Socetà Sportiva Calcio Venesia

F.B.C Unión Venexia

Bałon
El Vecio Leon, I Łagunari, Arancioneroverdi, Leoni alati, I Neroverdi, "i fioi"
Segni distintivi
Maje 　 Caxa 　 Fora caxa 　 Maglia 100°
Cołori soçiałi:	Naranson-Nero-Verde
Dati soçietari
Çità:	Venexia
Nasion:	Itałia
Confederasion:	UEFA
Federasion:	FIGC
Canpionato:	Girone c
Fondasion:	1907
Rifondasion:	2005; 2009
Presidente:	Yuri Korablin
Ałenador:	Giancarlo Favarin
Stadio:	Stadio "Pierluigi Penzo" de Venexia (9.977 posti)
Sito web:	www.fbcunionevenezia.com
Palmares
Scudeti:	0
Trofei nasionałi:
Trofei Internasionałi:	0

Ła F.B.C. Union Venesia ła xé na socetà calcistega con sede 'nte ła sità de Venexia.

Storia

Fondasión, gloria, unión e fałimento

Fondà 'ntel 1907, 'ntel 1909 ła riva a ła semifinal nasional (par mancansa de aversarie 'nte ła zona). Intrà alti e basi, ła riva in serie A nel 1925-26. El Venesia da ła stagion 1929-30 el canbia anca nome e cołori (par ła cronaca el gera ciamà Serenisima e i cołori de łe magie i gera de roso venesian). L'esperimento el tèrmina tre ani daspò.

Al'inisio dei anni quaranta el Venesia el vinse ła Copa Itałia (1940-41), e riva terso 'nte ła stagion daspò. A quei tenpi 'ntel Venesia ghé gera dó grandi del calcio itałiàn come Ezio Loik e Valentino Mazzola, vinsidori de scudeti a ripetision col Gran Torin.

La socetà nel 1987 ła conpra i diriti de ła squadra de Mestre (che ła ga anca xogà col nome de Mestrina) par darghełi pò al Pałermo rexentemente fałìo e ciapa par un breve periodo el nome de Venesia-Mestre. Na curioxità: 'ntei primi ani novanta 'ntel Campionado Nasional Diłetanti ghe ga xogà n'altra squadra de calcio col nome Venezia. Łe divixe de sta squadra qua łe gera del clàsego cołór neroverdo. El gera stà fondà da sogeti contrari a ła fuxion infrà Venesia e Mestre. El xé desconparso datorno al 1996.

Co ła rivada de Maurizio Zamparini e grasie al'integrasion de łe dó roxe del Venesia e del Mestre, ła squadra ła xé subito promosa in C1 e l'ano daspl ła tol de novo ła denominasion Associazione Calcio Venezia 1907. Daspò, 'ntel 1990-91, ła torna indrio B daspò un sparégio contro el Como, e 'ntel 1997-98 el Venesia el torna in serie A (Ałenadór Novellino) daspò trent'anni. Se salva ła stagion daspò grasie a łe prodese de Recoba e Maniero. Daspò ła retrocesion 'ntel 2001-02, ła squadra ła va in profonda crìxi anca par l'abandono del prexidente Zamparini (che 'ntel pasagio al Pałermo se tol drìo un bel fià de xogadori, infrà i quałi el stéso Maniero) e a ła fìn del 2004-05 ła va xó in Serie C1.

El 22 giugno 2005 ła vien diciarà fałìa.

Ła rixałida

Ła nova socetà ciamà Socetà Sportiva Calcio Venesia, cavegià dal Grupo Guaraldo rapresentà da Lorenzo Marinese, riparte da ła Serie C2 'ndo dopo na partensa al rałentadór rixàl vełosemente łe poxisioni fìn a oténare co dò xornae de antiçipo ła promosiòn en serie C1, dopo ła vitòria contro Jèxoło en trasferta par 3-1.

'Nte ła staxón 2006/2007 el Venesia riva nel campionado de Serie C1 come matricoła, ma dimostra fìn de suvedo de avere łe carte en regoła par n'immedià promosión en serie B. Dopo massa parégi 'nte łe prime xornae de campionado, el Venesia scomensa a infiłàr na bona serie de vitòrie.

Da ła prima jornada de ritorno fino a indeso ła formasiòn łagunare gò detegnù na beła posisiòn 'nte ła classifica, anca si en coabitasioni co altre formasioni, parché ghe xé un grando equiłibrio. Co grande fadiga el Venesia xè riussio a quaificarse ai play-off batendo in casa a l'ultima giornata el Pisa pa 1-0, con gol de Romondini a un minuto daa fine: na emossiòn grandissima pa tuti quei (mi compreso) che gà visto ea partìa. Dato che in campionato gerimo rivà quinti ai play-off ne gà toccà zogàr l'andata in casa contro, ironia dea sorte, propio el Pisa. Ma putropo dopo essere 'ndai in vantagio 1-0 stavolta nà xè finia come ea altra volta: el Pisa gà ricambia el favore pareggiando eo stavolta a pochi minuti daa fine. Così al ritorno a Pisa el Venesia, nonostante esserse portà in vantagio, el xè croà 3-1, el Pisa xè 'ndà in finae (e dopo el gà vinto anca quea 'ndando in serie B)e el sogno promosion pal Venesia gera finio. Restava comunque el ricordo e la sodisfaxion de 'na stagion vissua in alta classifica.

