Canpana

Da Wikipedia, l'ençiclopedia libara.
Dezanbìgua – Se te serchi altri signifegai, védarse Canpana (disanbigua)

Canpana de la Chapelle Saint-Antoine a Chastel-sur-Murat, Cantal, Francia

La canpana la ze an strumento musical de solito de bronzo, doperà 'te el mondo cristiàn pì ke sia par scandir al tenpo da i canpanii de le cese o come richiamo par funsion, ricorense o avegnimenti che reguarda la comunità, e al gnen sonà da i canpaner. Le canpane se le destingue par la so sonada carateristica, fata da la percusion de un pendol de fer ciamà batocio su le pareti interne de la canpana.

Al nome[canbia | canbia el còdaxe]

Secont i studiós, al nome "canpana" al deriva dal latin vasa campana, espresion ke la indichéa cadin semisferici de bronzo fati 'te la zona de Napoli, la sagoma dei quai la era recordada da le canpane.

Par latin la canpana la era ciamada tintinnabulum, co riferimento al so suono.

Al insieme de le materie ke reguarda al studio de le canpane (storia, tecniche, musicologia, signifegai) al costituìs la canpanologia.

Storia[canbia | canbia el còdaxe]

Pareree ke le canpane pì veče le risale a la Cina de qualche mili ani prim de Cristo. Secont la tradision la canpana co el batočo interno la ze invese na invension 'italiana: la saree stata introdusesta da San Paolin vescovo de Nola 'te el V secolo d.c., anca se no ghe n'è gnissun documento ke ghe intèste la paternità de la invension al Santo.

Le dimension, al suono e la nota[canbia | canbia el còdaxe]

Al sòno de na canpana al ze ligà a un equilibrio conplicà de spesòr ke i determina al profilo de la canpana. I spesòr i fa, insieme de la nota principàl e a i sòni parsiai, al sòno de la canpana. La nota, invese, la ze determinaza dal volume de la cavità inte la canpana: pì al ze grando e pì gròsa la sarà la nota, pì al ze čeo e pì acuta la sarà la nota. Le canpane le pol eser quindi acordade tra de lore tramite operasion specifiche ke le va a modificar al volume. Esiste diversi tipi de canpane a seconda del spesòr, de la nota e de la forma. Al profilo, ke al čapa al nome de "sagoma", al pol eser diverso (par esenpio) a seconda de le esigense del posto aonde ke sarà metest la nova canpana. Esiste "sagome lidjere" e "sagome pesanti" doperade da i diversi fondizor. La diferensa la ze 'te la qualità del suono fata da na canpana de sagoma pesante. In Itàlia de solito se fonde pì "lidjer" in confronto al stàndar de l'Europa central.

Al magiór peso, e quindi al magiór spesór, al fa sì ke la àbie na pì grosa e longa vibrasion del strumento oltre ke an magiór sostegno dei toni parziali, sora-de-tuto quei de ottava inferiore e de terza maggiore, ke i a da eser presenti in ogni campana. De solito la campana in proporsion pì pesante la risulta aver an sòno in general pì càlt e pì graẑioso, mentre na campana "leggera" la ze spés strident e spiacevole ale reče.

Na bona campana la pol rivar a emeter fin a 50 toni parziali, ma i pì importanti e sora-de-tuto i pì riconosìbiłi i é (rispeto ala nota fondamental):

  • parsiale de "Prima"
  • di "Terza" (ke pol eser magiór o minór)
  • "Quinta" (ke pol eser diminuiza)
  • "Ottava Superior" e "Ottava Inferior".

