Ferrari

Da Wikipedia, l'ençiclopedia libara.
Ferrari
Logo
フェラーリ本社前 (36309429124).jpg
StatoITA
Forma sosietariaSocietà par Asion
Fondasion1947
Fondada daEnzo Ferrari
Sede prinsipałe* Modena (sede łegałe)
GrupoFerrari N.V.
Persone ciaveJohn Elkann, prexidente
  • Louis Carey Camilleri, aministratore dełegà
  • Piero Ferrari, viceprexidente
  • Setoreautomobiłìstego
    ProdotiAutoveture
    ControłaeScuderia Ferrari
    Faturà3,766 miliardi de € (2019)
    utiłe neto699 milioni di € (2019)
    Dipendenti3200[1] (2019) e (2020)
    www.ferrari.com/

    Ferrari S.p.A. ła xe na caxa automobiłìstega itałiana fondada da Enzo Ferrari inte el 1947 a Maranello in provinsia de Modena.

    Produtora de automobiłi sportive d'alta fasa e da corsa e inpegnada inte l'automobiłismo sportivo, xe ła pì titołada inte el canpionato del mondo de Formuła Uno, indove ła ga concuistà cuindexe titołi piłoti e sedexe costrutori, nonché una de łe pì vinsenti inte łe conpetision par veture Sport, Prototipo, Sport Prototipo e Gran Turismo cofà el canpionato del mondo Sportprototipi, co dodexe titołi costrutori otegnesti e el canpionato del mondo Endurance FIA, indove che deiten sìncue titołi costrutori GT e tre titołi piłoti GT. Ła se ga afermà pì volte in clàseghe gare endurance cofà ła 24 Ore de Le Mans, ła 12 Ore de Sebring e la 24 Ore de Daytona e in gare so trasà stradałe cofà ła Targa Florio, ła Mille Miglia e ła Carrera Panamericana.

    Łe so orixeni sportive łe risałe xa al 1929, co Enzo Ferrari ga daxesto orixene a Modena a ła Scuderia Ferrari, che ła xe anca al dì de ancò ła divixion prinsipałe del reparto corse de ła Ferrari, siando da senpre inpegnada in Formula 1 e avendo coresto inte el canpionato del mondo Sport Prototipi fin al 1973. El dipartimento Ferrari Corse Clienti invese el se ocupa del suproto tramite ła sesion conpetision GT ai team clienti che core inte i canpionati GT prexenti a liveło internasionałe, el canpionato del mondo Endurance FIA inansituto e de ła xestion de Ferrari Challenge, XX Programmes e F1 Clienti.

    El sìnboło uficiałe xe el cavałin ranpante, che deriva da cueło in uxo durante ła prima guera mondiałe da l'aviator itałiano Francesco Baracca. Cedesto personalmente da ła mare de Baracca come portafortuna a Enzo Ferrari inte el 1923, el sarìa devegnesto l'enblema de ła marca Ferrari e del reparto corse. El canpo xało, indove xe rafegurà el cavałin ranpante, xe stà sernìo da Enzo Ferrari in cuanto se trata de uno dei cołori del stema de ła sità de Modena.

    Inte el 2013 e inte el 2014 ła marca xe stà reconosesta cofà ła pì influente al mondo e inte el 2015 xe stà poxisionà al 295° inte ła clasìfega "The most valuable brands of 2015" del sito web de ła Brand Finance co un vałor de 4,8 miłiardi de dołari[2].

    Dal 21 łujo de 2018 l'axienda, come ła controłante Ferrari N.V. xe guidà da Louis Carey Camilleri, in cuałità de aministrador dełegà, mentre John Elkann ne xe el prxidente. Entranbi xe sucedesti, pochi xorni prima de ła so morte, a Sergio Marchionne che guidava l'axienda dal 2014, co gaveva sostituìo Luca di Montezemolo.

    Storia[canbia | canbia el còdaxe]

    Ła Scudaria Ferrari[canbia | canbia el còdaxe]

    Enzo Ferrari in una de łe rare intarviste rełasàe, co a łe spałe el cavałin ranpante, sìnboło de ła Ferrari.

    Enzo Ferrari ga fondà ła Scudaria Ferrari, che ła xe oncora deso ła divixion prinsipałe del reparto corse de ła Ferrari, el 16 de novenbre del 1929 a Modena. Fin al 1932 ła Scudaria Ferrari ga recoverxesto el ròło de fiłiałe tècnego-agonistega de l'Alfa Romeo, mentre a partir dal 1933 ne xe devegenesta a tuti i efeti el reparto corse inisiando a ocuparse de progetasion oltra a ła xestion de łe veture da conpetision. Tałe inpegno xe continuà co suceso fin a ła fin del 1937, cuando ła scudaria xe stà desfà poiché l'Alfa Romeo ga ałestìo un novo reparto corse interno guidà dal steso Ferrari.

