Pałaso de ła Razon (Pàdoa)

Pałaso de ła Raxon visto da piasa de ła Fruta

El Pałaso de ła Razon, ciamà in sità semplicemente "el Sałon", el xe un pałaso in sentro a Pàdoa che el se trova tra Piasa de łe Erbe e piasa de ła Fruta. Costruio in origine inte el 1219, el gà ciapà ła so forma atuałe inte el 1309. El pian superiore xe ocupà da una de łe più grandi sałe pensii d'Italia, che gera stà al'epoca ła più granda del mondo; ła misura circa 80 metri par 27 e ła gà na altesa de quasi 40 metri, col sofito de legno a carena de nave roversà. El fa parte del Pałaso Comunałe de Padova. El pian superiore, el sałon vero e proprio, vien uxà par mostre de arte e queło inferiore, conosuo a Padova come "soto el sałon", xe destinà a atività comerciai de generi alimentari.

Storego

Zà inte'l 1166 esisteva so'l sito un edificio a un piano soło che gavea funsion publrhe costruio inte łe rovine de presedenti edifisi de epoca romana, dei quai ghe xe tutora tracia. Ła prima reaixasion moderna risałe al 1219 e ła ospitava tribunali e ufici finansiari, destinasion che ła gavaria conservà anca in età comunae, durante ła signoria Carareze e soto ła dominasion venesiana, fin al 1797. El pałaso el xe stà comunque senpre anca sede de comerci, e el Comun gà sempre regołà e proteto łe atività comerciałi.

Interno del sałon

Ła forma atuałe ła xe opera de frate Giovanni dei Eremitani, che tra el 1306 e el 1309 el gà fato costruire ła grande volta in legno a dó całote, el porticato e łe loge che cuerxe łe scałe. El teto xe stà rifato a capriate in legno de larice e co ła copertura in piastre de piombo. Se rivava al piano superiore co quatro diverse scałe che łe ciapava el nome dal marcà sotostante: ła Scała dei osei e queła de ła fruta in Piasa de ła Fruta e quełe dei feri lavorai e del vin in piasa de łe Erbe. Se pensa che in epoca comunae ghe sia stà un pasajo soprelevà che cołegava ła logia picoła col pałaso de fronte, l'atuae Pałaso de łe Debite, che a chel tempo el gera na prexón. Ghe xe invese oncora el pasajo che cołega al pałaso comunałe. I afreschi originai de łe sałe superiori gera stà fati da Giotto a partire dal 1306 ma i xe stà distruti da un incendio inte el 1420. Inisialmente ła parte superiore gera divixa in 3 grandi sałe, e xe stà co ła ricostrusion dopo l'incendio del 1420 che el pałaso xe sta riverto co el gran sałon unico, co i muri che se poxava su archi e piłastri co volte a crociera, su progeto del'architetto Bartołomeo Rizzo.

El 17 agosto 1757 un potente turbine gà distruto el teto e gà scovercià el pałaso. Ła recostrusion se deve a Bartołomeo Ferracina, un orołogiaro e inzegnere de ła Serenisima famoso pa' 'ver fato costruire el rełojo de piasa San Marco a Venesia e ricostruire a Basan el Ponte Vecio progetà da Andrea Paładio. Inte el 1797, co ła conquista de Venesia da parte del'exercito francexe guidà da Napoleon Bonaparte, xe sta trasferii i tribunali del Pałaso e el Sałon xe stà destinà a grandi reunion, recorense e feste popołari.

Careteristeghe

Medajon dedicà a Belzoni, meso sora ła porta del coridoio che cołega el sałon col Pałaso Comunałe

A prima vista el sałon pare retangołare, ma in realtà i quatro lati gà misure difarenti, forse par starghe drio ai canałi che girava intorno al pałaso. El teto xe in legno co na forma de arco a sesto acuto. Łe pareti del sałon xe decorà co circa 500 afreschi co motivi astrologici, sogeti rełigiosi e figure ałegoriche. A rifare i afreschi de Giotto distruti nel'incendio del 1420 xe stà Nicolò Miretto e Stefano da Ferrara. I afreschi xe divisi in tre xone orixontai e in dodexe verticałi, ripartii in oltre trexento riquadri. Oltre ai temi astrołogici e religioxi de cui ła magior parte dei afreschi trata, de frecuente xe rafigurà el leon de ła Serenisima, che gaveva conquistà Padova qualche ano prima del 1420. Inte el pavimento del sałon ghe xe na strisa bianca e nera che raprexenta el 12° meridiano che pasa par Padova.

Altri afreschi xe stà xontai più tardi, insieme a monumenti come na lapide tombałe romana, da alcuni atribuia al poeta padovan Tito Livio, e el medajon del Setecento dedicà al'esploratore padovan Giovanni Battista Belzoni. Ghe xe anca ła Piera del Vituperio, dita anca del faimento, un bloco de porfido nero su cui na volta vegneva fati sentare i debitori insolventi e i faii, che i restava in camixa e mudande e i doveva publicamente rinunciare ai so' averi prima de 'ndare in bando. Se i tornava sensa el consenso dei creditori, i doveva sentarse da novo su ła piera del Vituperio e ghe vegneva tirà tre seci de acqua. Dentro al sałon ghe xe un gran un cavało de legno che inte el 1837 xe stà regałà al Comune da ła nobiłe fameja Capodilista, i cui antenati ło gaveva fato costruire inte el 1466. Se gà creduo pa tanto tempo che el cavało fuse stà fato dal Donateło, che sempre a Padova el ghe ne gaveva fato n'altro tanto somejante, queo del Gattamelata davanti a ła cexa del Santo. Tra łe altre robe dentro al sałon, ghe xe rełoji, meridiane, altri strumenti par misurare el tempo e un pendoło de Foucault.

Marcà in piasa de łe Erbe

Sul lato orientałe del sałon ghe xe el coridojo che porta al Pałaso Comunałe e soto ghe xe intrà i do pałasi el Vòlto de ła Corda, grande arco costruio inte el 1277 che mete in comunicasion piasa de łe Erbe e piasa de Ła Fruta. El volto gà ciapà sto nome parché qua soto vegneva colpii su ła schina co na corda i buxiari, i faii, i imbrojoni e i debitori insolventi. L'angoło soto al volto el se ciama canton de łe buxie parché là se incontrava i comercianti. Ghe xe ncora soto al volto łe vece misure padovane scolpie suła piera bianca che impediva ai venditori de imbrojare i clienti.

Atività comerciałi

Al piano tera ghe xe ncora, come che e ghe senpre stae, e boteghe sora-de-tuto de zeneri alimentari, che łe conserva l'antigo incànto. I prodoti che vien vendui i xe de soito de alta quaità e i riva da tuta Itàlia, oltre a diversi prodoti locai tipeghi. Łe piase de ła Fruta e de łe Erbe xe piene de bancarełe che forma dó dei marcà più orizinałi e frequentai de Pàdoa.

Altri projeti

Altri progetti

• Wikimedia Commons

• Wikimedia Commons el detien imàjini o altri file so Pałaso de ła Raxon