Canpanil
Da Wikipedia, ła ençiclopedia lìbara.
|
Sto articolo l'è scrito en diałeto bełunexe (belumat)
|
An canpanil al è an edificio a forma de tór colegà ala česa o a 'n palaž aonde ke ghe n'è inte le canpane, ke le gnen sonađe a 'l scopo de convocàr la žent a la funžion relijosa, de scandir al tenp, de nunžiar 'na festa o 'na desgràžia. Se al canpanil no 'l è ligà a na funžion relijosa ma živìl, alora al gnen ciamà tor civica.
[modìfega] Tipi de sonada, funžion e segnai
Canpanii de cese
- bot: bot singoi par sonar le ore
- meridiana: sonada a tre canpane fata a manca an quart a meodì te la cesa de Vilabruna (Feltre)
- sonada a na canpana: in ocasion de qualunque celebražion se al canpanil al à na unica canpana, sonar le avemarie se al canpanil al à pì de na canpana
- sonar a mort: se sona solche do canpane par nunžiar an mort e par conpagnarlo al cimitero dopo al funeral
- sonar dopio: se sona a tre canpane par nunžiar la messa (an quart de ora prim) e co se lede al Gloria; 'te 'n žerti posti anca par conpagnar al mort a 'l cimitero
- sonar ugnol: se sona co na unica canpana te 'n canpanil a pì canpane par nunžiar la messa, dopo de er sonà dopio
- canpanò: se sona le canpane a concerto qualche dì prim de 'l santo patrono secont le tradižion de 'l posto par nunžiar la festa
- canpane a martel: se sona a martel par avisar che ghe n'è an incendio o na aluvion, in modo che tuti i core a jutar
- sgreole: da' che de Vendre Sant na olta no se podea sonar le canpane, se ndea su te 'l canpanil e se sonea le sgreole par ciamar la đent a la procession
Canpane de tor civiche
- Convocažion consiljo comunal
- Mort particolari
- Aniversari locai e\o nažionai (4 novenber, 25 aprile, 1 majo, 2 giugno e altri)
- Ore
- Scola
- Altre robe
[modìfega] Architetura
la prima distinžion de i canpanii se pol farla in base a come ke al edificio al se inserìs te 'l contesto de la česa o de 'l palaž a 'l qual al è colegà. Se ghe n' trova difati de quei conpletamente destacàđi da la česa (tipici de l'Italia), altri tacađi ma comunque dotai de 'na so porta de aceso e de fonde, e žerti conpletamente inglobai 'te la česa, tant da no aer fonde soe (tipici de le cesete pì cèe).
An nantra distinžion la pol eser fata in base a la idea de costružion: ghe n'è canpanii fati come 'na vera e propria tor, co 'n bus inte par ndar sù e te 'n žerto senso na càsa de risonanža, e altri, i cosideti canpanii "a vela", fati solke da 'n suporto a mo' de cavalét par čener sù le canpane.
I primi i è carateristici de quasi tute le cese de dimension medie, grande e pižole. Al canpanil al pol eser frequentà da đent (se la so dimension la lo permet) e le canpane se le sent da distante parkè la strutura serada sù la costituis na specie de casa de risonanža.
I canpanii a vela inveže i è tipici de le ceséte pì cèe, pì ke sia 'te 'l passà 'te la zona alpina, ma anca 'te n žerte ceséte in stile francescàn. Incói la gran part de le čese nove le à an canpanil a vela de cimento armà; la assenža de 'na strutura serada no la assa ke la canpana la rinbonbe 'te i mur dintorn, sichè se sent na sonada pì linpida ma smoržada.
