Ippolito Nievo

Da Wikipedia, l'ençiclopedia libara.
Ippolito Nievo.jpg

Ippolito Nievo

Ippolito Nievo (Padova, 30 de novenbre 1831Mar Tireno, 4 de marso 1861) xe stà un scritor itałian dell'Otosento.

Biografia[canbia | canbia el còdaxe]

El gera nato a Padova da Antonio, on nobiłe magistrato mantovan e da Adele Marin na nobildona venesiana, fioła de on patoreo e de na contesa furlana, Ippolita de Colloredo e de Carlo cui el Nievo el gera particołarmente łigà.
I łoghi de ła so infansia e de ła so fameja i ga fato da sfondo, in tuti i so romanzi e łe so novełe, ai personaji che i se moveva tra ła Łonbardia, el Veneto e el Friułi.

I studi[canbia | canbia el còdaxe]

Par tegner drio a so pare inte i so trasferimenti de łaoro, Ippolito el ga trascorso i primi ani d'infansia in varie sità del Regno Lonbardo Veneto e inte el 1841 el se ga iscrito al cołejo del seminario de Sant'Anastaxia de Verona entrando a convito.
El ga proseguìo i studi a Cremona e a Revere, inte on liceo privato, dove el ga conseguìo ła łicensa łiceałe inte el 1850. Ritornà a Mantova inte ła caxa paterna, el se ga iscrito a ła facoltà de Łexe preso ł'Università de Pavia, studi proseguìi a Padova dove el se ga laureà inte el 1855 quando zà i avenimenti storeghi e połiteghi de chel tenpo i ło gavevano coinvolto in prima persona.

Ł'atività miłitante[canbia | canbia el còdaxe]

Inte el 1848 el xovane Ippolito, afasinà dal rigor morałe de ła predicasion masiniana, el ga parteçipà inte el s-ciopo del moto insuresionałe a Mantova che el ga fałìo.
Dełuxo da ła sconfita el va a Cremona co ł'amigo Attilio Magri e in sta sità, dove el ga vivesto par qualche mexe, el conose Matilde Ferrari, ł'ispiratora del romanzo "Antiafrodisiaco par l'amor platonico" conposto inte el 1851, e se ne ga inamorà.

Inte ła primavera del 1849 el sogiorna par poco a Pixa dove el conose Andrea Cassa, col cuałe el parteçipa ai moti livornexi e el entra in contato co i esponenti del partio democratico de Guerrazzi.

Ł'intarese par ła łeteratura[canbia | canbia el còdaxe]

Ł'intarese par ła leteratura el se gera intanto consołidà e inte el 1852 el xovane el ga scuminsià, acanto al laoro leterario, ła so atività de publicista che ła proseguirà anca a łaurea conseguia, rifiutandose cusì di intraprendere na cariera giuridica che ło gavarìa inserìo inte ł'odià aministrasion austriaca.

Inte el 1854 a vien publicà preso ł'editor Vendrame de Udine on primo vołume dei "Versi" che el rancura łe poesie che łe gera sta precedentemente publicà so ła rivista "L'Alchimista friulano" e inte ło steso ano a vien rapresentà a Padova el so drama "Gli ultimi dì di Galileo Galilei".

Inte el 1855, dełuxo da ła situasion połitega italiana, ło scritor el se ritira a Colloredo di Montalbano e el se dedica ativamente a ła produsion leteraria dełineando inte ła mente queło che el sarà el so capołaoro, "Le confesion d'un Italiano".

El continua intanto ła so atività de publicista e el se avisina al giornałismo miłitante miłanexe cołaborando al setimanałe "Il Caffè".

El sojorno a Miłan[canbia | canbia el còdaxe]

Inte el 1856, a cauxa de on raconto intitołà "L'Avvocatino" publicà sol foglio miłanexe "Il Panorama universale", el vien acusà de viłipendio inte i confronti de łe guardie inperiałi austriache e subise on proceso.
Ła sarà questa ł'ocaxion par trascorare łonghi periodi a Miłan dove el gavarà modo de partesipar ai dibatiti łeterari e połiteghi che i se svolgevano e de apresar el vivace clima culturałe de queła sità.

Ła stexura del romanzo[canbia | canbia el còdaxe]

Tra el 1857 e el 1858 Nievo, ritornà a Colloredo, el se dedica intensamente, a ła stexura del so grande romanzo, "Le confesion d'un italiano", che el sarà publicà postumo inte el 1867 da ł'editor Le Monnier col titoło rivisto "Le confesion di un ottuagenario".

I avegnimenti del 1859 e del 1860 i ga rexo pì intensa ła so atività giornalistega e el ne ga sołecità i primi du sagi połiteghi, ł'opuscoło "Venezia e la libertà d'Italia" ispirà da ła mancada liberasion de ła sità, e el "Frammento sulla rivoluzione nazionale".