Tipi de sonada, funsion e segnai[canbia | canbia el còdaxe]

Canpane de cese

  • bot: bot sìngoi par sonàr le ore
  • meridiana: sonada a tre canpane fata a manca an quàrt a meodì te la česa de Vilabruna (Feltre)
  • sonada a na canpana: in ocasion de qualunque celebrasion se al canpanil al ga na unica canpana; sonar le avemarie se al canpanil al ga pì de na canpana
  • sonada da mort: se sona solke do canpane par nunsiar an mort e par conpagnarlo al simitero dopo al funeràl
  • sonar dópio: se sona a tre canpane par nunsiar la mesa (an quart de ora prima) e co se leze al Gloria; 'te un serti posti anca par conpagnar al mort al simitero
  • sonar ugnol: dopo de er sonà dopio, se sona ugnol (co na canpana solche) par ciamar la zent a messa
  • canpanò: se sona le canpane a concerto qualke dì prima del santo patrono secónt le tradision del posto par nunsiar la festa
  • canpane a martel: se sona a martel par avisar ke ghe n'è an incendio o na aluvion, in modo ke tuti i core a jutar

Campane de edifici civici

  • Convocasion consiglio comunal
  • Mort particolari
  • Aniversari locai e\o nasionai (4 novenber, 25 aprile, 1 majo, 2 zugno e altri)
  • Ore
  • Scóla
  • Vari

Disionario dei termini specifici[canbia | canbia el còdaxe]

  • CPortante: strutùra, na olta in lenč, incói in ghisa o aciaio, 'ndé ke vien fisà la campana basculante.
  • Asta: stanga, deta anca aspetta, toc ke vien fora dal ceppo 'ndé ke vién colegà na corda par meter in movimento la campana; 'te i sistemi "a slancio" l'è inseriza inte na strutùra a triangol ciamaza cicogna o bilancia; 'te i sistemi a concerto (inglese, ambrosian, veronexe) e co la pì moderna eletrificasion vien spés sostituiza dala Ruota.
  • Batocio (dal latin "Bataculum"): toc in fèr tacà a pingolón drento la campana ke baténdo contro i oposti bordi la fa vibràr e risuonàr. Na olta al ñea asicurà al'asola co an nervo de bue o na strika de cuoio, adés vien usa rinforzi e cavet in acciaio.
  • Bocce: pomi (de solito 3) ke i vien imbulonà al de sóra del contrapeso inte el sistema ambrosiano e le soe derivasion.
  • Contrapeso o Scatola dei contrappesi: parte de sóra del ceppo ambrosiano ke, riempiza co piastre de fer, bilanča ralentando la rotasion dela campana.
  • Maneghere: dete anca anse. le forma la corona superiore, ričioli de bronzo ke se trova sora ala campana par colegarla al ceppo (se basculante) o al trave (se fisa) par mezo de sbàre in fer e bolói.
  • Isolatore: toc de lenč ke el ga na importantìsima funsion in tute le campane ke se move: al' ze infati mes intrà le maniglie dela canpana e el ceppo; al asorbe le vibrasion ke le ariva al'estremità de sora dela campana, ke se le continuarése le 'ñarie trasmése al ceppo superiore.
  • Perni: i ze 2 cilindri ke i vansa fora da i lati del portante e ke i permét al movimento. I ze colegài a la strutùra fisa da cusinét, de solito a sfera.
  • Roda: la gnen colegada a destra o a sinistra del portante e de la canpana. Inte la so gola cor la corda, se la canpana la ze sonada a man, o na cadena ondesta se ghe n'è na automasion elètrica. Le canpane sensa roda le ga la asta.
  • Campana a distesa: se usa sta espresion par indicar la canpana quando ke la sgorla atorno 'an ase squasi baricéntrico e la fà an suono da no scambiarlo co al mezzo slancio o co lo slancio alto, ke i ga an asse de rotasion rispettivamente sempre p' distante dal baricentro.
  • Campana a bicchiere o a concerto: se usa sta espresion par indicàr la posision dela canpana completamente revèsa; sta posision la vien quando ke la canpana la fà na rotasion de 180°. Ovio ke le canpane a concerto le é tìpike dei sistemi de suono co canpane ke se move; na olta rivazi a la posision "a bicchiere", la canpana la vien fata giràr par far un o pì rintóki e po' tornar in quéla posision. In serti modi de sonàr, come el veronexe, la canpana a concerto la fa part de na sequenza preordinata de rintóki co altre campane; in altri modi la campana a concerto la pól concluder frasi musicai in modo solene o aver na funzion funebre.
  • Campana a slancio: varda la sesion ke segue "classificazione delle campane".
  • Campana controbilanciata: varda la sesion ke segue "classificazione delle campane".

