Anatomia

Da Wikipedia, l'ençiclopedia libara.
Jump to navigation Jump to search
Sto articoło el xe scrito in padoan
Lession de anatomia del dotor Tulp, depinto de Rembrandt del 1632, che'l descrive el dotor che, co na pinsa, mostra fora mùscoli e téndini del'avanbrasso de sanca ai sui studenti. La fama de st'òpera la xe signifegativa par l'inportansa che i progressi del'anatomia i gaveva in te'l contesto de la revolussion sientìfega che la gera drio avenire in tel corso de quili sècoli.
El tiatro anatòmego de Pàdova, prima strutura stàbile de sto tipo, vossuda da Girolamo d'Acquapendente. Se cata in tel palasso del Bo del'università e xe stà el sentro de sta revolussion mèdega. Al sentro ghe stava el professor e i studenti i vardava dai portezeli intorno sora.

L'anatomia xe la dissiplina, rama de la biologia, che la studia la strutura dei organismi, overo i corpi viventi, e de le so parte. Sta parola la salta fora dal grego anatomé che la signìfega tajo, par via del mètodo sevità da chi che'l pràtega sta siensa, che da sèculi oramai xe la dissession. Drento al'anatomia se destingue vari seturi de studio:

  • Prima de tuto ghe xe l'anatomia umana, ma anca l'anatomia anemale e quela vegetale.
  • In tuti sti ànbiti de studio se ga la contraposission fra l'anatomia macroscòpica (che la studia i organismi par intiero, i aparati e i sistemi, i òrgani) e l'anatomia microscòpica (che la studia i tessudi e i le sèlule, in te le so ramifegassion respetivamente ciamade istologia e citologia).
  • Po ghe xe la destinsion in fra anatomia normale (l'anatomia propiamente dita, overo dei corpi sani) e anatomia patològica. St'ùltima la xe na specializassion mèdega co un definio rolo de diàgnosi su biopsia e autopsia, che le se fa, respetivamente, su tochi tolti dal corpo vivo e sul corpo morto intiero.

L'anatomia la xe n'insieme de studi conplesso che'l ìntrega informassion de siense sorele. In fra ste qua ghe xe la teoria del'evolussion, che la serca de spiegare le difarense in fra i organismi de specie deverse, l'enbriologia, che la studia el svilupo de le parte del corpo, e anca la fisiologia, che la studia la funsion de le struture descrite dal'anatomia. L'avansamento sientìfego e tècnego el ga permesso la nàssita de siense come la radiologia e la medicina nucleare che le parmete de védare in tel corpo sensa tajare gnente: va dito che le imàzene che vien creade sevitando i prinsipi de ste siense no le xe la vera descrission del corpo o de na so parte. Par quanto detajade le possa èssare le imàzene che le se vede in un paramento de TC o RM, le no rapresenta la realtà anatòmega, quanto piutosto de n'onbra che se crea al'interassion dei so tessudi co che i interagisse col'energia eletromagnètica butada fora da na sorzente e i da indrio un segnale ciapà da un rilevator. Tegnudo conto de sti lìmiti, va sotolineada l'inportansa de ste tecnologie, soratuto ciaramente pa'l studio anatòmico del vivente.

El progresso sientìfego el ga parmesso l'avansamento de le cognossense anatòmeghe in te l'ùltimo sècolo, co invesse prima la dissession, restada oncora el mètodo de referimento, la gera l'ùgnolo a desposission. L'istoria del'anatomia la spenze indrio i primi tentativi de studio del corpo uman fin al'Antigo Egito, dal quale ne xe rivai papiri che i descrive pràteghe de autopsia e teorie su le funsion dei òrgani. Personaji inportanti del'antighita che i se ga intaressai de anatomia e medicina xe stai Ipòcrate, Aristòtele, el re Tolomeo I Soter che'l ga fondà na scola anatòmega a Alessandria d'Egito e Galeno. Notévoli avansamenti xe sta fati anca in tel mondo mussulman, mentre quela che in tel corso del Medioevo in te l'Eoropa cristiana fusse proibie le dissession autòptiche sul corpo uman, par motivi relijosi, xe na buzia istòrega che la xe ancora bastansa difusa. Studi anatòmeghi i gera prategai anca in te'l Basso Medioevo, sul'anemale come sul'omo, el grando svilupo de sta dissiplina se ga vudo però col Renassimento e òmeni de siensa come Leonardo da Vinci, Girolamo Fabrici d'Acquapendente, William Harvey (che'l ga teorizà el modelo moderno de la circolassion del sangue), Andrea Vesalio e Gabriele Falloppio. Sti ùltimi quatro i ga goduo del'istitussion dei primi tiatri anatòmeghi fissi, in particolare al'Università de Pàdova. Senpre in sto posto xe sta tribuia a Gian Battista Morgagni la fondassion del'anatomia patològica, par nomenare n'altro inportante esponente de sta materia, va recordà in te la Germania del'800 Rudolf Virchow.