Graviansa

Da Wikipedia, l'ençiclopedia libara.

Modeło:Padovan

Dona a la 26esima stimana de graviansa, la roba più evidente la xe la globosità del'adome. Canbiamenti endòcrini i se verìfega in preparassion a la latassion e i depende da la secression placentare de hPL e a quela ipofisaria de prolatina: le mamele le deventa più sode e voluminose par iperplasia de la so conponente lobulare.

La graviansa, anca ciamada gestassion, la xe un stato fisiològico de la vita de na fémena de mamìfaro, durante el quale un o più fioli i se svilupa al so interno. El contegnudo de la cavità del'ùtero, òrgano co la funsion de rissévare la fiolada par sto perìodo, toe el nome de enbrion par le prime 8 stimane dopo del consepimento e feto par quele che ghe resta. El primo perìodo xe importante pa la formassion dei òrgani de la nova forma de vita, el secondo xe più caraterizà da la sucessiva maturasion e, soratuto, espansion de le parte del corpo, che el cresse creando n'espansion visìbile a livelo del ventre de la dona. La durata mèdia signada come zusta par la graviansa de la spece umana xe de 37-42 stimane, intorno a 9 mesi.

Miga solo i canbiamenti del novo organismo in formassion i ga relevansa mèdega: anca a livelo de la mare avien tuta na serie de adatamenti fisiològissi che i serve a sostegnere sta nova forma de vita.

  • L'aumento de peso mèdio el gira intorno a 1 kg par mese, co un massimo normale de 12 kg: xe dovudo in bona parte a la créssita dei tessudi del feto sostegnuda dal'aumento del petito de la dona, un dei sìntomi ciave par el sospeto de graviansa. Va dito che parò el peso mèdio de un neonato a tèrmene no'l sùpara normalmente i 4 kg: bona parte de sto aumento xe da tribuire anca a la presensa del lìquido amniòtico e ai adatamenti de la circolassion materna.
  • La volemia la vien su de 1,2-1,9 l, co aumento mazor del plasma respeto a quelo dei elementi figurati del sangue. Sta diluission aumenta oncora de più el cargo de laoro al cuor, che el va incontro a ipertrofia fisiològica, con parte del conpenso che el previen massa aumenti de pression arteriosa xe ligà a la vasodilatassion.
  • La mare la respira più a fondo e de frequente par butare drento più ossìgeno e fora più anidride carbònica, se parla de iperventilassion.
  • I reni i laora de più in filtrassion e riassorbimento, i ureteri, soratuto quelo de dreta, i vien in parte schissai dal'ùtero che se slarga. Sta conpression la xe più contegnuda se la dona la se stende in decùbito laterale de sanca.
  • A livelo del'aparato digerente se ga nausea (e a volte gòmito) par l'atività del β-hCG e par el sòlito efeto conpressivo se vede de frecuente stitichessa e reflusso gastro-esofageo.
  • Canbiamenti metabòlissi: i gira par el sangue più glucosio e lipidi par le mazori necessità dae da la presensa del feto
  • Canbiamenti endòcrini: el controlo dei ormoni sessuali se staca dal'ipòfisi e vien tolto da la placenta che la buta fora hCG e hPL (ormoni protèissi) e anca ormoni steroidei come l'estrògeno estrione e progesterone (st'ultimo a partire da la fin de la fase enbrionale, durante la quale hCG sostien oncora la produssion da parte del corpo lùteo del'ovaro).
  • Ghe xe altri canbiamenti menori a livelo de pele e mucose.

Tuti sti canbiamenti i ga signifegà in tel sostentamento de la nova vita e xe un adatamento dinàmego in funsion a la créssita struturale e funsionale del'enbrion/feto. I poe tore signifegà patològico co che la mare no la xe bona a sostegnerli, o anca se sviluppa in maniere o quantità miga zuste, par difeto o par eccesso.

Consepimento[canbia | canbia el còdaxe]

Un despositivo che el fa da test de graviansa: inserio inte le orine, se ste qua le contien na concentrassion bastante de hCG, el test salta fora come positivo, de sòlito do stimane dopo che el stesso dosajo in tel sangue.