Classificasion de le canpane[canbia | canbia el còdaxe]

Le canpane le pol esser classificaze in base a come che le é montade:

  • canpane fisse, o sia colegade a potrèle o sostegni
  • canpane "a slancio", o "a batocio volante"
  • canpane controbilanciade, o "a batocio cadente"

Anca se ale reče del profàn i rintoki dele canpane le pol sembrar tuti compagni, in Italia i esiste diversi sistemi de suono par canpane basculanti, o in movimento, par canpane fìse o ferme e par l'unión de questi doi tipi.

Le canpane fìse[canbia | canbia el còdaxe]

Le é senza ceppo, o sia contrappeso, parké no le ga da compier osilasion de nisun genere; le é quindi ferme, tacaze a putrele o travi; le vien sonaze co la percusion del batoč de entro o de martèi de fòra (čiamazi "elettrobattenti" se ge n'é la elettrificasion). In Italia le canpane fìse le é squasi sempre pičole e fracaze drento te l' campanìl, speče se le fa part de un complèso de canpane. Nei carilon, difondesti te el nord Europa, le riva anca a 60 o pì esemplari te un solo campanìl.

Le campane "a slancio" o "a batocio volante"[canbia | canbia el còdaxe]

Le ze canpane dotade de un portante lidjer, o sia poco contrapesade, e par sto motiu le pol er ossilasion svelte, fando cossì bot vesini te el tenpo un a quelaltro.

Te i sistemi a slancio "classico", par far suono le ga da donder almanco i 60° de inclinasion (anca se esiste sistemi a slancio co el batocio dotà de un dopio snodo par poder sonar anca co el movimento pì pisol). Ten sto sistema de sonar al batocio al ze ingancià sot a i perni de rotasion sichè al va a petar te el bronzo senper verso in sù; se diss che al batocio, che de solito al ze pì pesante rispeto a i altri sistemi de montajo, al ""caresa la canpana".

ten sto sistema de montajo al batocio al se destaca suito dopo al bot e quindi no el smorsa i armonici rendendo libere le vibrasion al contrario del sistema controbilancià. Par sto tanto le canpane a slancio le mancen vibrasion par pì tanto tenp. Al sistema al ze tipico in tuta Europa (es: "changeringing" inglese ), te el sistema emiljan, inte el centro e inte el Sud Itàlia, 'te el Tirol e 'ten serte bande del Triveneto.

Le canpane "controbilanciade" o "a batocio cascante"[canbia | canbia el còdaxe]

le ze canpane dotade del portante pesante, o sia tanto contrapesade, e par sto tanto le pol far ossilasion pitost lente, fando cossì na serie de bot distanti 'te el tenpo un da quelaltro. Da' che le ze tanto contrapesade le donde fasilmente la posision "a goto", o sia le fa fasilmente na rotasion de 180° dopo poche ossilasion. le sona pena che le gnen inclinade, parchè 'ten sto tipo de canpane al batocio al ze ingancià pì in sù o al isteso livel rispeto a la altesa dei perni de rotasion sichè al va a petar te el bronzo senpre verso al bass.

Curiosità e note[canbia | canbia el còdaxe]

