Testicoło

Da Wikipedia, l'ençiclopedia libara.

Al testicolo al fa parte del aparato genital maschil de quasi tuti i animai e al representa la gonade maschil. Al ze an organo pari (ghe n'è doi) e 'te i mamiferi Euteri al ze inte del scroto, sa specie de "sachet" sot al casso. Al ga la funsion principal de far i spermatozoi (la part pì inportante de la sbora) e serti ormoni intrà i quai al testosterone.

Anatomia umana[canbia | canbia el còdaxe]

Sesion trasversa de la part sinistra del scroto e del cojon sinistro, trata dal libro de anatomia Gray's Anatomy.

I testicoli i ze de sagoma oval, i mesura 5 sentimetri circa de longhesa, 3 sentimetri circa de larghesa e 3 sentimetri circa trasversalmente.

Al peso dei testicoli de un adulto al ze de circa 30 grami par un, anca se un dei doi al pol esser an stciantenin pì grando e pì pesante de quelaltro, e in genere na s-cianta pì bass. Al motivo de sto tanto no el ze segur, ma la podaree esser quela de inpedirghe a i cojoi te tocarse.

I testicoli i ga do funsion: la produsion dei spermatozoi dal momento de la pubertà infin a la mort, e la produsion dei ormoni sessuai maschili ciamadi androgeni, dei quai al testosterone al ze al pì inportante.

La produsion dei ormoni da parte dei testicoli la ze evidente infin da la nasita, ma la aumenta enormemente dintorn de la pubertà e la se mancen a alt livel par tuta la età adulta infin a manifestar an calo durante i ultimi ani de vita.

La produsion dei spermatozoi no la scominsia infin a la pubertà, anca se la segue al model de la produsion de ormoni calando in età avansada. I spermatozoi i gnen prodoti inte ogni cojon in struture speciai ciamade tubuli seminiferi in particolar da le celule del Sertoli. Sti tubet i ze al centro de ogni cojon e i ze colegadi co na serie de condoti che i convoglia la sbora a altri inportanti organi e, a la fin, fora dal casso, se sto tanto al ze domandà.

Inte ogni testicolo, arent a i tubuli seminiferi, ghe n'è tante celule ciamade celule interstisiai o celule de Leydig. Le ze responsabili de la produsion del ormon sessual maschile (testosterone) che el gnen riversà diretamente 'te i vasi sanguigni dintorn. A el momento de la pubertà, la gran part dei canbiamenti che sucede 'te el mastcio la ze produsesta da la gran quantità de testosterone che ghe n'è 'te el so corpo. Durante la ecitasion sessual i cojoi i aumenta de grandesa. Al sangue al inpien i vasi sanguigni che ghe n'è inte causando al so ingrandimento. Dopo la ejaculasion i torna a le so dimension naturai. Pena prim de la ejaculasion i cojoi i gnen tiradi arent al corpo. Dopo la ejaculasion i torna 'te la so posision usual 'te el scroto.

Al medesimo ravesinament dei testicoli al corpo se el ga 'te i momenti de paura, rabia o quando che al on al ga fret. Te un sto modo, naturalmente, al corpo al proteje sto mecanismo delicato e vulnerabile. I cojoi i pende dal corpo par poder star a la tenperatura an pel pì bassa che ze domandada par la produsion de la sbora. Quando che la stajon la ze tanto calda o durante an bagno tiepido i ze pì bassi del solito, distante dal corpo e dal so calor; al incontrario, 'te la stajon freda, i se ravesina al calt del corpo par mancener na tenperatura otimal. Se i gnen cenesti a la tenperatura corporea no i ze pì in grado de far spermatozoi e al on al gnen sterile. Quando che i muscoi del on i se tira, par esenpio quando che al se parecia a na fuga o a na agresion opur pena prim de la ejaculasion, an insieme de muscoi inte el scroto al pende i cojoi insù: sti qua i ze la fassa cremasterica, la fassa spermàtega interna e la fassa spermàtega esterna.

