Gerry Scotti

Gerry Scotti

Biografia
Nasimènto	(67 ani) Miradolo Terme (Itàlia)
Deputà de ła repùblega d'Itałia
2 de lujo del 1987 – 22 de apriłe del 1992 Lejislatura X legislatura della Repubblica Italiana (it)
Atività
Posto de laoro
Ocupasion
Atività	1983  –
Partio
Influense	Mike Bongiorno
Segno

Gerry Scotti, a l'anàgrafe Virginio Scotti (Camporinaldo, 7 de agosto 1956), el ze un condutor tełevizivo, condutor radiofonego e ex-pułìtego itałian. Conosùo anca co'l apeładivo de Zio Gerry, e, soratuto in pasà, de Dottor Scotti o Signor Scotti, come condutor (e inte łe ùlteme stazon anca zùdexe) el ga a l'ativo al 2019 sirca 700 prime serade e oltre 8000 pontade de programi in day time so łe redi Mediaset.

Biografia

Virginio Scotti el nase a Camporinaldo (frasion de Miradolo Terme in provincia de Pavia) el 7 agosto 1956, ciapando el nome de só zio. Fiol ùnzoło, el pare Mario el ze un operaio che'l łaora a łe rodative de'l Corriere della Sera, mentre só mare, de Miradolo Terme, ła ze na cazałinga. Daspò un pochi de ani da ła nàsita de só fio, ła fameja Scotti ła se trasferise a Miłan. El frecuenta el łiceo clàsego e può el se iscrive a giurisprudenza, sensa parò conpletar i studi, fermandose a sołi do exami dal tìtoło.

Inte'l 1991 el se ga spozà co Patrizia Grosso da ła cuała el se ga separà inte'l 2002 e el ga infìn divorsià inte'l 2009. I do i ga avùo un fìo, Edoardo, nasùo el 10 marso 1992; el 21 magio 2009 el ghe manda na łétara a'l diretor de'l Corriere della Sera in cui el manifesta ła só aprovasion par ła vertura de ła Cieza Catòłega inte i confronti dei devorsiài auspicada da'l cardinałe Carlo Maria Martini.

Atività radiofònega

Radio Milano International

Gerry (che a l'inìsio se faseva ciamàr Gary) taca ła so carièra radiofònega a Radio Hinterland Milano2. A fin ani setanta el pasarà a Radio Milano International co le rubriche Il mercatino delle pulci, indove ch'el łexeva mesaji de parsone che vendeva o sercava robe uxàe, e po' Il puntaspilli, rubrica de anunci, par po' deventàr una de łe voxe de ponta de ła radio col programa La mezz'ora del fagiano.

Radio DeeJay

Inte el periodo estivo del 1982 Gerry riva a Radio Deejay dopo èsar stà ciamà da Claudio Cecchetto. Prima de l'incontro co sto ùltemo Scotti gaveva łaorà contenporaneamente par Radio Milano International e na agensia par ła cuała el inventava testi e canpagne publiçitarie. El responsàbiłe de sta agensia ghe gaveva 'pena prenotà un bilieto aereo par i Stati Unii, indove ch'el gavarìa dovesto andar par ciapar parte a un corso de regia tełevixiva, ma riva ła tełefonada de Cecchetto, che riese a convinçerlo a restar in Itałia co na proposta interesante: devantar ła prima voxe de Radio Deejay. In riguardo el ga contà: "Gavevo un òtemo stipendio, un mucio de benefit, parfìn el dentista pagà. Cusì, quando che go dito a caxa che vołevo darme al spetàcoło, par poco a mia mama no ghe ciapava un cocołon".

Pròpio grasie a Radio DeeJay non soło el riva al gran publico, ma el sbarca anca in tełevixion co DeeJay Television. El łasarà sta radioo solchè inte el 1988 par ndar a RDS, andove el restarà soło sìe mezi.

Radio R101

A l'inisio de'l 2006, dopo scuazi vinti ani, el torna in radio co Il quesito del fagiano, in onda so R 101 (che no'l ze altro che ła só vecia Radio Milano International), ed entra inte'l CdA de ła Monradio S.r.l. (ła sosietà Arnoldo Mondadori Editore nasesta par ła zestion de l'area radiofònega), indove el vien nomenà visepresidente. Inte l'utuno 2006 el ze in onda co Sbanca 101, repropozision de'l só quiz Passaparola in radio. In inverno-primavera 2007 el prezenta Regalo di compleanno. Da'l zunjo 2007 el ze presidente de ła Monradio srl.

Inte l'autun 2007 el torna co Sbanca 101. Da'l zenaro fin a zunjo 2008 el ze in radio co Smile. Inte'l 2007 el ze premià co ła Radiogrolla, el Premio Saint Vincent par ła Radio, par ła categoria mejo voze mascołìna. Da l'utuno 2008 a zenaro 2011 el ze in radio co un programa de mùzega in onda el sabo, e in replica ła doménega, ciamà 101%. Inte'l zenaro 2012 el rasenja łe dimision da presidente par masa inpenji tełevizivi.

