Aparato sircolatorio

Da Wikipedia, l'ençiclopedia libara.
Jump to navigation Jump to search
Sto articoło el xe scrito in padoan
Schema del'aparato sircolatorio co core e vasi alteriosi e venosi de dimension mazori. No xe segnai i nomi dei vasi ma ghe se vede la distinsion de la sircolassion polmonare da quela sistèmica. Par convension i vasi che i porta sangue alterioso i xe desegnai come rossi, queli che i porta sangue venoso i xe blu: donca xe desegnada in blu l'alteria polmonare e in rosso le vene polmonari.
Modelo de funsionamento de la pìcola e de la granda circolassion in serie, tute e do mosse da le stesse contrassion del core. Le vàlvole cardìache, come desegnà in tel schema, le xe fondamentali par diressionare la pression e réndare eficace el flusso verso i capilari sistèmissi e polmonari.

L'aparato sircolatorio o cardiovascolare xe l'insieme dei òrgani che i ga la funsion de varentare la circolassion del sangue par la perfusion de tuti i distreti corpòrei, cussì da parmétare el so metabolismo. Sti òrgani del quale xe struturà i xe, prinsipalmente:

Ghe xe vossudi un bel fià de sèculi par rivare al modelo de ancó de la circolassion sanguigna, el resultà xe tribuio a William Harvey co la so publicassion De motu cordis in tel 1628. El core el funsiona come na ponpa mecànega che la buta vanti un flusso continuo de sangue in te i vasi, che i xe come tubi. Sti qua i parte dal sistema alterioso che'l ramìfega manman fin ai capilari, queli de diàmetro menor e parede streta bona par i scanbi de sostanse coi tessudi; a la fin i converze a formare el sistema venoso che'l porta indrio el sangue al core. La circolassion che la gira da e in diression del core la resulta organizada in do seturi che i funsiona come sircùiti desposti in serie:

  • la granda circolassion o circolassion sistèmica in partensa dal ventrìcolo de sanca e in ritorno al'atrio de drita, la porta el sangue alterioso (rico de ossìgeno e pòaro de anidride carbònica) ai tessudi periferissi traverso le ramifegassion de la più granda e spessa alteria del corpo che la xe l'aorta; el ritorno del sangue venoso passa traverso le do tributarie cardìache ciamade vena cava superiore e inferiore.
  • la pìcola circolassion o circolassion polmonare in partensa dal ventrìcolo de drita e in ritorno al'atrio de sanca, la porta el sangue venoso (pòaro de ossìgeno e rico de anidride carbònica), traverso le rame del'alteria polmonare, ai alvèoli polmonari, dove che'l sangue poe far scanbio de gas col'aria che cata; da qui torna, traverso le vene polmonari, come sangue alterioso de novo al core par tornare in circolassion sistèmica.

La regolassion de la circolassion sanguigna la xe basada sul prinsipio de sigurare na perfusion bona par tuti i distreti corporei a seconda de le so esigense, però favorendo teritori privilezai par inportansa come el core stesso e'l servelo parché i no vaga in ischemia. Sta regolassion la ga da far fronte ai adatamenti fisiològissi ai quali se va incontro coi canbiamenti de atività e esigense metabòliche dei sìnguli distreti, variando spessìfissì paràmetri.

  • La pression sanguigna xe fondamentale parché el so gradiente longo tuto el torente sircolatorio xe quelo che'l move el sangue: sarà più alta a livelo dei cai alteriosi de la circolassion e più bassa ai cai venosi, se no'l fusse cussì el sangue tornaria indrio par st'altro verso. Se vien a creare un distreto del'intiero aparato dito sistema a alta pression (le alterie de la circolassion sistèmica), che'l ga la funsion de propulsion, dove sto paràmetro el ga provisorie variassion in funsion de la fase del ciclo cardìaco, alternàndose fra i normali 120 e 80 mmHg de la pression sistòlica (la màssima) e diastòlica (la mìnima). La volemia xe determinante, insieme al'atività de contrassion del core, la pression che se cata in te i distreti del'aparato. Gran parte del volume emàtico se cata in tel sistema a bassa pression (tuto el resto, capilari e vene sistèmissi e l'intiero sìrcolo polmonare) che'l ga funsion de magazin de sangue da butare in giro in caso de bisogno. La pression venosa sentrale la xe assè più bassa de quela alteriosa sistèmica (no la gavaria da ndare sora dei 8 mmHg), in tel sìrcolo polmonare la pression alteriosa la xe de 25/10 mmHg.
  • La gitada cardìaca xe el flusso (volume/tenpo) butà fora dai ventrìcoli, deverso a seconda de la persona e de l'atività che la xe drio fare, ma gualiva a livelo dei do versanti sistèmico e polmonare. I do ventrìcoli i buta fora la stessa quantità de sangue al menudo, anca se i elo fa a pression deverse. La gitada cardìaca la xe el prodoto de frequensa cardìaca par gitada sistòlica, paràmetro che'l depende da ritorno venoso al ventrìcolo e forsa de contrassion.
  • Le resistense ai flussi le xe vero più alte in te la circolassion sistèmica respeto a quela polmonare, par rezon de anatomia, e sta roba la spiega parché i flussi i xe gualivi mentre le pression le xe deverse.

Par mantegnere n'aporto de sangue bastante e adatà a le necessità del momento, i tessudi i risseve na quantità de sangue regolada da molti mecanismi. Fra sti qua ghe xe adatamenti logali de autoregolassion (a livelo de core, servelo e rene soratuto, ma anca a livelo dei mùscoli) e mecanismi generali mediai dal sistema nervoso vegetativo (al breve perìodo) e dal sistema endòcrino (al longo perìodo).