2007-2009 e naltro fałimento

Ea stagion 2007-08 xè comincia poco ben e finìa quasi mal. Dopo un avvio con la sconfita casainga coa Cremonese (1-2) tra alti e basi el Venesia gà avuo ben 4 alenatori: Corradini (che el gera el vice de Deschamps aa Juve in serie B),sucedùo a Neo De Costanso soa panchina del Venesia a giugno, xè stà silurà de punto in bianco subito dopo ea prima giornata; dopo xè rivà D'Adderio, che però el gà porta ea squadra dal sogno play-off all'incubo de dover zogar i play-out e infine xè rivà Michele Serena, mestrin, che xè riusio a far conquistare aa squadra ea salvessa diretta. Ea stagion 2008-09 ea xè comincia sin da subito in salida parchè el Venesia xè partio penaisà de 4 punti a causa dei mancati pagamenti dee tasse da parte dea società. Ea squadra gà sempre navigà nee zone basse dea classifica piombando a xenaro adiritura a l'ultimo posto. Michele Serena xè sta esonera a metà novembre e al sò posto ghe xè stà Michele Cuoghi che però no gà fato mejo del colega Serena che anzi xè sta riciamà a marso pà sercare de fare l'impresa: recuperare 6 punti dal penultimo posto pa disputar almanco i paly-out e sperar de salvarse così. Ea squadra gà pian pian ripreso fiducia e nonostante el muro contro muro coa dirigensa, accusà de no aver pagà i stipendi ai zogadori, e qualche sciopero anca dei stessi zogadori, el Venesia gà comincià a far punti pesanti sopratuto in casa e a recuperare punti e quindi speransa. E ultime partie casainghe e xè finie 3-1 col Novara, 1-0 col Pergocrema, 2-0 col Legnàn, 0-0 coa Sambenedetese (avversaria paa salvesa) e l'esaltante 1-0 col Ravena secondo in clasifica. Manca soo nà partia aa fine del campionato: Pro Sesto-Venesia. Ai play out el Venexia vinse pa 3-1 a l'andata e paregia 1-1 in trasferta al ritorno e dunque resta in Lega Pro Prima División dopo comunque 'na sofertissima salvessa.

L'8 lugio 2009 el Venexia el xé neł'elenco dełe sedeze squadre escluse dała Lega Pro dopo i controłi deła Co.Vi.Soc.

El 10 Lugio i zogadori e i alenadori i xé stà convocà in sede pa ciapare i aretrati dei stipendi e firmare łe liberatorie (indispensabili pa l'iscrixión) a mezodì. Ghe xé un primo rinvio ałe dó e meza. El tempo passa e i tifosi i taca a impinire ła sede ma no sucede gnancora gnente. Ałe sie del pomerigio riva ła notixia che el neo proprietario Golban el se gà ritirà e el xé intensionà a far causa ai Poleti pa non aver iscrito ła squadra al prossimo Campionato de Lega Pro. Ałe ore 20 ła piassa deła sede ła xé gremia de tifosi in lacrime par l'ormai inevitabiłe fałimento dei Lagunari. Riva però ła smentia da parte de Golban de vołer ritirarse ma ormai nessuno sa pì quałe che xé ła verità. Sta de fato che entro le 13 de sabo 11 Lugio el Venexia el gavaria dovuo presentar ricorso pa la non amission in Prima Divisione, invexe non xé stà mandà nessun scheo ała Lega Pro. Pare ormai inevitabile neła migliore dełe ipotesi ripartire con 'na nova società dała serie D, ma el rischio de 'ndare adiritura nel Campionato Regionałe (Ecełensa, 1°,2° e 3° categoria) el xé pì che mai vivo. Questa xé l'amara verità: el glorioso Venexia Calcio el xé spario dal calcio professionistico.

La rifondassión: el Vecio Leon torna a rugir

Grassie al lavoro deła aministrassion comunałe mirà a asicurare un futuro al calcio venexiàn, a fine lugio 2009 xé sta fondà 'na nova società, la F.B.C. Union Venexia, co presidente Mauro Pizzigati e ałenador Paolo Favareto. El Venexia xé riussio a iscrivarse in SERIE D. El zoga nel giron C par l'esatessa.