Dopo del raporto sessuale, se sto qua avien inte i modi e i tempi più apropiadi, l'incontro intrà òvulo e spermatozoo causa la fecondassion, co formassion de na sèlula ùgnola e granda, el zigote. Sto qua se divide par mitosi anca se el spassio ocupà resta el stesso: sta segmentassion forma la blastocisti, inte la quale se destingue do parte:

  • enbrioblasto, che formarà i tessudi dell'enbrion;
  • trofoblasto, che formarà i tessudi de la placenta.

Sta fase la xe inportante anca par l'evento del'inpianto: a l'otavo dì, a ocio, sta massa de sèlule la se taca al'endometrio par tirare sostentamento dai sui vasi. El trofoblasto el produse hCG par mantegnere la secression ovàrica de progesterone e blocare la pròssima mestruassion. I test de graviansa più difondesti i mesura la subunità β del hCG in tel plasma (dosàbile sùbito) e inte le orine (a distansa de qualche dì). Sìntomi chi i sugerisse la diàgnosi de graviansa xe, oltre che l'amenorea (assensa de mestruassioni), nausea/gòmito, aumento del petito e poliuria (aumento del volume de le orine).

Fase[canbia | canbia el còdaxe]

Cronołozia de la graviansa in inglese, notare la division in trimestri e che intorno a le stimana 24 se ga n'aumento neto de le possibilità de soravivensa fora dal'ùtero. L'interussion de la graviansa prima che el feto el sia auto-suffisente la se ciama aborto.
L'ecografia xe l'esame più doparà par sevitare le gravidanse, de sòlito se ne fa tre, una par semestre. Sta qua, fata a la stimana 8, la parmete la descrission de tanti paràmetri, come la longhessa crànio-caudale (CRL), che la permete na stima tanto precisa de l'età del feto.

Tradissionalmente se divide la graviansa in:

  • stimane: nota la difarensa intrà età gestassionale (manco precisa perché la data la graviansa al'ultima mestruassion) e età concessionale (ghe zonta almanco 14 dì necessari par ovulassion e inpianto, donca la corela mejo a le stime basade su le dimension del feto al'ecografia)
  • fase enbrionale (fin a l'otava stimana) e fase fetale (da la nona)
  • trimestri

Primo trimestre[canbia | canbia el còdaxe]

El va da la stimana 1 a la 12. La contien la fase enbrionale e l'inissio de quela fetale. Xe un perìodo delicà par via del fato che avien l'organogènesi e tante done no le se rente gnanca conto, fin a un serto ponto, de spetare un fiolo. La granda mazoransa dei aborti i càpita in sto periodo, sia spontànei che indoti, anca parché in tanti paesi se poe fare più fassilmente.

Secondo trimestre[canbia | canbia el còdaxe]

El xe fissà da la stimana 13 a la 26. I se rende più evidenti i canbiamenti clìnissi come l'adome che taca a slargarse e se vede se quei canbiamenti fisiològissi i xe sostegnudi da la dona, par esenpio, in sto perìodo i conpare più de frecuente preeclampsia e diabete gestassionale.

Terso trimestre[canbia | canbia el còdaxe]

El taca a la stimana 27 e'l finisse col parto. Ghe xe malatie, sia materne che fetali, che le se poe mostrare anca in sto perìodo. La preparassion al parto la poe domandare esami spessìfissi par controlare el benèssare fetale.

Conclusion[canbia | canbia el còdaxe]

El parto fisiològico, dito eutòcico', l'avien par via vaginale. Le distocie le poe èssare caraterizade da le anomalie de posission del feto che el domanda particolari tècniche de estrassion, fin a l'esecussion del tajo cesàreo, operassion cerùsica necessaria anca quando ghe xe patołozie materne e/o fetali che rende poco sicuro el parto vaginale. Anca el parto poe èssare condoto par via spontànea o èssare indoto: sta roba la se rende urgente se la mare no la tòlera la graviansa (soratuto a partire da la 24-28esima stimana quando che el neonato premaduro poe soravìvare fora dal'ùtero co o sensa juto) e quando la graviansa la se slonga più de quelo che la deve. Se ciama parto pre-termine quelo prima de la 37esima stimana, post-termine quelo dopo de la 42esima.


Controło de autoritàGND (DE4053724-9 · NDL (ENJA00568522
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Graviansa&oldid=1100415"