Canpanò

Da Wikipedia, l'ençiclopedia libara.
Va a: navigasion, serca
Sto articol al é scrit in belumat

Co la parola canpanò se intende na maniera particolar de sonar le canpane che se costuma doperar ten žerte ocasion speciai, tipica de 'l Nord-Est de l'Italja. Esiste diversi modi de sonar a canpanò secont la tradižion de 'l posto, la conformažion de 'l canpanil e 'l numero de canpane a disposižion. La tradižion la ciameree che se fesse canpanò a međodì, ma a 'l dì de incoi i canpaner i à quasi tuti al laoro in fabrica, sichè de solito al apuntamento al gnen spostà a la sera.

In teoria no ghe n'é limiti reguardo a quante canpane che se ol doperar par sonar a canpanò.

Sonar a "cop"[canbia | canbia sorxente]

Se ghe ciama a cop 'l canpanò fàt co 'na unica canpana. Te 'n sto caso se dòpera la man sinistra par sonàr co 'l batocio, e co la destra se péta co 'n sass te la parte esterna. Par evitar bruti movimenti se se fronta co na spala te la roda de la corda de la canpana. Te la zona aonde che se sona a cop se costuma sonar da 7 o 14 dì prim de la festa de 'l Santo Patrono infin a 'l dì stess. Probabilmente la ultima olta che è stat sonà a cop la è stata a Menin (Žess) par San Biasi de 'l 2008.

Sonar "a canpanò" o "a batarela"[canbia | canbia sorxente]

Se diss che se fa canpanò o batarela quando ke se sona co 3 canpane (o qualche olta 4). Te 'n sto caso se liga le canpane ke le stàe čete, podòpo se taca n'antra corda te 'l batočio de ogni canpana e te la ringhiera de 'l canpanìl (o 'te 'n qualke altro suporto) tirandola polito in modo da ravesinar al batočio infin a 'n det de distanža da la canpana. A sto punto baténdo te le corde se le met in tražion quel tànt ke basta parkè al batočio al rue de petar te la canpana e al la fae sonàr. De solito se sòna la pižola e la granda co la man destra, la media co la sinistra. Se le canpane no le è in linea se dòpera co una an pié, senò se sona in doi. Aonde che ghe n'è sta tradižion de solito se sona i 7 dì prim de 'l Santo Patrono.

Sonar a "canpanon"[canbia | canbia sorxente]

Al canpanon al è al equivalente de la batarela par le cese de la part alta de la Provincia de Belun. I canpaner i à a disposižion quatro o žinque canpane, e ogni un no 'l ghe n sona de pì de doi. De solito le è grande e le ciapa quasi tut al posto de 'l canpanil, sichè i canpaner ghe toca star te 'l pericol. Le canpane no le gnen ligade, e le gnen sonade tirando i batoci co le man. Gnen sonà a canpanon le veđilje de 'l Patrono, de Nadal, de Pasqua.

Altri modi de sonar canpanò[canbia | canbia sorxente]

Te la part de 'l Trentin che la varda a 'l lago de Garda al sistema de sonar al è tip quel a batarela, co la diferenža che le corde de i batoci inveže de esser paralele le se incrosa e le gnen tirade assialmente. Ten altre parti inveže se cata diversi canpaner che i sona co le corde diretamente da la base de 'l canpanil, na canpana a testa, secont sequenže prefissade.

Musiche[canbia | canbia sorxente]

La sonada a canpanò la gnen fata diferénte 'te 'n ogni cesa. Inte žerti posti ghe n'è la tradižion de sonar 'na musica fìsa tramandada "a rečia" tra le generažion o scrita in qualke maniera. De solito comunque ghe n'è tuta 'na serie de sequenže particolari studiade e perfežionade in tanti ani ke le gnen conbinade insieme secònt la braùra de 'l canpaner in maniera libera da regole fìse. Te 'n sto caso le sequenže le canbia sia pur de poc da na cesa a quel'altra. Anca al ritmo no 'l è mai conpagn parkè al à da adatarse a la sonada ke fa le canpane e a la acustica de 'l canpanìl.