Hellas Verona Football Club

Hellas Verona Football Club
Vestiàrio
Dati
Sorte	club de bałon
Creasion	1903
Atività
Spor	bałon
Liga	Serie A (2019–)
Stàdio	Stadio Marcantonio Bentegodi (it) : Verona (Itàlia) . 31 045
Spònsor	Air Dolomiti (it)
Governo d'impresa
Presidènsa	Maurizio Setti (it) (2012–)
Ałenador	Gian Piero Ventura (it) (2006–2007); Maurizio Sarri (it) (2007–2008); Fabio Grosso (it) (2018–2019); Ivan Jurić (it) (2019–2021); Eusebio Di Francesco (it) (2021–2021); Igor Tudor (it) (2021–2022); Gabriele Cioffi (it) (2022–2022); Marco Zaffaroni (it) (2022–2023); Marco Baroni (it) (2023–2024); Paolo Zanetti (it) (2024–)
Filiałi	Women Hellas Verona (it)
Sito web	hellasverona.it
	Pozision

El Hellas Verona Football Club, ła xe na scuadra de bałon vèneta de serie A, fondà inte el 1903 col nome de Hellas inte ła sità de Verona. In tei ani pasadi ła xe stà senpre ciamada soło Verona, parché la jera l'unjoła scuadra çitadina che la xugava in tei canpionai de Serie A o de Serie B. Al dì d'ancó, sicome che anca chel'altra scuadra de Verona, el Ceo, la se ga fato conósar in tuta Italia, de solito par distìnguarle se parla de Hellas e Ceo o Chievo.

L'Hellas el pol vantarse de esar stà, da cuando gh'è el canpionato co on xiron solo, l'unjoła scuadra de balòn (insieme al Cagliari) a ver vinsesto on scudeto (inte ła stagion 1984-85) anca se la xe na scuadra "provinçiałe", fora dal giro de chełi che conta. Chełi ani là del scudeto el xe stà el periodo mejo de ła squadra, che el xe rivà par tri^[1] olte inte ła finałe de Copa Italia. Ła scuadra ła gà xugà 24 canpionai de serie A e 49 de serie B (rècor de prexense inte ła serie cadéta, insième col Bresa).

I cołori i raprexenta la çità, e inte ła divixa de ła squadra gh'è anca el stema de Verona (na croxe xała so fondo blu). Du soranòmi de ła squadra i xe "i mastini" e "i scalixeri", che i se riferise a Mastin I de ła Scala de ła Signoria de ła Scala, che el gà tegnù la sità intel tredaxexemo e in tel cuatordaxexemo secoło. El stèma aràldego dei Scalixeri el se cata so ła maja che ła vien doparada par xugar e in tel marchio soçetario cofà on'imàjine stiłixà de do mastini che i varda in diresion oposte.

Łe orìxane e i primi ani

Mesa sù inte el 1903 da un pochi de studenti del liceo clàsico Scipione Maffei, ła squadra l'è stà ciamà Hellas, che l'è el nome co cui i Greci i ciama ła só patria, scoltando ła proposta del profesor Corubolo, che l'insegnava apunto el Greco. In chei ani là el balón el se zugava sul serio solo inte łe grande sità del Nord-Ovest del'Italia, e la major parte dei Veronexi ghe interesava gnente de sto spor. Parò, quando che dó squadre de ła sità łe gà decixo de nar a zugar in Arena, la xente la gà scominsià a intersàrsene.

In sti primi ani l'Hellas l'era una de łe tri-quatro squadre che zugava a livel muniçipałe, batendose coi nemiçi de ła Bentegodi par decidar ci era el più forte in çità. Inte ła stagion 1907-08 l'Hellas el sà méso a zugar contro squadre dela rejon, scominsiando na rivałità col Vicensa tanto sentìa fin dèso.

Inte el 1911 la squadra la gà scominsià a parteçipar al canpionato rejonałe, che fin al 1926 l'era ła faxe de quałificasion par el titoło nassionałe.

Inte el 1919, dopo la Prima guera mondiałe, la squadra la sà fuxo insieme coi rivali del Verona, canbiando el nome in Hellas Verona. Dal 1926 al 1929 inte el Campionato Nassionałe gh'era tute le mejo squadre dei vari grupi rejonałi, e l'Hellas Verona el gh'era anca lu, anca se no'l faxea grandi robe.

Al'inissio de ła Serie A, in tel 1929 quando che el Canpionato Nassionałe l'è deventà un canpionato de profesionisti, l'Hellas el sà fuxo co altre dó squadre veronesi, el Bentegodi e ła Scaligera, deventando A.C. Verona e zugando inte el canpionato de Serie B. Ghe vorà comunque 28 ani parché el riva in Serie A. Dopo de ver zugà in A par la stagion 1957-58, inte el 1959 la squadra la sà fuxo de nóvo co n'altra squadra veronexe (che se ciamava anca sta chì Hellas) e i sà méso el nome de Hellas Verona F.C, in omàgio a łe só origini.

I suçesi dei ani 70 e 80

El scudeto del 1984-1985

La strutura de ła squadra la xera bona che no se sa: i gh'avea vinto el canpionato de serie B, xera 'ndai do olte de seguito in finale in Cópa Italia e i gh'avea pena fato do canpionati in serie A in dove che a un terso del canpionato i xera primi in clasifica. El tènico el xera uno tipo svejo, brao che no se sa; i tifoxi i tegnea su ła squadra e i ła inzitava senpre a far bèn. In più 'ntel'istà del 1984 ze rivà anca do zugadori foresti bei ciosi, el nassionałe todesco Hans Peter Briegel e el nassionałe danese Preben Elkjear Larsen, che i ga dato subito a ła squadra cheła parte de esperiensa e de potensa che l'era mancà inte i ani prima.

