Eric Clapton

Da Wikipedia, l'ençiclopedia libara.
Va a: navigasion, serca
Eric Clapton
Eric Clapton 'ntel 1975
Eric Clapton 'ntel 1975
Informasion xenerałi
Nòme vero Eric Patrick Clapton
Nasùo/a 30 marso 1945, Ripley
In atività dal 1962
Xenere muxicałe Pop Rock Blues
Eticheta discografega
Strumento chitara
Atività prinsipałe cantante, muxicista
Discografia
Àlbun publicai 67
Studio 31
Live 16
Racolte 20
www.ericclapton.com Sito web


Eric Patrick Clapton (Ripley, 30 marso 1945), xe un cantante, chitarista, e conponidór britanico.

Soranominà Slowhand (Man lenta) e God da Chuck Berry definìo The Man of the Blues (l'omo del Blues) Eric Clapton xe un dei pì famoxi e influenti chitaristi blues. Vinsidor de pì Grammy Awards, xe el soło muxicista che vanta tre inseriménti ne ła Rock'n Roll of Fame (The Yardbirds, Cream, sołista). Ła rivista Rolling Stone ło gà tacà al segondo posto dadrìo soło a Jimi Hendrix ne ła lista Rolling Stone's 100 Greatest Guitarists of All Time, che minsona i mejo chitaristi de tuti i tenpi, ełexendoło donca megio chitarista in vita.

Biografia[canbia | canbia el còdexe]

Putełèsa e adołesensa[canbia | canbia el còdexe]

Eric Clapton xe nato el 30 marso 1945 a Ripley (Inghiltera). El gera un putèło chieto, vergognìn, sołitàrio e pa'ła so stesa definision, "cativo", tnato fisà a raxonxer i so obietivi nel studio de ła muxica, ma che gaveva anca un gran senso de l'umorismo.

El gà pasà i ani de ła scòła media a ła Hollyfield School de Surbiton e in ocaxion del so tredeximo conpleano el gà risevùo 'na chitara spagnoła Hoya. Inparàr sto strumento gera par lu cussì difisìłe che dobòto gera drìo sbandonàrla. Fin da quando ch'el gera bòcia el xe stà pasionà de blues e 'l se ałenava un mucio de ore par inparàr i acordi e sonàr a so modo ła muxega de artisti blues, ch'el scoltava co'l so registrador.

Clapton taca ła so carièra da sołista exibindose in volta pa'e strade. Da straxovene el intra nei Yardbirds e po' el pasa co' i Bluesbreakers de John Mayall, co'l quałe 'ntel 1966 insìde el çełebre disco Bluesbreakers with Eric Clapton. In sto periodo el conose el baterista Ginger Baker e 'l pianista, conponidor e basista Jack Bruce. Co' stalti el fonda el grupo rock-blues dei Cream. Inaxonta el sona nei primi album de Frank Zappa, insìidendo de łe parti vocałi e altre de chitara.

I ani dei supergrupi (1965 - 1969)[canbia | canbia el còdexe]

Come xe formà i Cream, un supergrupo de virtuóxi, permete a paròmo dei conponenti de łibaràr le pròpie capaçità sensa eser costreto dai limiti che gà łe cansonete pop. Sunshine of Your Love, White Room - scrita dal basista dei Cream Jack Bruce - e Badge (scrita co'l so amigo George Harrison) xe łe game più łuminoxe de ła prima parte de ła carièra de Clapton. Al top del suceso, ała fìn dei sesanta, i Cream se mòła.

Par i ani suìto drìo ła carièra de Clapton ciapa un caratere un fià sìngano e inregołàr. Co' Ginger Baker e l'amigo Steve Winwood, Eric fonda i Blind Faith, Presence of the Lord xe un clasico cha ancora ancùo Eric sona durante i so concerti. Anca i Blind Faith gà 'na vita daseno curta e, drìo el disco de exordio, ła so eperiensa se sera : del resto ła vita dei cussì soranominài "supergrupi", quałi gera sia i Cream che i Blind Faith, no xe mai stàda façìłe, soratuto pa' łe presion de łe major.

Clapton durante un concerto del 1974

El se rifugia quindi ne ła band Delaney & Bonnie, in cui par un periodo stracurto el miłita e va in tour. Ghe ne rexulta do dischi: Delaney & Bonnie & Friends e On Tour with Eric Clapton.

'Ntel 1970 ese el primo albun sołista de Clapton. Rara ła prima version (CTH in trail-off pa'i cultori del viniłe), insìa par stranbòto co' version inedite de After Midnight e Blues Power. Déłongo drìo, Eric forma i Derek & The Dominos. In realtà el grupo dovea ciamarse Derek & The Dynamos ma xe stà canbià par un sbalio de trascrision. Riva' ai studi postataménte co'l fin de conoser Clapton, intra a far parte del grupo un altro gran chitarista ełetrico, Duane Allman, conosùo par aver fato parte dei Allman Brothers.