Al servisio de Garibaldi[canbia | canbia el còdaxe]

Inte el 1859 el xe tra i Cacciatori delle Alpi de Garibaldi e ł'ano seguente el partesipa a ła Spedision dei Miłe. Unendose a łe trupe garibaldine el 5 de majo del 1860 el salpa da Quarto a bordo del Lombardo insieme a Nino Bixio e Cesare Abba.

Distintose a Całatafimi e a Pałermo a ghe vien afidà ła nomina de "Intendente de prima clase" de ł'inprexa dei Miłe co incarichi aministrativi e el ne sarà anca atento cronista ("Diario della spedizione dal 5 al 28 de majo" e "Lettere garibaldine").

El naufragio e ła precoce morte[canbia | canbia el còdaxe]

Avendo ricevù ł'incarico de riportar da Pałermo i documenti aministrativi de ła spedision, el cata ła morte durante el viajo de ritorno da ła Siciłia, inte ła note tra el 4 e il 5 de marso 1861, inte el naufragio avegnù inte el Mar Tireno del vapore Ercole sol cuałe el viajava.

Opare[canbia | canbia el còdaxe]

Inte ła produsion del Nievo a xe presenti generi leterari diversi anca se łigài dal tema comune del so inpegno risorgimentałe.

Le lettere a Matilde Ferrari[canbia | canbia el còdaxe]

Ła prima prova narativa del Nievo ła consiste inte łe 70 łetare spedìe, tra el 1848 e el 1851, a Matilde Ferrari durante ła so rełasion. In ese, che łe risente de ł'influensa del Foscolo ortisiano, a se sente zà queła particołar sensibiłità a riguardo a ła realtà contadina, oltre el nostalgico ricordo de ła civiltà venesiana, che caraterixarà łe so opare magiori.

Afrodisiaco par l'amor platonico'[canbia | canbia el còdaxe]

Ła so prima vera opara el xe el romanzo curto połemico-satirico Afrodisiaco par l'amor platonico', scrito inte el 1851, łigà a ła rotura del raporto amoroxo co Matilde che ł'autore el ga łasà inedito e che el xe sta publicà postumo inte el 1956 a cura de C. Bascetta e V. Gentili a Firense preso ł'editore Le Monnier.

I Versi[canbia | canbia el còdaxe]

Ai ultimi mexi del 1853 e ai primi del 1854 a risałe i primi Versi fruto de na intensa cołaborasion col xiornałe de tendensa łiberałe "L'Alchimista Friulano".
In esi el scritor el se rivolxeva contro łe "svenevołese" dei poeti łigà a ła tradision clasicistica che ła gera diventà ormai academica e contro i cantori romanteghi.

Ł'ideal poetico del xovane Ippolito el se identificava, in chel periodo, inte ła poexia de Giuseppe Giusti el cui łéngoajo, łetarario e popołare insieme, el podeva esare ł'unico adato a sostegnere ła cauxa de ła nasion.
Ma Nievo el gaveva savesto acetar, insieme a łe łodi, anca i amonimenti de Carlo Tenca ch el gaveva recenso inte el "Crepuscolo" ła so prima racolta. Cusì, ł'ano dopo, 1855, el xovane el xe na fora co altri Versi de natura pì intima che i risentiva de ła łesion foscołiana e leopardiana.

Ancora pì atenuà ła sarà ł'influensa del Giusti inte łe sucesive racolte: "Le Lucciole. Canzoniere (1855-1857)", publicà a Miłan da ł'editore Redaelli inte el 1858 e "Gli Amori Garibaldini " publicà a Miłan da ł'editore Agnelli inte el 1860.

Studii sulla poesia popolare e civile massimamente in Italia[canbia | canbia el còdaxe]

Intanto el poeta, tra łe do racolte, el gaveva publicà, inte el 1854, on sagio intitołà Studii sulla poesia popolare e civile massimamente in Italia che el gera presedentemente vegnù fora in siè puntate so "L'Alchimista Friulano" dal 9 de lujo al 15 de agosto 1854.
Inte el sajo, che el risulta quaxi na mesa a punto de ła so połemica contro ł'atuałe łeteratura, Nievo el traciava on anpio panorama storego che da łe orixini de łe łeterature romanze el arivava fin ai tempi presenti.
Queło che el sercava inte ła łeteratura romantica ła gera na łeteratura nova che partendo dal rispeto de ła tradision e rifaxendose a Dante, ła 'ndase su łongo i secołi par sunàre su qualcosa da ł'insegnamento viriłe de Alfieri e de Parini, in parte del Foscolo fin al Manzoni.
El sajo el finiva co on ełogio al Giusti del cuałe el łodava non soło i vałori morałi che ła so poexia ła gaveva espreso, ma anca ła łengoa vigoroxa e parlà.