Stagione 2009-10

Se riparte da zero co na squadra che se raduna par el primo alenamento solo a feragosto, co na preparaxion in ritardo che se rivelerà decisiva par le prime partie che la squadra zoga: se fa fadiga a trovar el ritmo e se buta via punti prima perdendo dopo co tanti paregi. El Venexia trova finalmente el zogo nel giron de ritorno fasendo 7 vitorie consecutive e fasendo più punti de tuti. Ma purtropo el primo posto xé massa distante sicchè i lagunari riva tersi in classifica ale spale de Montichiari (promosso) e Este. El disputa cossì i play-off vinsendo la prima partia co lo Jesolo in casa ma perdendo però a sorpresa la seconda in casa co l'Union Quinto che espugna el Penzo co un 2-0 neto. La stagiòn se conclude co l'addio al sodalissio da parte del segretario generale Leandro Casagrande e dell'alenador Paolo Favareto.

Stagione 2010-11

Enrico Cunico vien nominà novo alenador del Venexia e l'organico dela squadra vien rivoluzionà: pochi i zogadori che resta (solo le vechie glorie Collauto e Vianelo), tanti quei che parte da Venexia e altretanti i novi che invesse sbarca in laguna. L'obietivo xé costruire un giusto mix de zoventù e esperiensa pa essere pì forti de l'ano passà e combattere par el primo posto fin alla fine del campionato. A marso dei russi compra ea società, el presidente deventa Yuri Korablin, dopo pochi giorni more el patron Enrico Rigoni che ghevà salvà el Venexia nel 2009 daea scomparsa e che gheva vendù la società ai russi. La squadra lotta tuta ea stagion par el primo posto insieme al Treviso, ma alla fine i biancoseesti trevisani i gà ea mejo e el Venexia riva secondo, nonostante l'arrivo in panchina de Gianluca Luppi al posto dell'esonerato Cunego. Ai play-off, dopo ea vitoria contro el San Polo Padova, el Venexia perde 3-2 ea finale del giron C al Penzo contro el San Donà-Jesolo: l'amaressa xé tanta perché na papera del portier Casini (comprà a genaio dal Rovigo) rovina un campionato intiero ma anca riasume ea difesa ineficiente, piena de problemi pa tuta ea stagion, dall'inissio aea fine.

Stagione 2011-2012

Anca se durante l'istà, ła Lega Pro se gà slargà novamente a 76 squadre, łe speranse de ła squadra de poder vegnir ripescà in quel canpionato xe andàe perse del tuto quando anca a ła fin no xe stàda prexentàda ła documentasion necesaria che podeva servìr par far el gran salto. L'Union Venesia gà cussì da far i conti co' ła realtà dovendose preparàr par un novo ano de canpionato in serie D. Ghe xe comunque a l'interno de ła società 'na riconpoxision de tuti i ròłi e i inpreditori rusi 'rivài da pòco che ciapa in man el destin de ła società e de ła squadra controłandoghene cussì in modo ciaro el so futuro dandoghe sicuresa e sołidità. 'Ntel C.D.A. ghe xe alcuni dirigenti che no vien più riconfermà : el D.S. Andrea Seno e l'ałenador Gianluca Luppi; al so posto riva Oreste Cinquini e 'l xovene ałenador Davide Sassarini. I xogadori invese che fa ancora parte de ła roxa xe 'l sentrocanpista Casagrande, el capitan Mattia Collauto e 'l goleador Emil Zubin, ai quałi se ghe xonta 'na serie de xoveni che riva da xovaniłi de squadre profesionistiche, alcuni xogadori che prima miłitava nel giron toscano de ła serie D, e qualche colpo ben studià, cofà l'ingàgio del defensor central navegà Roberto Mirri, e dei esterni d'ataco Diego Oliveira (che l'ano pasà xogava in serie B) e Fabio Lauria (che riva dal Lumezzane in C1). Durante el mercà invernàłe vien po' ingagià el centrocanpista che xogava a ła Triestina Nicola Silvestri, e dopo el ritorno de l'atacante Marco Moro, vecia conosensa del calcio łagunàr che xa gaveva disputà un canpionato co' ła squadra arancioneroverde nei ani de ła gestion dei Poletti. L'Union Venesia otien ła promosion in Lega Pro co' do xornàe de antisipo, dopo 'na longa batagia co'l Delta Porto Tolle in un canpionato dove co' undexe ponti de distaco e un cało de punti (da ricordàr anca ła sostitusion de l'ałenador Davide Sassarini co' 'l mister Giancarlo Favarin, el Venesia riese comunque a vìnser el canpionato co' na xornàda de antisipo. Dopo ła finałe ne ła corsa par el scudeto de Serie D, l'Union Venesia vinse 3 a 2 co'l Teramo Calcio deventando cussì "Canpion de Itałia" par quanto rivarda ła serie diłatentistica (D) xontando cussì un novo trofeo ne ła so bacheca in vista de ła Lega Pro.