Ese el disco Layla and Other Assorted Love Songs. Layla, co' el straxordenario riff de vertaùra, xe una de łe canson pì sełebri de Clapton co' ła sucesiva Cocaine (1977) scrita da J.J. Cale. Siben el disco gabia al so interno anca altri otimi brani (Bell Bottom Blues, I Am Yours, Key to the Highway), xe in xeneral el lirico diałogo tra ła chitara di Clapton e queła de Duane a dominàr e caraterixàar el disco. Clapton patìse un mucio pa' ła morte inprovixa de Jimi Hendrix, a cui el jera ligà da grande stima ma anca da conpetision. Par un longo periodo i concerti de Clapton co' Derek and the Dominos del 1970 se verxe co' Little Wing de Jimi Hendrix in omagio al gran chitarista.

Al suceso statunitense de l'albun segue 'na tournée e un disco dal vivo. Un segondo progeto de disco abordìse 'vanti de eser publicà, Duane muore in un incidente stradałe e par Clapton se verxe definitivamente łe porte de l'inferno de ła droga. Ne l'agosto 1971, un Clapton visibilmente provà partesipa al Concert for BanglaDesh de l'amigo George Harrison, riprendendo tra l'altro el famoxo asoło de While My Guitar Gently Weeps, da łù xa sonà ne ła version del White Album dei Beatles.

I ani de ła crixe e ła carièra sołista (1969 - 1979))[canbia | canbia el còdexe]

Clapton in concerto al teatro "Eishalle" de Wetzikon, Zurigo, (Svisera), el 19 xugno 1977

Ghe vorà nùmaroxi mexi e l'ajuto de amighi cofà Peter Townshend par farlo insìr dal sprofôndo, almanco in modo parsiałe. Cussì tanto tacaménto gà dobòto costreto Clapton a tornàr live al Rainbow da cui vien ciapà un live, che no xe riusìo del tuto, come che xe stà dito da diversi critici (anca parchè su l'LP no vien inserìi i brani mejo, po' publicà so bootlegs giaponéxi de alto livèło). Ma xe bastansa parchè Clapton se rimeta in pista, e co' 461 Ocean Boulevard torna a rugìr ne ła radio e sui xiradischi de tuti i fans. Ła canson piłota xe I Shot the Sheriff, za de Bob Marley (a l'epoca ancora autor jamaican non conosùo). Infati Clapton xe anca famoxo par el so gusto nel sèlier nel repertorio de altri artisti canson da slansàr a nòva vita.

Se rimarca 'ntel disco anca Let it Grow, che sona lenta e fasinoxa, ma co' na seràda che no se podeva desmentegàr e un mucio bèła, de prónta harrisoniana, precedente al xiro de acordi de Stairway to Heaven (1970). Se Eric Clapton (1970), come dito atribuibiłe in larga parte a Delaney & Bonnie, par quanto de otimo livèło, xe un fià 'na falsa partensa, 461 Ocean Boulevard (1974) segna el scominsio efetivo de ła carièra sołista de Clapton deventando de soravìa l'archetipo de tuti i so albun: tanti altri ne seguirà nei trent'ani drìo ma ricalcarà tuti, co' maxor o minor suceso, ła formùła vinsente de questo, blues, ballads e laid-back, co' intràe de chitara dal saor pontìo.

In ogni caso l'atività de studio xe funsionàl a quèła dal vivo, indove Clapton tira senpre fora el megio de sé, fora quando ch'el torna ad esare piciàda de demoni e dipendense varie. Intra i dischi dal vivo dei ani setanta se ricorda E.C. Was Here co' grandi asołi blues e Just One Night, in cui Clapton riese a render briłanti sfiamegànti anca conpoxision che in studio se gavea pałentà dèbełe.

I ani otanta e ła rinasita del Blues (1980 - 1998)[canbia | canbia el còdexe]

I ani otanta vede un Clapton un mucio łigà a tuto queło che xe in voga e senpre intrigà co'l gossip e'l jet set pìtosto che co'l blues. 'Ntel 1998 co'i Dire Straits el partesipa ad un concerto in onor de Nelson Mandela. Xe 'na tapa del steso tour che interesa i do amighi Mark Knopfler ed Elton John. Ła sesion straxordenaria de amighi gavarà ła so sima durante el concerto in beneficensa de Knebworth del 30 xugno 1990.