Novelliere campagnuolo e altri racconti[canbia | canbia el còdaxe]

Quando Nievo el ga intrapreso ła so opara de naradore ło ga fato ispirandose a ła vita de łe canpagne e ciapando come modełi łterari łe novełe de Giulio Carcano, de Caterina Percoto, de Francesco Dall'Ongaro oltre che dai romans champêtres anbientai inte el "Berry" de George Sand.

Łe novełe, in tuto sete, łe gera sta scrite tra el 1855 e 1856 publicà inte i giornałi e pronte a vegner fora in vołume col titoło de Novelle campagnuole come scrivarà Nievo el 14 de marso 1857 al cuxin Carlo Gobio. Łe novełe in realtà łe xe restà inedite e łe xe sta racolte, da I. De Luca e publicae inte el 1956 a Turin da ł'editore Einaudi col titoło Novelliere campagnuolo e altri racconti.

La nostra famiglia di campagna[canbia | canbia el còdaxe]

La nostra famiglia di campagna ła xe vegnù fora so "La Lucciola" de Mantova dal majo al diçenbre 1855 e probabilmente ła gavaria dovesto esare ł'introdusion al Novelliere. Ło se po' dedure dal tono discorsivo, 'pena acenà da ł'exiłe raconto e soratuto rivolto a presentare a ła società borghexe queła contadina de ł'Alto Mantovan che ła vegneva ciapà a esenpio de ła vita difisiłe e stentà de tute łe popołasion agricołe de ł'Itałia setentrionałe de quei tenpi.

La Santa di Arra[canbia | canbia el còdaxe]

La Santa di Arra ła xe sta publicà inte el setenbre del 1855 sol "Cafè" de Miłan e ła gera anbientà inte el Friuli, in particołare in queła zona de cołina a nord de Udine che ł'autore el conoseva ben par łe so łonghe dimore a Cołoredo de Montalban.
Ła vicenda, pitosto łagrimevołe, ła finìse inte on morałegiante final in cui el ben el trionfa sol mal ma el diventa el pretesto par descrivare, in modo veritiero e pasionà, i costumi del viłajo]], consegnandose cusì on toco de storia sociałe de ł'epoca.

La pazza del Segrino[canbia | canbia el còdaxe]

La pazza del Segrino ła xe sta scritta inte el diçenbre del 1855 e łA XE RESTà inedita fin al 1860.
Ła xena dramàtega vicenda anbientà inte ł'Alta Briansa (Łago del Segrino) che tacando ła asume on'intonasion canpagnoła par concludarsi man man inte on tranquiło e borghexe łieto fine.

Il Varmo[canbia | canbia el còdaxe]

Ła noveła Il Varmo ła xe vegnù fora, dal marso al majo 1856, su ł'"Annotatore Friulano".
In esa, el Nievo, co na magior coerenza rispeto a łe precedenti novełe, el dełinea el so raconto tegnando drio ai personaji da ła nasita a ła maturità co profonde riflesion so ła so vita metendo in rixalto el rapporto tra i so caratari e i so destini.
I critici che i se ga sofermai so sta noveła, pì che so łe altre, i ga individuà in questa el nucleo inisiałe de ł'idiłio de Carlino e Pisana putini inte i primi capitołi de łe Confesion d'un italiano.
Inte el Varmo el Nievo el trateja el tema de ł'infansia intexo come quel particołare periodo de ła vita a ł'interno del cuałe a coexiste senpre el triste prexentimento de na maturità mai perfeta.
Ł'amore puteo dei du personaji prinsipałi, Favitta e Sgricciolo, el xe ofuscà da ła sensasion che tenperamenti diversi, che i se atrae e i se respinse, i pol esa sì destinà a tacarse ma anca a sofrir del resiproco afeto.

El ciclo del contadin Carlon[canbia | canbia el còdaxe]

Łe ultime tre novełe łe apartien a on unico ciclo, queło del contadin Carlon, e łe cunta tre diverse storie acadue durante na veja inte na stała de Fosato.

El ciclo el conprende Il milione del bifolco' publicà da ł'apriłe al giugno 1856 so "La Lucciola", L'Avvocatino che el ga visto ła łuce sol "Panorama Universale" de Miłan, senpre da ł'apriłe al giugno 1856, La viola di San Sebastiano publicà inte ło steso ano come seguito de ł'Avvocatino senpre so Panorama Universale.
Ambientae inte el mantovan a ritorna, sensa na raxon evidente, a łe cołine e a łe pianure del Friuli dove, traverso łe parołe del bifolco mantovan Carlo Peschierotti, łe delinea el quadro de na vita exenplare trascorsa straverso łe fadighe, łe speranse, ła rasegnasion de fronte a łe disgrasie.

