.
La Fresarìa (Frezzaria) vista da Bocca de Piasa

Ła Fresarìa (scrito frezzaria come se łexe su l'omonemo nisiołéto) xe na area de interese situàda inte el sestièr de San Marco a Venesia.

El parcorso de ła Fresarìa parte dal Teatro Ła Fenice e se desboca rivando in Piasa San Marco, co diramasion secondarie de cołegamento verso Canpo San Luca e quindi ła xona de Rialto. Ła całe xe caraterixàda dal gran nùmaro in sucesion dobòto sensa interusion de atività comerciałi de alto liveło (veri de Muràn, fornimento de marca, gałarìe d'arte) e pa'ła so poxision centrałe e ła so funsion de cołegamento raprexenta una de altèrie pedonałi e turistiche de maxor tràfego. Fin al 1863, prima de ła vertaùra del Basin Orseoło e ła creasion de na nova viabiłità più direta, gera ła via de cołegamento più rapida infra canpo San Luca e Piasa San Marco.

El nome de ła całe riva dal fato che inte el Quatrosento in sta xona se fabricava e se vendeva łe frése. Alcune łexi de ła Republica de Venesia risałenti al XIV secoło prescriveva infati par tuti i sitadini dai 16 ai 35 ani l'obligo de exercitarse setimanalmente inte el tiro co ła bałestra al Lido de Venesia. Par sto tipo de exercitasion gera prevista na inbarcada cołetiva in Piasa San Marco e ła Fresarìa par la so pòsta sol parcorso e par la so funsion cołegamento co łe xone de Santo Stefano e Rialto costituiva na dislocasion ideàl par l'aquisto de łe frése che gera fato dai çitadini [1]. Col tenpo e co ła dexisténsa de ła vendita de frése, l'area gà mantegnùo el so caratere de altèria artexanàl e comercial.

Senpre in sta xona se catava ła botéga de l'incixor in rame e calcofrafo (incixor) Giacomo Franco (1550-1620), che gà łavorà anca par i pitori Tizianello e Palma il Giovane al qual el gà łasà dei beni in redità[1]. In più ghe gà soxornà George Byron inte el so primo periodo de permanensa in çità[1] e cołù che gavea a quel tenpo quindéxe ani: Wolfgang Amadeus Mozart, come ricorda na tavèła pòsta sol pałaso indove el xe stà ospità, pròpio sol scominsio del parcorso in banda al Teatro La Fenice.

Note[canbia | canbia el còdaxe]

  1. 1,0 1,1 1,2 G. Tassini, Curiosità veneziane, Filippi Editore

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Fresarìa&oldid=1012698"