Riva

Da Wikipedia, l'ençiclopedia libara.
Jump to navigation Jump to search


Sto artìcoło el xé scrito in diałeto venesian


La riva xe un elemento carateristico de ła viabiłità de Venesia.

Rive portuałi[canbia | canbia el còdexe]

Ne ła toponomastica çitadina el termine riva xe risevà a łe fondamente che costegia el Canal Grando e 'l Baçin de San Marco. Ai tenpi de ła Republica de Venezia infati łe atuałi rive gera łe banchine portuałi par l'armìzo de łe navi mercantiłi che operava el tràfego nel basin del Mediteraneo. Par sta razon le rive xe caraterizàe da 'na largheza un mucio mazor respeto a queła de łe fondamente ordenàrie e xe mancanti patòche de parapèti.

Le rive pì famose xe ła Riva de Biasio, ła Riva del Vin e ła Riva del Carbón longo el Canal Grando; ła Riva dei S-ciavoni e ła Riva dei Sete Martiri longo el Baçin de San Marco.


Rive par l'armìzo[canbia | canbia el còdexe]

El termine riva se usa anca par indicàr i armìzi recavài longo i parapèti dei rii. Se trata massime de picòłe scałinàe spòrzenti reałizàe in pièra d'Istria e che finisse diretamente in aqua. El cui fìn xe façiłitàr l'aceso a łe imbarcazion ne łe difarenti condizion de marea. Spesso łe scałinàe de łe rive gà un gradon-piataforma logà çirca a metà de ła scàła par agevołàr ulteriormente łe operazion de cargo e descargo marcanzìe e de salìda e desmontàda dei passegeri da łe imbarcazion che se armìza.

Ghe xe in modo sostanziàl tre tipołogie de rive[1]:

  • ła riva co' scałìni logài parałełamente al percorso del rio
  • ła riva co' scałìni logài perpendicolarmente respeto all percorso del rio
  • ła riva che finisse 'na całe o un sotopòrtego che desboca avalìo su l'aqua.

Le rive co' scałìni logài in modo perpendicołàr xe stàe sfrutàe anca par razon architetoniche, par dar resàlto o magnificensa a ła cesa o al pałaso danànsi al logo indove che se trova. Esempi tipici de sto utiłizo sia pratico che ornamental xe łe rive che se trova davanti a ła Cesa dei Gesuati, a ła Baxełega de Santa Maria de ła Sałute e a ła Cesa dei Tołentini.


Note[canbia | canbia el còdexe]

  1. G.Perocco, A.Salvadori, op. cit., pp.250-254

Bibliografia[canbia | canbia el còdexe]

  • G. Perocco A. Salvadori, Civiltà di Venezia, volume I, Venezia, La stamperia di Venezia, 1977.