Sistema endòcrino

Da Wikipedia, l'ençiclopedia libara.
Jump to navigation Jump to search
Schema dei prinsipali òrgani endòcrini che'l mostra le difarense de le gònade in fra màscolo e fémena. L'ipotàlamo no'l xe mostrà, se cata propio sora e in continuità col'ipòfisi, ciamada anca giàndola pituitaria, mentre l'epìfisi la vien anca ciamada giàndola pineale.
Le frese le ciarise le funsion de stimolasion (frese rose) e feedback (negativo, in frese blu) ormonale, in sto caso in tei asi ipotalamo-ipòfisi-gònade de fémena e màscolo. I prinsipali produti de ovario e cojon, respetivamente estradiolo (n'estrògeno) e testosteron (n'andrògeno), i va a inibir la secresion de GnRH ipotalàmego e FSH e LH ipofisari. Sti sistemi i no xe, in pràtega, speso cusì sénpleghi in te'l so funsionamento, basta pensare al fato che l'ovulasion la càpita in corespondensa de un pego de LH che'l se verìfega co, a metà siclo mestruale, el feedback negativo del'estradiolo sul LH deventa de colpo positivo (fresa zala), causando n'inproviso aumento de la secresion de st'ùltimo.

El sistema endòcrino xe l'insieme de le giàndole del corpo uman a secresion interna (aponto, endòcrine), che le buta drento in te la circolasion sanguigna sostanse ciamade ormoni. L'insieme dei òrgani che ghe fa parte xe pì difìsile da caraterixare respeto a altri aparati e sistemi parché le giàndole endòcrine no le xe in continuità o contiguità anatòmega, ma le funsiona conpagne anca se le se cata distante.

La secresion dei ormoni la ga come rolo cheło de métare in comunegasion parte distante del corpo e cusì la funsion endòcrina la xe conpagna a cuela nervoxa, da la cuale se difarensia par determinai aspeti. Prima de tuto, l'ormon, a difarensa del neurotrasmetitor, el vien butà in solusion in te'l sìrcolo sanguigno e da sto cua poe ocupare l'intiero lìcido extraselulare e anca cuelo intraselulare (se le so caraterìstighe chìmeghe elo parmete): se caratarixa donca par un grando volume de distribusion aparente e'l agise a distansa, mentre el segnale nervoso el resta consentrà e logalizà in un ponto spesìfego. Sta cualità cinètega, somada al fato che speso l'ormon, respeto al neurotrasmetitor, el ga ritmi de eliminasion pì débuli, la spiega parché la segnalasion endòcrina la se destingue da cuela nervosa pa'l fato de èsare lenta a tacare, ma a longa durada.

N'altra caratarìstega sentrale par la fisiologia del sistèma endòcrino xe la regolasion de la secresion giandolare e, donca, del'intensità del mesajo che ghe coresponde. Dito che le majori giàndole del sistema le vien controlade indiretamente dal sistema nervoso traverso l'ipotàlamo, xe inportante pa'l controlo autònomo de la so secresion i cusì ciamadi sistemi de retroasion o feedback. Sti cua i funsiona traverso mecanismi selulari che i poe portare a na deminusion de produsion e/o secresion de l'ormon, se gavemo na crésita dei liveli de sto cua (feedback negativo) co tendensa al ritorno al'ecuilibrio dito omeòstasi. In alternativa la crésita de la concentrasion del'ormon la poe causare ancora aumento de secresion (feedback positivo) co n'incremento esponensiale manman pì rapido, fin co che se riva a on novo ecuilibrio. El feedback el połe funsionare a livelo de la stesa giàndola che la buta drento ormon, cusì come su na o pì giàndole poste a controlo de la stesa.

Defati, se cata, in te na parte sistema endòcrino, l'organixasion jeràrchega dei cusì diti asi endòcrini majori, costituidi da:

  • Ipotàlamo: el xe na protrusion del sarvelo (de la so parte ciamada diencèfalo) co na partegolare rete vascolare che la juta a consentrare in te'l sistema portale ipotalamo-ipofisario i so ormoni pa'l controlo de la giàndola che la vien dopo;
  • Ipòfisi: sta cua xe costituida da na parte posterior che la xe un prolongamento de altri neuroni ipotalàmici boni de butare altre sostanse dretamente in te'l sangue, e na parte anterior (na vera giàndola fata da tesudo epiteliale) che la riseve i segnali butadi dretamente dal'ipotàlamo par convertirli in secresion de altre sostanse.
  • Tiroide: catada vanti in te'l colo, xe parte del'ase ipotàlamo-ipòfisi-tiroide parché la secresion dei sui ormoni la xe influensada dal TRH ipotalàmego traverso el TSH ipofisario. La ga anca sèlule parafolegolari che le funsiona da sole e le produxe calcitonina
  • Giàndole surenali: catade sora dei rini, le so cortegali le xe parte del'ase ipotàlamo-ipòfisi-surenale che'l funsiona in maniera somejante a cuela xà descrita (CRH ipotalàmego, ACTH ipofisario). Le midolari, invese, le xe soto controlo del sistema nervoso ortosinpàtego.
  • Gònade: che le xe i ovari de la fémena e i cojuni del màscolo, le so parte secretorie le responde ai liveli de FSH e LH ipofisari che i depende da la secresion de GnRH ipotalàmego.

Conpagna a sta parte organixada del sistema, ghe xe òrgani endòcrini menori che i ga na regolasion autònoma:

  • Ìsole de Langerhans del pàncreas endòcrino: cognosude soratuto par la secresion dei ormoni antagonisti insulina e glucagon co'l rolo de controlo (miga solo) de la glicemia.
  • Paratiroidi: co na granda variabilità anatòmega, de sòlito le xe cuatro e le se cata drio dei lobi tiroidei; le règola i liveli de calcio in te'l sangue insieme a altri sistemi ormonali.
  • Epìfisi: catada drio e sora del'ipotàlamo, senpre parte del diencèfalo, la senbra far parte del regolamento dei sicli sòno-veja co le so secresion de melatonina influensade dal'esposision a la luxe.

Infin, anca òrgani che i fa parte de altri aparati o sistemi i poe funsionare come giàndole endòcrine:

  • Core: el produxe peptidi natriurètici che i juta a butare fora come orina masa lìcuidi che i jira in te'l aparato sircolatorio;
  • Rene: i ormoni che'l buta in sìrcolo i xe renina, eritropoietina e vitamina D ativada;
  • Figà: xe responsàbile de la secresion de tronbopoietina e vitamina D pre-ativada;
  • Altri òrgani del aparato degerente: le molècole che le buta in sìrcolo (gastrina, colecistochinina, motilina, grelina, e tante altre) le ga numerusi roli de modifegasion de motilità e secresion del trato gastro-intestinale cusì come del senso de fame. De ste secresion xe responsàbili le sèlule cromafini del sistema neuroendòcrino difuso, catà anca in te'l àlbaro bronchiale, del cuale poe èsare considarà parte anca le porsion endòcrine del pàncreas, le giàndole paratiroidi e le sèlule parafolegolari de la tiroide.
  • Pele: la converte el colesterolo in te'l primo precursor, inativo, de la vitamina D3;
  • Tesudo adiposo: valorixà come giàndola endòcrina da tinpi resenti, el controla cuanto magnar se buta xo pì a longo tèrmine respeto ai òrgani degestivi.


Controło de autoritàGND (DE4113434-5
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Sistema_endòcrino&oldid=650968"