Atività in tełevizion

Gerry Scotti conduxe quiz, varietà e talent show, ma el reçita de frecuente anca in sit-com o film TV. El ga senpre prexentà so Mediaset, e l'axienda de Cologno Monzese ło considera un so personaxo de ponta e de spico, reciamandoło in ocaxion de crixe de ascolto o de insucesi de trasmision. Mike Bongiorno, el re dei presentadori tełevixivi, ło considarava el so erede. Tìtoło confermà anca da ła xente: segondo ła socetà de sondagi SWG, par conto del setemanałe Oggi, Gerry par el 58% dei tełespetadori intarvistài xe l'erede tełevixivo de Mike Bongiorno. L'erede di Mike Bongiorno? Gerry Scotti! - www.mondotvblog.com, 16 settembre 2009 |date=marzo 2018 |bot=InternetArchiveBot }}</ref> Inte el 2010 el ga dichiarà de vołerse ritirar dal mondo tełevixivo intorno ai 60 ani de età. Poco prima de compir 60 anni el ga parò deçidesto de continuar a far tełevixion.

Mùxica e varietà

Durante i primi ani Gerry se speçiałixa inte ła condusion de programi muxegałi, ma non soło. El fa el so exordio inte el 1983 so Italia 1, sendo DJ de Radio DeeJay, co DeeJay Television, el primo programa tełevixivo che trasmete videoclip muxegałi, l'antesignan de MTV. Inte el 1985 el parteçipa a Zodiaco' e a ła varsion estiva de DeeJay Television, ciamada Video Match, mentre l'ano drìo el parteçipa al Festivalbar 1986 in cuałità de cantante.

Claudio Cecchetto e Scotti inte el 1984 inte'i studi tełevixivi de Italia 1 par DeeJay Television

Inte el 1987 el conduxe Candid Camera, in istà Deejay Beach e in ùtuno Smile, programa che el condurà fin al 1990. Dal 1988 e fin al 1991 el prexenta tre staxon de Candid Camera Show, otegnendo un considerévołe suceso: ła mèdia dei ascolti supara i 4 miłioni de tełespetadori. In istà el torna al Festivalbar, che condurà fin al 1992 par un totałe de sique edision, e el prexenta anca Azzurro dal 1989.

Dal 10 setenbre 1990 el ciapa el posto de Raimondo Vianello inte Il gioco dei 9, che conduxe fin a l'11 xenaro 1992, dove po'l xogo xe pasà so s Italia 1, par dar spasio el 13 xenaro del steso ano al nomentato TG5. Inte el 1991 el conduxe co Cristina D'Avena Sabato al circo', co ła partesipasion de Massimo Boldi. Senpre in quel'ano, Scotti interpreta el ròło de Porthos inte el tv-muxical I Tre Moschettieri. El 1992 so Canale 5 xe l'ano de La grande sfida, trasmision del vènare sera condota co Natasha Stefanenko, e del poco fortunà programa del mexoxorno Ore 12, tanto critità parché considerà clone dei programi de Michele Guardì in onda so Rai 2.

Dal 5 ługio al 18 setenbre 1993 el conduxe Campionissimo so Italia 1 e in autuno de ła segonda edision de La grande sfida co Valeria Marini e Nino Frassica, ma soratuto, dal 24 otobre 1993 al 24 avril 1994, de Buona Domenica so Canale 5 insieme a Gabriella Carlucci. In istà el prexenta so Canale 5 tre speciałi so ła moda: ModaMare, Donna sotto le stelle e Bellissima; senpre in istà ogni domenega el prexenta Il Quizzone. Senpre al fianco de Gabriella Carlucci el conduxarà oncora dal 16 otobre 1994 al 28 magio 1995 Buona Domenica.

Inte el 1995 el coduxe so Canale 5 La sai l'ultima? co Paola Barale, ła trasmision muxicałe Super, version axornada de ła fortunada trasmision de Maurizio Seymandi Superclassifica Show, e in istà da novo Il Quizzone. So Italia 1 dal 3 de novenbre 1996 al 5 de xenaro 1997, el conduxe el programa, che tutavia otien poco suceso, Non dimenticate lo spazzolino da denti, insieme a na xovanisima Ambra Angiolini. Inte l'utuno senpre del 1995 el sbarca anca so Rete 4 a l'ora de disnar, indove el conduxe Adamo contro Eva, ma ła trasmision ła sarà serada dopo poco par insuceso.

Inte el 1996 el conduxe Miss & Mister '96 e La sai l'ultima?. Inte ła vèrta del steso ano, par Scotti riva ła prima e fin deso únega esperiensa de condusion tełevixiva in un programa non targà Fininvest/Mediaset: se trata de Storie di stelle, cuatro pontae in onda al vènare in prima serada so ła Tełevixion de ła Svisera Itałiana (l'atuałe RSI La 1). A l'interno del show reałixà par ła Tv elvetica, Scotti incontra çełebri personaxi de ła sena muxicałe itałiana par sotołinearghen esperiense profesionałi, sucesi, projeti futuri: el condutor pavese xe coadiuvà da Carla Petracca. In istà, de ritorno a Mediaset, Gerry prexenta oncora Il Quizzone e, dal 1º de łujo al 30 de setenbre 1996, inte el preserałe de Canale 5 el conduxe el quiz Vinca il migliore. Inte el 1997 el conduxe oncora Miss & Mister '97, La sai l'ultima? co Natalia Estrada e el prexenta in magio Striscia la notizia co Franco Oppini. Inte el 1998 el prexenta so Canale 5 Scopriamo le carte co Natalia Estrada e in istà Forza Papà co Mara Venier. El ga anca recità tra el 1996 e el 1998 inte ła sit-com tełevixiva, Io e la mamma co Delia Scala. Inanxonta inte el 1998 el ga partesipà a ła sètema pontada de ła prima edision de Ciao Darwin indove l'è stà a cao de ła categoria Peòchi.

