Cojon

Da Wikipedia, l'ençiclopedia libara.
Va a: navigasion, serca

Al cojon al fa parte de 'l aparato genital maschil de quasi tuti i animai e al representa la gonade maschil. Al è an organo pari (ghe n'è doi) e 'te i mamiferi Euteri al è inte de 'l scroto, sa specie de "sachet" sot a 'l casso. Al à la funžion principal de far i spermatozoi (la part pì inportante de la sbora) e žerti ormoni fra i quai al testosterone.

Anatomia umana[canbia | canbia sorxente]

Sežion trasversa de la part sinistra de 'l scroto e de 'l cojon sinistro, trata da 'l libro de anatomia Gray's Anatomy.

I cojoi i è de sagoma oval, i mesura 5 žentimetri circa de longheža, 3 žentimetri circa de largheža e 3 žentimetri circa trasversalmente.

Al peso de i cojoi de 'n adulto al è de circa 30 grami par un, anca se un de i doi al pol esser an stciantenin pì grant e pì pesante de quelaltro, e in genere an stciant pì bass. Al motivo de sto tant no 'l è segur, ma la podaree esser quela de inpedirghe a i cojoi te tocarse.

I cojoi i à do funžion: la produžion de i spermatozoi da 'l momento de la pubertà infin a la mort, e la produžion de i ormoni sessuai maschili ciamadi androgeni, de i quai al testosterone al è al pì inportante.

La produžion de i ormoni da parte de i cojoi la è evidente infin da la nasita, ma la aumenta enormemente dintorn de la pubertà e la se mancen a alt livel par tuta la età adulta infin a manifestar an calo durante i ultimi ani de vita.

La produžion de i spermatozoi no la scominžia infin a la pubertà, anca se la segue al model de la produžion de ormoni calando in età avanžada. I spermatozoi i gnen prodoti inte ogni cojon in struture speciai ciamade tubuli seminiferi in particolar da le celule de 'l Sertoli. Sti tubet i è a 'l centro de ogni cojon e i è colegadi co na serie de condoti che i convoglia la sbora a altri inportanti organi e, a la fin, fora da 'l casso, se sto tant al è domandà.

Inte ogni cojon, arent a i tubuli seminiferi, ghe n'è tante celule ciamade celule interstižiai o celule de Leydig. Le è responsabili de la produžion de 'l ormon sessual maschile (testosterone) che 'l gnen riversà diretamente 'te i vasi sanguigni dintorn. A 'l momento de la pubertà, la gran part de i canbiamenti che sucede 'te 'l mastcio la è produsesta da la gran quantità de testosterone che ghe n'è 'te 'l so corpo. Durante la ecitažion sessual i cojoi i aumenta de grandeža. Al sangue al inpien i vasi sanguigni che ghe n'è inte causando al so ingrandimento. Dopo la ejaculažion i torna a le so dimension naturai. Pena prim de la ejaculažion i cojoi i gnen tiradi arent a 'l corpo. Dopo la ejaculažion i torna 'te la so posižion usual 'te 'l scroto.

Al medesimo ravesinament de i cojoi a 'l corpo se 'l à 'te i momenti de paura, rabia o quando che al on al à fret. Te 'n sto modo, naturalmente, al corpo al proteje sto mecanismo delicato e vulnerabile. I cojoi i pende da 'l corpo par poder star a la tenperatura an pel pì bassa che è domandada par la produžion de la sbora. Quando che la stajon la è tant calda o durante an bagno tiepido i è pì bassi de 'l solito, distante da 'l corpo e da 'l so calor; a 'l incontrario, 'te la stajon freda, i se ravesina a 'l calt de 'l corpo par mancener na tenperatura otimal. Se i gnen cenesti a la tenperatura corporea no i è pì in grado de far spermatozoi e al on al gnen sterile. Quando che i muscoi de 'l on i se tira, par esenpio quando che al se parecia a na fuga o a na agression opur pena prim de la ejaculažion, an insieme de muscoi inte 'l scroto al pende i cojoi insù: sti qua i è la fassa cremasterica, la fassa spermatica interna e la fassa spermatica esterna.

