Bricoła

Na bricoła ła xe praticamente un paracaro che invese de parar el caro, ła te dixe dove ti pol ndar sensa finir in barena. łe xe dei pałi de łegno (mejo se de castagnèr) che dełimita i canałi navigabiłi fora Venesia.

łe ga diverse forme e dimension: quełe che ga un soło pało łe xe quełe che marca el canal, quełe che ga do o tre pałi łe marca el prinsipio e ła fin del canal. Nei posti deła łaguna dove do o più canai i se tagia, ghe xe bricołe a tre pałi che te dixe dove ti ga da svoltar.

Anca se ghe xe łe bricołe, se no se xe pratici se va riscio de perderse, xe più fasiłe che queło che se posa pensar. Serve ricordarse che ła łaguna ła sè granda e piata, e che ghe xe posti dove no se vede do cocai, dove anca łe bricołe finise, ma el canal no!

Dopo ghe xe łe bricołe impiantae ai angołi dełe fermate dei vaporeti, e ste quà serve a parar i colpi che i batei ghe dà.

Ghe xe anca łe bricołe più picenine davanti ai pontiłi dei pałassi nobiliari o dei pałassi deła publica aministrasion, coi rispetivi cołori o stemi.

In fin dei conti łe xe i bordi dełe strade deła łaguna.