Il Conte Pecoraio[canbia | canbia el còdaxe]

Il Conte Pecoraio el xe on romanzo a caratare contadinesco che el gavaria dovesto diventar, inte ł'anbision de ł'autore, el livro de letura de łe umiłi persone contadine durante i mexi osioxi de ł'autuno che i tegneva drio el periodo de ła vendemia e ła sòmena, quando łe noti łe se slongava e arivava i primi fredi. On tentativo, dunque, de aviare queła łeteratura autenticamente popołare, tanto desiderà.
Ma se i propoxiti i gera alti, in realtà el romanzo, da ła storia lagremevołe, el risulta esare na pietoxa descrision de ła mixeria soferta dai contadini oncora opresi da na picoła e retriva nobiltà feudałe proteta da ł'Austria.

Angelo di bontà. Storia del secolo passato[canbia | canbia el còdaxe]

Angelo di bontà. Storia del secolo passato el xe on romanzo storego scrito contenporaneamente al Conte Pecoraio e ai raconti canpagnołi, comunsià inte ła primavera del 1855 e finìo inte ł'agosto del steso ano, el xe sta publicà a Miłan inte el 1856.
Ła storia ła xe anbientà a Venesia, tra el 1749 e el 1768 e trata de ła decadensa de queło Stato e del sfasamento de ła so aristocrasia dominante, drama che el gera sta soferto anca inte ła fameja materna del Nievo e che el gera oncora vivo inte ł'animo dei venesiani e dei veneti, almanco fin al 1848, quando a xe sta restaurà la Republica de San Marco.

Le Confesion d'un italiano[canbia | canbia el còdaxe]

A risałe al periodo che el va tra ła fin del 1857 a ł'agosto del 1858 ła stexura del romanzo Le confesion d'un italiano che Nievo no 'l ga publicà, sia parché no 'l gaveva catà on editor disponibiłe, sia parché masa imnegna inte łe vicende garibaldine.

El romanzo el vegnarà publicà inte el 1867, dopo ła morte de ł'autore, a cura de Erminia Fuà Fusinato, mujere de Arnaldo Fusinato amigo de Nievo, co alcuni interventi coretori e col titoło Le confesion di un ottuagenario.

Scriti de intervento połitego e storego[canbia | canbia el còdaxe]

Fra i scriti a caratare połitego e storego a xe degni de riłievo Venezia e la libertà d'Italia che el xe sta publicà anonimo a Miłan da ł'editore Agnelli inte el 1859, el Diario della spedizione dal 5 al 28 maggio, el Resoconto amministrativo della prima spedizione in Sicilia, e el Frammento sulla rivoluzione nazionale ła cui data de conpoxision ła xe incerta (poco prima o poco dopo ła spedision dei Miłe) che ła raprexenta ł'ultimo risultato de łe riflesion de Nievo so ła so curta ma intensa atività połitega, restà inediti.

Ła storia fiłosofica dei secołi futuri[canbia | canbia el còdaxe]

Col romanzo curto Storia filosofica dei secoli futuri del 1860, Nievo el entra de dirito tra i primi precursori de ła fantasiensa italiana. In st'opera singołare e poco conosesta ei tratexa ła storia futura de ł'Italia da ł'ano 1860 al 2222.

Altri scriti[canbia | canbia el còdaxe]

Nievo el ga scrito anca testi teatrałi, restà inediti, intrà i cuałi a merita particołar atension łe tragedie I Capuani, Spartaco' e Gli ultimi anni di Galileo Galilei e ła comedia I Beffeggiatori.
On mucio inportante a xe ł'Epistolario utiłe par ła ricostrusion de łe vicende biografeghe de ł'autor.

Riconosimenti postumi[canbia | canbia el còdaxe]

Preso el palazo del Bo, sede de ł'Università dei Studi de Padova, in via VIII Febraro, a ghe xe on'auła intitołà a Ippolito Nievo. Inte el steso modo, una de łe Caxe del Studente de ł'ESU de Padova ła xe intitołà a łu. A łu a ghe xe sta intołà, anca, el łiceo sientifego che el se cata in via Gregorio Barbarigo noto par eser el pì vecio łiceo sientifego de ła sità.

Łigamenti foresti[canbia | canbia el còdaxe]

Controło de autoritàVIAF (EN68995581 · ISNI (EN0000 0001 2138 1103 · SBN (ITIT\ICCU\CFIV\000647 · Europeana agent/base/103098 · LCCN (ENn50004002 · GND (DE118786210 · BNF (FRcb12305714s (data) · BNE (ESXX1048645 (data) · NLA (EN35387533 · BAV ADV10132570 · WorldCat Identities (ENn50-004002
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Ippolito_Nievo&oldid=1050842"