    Fondasion de ła Auto Avio Costruzioni[canbia | canbia el còdaxe]

    Dopo aver łasà sto incargo inte el 1939, el 13 de setenbre del steso ano Ferrari ga fondà a Modena na caxa automobiłìstega, l'Auto Avio Costruzioni, in te'l steso łogo indove fin a do prima gaveva sede ła Scudarìa Ferrari. No xe stà uxà ła denominasion Ferrari a cauxa de clauxołe che łigavva Ferrari a l'Alfa Romeo e che ghe inpediva de utiłixar el pròpio cognome so łe automobiłi da łu produxeste. Ste clauxołe xera sta vałide fin a tuto el 1944.

    Ła prima vetura de l'Auto Avio Costruzioni, ła 815, xe stò costruìa inte el 1940 in sołi do exenplari. Tutavia con l'avento de ła segonda guera mondiałe l'atività automobiłìstega ła xe stà sospexa e łe comese de l'axienda łe xe devegneste prinsipalmente ła costrusion de conponenti par vełivołi miłitari. Inte el 1943 ła sede ła xe stà spostà a Maranello e, dopo ła xe vegnùa bonbardà dai Ałeai inte el 1944, ła xe stà ricostruìa inte el 1945.

    El marchio automobiłistego Ferrari[canbia | canbia el còdaxe]

    Finìa ła segonda guera mondiałe, grasie a ła scadensa de ła clauxoła dei cuàtro ani, el 12 de marso 1947 Enzo Ferrari ga fondà el marchio automobiłistego Ferrari. Ła prima automobiłe a portar sto nome xe stà ła 125 S, che ga debutà in gara a Piacensa l'11 de magio del steso ano, guidada da Franco Cortese, primo piłota e cołaudator de ła Caxa[3]; l'exordio se ga concludesto co un ritiro a ła segonda gara, che se ga disputà a Roma do setemenae drìo, Cortese ga otegnesto ła prima stòrega vitoria Ferrari. Inte el 1960 l'Auto Costruzioni Ferrari ga canbià denomenasion in SEFAC (Società Esercizio Fabbriche Automobili e Corse), devegnendo senplisemente Ferrari inte el 1965.

    Da ła cołaborasion, a ła partecipasion, al controło FIAT[canbia | canbia el còdaxe]

    Ingreso de ła fàbrega de ła Ferrari a Maranello

    El Grupo Fiat ga intervegnesto in favor de ła Ferrari xa inte el 1955, finansiando par un cuincuenio el sviłupo de ła Scudarìa. Tałe desixion, nasùa par arxenar el strapoter tècnego-conòmego de ła Mercedes che gaveva concuistà i canpionati de Formula 1 del 1954 e del 1955, oltre a ła Mille Miglia del 1955, ga contribuìo a far vinser a ła Ferrari i canpionati del 1956 e del 1958, oltre a łe Mille Miglia del 1956 e del 1957. In te i primi ani sincuanta jera stà anca tentà ła stada de far rinaser l'acordo co l'Alfa Romeo ma, daspò alcuni scanbi de proposte, l'ipotexi xe stà abandonà da ła Caxa miłanexa che ormai vedeva ła Ferrari come antagonista sportiva più che come posìbiłe partner.[4]

    Nonostante i grandi sucesi sportivi ła Ferrari xe cadesta in una greve crixe drìo l'abołision de łe corse so strada, decretà in bona parte del mondo dopo el dixastro de Le Mans del 1955 e, anca in Itałia, dopo ła tragedia de Guidizzolo del 1957. L'ełiminasion de tałe gare gavea de fato reduxesto ła clienteła de ła Ferrari, prinçipalmente conponesta da facoltoxi gentleman-driver come Aymo Maggi o Giannino Marzotto, che se contendeva ła redota produsion de veture da conpetision del Cavałin.

    Ferrari 488 GTB del 2015, exenpio de vetura stradałe de ła Ferrari

    In tałe cuadro economego Henry Ford II ga provà ad acuistar ła Ferrari, in modo da fruir del so prestigio co un prevedìbiłe ritorno de imàjine par l'axienda da łu posedesta. Conduxesta da Lee Iacocca, inte el majo 1963 ła tratativa pareva inviada a na rapida concluxion, cuando se xe arenà so ła conditio sine qua non ponesta da Enzo Ferrari in merito a l'intocabiłità de ła so autonomia sìrca łe decixion da tor in te l'anbito del reparto corse; al rifiuto de Iacocca ga seguìo ła mediata e definitiva rotura del negosià. El naufragio de łe tratative par ła vendita de l'axienda a ła Ford ga inescà un'garba bèga tra ła Ferrari e el cołoso industriałe statunitense che ga metesto in seria dificoltà ła Caxa de Maranello, fin a sbocàr in te ła clamoroxa protesta del Drake che, non sentindose puxà da łe autorità sportive nasionałi, inte el 1964 ga deçidesto de restituir ła łiçensa sportiva itałiana.

