Casel

Al casel te el mondo agricol al ze na costrusion edilisia ligada a na majolera, a un maso o a na casa rural aonde che gnen cenest in fresca la lat dal momento che la gnen moldesta a quel che la gnen laorada. De solito al ga entro aqua corente par asportar al calor, e al ze fat de mur de piera col sofito fat a cuba de sass o senò pjan e fat de un geto de ciment armà. Al pol er una o pì finestrele pisole par far filtrar la luce necessaria a far le operasion ligade a la manutension de la strutura e a cavar la pana che gnen par sora de la lat. De solito ste finestrele le ga na qualche sort de seramento par evitar che i animai i vae a bere la lat. Casei de sto tip oramai i ze na rarità e no i gnen pì doperadi da gnissuni.

In epoche pì recenti ten ogni paess i contadin i se ga organizà in modo da far na strutura publica che la podesse funsionar da casel, da casera e da stanfia, formando cossì quela realtà che dess la gnen ciamada lateria. Al ze da sotolinear che se sta qua la ze ligada a un ambito paesan e la laora na quantità limitada de lat la gnen oncora identificada come casel. Dopo de la nassita de le laterie de mèdie dimension anca sto secondo tipo de casel al ga fenì la so gloria, anca se se ghe un cata oncora qualchedun in funsion. Ste costrusion le ze oncora esistenti quasi dapartut, anca se par la gran part le ze state restuturade par organizar convegni e sagre paesane.