La formassion-tipo che ga vinto el canpionato la xera: Garella; Ferroni I, Marangon I; Briegel, Tricella, Fontolan I; Fanna, Volpati, Di Gennaro, Galderisi, Elkjaer; el mister l'era Osvaldo Bagnoli. Tra le riserve, ghe jera Luciano Bruni, Luigi Sacchetti e Fabio Turchetta.

Tra łe partìe da tegnerse in mente de chel'ano ghe n'è almanco dó: la prima l'è queła in caxa contro ła Juve inte el 14 de otobre 1984 (quinta giornada), vinta 2-0 co Elkjaer che gà fato un gol descalzo a Tacconi, parché el gavéa perso na scarpa durante el zugo; la seconda l'è queła al stadio "Friuli" de Udine (10 de febraro 1985, disdotéxima giornada), quando i veronexi i gà batùo l'Udinexe par 5-3 inte na partìa incredibiłe, metendo a taxer cuei che dixea che i zugadori ormai no i gh'avéa più forsa 'ntełe ganbe. Tra i altri epixodi de ła stagion: tri vitorie una dopo l'altra (conpresa na partìa mìa façile vinta contro la Roma 1-0), che le ga fato védar a tuti che la squadra l'era oncora svéia e un ganba anca se chełe altre squadre łe stava rimontando; e un pari 1-1 a Bergamo co l'Atalanta, che gà fato vénzar el titoło na giornada prima de ła fine.

Chel'ano lì el Verona el gà finìo co quìndexe vitorie, trédexe paregi, solo do sconfite e 43 ponti, 4 piesè del Torìn, col'Inter e la Sampdoria in tersa e quarta poxission.

El scudeto del'Hellas Verona de Osvaldo Bagnoli, vinto propio quando tuti i piesè brai canpioni de bałon del'epoca (Platinì, Zico, Maradona, Socrates, Rummenigge ecc..) i zugava in Italia, l'è stà na roba che probabilmente no vegnarà mai più, forsi l'ultimo de un çerto modo de zugar a balon. L'è stà un scudeto stramerità e sensa màcie, otegnù dopo ła longa cavalcada da sołi scominsià inte ła prima giornada de canpionato, che l'ha podùo sucédar anca grassie al fato che in chel'ano lì, par l'unica olta in tuta ła storia del calcio italian, łe dexignasion dei arbitri jè stà fate col sistema del sortegio totałe.

Ła scuadra canpion d'Italia 1984-85

Hans Peter Briegel, Luciano Bruni, Antonio Di Gennaro, Dario Donà, Pietro Fanna, Mauro Ferroni, Silvano Fontolan, Giuseppe Galderisi, Claudio Garella, Preben Elkjær Larsen, Antonio Lonardo, Fabio Marangon, Luciano Marangon, Luigi Sacchetti, Sergio Spuri, Roberto Tricella, Franco Turchetta, Domenico Volpati, alenator Osvaldo Bagnoli.

In Eoropa

L'Hellas Vèrona ga debutà nele competision internasionali partesipando al torneo Anglo-'Taian in tei primi ani 70, Vegnendo fora prima tra le squadre 'taiane inte un torneo dominà da quele inglesi. In tel 1982-1983, sicome la gavea vinto el campionato de serie b l'ano prima, l'Hellas Verona ga partesipà al Mitropa Cup, in doe parò no ga otegnesto risultadi degni de nota.

L'ano dopo finalmente la ga debutà inte na competision internasional de gran livelo ma la squadra in Coppa UEFA in tel 1983-1984, dopo che la gavea sorpasà el primo turno co na bela vitoria sul campo dela Stela Rossa de Belgrado, le sta eliminà dai austriasi de lo Sturm Graz (2-2 a Verona, 0-0 a Graz).

La stagion 1985/86 la ga visto la squadra in Copa Campioni grasie alo scudeto che la gavea vinto l'ano prima. In tei sedicesimi l’Hellas la ga incontrà el Paok de Salonico, in tei otavi, la ga catà laJuventus che la gavea vinto la copa l'ano prima e quindi de dirito amesa al torneo de l'ano dopo. La partia de andada l'era al Bentegodi e i ga fato 0-0. Quela de ritorno i ga xugà aTorin a porte serà (par via dela sansion che l'Uefa ga dato ala Juve l'ano prima par colpa dela final de l'Heysel Bruxelles contro el Liverpool) finia 2-0 par la juve, anca se l'arbitro Wurtz ghe na combinà una par color.

Ani in ùltema

El derby col Ceo

Inte ła stagion 2001-02, quando che el Ceo l'è rivà in Serie A, Verona l'è deventà la quinta sità tajana ad averghe un dèrbi de Serie A (el dèrbi de ła Scala), dopo de Milàn, Roma, Torìn e Genoa. El primo dèrbi, zugà al'undicesima giornada, quando che łe do squadre veronesi le jera inte i primi quatro posti de ła clasìfica, l'è stà vinto dal'Hellas par 3-2; el Ceo el gà vinto el ritorno co un 2-1.