El 20 marso 1991 capita un fato che rabalta tuta ła so vita, el peder el so fiol picenin par 'na fenestra lasàda verta da 'na desmèstega. Conor, el fantuìn, gera nato el 21 agosto 1986 da ła rełasion avùa co' Lory Del Santo. Co' nase sta disgrasia el gavea soło che quatro ani quando ch'el xe casca dal 53° pian de un gratacieło de New York in cui se trovava co'ła mare. Clatpon xe desfà ma 'l dołor ghe dà 'na descantàda patòca. Ispirà da sta desgrasia el conpone Tears in Heaven, canson dedicà pa'l so putèło sconparso e infìn se verxe da nòvo al blues. Ła prima publicasion de Tears in Heaven risałe a quando ch'el gà anca reałixà ła cołona sonora del film Rush (1992), dove ła canson, desferensiandose da ła version acustega che conparirà in "unplugged", xe reałixàda co' ła chitara ełetrica. Xe pròpio sto film de nome Rush che a Eric ghe dà l'ocaxion de esprimer, come ghe gera stà richiesto dal regista, 'na muxica che daga l'emosion a chi che ła scolta e gà perso 'na persona amàda. Altre canson conponeste so l'onda de emosion de ła morte de Conor xe: My father's eyes e Circus has left down canson in cui Clapton esprime el so dołor sia par aver perdùo so fioło che pa'l fato che no gheva mai conosùo so pare reàl.

Doyle Bramhall II, Derek Trucks, Steve Jordan, Eric Clapton, Willie Weeks


El trova el modo par verxer el cuor al so publico e far veder łe ferìe ch'el gavea, ła forsa sua e l'amor ch'el gà pa'l blues vien 'ntel 1992 quando vien registrà el MTV Unplugged. Come richiedeva ła trasmision tełevixiva, se podeva uxar soło chitare acusteghe e non strumenti. ełetrici. El musical che ghe ne vien fora xe daseno maxengo, dove anca i nùmari che pararìa non de suceso in version acustiche, se vede invese che i rivitałixài e pareciài come fuse nòvi, un su tuti Layla strafamoxa part tanti ani ne ła so prima version, Layla deventa un mucio famoxa ne ła version acustica, un ritmo swing dołente che no gà gnente de simiłe al finàl rock pien de smàra che gavèa sto tòco trent'ani prima.

El diso ciapà da ła trasmision deventa un best dando cussì vałór ancora a Eric Clapton. Anca łù colpìo dal suceso inatexo a livèło mondiałe, el continua a sercàr el vero blues e 'ntel (1994) el publica From the Cradie, albun rigoroxaménte in stiłe ełetrico e blues.

Tenpi recenti (1999 - Ancùo)[canbia | canbia el còdexe]

Eric Clapton in concerto a Londra el 28 xugno 2008

'Ntei ultimi ani Eric Clapton xe pasà da produsion mainstream a dischi co' ciàro saor blues (i ultimi de sta serie xe Ne and Mr. Johnson e Session for Robert J., tributi a Robert Johnson).

Intanto Clapton gà anca avùo un fià de tenpo de fondàr 'na fondaménto par la cura e ła riabiłitasion dei alcołisti (Fondaménto Crossroads co' sede ad Antigua), 'ntel 1999 el gà organixà un concerto al Madison Square Garden de New York indove xe stà publicà un DVD el cui titòło jera Eric Clapton & Friends in Concert A benefit For The Crossroads Centre At Antigua, mentre 'ntel 2004 e 'l 2007 el gà organixà un gran festival de ła chitara blues, el Crossroads Guitar Festival, de cui xe stà publicà do DVD dopi.

Durante el mexe de agosto del 2005, l'albun Black Home xe stà tanto criticà: masa orientà e mainstream, vien caraterixà da un tono bastansa tìvio, dove ła maravegioxa Stratocaster no "rugise" altro. Qualchiduni gà fato trapełàr la notisia che in realtà łe canson de Black Home fuse stàe registràe 'vanti del disco-omagio a Robert-Johnson, ma che ła caxa discografica, considerandołe de manco intarese de łe stese cover, gà preferìo intardigàr l'insìda del materiàl orixinàl preferìndoghe el tributo al vècio "omo del blues".

'Ntel 2006 vien publicà The Road to Escondido, albun indove el cołabora co' J.J Cale cołù che gheva scrito Cocaine. 'Ntel grupo l'è prexente anca Billy Preston ne ła ultima session in studio, pochi mexi 'vanti de ła so sconparsa. Dal 2006 el se exibise anca in Itałia fasendo 'na serie de date come par exenpio al Lucca Summer Festival el 7 lujo in conpagnìa de ła Robert Cray band, a Umbria Jazz l'8 ługio, e a l'Arena de Verona, ancora 'na volta co' Robert Cray davanti a un publico pien de spetadori: i gà fenìo el concerto dotando in Crossroads. El tour gà visto concerti memoràbiłi sold out co' l'amigo Stevie Winwood e l'altro amigo Jeff Back.