Anatomia microscopica de 'l cojon[canbia | canbia sorxente]

Al cojon al è costituì da la tonega albuginea e da le so dipendenže, da 'n parenchima costituì da i tuboli seminiferi, e da 'l stroma che 'l circonda i tubuli seminiferi e 'l contien sto ultimo le celule de leydig a funžion endocrina. la tonega albuginea la è la tonega pì intima de 'l cojon, costituida da an tessuto de conession fibross denso co fass de fibre colagene a andamento paralelo, la è resistente e inestensibile, spessa medo o an melimetro, che a 'l esterno la continua co 'l epiorchio. Inte i strati pì superficiai se cata fibrocelule muscolari slisse e 'te i strati pì fondi se cata fibra elastica. Da la facia fonda de la albuginea ciamada tonega vascolosa parchè tant vascolarizada parte seti convergenti verso la mediastin testicolar i se profondiss a 'l interno de 'l cojon dividendolo in nicie, circa 300. Ogni nicia la à sagoma piramidal, co la base oltada verso la superficie de 'l cojon e la ponta in corispondenža de 'l mediastin testicolar. Al parenchima de color rosa gialastro, al inpien le nicie inte de le quai al se organiza in lobui. Ogni lobul al cen inte tubi seminiferi intorti, i estremi de i quai i è tant anastomizadi. Da la rede testis parte circa 15-20 condotin eferenti che i confluiss a far al epidimo. I tubuli seminiferi intorti i è longhi da 30 a 70 cm e i ocupa al poch spažio a so disposižion gražie a 'l so andamento intort. La parete de i tubuli seminiferi la è costituida da epitelio pluriserià ciamà epitelio germinatiu che 'l poja su na lamina soa. Al epitelio germinatiu al conprende arent a le celule germinai in diverso stato de diferenžiažion le celule de 'l Sertoli che le è celule de sostegno. le celule de 'l Sertoli le è celule de derivažion mesodermica no spermatogeniche che oltre a sostegner e a darghe da magnar a i spermatozoi i fa inportanti funžion endocrine. I se estende par tut al spessor de 'l epitelio co la base che poja su la menbrana basal e la žima verso al lume; la žima la presenta infossadure inte le quai le è contegneste le teste de i spermatidi in via de svilupo. Se pol cognosserli par al nucleo triangolar co 'l nucleolo evidente e la cromatina disperdesta. Le celulede 'l Sertoli le è unide da conplessi de giunžion (tight junctions) che i divide al epitelio germinatiu in do conparti cognossesti come basal e come luminal. le celule de 'l Sertoli quindi le fa da tramite 'te i scanbi metabolici tra al conparto luminal de i spermatidi e quel sistemico costituendo na bariera ematotesticolar che la isola i spermatidi da 'l resto de 'l organismo, riparandoli da 'l sistema inmunitario. Al citoplasma al è acidofilo, co gožete de lipidi, scars RER e abondante REL. Žerte olte è visibili agregadi proteici noti come corpi de Charcot Bottcher. Se cata anca lisosomi primari e secondari. Le celule de 'l Sertoli le media la spermatogenesi e la spermiažion, le riassorbe i corpi residui tramite fagocitosi. Le à anca na funžion endocrina: le fa ABP (protein binding androgen), sot de 'l stimol de 'l FSH ipofisario che 'l concentra al testosterone favorendo la spermatogenesi; le secerne inibina che la agiss co feedback negativo a livel ipotalamo-ipofisario. Le celule germinai le è celule in vario stadio de diferenžiažion. Quele pì indrio le è in periferia e quele pì avanti le va verso al lume. Al processo tramite al qual i elementi celulari i passa da la periferia a 'l lume al ciapa an nome de spermatogenesi. Al dura 74 dì circa e 'l conprende la spermatogoniogenesi (proliferažion par mitosi de le celule germinai primitive, da le quai se origina i spermatociti primari), la spermatocitogenesi (division mejotica de i spermatociti primari a formar spermatociti secondari e sti ultimi i spermatidi) e la spermiogenesi (diferenžiažion de i spermatidi in spermatozoi maduri, no se à fenomeni de moltiplicažion).

Colegamenti esterni[canbia | canbia sorxente]

Modi de dir[canbia | canbia sorxente]

  • Riferì a na persona, "cojon" al è na ofesa e al ciapa al significà de "stubido" o pì raramente "ingenuo".
  • strucarse i cojoi (o tocarseli) al pol esser an modo par scongiurar la scarogna
  • ronper i cojoi ol dir far qualcossa par dar fastidio. Al deriva da 'l fato che le pache te i cojoi le fa tant mal. Da sto tant deriva anca i deti "star te i cojoi" (star antipatici) e "dar na scarpada te i cojoi" (na forma de minacia).