François-Joachim de Pierre de Bernis

François-Joachim de Pierre de Bernis

François-Joachim de Pierre, cardinałe de Bernis (Saint-Marcel-d'Ardèche, Fransa, 22 de majo 1715 – Roma, 3 de novenbre 1794).

Disendente da na fameja de ła nobiltà, al momento de ła so nasita on mucio decadua, el xe sta avià, no esendo el primoxenito, ała cariera eclexiastega. Co na notevołe inclinasion par ła łeteratura e ła poexia, el xe entrà, a sołi 29 ani, inte ł'Académie française.

Inte el 1748 el xe divegnesto conte de Lion, titoło chel spetava de dirito ai menbri del capitoło de ła catedrałe de Lion.

In sèvito el ga tolto co suceso na cariera pułitega. El xe sta proteto da Madame de Pompadour che ło ga considerà uno dei so pì streti consijeri. Inte el 1752 el xe sta nominà ambasador preso ła Republica de Venesia, incarico che el ga condoto co suceso. Durante i tre ani de permanensa inte ła Serenisima el ga condoto na vita estremamente briłante diventando amigo de Giacomo Casanova (che inte ła so Histoire el ghe ne ga tracià on ritrato vivisimo), incontrandoło da novo a Parigi dopo el so rientro inte ła cavedal. A xe da riłevare che el ritrato che De Bernis el ga fato de sé steso inte ła so autobiografia, tuto texo a manifestare ła so morigeratesa e modestia, el xe oposto a queło de Casanova che ło dipinto come on gaudente libertin. A va dito che ła fama de cui el cardinal el godeva preso i contenporanei ła xe pì aderente a queła descrita da ł'aventuriero venesian.

Finìo ł'incarico venesian, De Bernis, el xe entrà a far parte dei consijeri del re Luigi XV. Senpre asiduamente seguio da ła Pompadour, el ga direto el cusidito "rovesamento de łe ałeanze" che el ga portà, col Tratato de Versailles del 1756, a ł'ałeanza de ła Fransa co ł'Austria par far fronte a ł'agresivo miłitarismo prusian e a ł'espansionismo inperiałistego inglexe.

Purtropo ła so asion, tendente a mantegnere on equiłibrio pacifego in Eoropa, ła xe sta vanificà da ł'ataco prusian a ł'Austria dando scuminsio ała "guera dei sete ani". Inte el 1757 el xe diventà ministro de Stato (2 de genaro) e poco dopo (29 de zugno) el ga asunto el dicastero dei estari. El 2 de otobre 1758 el xe sta nominà cardinal dal papa Clemente XIII. Diexe dì el ga dà łe dimision da ministro dei estari, indicando come sucesore el duca de Choiseul che el vegnarà infati nominà el 3 de diçenbre. El 25 de novenbre el ga riçevù el bareto cardinalisio da łe man del re inte el corso de na cerimonia masa sołene par non risultare falsa.

Subito dopo el xe 'ndà in disgrasia, come ca ghe xe notificà co na łetara del re in data 13 de diçenbre e el xe sta parà via da Parigi. El motivo del suo ałontanamento el xe da risercare inte on conflito co ła potentissima Pompadour che no ła gaveva apresà afato ła so połitega de "bon senso" texa a far 'ndar fora in qualche modo ła Fransa da ła pericołoxisima situasion che se gera vegnù a crear in seguito ałe sorti de ła guera.

Purtropo i fatti sucesivi i ghe dà raxòn e i ga dimostrà ł'erore strategico de na połiteg masa rixida che ła ga condoto el paese a riportare dani enormi, tra cui ła perdita de cołonie inportantisime, cuałi el Canada, e ł'avento de ł'indiscuso predominio sui mari de ła corona inglexe.

De Bernis el se ga ritirà ałora inte el so casteło picinin de Vic-sur-Asne dove el se ga dedicà ała conpoxision dei Mémoires detati a so neoda, ła marchexa de Puy-Montbrun. Ł'opara, inportantisima par ła conprension de łe vicende storeghe a cui De Bernis el gaveva partecipà, el se ferma al 1758, in quanto ł'autore ła ga interota inte el 1769 ałorché el xe partio par partesipar al conclave indito ała morte del papa Clemente XIII.

Inte st'ocaxion el cardinałe el ga svolto on ruoło ativo, so indicasion del re e de Choiseul, inte el tentativo, riusìo, de far ełesare on papa aversario dei gexuiti. Il che el se ga verificà co ł'ełesion de Clemente XIV che el ga siolto inte el 1773 ła Compagnia de Gesù.

Inte el genaro del 1764 el xe sta riameso a corte e qualche ano dopo, inte el 1769, el xe sta nominà anbasador a Roma dove el xe restà fin ała morte. In seguito ała Rivołusion a ghe xe sta domandà, inte el 1790, de prestare giuramento ała nova Costitusion civiłe del clero. Dopo vari tentenamenti, el ga mandà on giuramento co riserva che el xe sta giudicà nuło da ł’Asenblea par vizio de forma (30 de genaro 1791). El sucesivo 23 de febraro el ga mandà el refudajo formałe de aderir ała richiesta.

Dopo aver subìo on cicheto e ghe xe sta notificà ł’inconpatibiłità intrà ła carica de anbasador e queła de vescovo de Albi. Poco dopo on altro vescovo el xe sta ełeto al so posto e contenporaneamente a xe scuminsià on’asion contro de lu par el recupero de inposte aretrate. In seguito a ulteriori asion inte i so confronti, tuti i so posedimenti i xe sta sequestrà e misi a ł’incanto o incamarà dal Stato.

Malgrado aver perso tuto, el cardinałe, restà definitivamente a Roma e averse dichiarà ofixialmente emigrà, el ga mantegnù comunque na poxision influente, grasie ała so indiscusa esperiensa, partesipando ała vita połitega e diplomàtega romana. El xe morto el 3 de novenbre 1794 e el xe sta sepolto inte ła cexa de San Luigi dei Fransexi.

Łivri

• Cardinale De Bernis, Memorie. Feltrinelli 1984
• (FR) Vaillot R. Le Cardinal de Bernis, Paris, Ed. Albin Michel, 1985
• (FR) Rouart J.M. Bernis le cardinal des plaisirs. Paris, Ed. Gallimard, 1998
• (FR) Desprat J.P. Le Cardinal de Bernis. Paris, Ed. Perrin, 2000

Predecessore:	Seggio 3 de ł'Académie française	Successore:
Nicolas Gédoyn	1744 - 1803	Roch-Ambroise Cucurron Sicard

Altri progetti

• Wikimedia Commons

• Wikimedia Commons el detien imàjini o altri file so François-Joachim de Pierre de Bernis
• el detien schemi gràfeghi so