Gran tifoxo del Milan, el ga prexentà ła serada de adio al calcio de Franco Baresi al Stadio San Siro el 28 de otobre 1997, ła festa scudeto rosonera inte el 1999 e el 15 de disenbre del steso ano el ga conduxesto, insenbre a Simona Ventura, in direta da l'Alcatraz de Miłan ła serasa çełebrativa par el sentener miłanista dal titoło "100 Milan - Buon Compleanno"; el tuto xe stà trasmetesto da Italia 1.

Passaparola e Chi vuol essere milionario?

Dal 1999 Gerry riva a ła fasa preserałe de Canale 5, indove el taca conduzer vari quiz. L'11 de zenaro del steso ano infati el prezenta so Canale 5 Passaparola, a fianco de Alessia Mancini e da altre toze ciamae Letterine. El programa, che Scotti prezentarà fin al 7 de zenaro 2006 (fora che dal 1º de marso al 26 de zugno 1999 parché sostituìo da Claudio Lippi) cuando che terminarà el so siclo, ciapa el posto del sfortunà Superboll conduzesto da Fiorello e otien un gran suceso. Dal 1º de marso al 12 de zugno 1999, insieme a Gene Gnocchi (copia za rodà ad Il gioco dei 9) el conduze Striscia la notizia. Propio inte ła prima pontada de Striscia conduzesta da ła copia Scotti-Gnocchi, Gerry sfonda el bancon de Striscia saltando come fazeva abitualmente Ezio Greggio. Gerry amearà che'l salto e ła rotura del bancon jera prevedesti e i jera stà provai, ma el sfondamento vero e propio no'l zera prevedesto.

El 13 de setenbre 1999 el reprende Passaparola sénpre co suceso. Viene anca trasmetesta ła sit-com Finalmente soli, spin-off de Io e la mamma; Gerry interpreta sénpre Gigi Mantelli, ma stavolta el se ga spozà e fato na fameja; so mujer ła ze intarpretà da Maria Amelia Monti. Inte'l zenrao 2000 el prezenta co Roberta Lanfranchi Provini - Tutti pazzi per la TV. El 22 de majo 2000 el sperimenta un novo quiz, un format de ła Endemol che mete in palio ben un miliardo de łire e che ga otegnesto tanto suceso a l'estaro: Chi vuol essere miliardario? (che po' vegnarà intitołà Chi vuol essere milionario?). El zogo otien un grandisimo suceso. Inte'l zugno 2000 el prezenta Un disco per l'estate.

L'11 de setenbre 2000 el presenta ancora Passaparola, dal 23 de otobre al 18 de novenbre 2000 el torna a conduzer Chi vuol essere miliardario?, e'l 20 de novenbre parò el reprende Passaparola. In otobre A ze in onda ła segonda serie de Finalmente soli. Dal 7 de zenaro al 15 de avriłe 2001 el conduze ancora Chi vuol essere miliardario?, ma ła doménega e in prima serada e Passaparola inte'l preserałe. El conduze elGran galà della pubblicità e ła disdotèzema edision del Gran Premio Internazionale dello Spettacolo con Maria De Filippi. In istà el conduze ła 37ª edision de Un disco per l'estate.

El 10 de setenbre 2001 el reprende Passaparola inte'l preserałe e dal 16 de setenbre al 4 de novenbre 2001, Chi vuol essere miliardario? inte'l prime time de ła doménega e, dal 19 de novenbre al 1º de disenbre, in preserałe. Inte'l 2002 tra inverno e primavera i do quiz se alterna e co l'avento de l'euro Chi vuol essere miliardario? deventa Chi vuol essere milionario? (ła doménega dal 13 de zenaro al 24 de febraro e dal 22 de setenbre al 24 de novenbre 2002, in preserałe dall'11 al 30 de marso, dal 13 al 25 de majo e dal 25 de novenbre al 14 de disenbre 2002), co'l radopio del montepremi finałe. Drìoman A vien trasmetesta ła tersa serie de Finalmente soli.

La Corrida e Paperissima

Inte'l 2001 Marina Donato, so mujer de Corrado, selie Gerry cofà novo condutor de La Corrida (dilettanti alla sbaraglio), uno dei varietà pì seguìi de ła storia de ła tełevizion, che'l conduzarà dal 16 de marso 2002 par 11 pontade, sénpre al fianco del mestro Roberto Pregadio, e otegnarà artanto suceso.