'Ntel setenbre del 2010 xe insìo el novo disco, co' al so interno do inediti, dal senplice titoło Clapton. Dito come che dixe Clapton un albun "vegnìo da so posta", un tributo a łe grande mełodie blues e jazz ch'el gaveva scoltà co'l gera bòcia.

El 24 xugno 2011 el se gà exibìo in un concerto de beneficensa co' Pino Daniele 'ntel stadio de Cava de' Tirreni danansi a sìrca 17000 spetadori.

El 13 setenbre 2011 xe stà publicà l'albun live (CD e DVD) Winton Marsalis & Eric Clapton Play the Blues[1], registrasion de un concerto che ghe xe stà in avrìl del steso ano al Rose Theatre de New York, rexultado de 'na fełiçe cołaborasion co'l virtuóxo tronbetista Wynton Marsalis. Conpagnà da 'na vera e pròpia big band jazz, i do muxicisti va in serca de łe raìxe del blues, intrepretando soratuto brani tradisionałi, cofà Just a Closer Walk with Thee, ma anca ła canson clasica de Clapton, Layla prexentà in un'altra nova version.

Pa'l 12 marso 2013 xe prevista l'insìda del nòvo albun Old Sock che se refà a queło che ło gaveva precedùo. L'albun gà do canson inedite e 'na cołesion de alcuni tra i brani che Clapton preferìse, che mostra cussì ła so cultura muxicałe. Da Leadbelly a J.J. Cale; Peter Tosh e George Gershwin; Hank Snow a Gary Moore e TajMahal, sto laoro xe dedicà a tuti quełi artisti che gà ispirà ła rica vita de muxica de Eric. L'albun xe caraterixà da standard romantici dei ani trenta, reggae, soul, rock e conprende anca 'na cołaborasion inportante co' Paul McCartney, par creàr 'na esperiensa che fa parte de ła muxica de Clapton".

Discografia[canbia | canbia el còdexe]

Exquisite-kfind.png Par saverghene de pì, varda ła pajina Discografia de Eric Clapton.


Albun studio[canbia | canbia el còdexe]

B.B. King e Eric Clapton

Xontando anca tuti i live ch'el gà fato, Clapton gà registrà in totàl pì de 300 albun fra casete, LP e CD.

I grupi ch'el gà avùo[canbia | canbia el còdexe]

Clapon, inaxonta al fato de aver fato tanti concerti co' i supergrupi nei primi ani de ła so carièra, el xe stà speso 'conpagnà nei so tour da nùmaroxi artisti un mucio conosùi, donca non soło cofà dei "ospiti" par alcuni dei so concerti ma cofà menbri del so grupo. Tra staltri da ricordàr i basisti Pino Palladino (Who, Paul Simon) e Donald Dunn (The Blues Brothers, i tastieristi Steve Winwood (Traffic, Spencer Davis Group) e Greg Phillinganes (Toto), i bateristi Phil Collins che gà sonà nei albun Behind the Sun, August e Journeyman) e Andy Newmark (Sly & The Family Stone.

Nei concerti del 2009, el grupo, cavando łe coriste, el basista e 'l tastierista, xe canbià tra łe date asiatiche/oseaniche, eoropee e 'mericane e gà visto intrigà :

Curioxità[canbia | canbia el còdexe]

Nei ani che Clapton sonava co' i Yardbirds, a metà dei ani '60, so'i muri in xiro par Londra se vedeva de łe scrite che dixeva che Clapton gera un dio : Clapton is God.

Onorificense[canbia | canbia el còdexe]

Comandante dell'Ordine dell'Impero Britannico - nastrino per uniforme ordinaria

Comandante dell'Ordine dell'Impero Britannico

— 2004

Note[canbia | canbia el còdexe]

  1. http://wyntonmarsalis.org/discography/title/wynton-marsalis-and-eric-clapton-play-the-blues
  2. New Eric Clapton Album 'Old Sock' Due in March
  3. Buddy Guy | AllMusic
  4. Il Messaggero
  5. The Secret Life of Felipe Massa

Voxe łigàe[canbia | canbia el còdexe]

Bibliografia[canbia | canbia el còdexe]

Altri progeti[canbia | canbia el còdexe]


Łigadùre foreste[canbia | canbia el còdexe]

Gnome-globe.svg Eric Clapton su DMoz (Segnala su DMoz un collegamento pertinente all'argomento Eric Clapton)