Anatomia microscopica del testicolo[canbia | canbia el còdaxe]

Al testicolo al ze costituì da la tonega albuginea e da le so dipendense, da un parenchima costituì da i tuboli seminiferi, e dal stroma che el circonda i tubuli seminiferi e el contien sto ultimo le celule de leydig a funsion endocrina. la tonega albuginea la ze la tonega pì intima del cojon, costituida da an tessuto de conesion fibross denso co fass de fibre colagene a andamento paralelo, la ze resistente e inestensibile, spessa medo o an melimetro, che al esterno la continua co el epiorchio. Inte i strati pì superficiai se cata fibrocelule muscolari slisse e 'te i strati pì fondi se cata fibra elastica. Da la facia fonda de la albuginea ciamada tonega vascolosa parchè tanto vascolarizada parte seti convergenti verso la mediastin testicolar i se profondiss al interno del cojon dividendolo in nicie, circa 300. Ogni nicia la ga sagoma piramidal, co la base oltada verso la superficie del cojon e la ponta in corispondensa del mediastin testicolar. Al parenchima de color rosa gialastro, al inpien le nicie inte de le quai al se organiza in lobui. Ogni lobul al cen inte tubi seminiferi intorti, i estremi dei quai i ze tanto anastomizadi. Da la rede testis parte circa 15-20 condotin eferenti che i confluiss a far al epidimo. I tubuli seminiferi intorti i ze longhi da 30 a 70 cm e i ocupa al poco spasio a so disposision grasie al so andamento intort. La parete dei tubuli seminiferi la ze costituida da epitelio pluriserià ciamà epitelio germinatiu che el poja su na lamina soa. Al epitelio germinatiu al conprende arent a le celule germinai in diverso stato de diferensiasion le celule del Sertoli che le ze celule de sostegno. le celule del Sertoli le ze celule de derivasion mesodermica no spermatogeniche che oltre a sostegner e a darghe da magnar a i spermatozoi i fa inportanti funsion endocrine. I se estende par tut al spessor del epitelio co la base che poja su la menbrana basal e la sima verso al lume; la sima la presenta infossadure inte le quai le ze contegneste le teste dei spermatidi in via de svilupo. Se pol cognosserli par al nucleo triangolar co el nucleolo evidente e la cromatina disperdesta. Le celulede el Sertoli le ze unide da conplessi de giunsion (tight junctions) che i divide al epitelio germinatiu in do conparti cognossesti come basal e come luminal. le celule del Sertoli quindi le fa da tramite 'te i scanbi metabolici tra al conparto luminal dei spermatidi e quel sistemico costituendo na bariera ematotesticolar che la ìzoła i spermatidi dal resto del organismo, riparandoli dal sistema inmunitario. Al citoplasma al ze acidofilo, co gosete de lipidi, scars RER e abondante REL. Serte olte ze visibili agregadi proteici noti come corpi de Charcot Bottcher. Se cata anca lisosomi primari e secondari. Le celule del Sertoli le mèdia la spermatogenesi e la spermiasion, le riassorbe i corpi residui tramite fagocitosi. Le ga anca na funsion endocrina: le fa ABP (protein binding androgen), sot del stimol del FSH ipofisario che el concentra al testosterone favorendo la spermatogenesi; le secerne inibina che la agiss co feedback negativo a livel ipotalamo-ipofisario. Le celule germinai le ze celule in vario stadio de diferensiasion. Quele pì indrio le ze in periferia e quele pì avanti le va verso al lume. Al processo tramite al qual i elementi celulari i passa da la periferia al lume al ciapa an nome de spermatogenesi. Al dura 74 dì circa e el conprende la spermatogoniogenesi (proliferasion par mitosi de le celule germinai primitive, da le quai se origina i spermatociti primari), la spermatocitogenesi (division mejotica dei spermatociti primari a formar spermatociti secondari e sti ultimi i spermatidi) e la spermiogenesi (diferensiasion dei spermatidi in spermatozoi maduri, no se ga fenomeni de moltiplicasion).

Colegamenti esterni[canbia | canbia el còdaxe]

Modi de dir[canbia | canbia el còdaxe]

  • Riferì a na persona, "cojon" al ze na ofesa e al ciapa al significà de "stubido" o pì raramente "ingenuo".
  • strucarse i cojoi (o tocarseli) al pol esser an modo par scongiurar la scarogna
  • ronper i cojoi ol dir far qualcossa par dar fastidio. Al deriva dal fato che le pache te i cojoi le fa tanto mal. Da sto tanto deriva anca i deti "star te i cojoi" (star antipatici) e "dar na scarpada te i cojoi" (na forma de minacia).
Controło de autoritàLCCN (ENsh85134157 · GND (DE4025306-5 · BNF (FRcb11976787k (data) · BNE (ESXX534283 (data) · NDL (ENJA00566150
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Testicoło&oldid=1042591"