Vagina

Da Wikipedia, l'ençiclopedia libara.
Va a: navigasion, serca


Sto articolo el xe scrito en diałeto padovan (padoàn, paduàn)


Desegno de la pelvi femenile, co la vagina catada drio a la vissiga e vanti al reto
Entrada a la vagina, se nota i pìcoli làvari e drento le rughe a disposission trasversale respeto a la diression longitudinale del canale
Vision istològica in colorassion EE dei strati mucosale e muscolare de la vagina: se vede epitelio squamoso pluristratificà, làmina propia e fibre muscolari, in pieghe.

La vagina, anca ciamada vajina o vazina, la xe un vìssere che'l fa parte del'aparato genitale femenile. Se trata de un canale che'l porta da la so vertaura al de fora del corpo, dita vulva, al colo del'ùtero, che in parte ghe vien drento in te la so parte ciamada fòrnice. La vagina se inserisse, a livelo de la rejon corpòrea ciamada pelvi, drio de la vissiga e vanti al reto. Ndando su da la vulva al colo del'ùterò, la xe piegada in diression dorsale, par sta rezon qua ze più longa la so parede posterior (media 9 cm) de quela anterior (media 7,5 cm).

L'àngolo de entrada del'esocervice in te la vagina xe a ocio de 90°. La vertaura esterna, invesse, xe proteta dai pìcoli làvari de la vulva e la se cata tra quela del'ùretra e del'ano. In te le done vèrzene, sto buso xe sarà da na sotile menbrana ciamada imene, perforada al primo raporto sessuale.

El canale vaginale xe de consistensa elàstega e muscolare, par via de la composission tessudale de la parede del'òrgano.

  • Vegnendo da drento a fora el primo strato xe na mucosa fata da n'epitelio squamoso pluristratificà e da la so làmina propia de sostegno mecànego e de nudrigamento. L'epitelio el va in continuità a quelo somejante del'esocervice e come st'ultimo qua i strati e l'atività de le sèlule i depende dai liveli de estrògeni in sìrcolo, par cui xe difarente a seconda de le età. No ghe xe giàndole, la lubrificassion vaginale necessaria al raporto sessuale probabilmente la depende da la secression dei òrgani intorno e da la trasudassion del plasma che'l riva in quantità mazori durante l'ecitamento. Sta mucosa la se tira su in pieghe dite rughe.
  • Più in fondo ghe xe na tònega muscolare fata da muscolatura lissa, co un strato interno a desposission sercolare e un più esterno a desposission longitudinale. Anca qua ghe xe vasi sanguigni, linfàtissi e fibre nervose.
  • Ancora più a fondo ghe xe la tònega aventissia fata dai tessudi conetivi de sostegno a la vagina, in continuità co le fasse pèlviche e le aventissie de sostegno ai òrgani intorno.

L'òrisene enbriològica de la vagina la descrive come ponto de incontro, slongà, fra el doto paramesonefrico de Müller (i xe do e i forma, un par lato fondéndose par metà, le do tube uterine e l'ùtero) e la placa vaginale del seno urogenitale. Lo svilupo del'organo el continua dopo de la nàsita e le so caraterìsteghe de strutura e funsion le xe dinàmeghe, canbiando in rezon de l'età e la stimolassion ormonale.

La funsion prinsipale de la vagina xe rissévare el pene in tel corso del raporto sessuale, la cussì dita penetrassion. La fa anca da canale de scolo del flusso mestruale e la se slarga in maniera evidente in tel corso del parto par far passare l'intiero corpo del neonato.

L'interno del canale vaginale no'l xe un ambiente stèrile, el contien na flora batèrica rica, in te la quale ghe xe numarose spece co dominansa dei lattobacilli, comensali che i serve a sbassare el pH del lìquido interno a liveli àssidi (intorno a 4,5) protetivi par sto ambiente. Alterassioni de sta flora le xe responsabili de vaginiti, fastidiose malatie sora tuto dovue a infession batèriche e de parassiti. Altre malatie che le poe colpire la vagina xe malformative, sià congènite che aquisie (come i prolassi e le fìstole, dae da alterassion dei raporti de parede fra vìsseri tacai), e neoplàstiche. Esiste quindi tumori sia benigni che maligni de la vagina.

Co la parola volgare vèneta mona se ìndega la vulva e la vagina. St'ultima parola la vien dal latin e la se riferisse al fodro de le spade.