Brocoło fiołaro

Da Wikipedia, l'ençiclopedia libara.
Jump to navigation Jump to search
El brocoƗo fioƗaro

El brocoƗo fioƗaro el xe na varietà de brocoƗo (fameja deƗe Cruciferae o Brassicaceae) ke crese su par le coƗine de Creazzo, in provinça de Vicensa. El se ciama cusì parkè su pal pecol vien fora altri rameti verdi ke vien ciamà fioƗi. Ɨa xe na pianta conosuda anca da Johann Wolfgang Goethe quando ke'l xe pasà par Vicensa, 'ntel 18° secoƗo. El xe na verdura doparà par diversi piati, come primo e come secondo.

Magnari fati col brocoƗo fioƗaro[canbia | canbia el còdexe]

BigoƗi coi brocoƗi fioƗari[canbia | canbia el còdexe]

Par 4 persone ghe vol:

  • 1 k. de bigoƗi
  • 3 eti de brocoƗi fioƗari
  • 1 spigoƗo de ajo
  • ojo de oliva veneto
  • formajo Grana Padano gratà
  • formajo de piegora gratà
  • saƗe e pevare

Cuxinare in aqua de bojo i brocoƗi fioƗari par 15 minuti, xontando na man de saƗe e pasarli par un criveƗo.In na farsora sfritegare 'nteƗ'ojo un spigoƗo de ajo finkè no'l diventa biondo. Intanto far bojere na pignata de aqua e cuxinare i bigoƗi par 15 minuti.. Versare i brocoƗi fioƗari 'nteƗa farsora a fogo tanto baso. versarghe sora i bigoƗi, xontare un pugno de grana gratà e uno de formajo de piegora gratà. Smisiare e servire.

Subioti coi brocoƗi fioƗari[canbia | canbia el còdexe]

Par 4 persone ghe vol:

  • 320 g de subioti
  • 250 g de brocoƗo fioƗaro
  • 50 g de séoƗa bianca
  • 50 g de lardo
  • 2 spigoƗi de ajo
  • ojo de oliva
  • saƗe e pevare

Ocore bojere i brocoƗi in aqua con un poco de saƗe e tegnerli a bojo par 10 minuti. Quando ke i xe coti, tritarli fini fini. Se trita fine fine anca Ɨa séoƗa e Ɨa se fa inbiondire con un fià de ojo, metendoghe drento anca el lardo e i spigoƗi de ajo. Dopo 3-4 minuti se mete insieme i brocoƗi e se regoƗa el saƗe. Quando ke se ga cuxinà i subioti, i se salta in padeƗa co sta salsa de brocoƗi. Se versa sui piati, con un poco de ojo e de pevare.Ɨ

CotoƗeta al brocoƗo fioƗaro[canbia | canbia el còdexe]

Par 4 persone ghe vol:

  • 4 fete de fexa de vedeƗo de 1 eto ciascuna
  • 3 ovi
  • 300 g de brocoƗo fioƗaro
  • 50 g de panseta stesa
  • 4 fete de formajo Asiago dolxe
  • 4 fete de prosciuto cruo
  • 1 séoƗa
  • pan gratà

Se boje par 10 minuti in aqua de bojo un poco saƗà i brocoƗi, i se scoƗa e i se fa saltare in padeƗa con un fià de ojo, Ɨa panseta tajà a strisete e Ɨa séoƗa trità fina fina. Se slarga col baticarne Ɨe fete de vedeƗo, Ɨe se mete drento i ovi sbatù e dopo sul pan gratà. Ste cotoƗete vien mese a cuxinar 'nteƗ'ojo, ma a mexa cotura se ghe mete sora i brocoƗi e sora na feta de prosiùto coverxendo tuto coƗ'Asiago a fete. Sarare col covercio e continuare Ɨa cotura finkè no se ga desfà el formajo.

PoƗenta, brocoƗi fioƗari e Axiago mexano[canbia | canbia el còdexe]

Par 4 persone ghe vol:

  • 300 g de brocoƗi fioƗari
  • 1 spigoƗo de ajo
  • 40 g de buro
  • 100 g de formajo Asiago mexano
  • 350 g de farina de mais Marano

Tajare i brocoƗi fioƗari e bojerli in aqua saƗà. Se rosoƗa Ɨ'ajo con un fià de ojo in na padeƗa e, prima ke'l diventa biondo, se ghe xonta i brocoƗi e se lasa lì par 4-5 minuti. Cuxinà Ɨa poƗenta, se ghe xonta Ɨ'Asiago gratà e i brocoƗi. Mis-ciare e servire sui piati. Na volta versà sta poƗenta, se pol metarghe sora anca kualke feteƗa de Asiago mexano, ke Ɨa se desfa sora.

Ligadure foreste[canbia | canbia el còdexe]