    Ła FIAT xe intervegnìa inte el 1965 anunciando ła cołaborasion tra łe do axiende, al fin de atuar un comun programa par ła costrusion de propulsori sportivi, che ga decretà ła nasita de ła marca Dino. In sto modo ła Ferrari ga roto l'ixołamento in cui jera stà confinà e ga trovà el nesesario puxo par ła produsion in pìcoła serie de łe so veture da strada.

    Inte el 1969 ła Ferrari ła xe entrà far parte del Grupo Fiat, ma ła ga mantegnesto comuncue ła pròpia autonomia:[5] Drìo seguito l'incontro del prexidente de ła Fiat dott. Giovanni Agnelli co l'ing. Enzo Ferrari xe stà decixo, inte el preminente intento de asicurar a ła Ferrari Automobili continuità e sviłupo, che el raporto de cołaborasion tècnega in ato co ła Fiat el se trasformarà entro l'ano in partesipasion paritetega, op. cit., Comunicà stanpa conxonto Fiat-Ferrari del 21 de xugno 1969[6]

    Dai ani otanta al XXI secolo[canbia | canbia el còdaxe]

    Ferrari 458 Italia GT3 del 2014 a ła 24 ore de Barsełona, exenpio de vetura da conpetision de derivasion de serie

    A ła sconparsa de Enzo Ferrari inte el 1988, el pacheto asionario xe devegnesto par el 90% del Grupo Fiat, mentre ła parte restante xe andà al fiòło Piero Lardi Ferrari. Sto ùltemo xe restà drento a l'axienda cofà viceprexidente. Contestualmente, a partir da sto periodo, i marchi Ferrari e Scudaria Ferrari ga scominsià a èsar uxà par un vasto merchandising.

    Inte el novenbre 1991 Luca Cordero di Montezemolo, in precedensa diretor sportivo de ła Scudaria Ferrari dal 1974 al 1977, xe stà nomenà prexidente de l'axienda. Inanxonta el ga avùo el ròło de aminstrador dełegà fin al 2006, col xe stà sostituio da Amedeo Felisa.

    Inte el 2006 el 5% de łe asion xe stà acuixio da na soçietà finansiaria dei Emirati Arabi Unìi, ła Mubadala, che inte ła capitałe de Abu Dhabi ga promovesto anca ła costrusion del Ferrari World, el pì gran parco a tema al mondo. El Grupo Fiat xe tornà in poseso de sto 5% inte el corso del 2010.[7]

    I ani 2010[canbia | canbia el còdaxe]

    Inte el majo del 2013 ła Ferrari xe stà incorporà inte ła sosietà de derito ołandezo New Business Netherlands N.V., renomenada Ferrari N.V., inte l'otobre 2015 co ła xe stà cuotà a ła Borsa de New York. Inte el zenaro 2016 ła Ferrari N.V. ła xe stà scorporà da Fiat Chrysler Automobiles, el grupo automobiłistego nasesto da ła fuxion intra Fiat S.p.A. e Chrysler Group, par cuotarse a ła Borsa Itałiana e pasar cusì a far parte del grupo Exor.

    Notasion[canbia | canbia el còdaxe]

    1. In Ferrari cinquemila euro di bonus. Lingambo vardà el 1º giugno 2018(archivià dal lingambo del prinsipio n'te ła data: 15 aprile 2018)
    2. (EN) Best Global Brands | Brand Profiles & Valuations of the World's Top Brands. Brandirectory. Lingambo vardà el 5 maggio 2017.
    3. Sergio Chierici. Franco Cortese, il primo pilota Ferrari. VirtualCar, 14 giugno 2007. Lingambo vardà el 5 maggio 2017(archivià dal lingambo del prinsipio n'te ła data: 4 aprile 2018)
    4. Giovanni Canestrini, Fiat corre Ferrari, L'Automobile, n.27 del 1969
    5. Enzo Ferrari. Ferrari. Lingambo vardà el 15 maggio 2011(archivià dal lingambo del prinsipio n'te ła data: 8 giugno 2011)
    6. Ferruccio Bernabò, Tra la Fiat e la Ferrari annunciato l'accordo, La Stampa, 22 giugno 1969, pag.15
    7. Riccardo Guerra. Fiat riacquista il 5% di Ferrari venduto agli arabi. 15 novembre 2010. Lingambo vardà el 5 maggio 2017.

    Altri projeti[canbia | canbia el còdaxe]

    Linganbi foresti[canbia | canbia el còdaxe]


    Controło de autoritàVIAF (EN193720481 · LCCN (ENn83123873 · GND (DE2092682-0 · BNF (FRcb12088910t (data) · NDL (ENJA00697031 · WorldCat Identities (ENn83-123873
    Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Ferrari&oldid=1014972"