  • Le canpane che le ga de pì de 50 ani da la so fusion le ze an ben artistico, tutelà quindi da la Sovraintendensa par i beni Artistici e Storici, no le pol quindi gner vendeste o fondeste da novo.
  • Ogni canpana metesta su un canpanil la ze dedicada a un o pì Santi e la ga sù decorasion a tema. In pì, quasi senper le ga sù inscrision par latin o par la parlada uficial del posto che le reguarda al an de fusion, al nome del fondidor e qualche olta anca de quei che, co oferte varie, i ga contribuì a la fusion de quel bronzo.
  • Ten tanti posti, ogni vendre a le 15.00, se costuma infin da tenpo lontani de sonar le "agonie", o sia 33 bòt in memoria de la mort de la mort de Gesù.
  • Da' che l'Itàlia la ze caraterizada da sistemi de sonada e de montajo che i canbia da rejon a rejon (e tante olte tra le singole province), ze nassest diverse società e associasion de canpaner 'te le diverse rejon 'italiane, par salvaguardar e promuover sta antica arte.
  • Inte la civiltà rural le canpane le ga senper abù al conpito de sonar al ruar de bruti tenporai o de la tenpesta, 'te la speransa de deslontanarli e quindi de salvar i racolt; 'te le orasion scrite sora le canpane se cata da spess ste formule: "a fulgure et tempestate libera nos Domine" opur "recedat spiritus procellarum" o "Defunctos ploro-nimbos fugo-festaque honoro".
  • San Paolino vescovo de Nola al ze considerà al protetor dei canpaner. Santa Barbara, anca ela patrona dei canpaner, la cognossesta anca come la santa che proteje tute le persone che 'te el so laoro le ga a che far co el pericol de mort instantanea, come i artificer, i artiljer, i carpentier (quindi anca le persone che le laora su le tor canpanarie: mecanici instalador, inpiegati de la manutension e canpaner), i minador e i geologi. Dess la ze venerada anca come la protetrice dei Vigili del fogo.
  • Santa Barbara considerada anca ela patrona dei canpaner. La so storia la diss che dopo de esser stata serada sù 'te na tor, la sie stata martirizada par man del pare, che suito dopo erghe tajà la testa al ze stat ciapà da na saeta. Da lora la tradision la ghe atribuiss a la Santa la capacità de controlar le saete. Al ze ovio quindi par i canpaner torla come protetrice, da' che 'te le stesse canpane se cata inscrision a reguardo, come che ze belche stat dit.
  • San Guido da Anderlecht al ze al patrono dei canpaner e dei sacristi.
  • Anca Sant'Antoni abate al pol esser considerà come patrono dei canpaner, da' che 'te la so iconografia al gnen representà co na canpana 'te la man.
  • Patrona dei fondidor de canpane la ze Santa Agata de Catania.
  • La introdusion de la usansa de far sonar le canpane 'te le ore canoniche e durante la celebrasion de la Comunion la ghe gnen atribuida a papa Sabiniano (604-606).
  • Inte i tre dì de la Setimana Santa de Pasqua, 'te le Ceze cristiane catoliche e anglicane al ze in uso de no sonar le canpane ('te el rito anbrosian se le sona infin al nunsio de la mort de N.S. del Vendre Sant), che le gnen sostituide da i cosideti "instrumenta tenebrorum": sti qua i deriva da i "semantron", o sia da tole de legn, oncora dess doperade 'te la Ceza cristianaortodossa e catolica oriental. I gnen ciamadi anca "sacrum lignum": se trata de tolete su le quale ze tacà de le maneghere de fer, che co se le sgorla le bat e le fa an rumor sordo. In Spagna an strumento che el ghe someja al se ciama "matraca": al ze de grosse dimansion e al ze instalà diretamente su i canpanii. Inte la Provincia de Belun invese se costumea sonar le sgreole.
  • Inte la California meridional, 'te el sito de na mision spagnola, ze stat catà del 1920 na canpana che la ła sù la inscrision: "Inte el an 1796, 'te el mese de genaro, sta canpana la ze stata fondesta 'te l'isola de Kodiak co la benedision del archimandrita Joaseph, durante la permanensa de Alexandr Baranov". No el ze ciar ten che modo che sta canpana ortodossa russa, da Kodiak, citadina de la Alaska la sie dondesta cossì distante.
  • I antichi Greci i erano soliti picar, 'te i so scudi, an poche de canpane, parché in batalja le tintinesse in onor dei dei.

Audio[canbia | canbia el còdaxe]

Scolta sto sonMelodia sonada da le canpane de Westminster


Video[canbia | canbia el còdaxe]

Varda anca[canbia | canbia el còdaxe]

Altri progeti[canbia | canbia el còdaxe]


Colegamenti esterni[canbia | canbia el còdaxe]



Controło de autoritàLCCN (ENsh85013057 · GND (DE4021292-0 · NDL (ENJA00564859
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Canpana&oldid=1112129"