Barchesa

Ła barchesa, barcòn o barco el ze on edifisio rurałe de servisio, tìpego de l'architetura de ła vila vèneta, destinà a contenjer i anbienti de łaoro, dividendo el spasio del corpo sentrałe de ła viła, reservà ai propietari, da cueło dei contadini. De norma łe barchese łe zera caraterizae da na strutura portegada ad alte arcae a tuto sesto ed adibìe ai servisi: da łe cuzìne, a łe abitasion dei contadini, a łe stałe e ai anesi rusteghi (barchésa par trapèłi agricołi, magazen par scòrte ałimentari ed altro).

Descrision

Inte l'area de ła Repùblega de Venèsia łe barchese - de frecuente pì de una - scuazi senpre łe se despone in banda a ła caza domenegałe o paronałe (el corpo sentrałe de ła viła che ospita ła rezidensa del propretario) e, de norma, łe ze parte integrante de un gran conpelso agricoło produtivo. Andrea Palladio ga dazesto dinjità architetònega a łe barchese, afiancandołe, ałineandołe e cołegandołe a ła caza paronałe, conferìndoghe a l'insenbre mazor simetria e monumentałità. Anca l'orientamento el zera inportante: inte i so I quattro libri dell'architettura (Venezia, 1570), Palladio aferma che łe barchese łe gavarìa da èsar esponeste a Sud in modo da tenjer suta ła paja, par evitar che ła fermente e ła bruze.

Inte łe canpanje venete - e in partegołar łongo ła riviera del Brenta - no ze infrecuente catar ancò barchese prive de ła viła: a cauza de ła tasasion so łe viłe, durante l'Otosento tanti edifisi del patrisià venesian ze stà butà zo, łasando solchè łe barchese, utiłi come rusteghi o magazeni.

Ezenpi

Tra łe pì famoze e caraterìsteghe barchese ghe ze cuełe abinae a łe viłe drio:

Viła Badoer, dita "ła Badoera", projetà da Andrea Palladio, inte el comun de Fratta Polesine, provinsia de Rovigo (l'únega viła inte ła cuała Palladio ga reałizà concretamente ła so idea de barchese ricurve ad emiciclo).
Viła Tiretta Agostini, Jàvara del Monteło (Provinsia de Trevizo).
Viła Emo Capodilista a Fanzolo de Vedełago (provinsia de Trevizo), de Andrea Palladio
Viła Barbaro a Maser (provinsia de Trevizo), de Andrea Palladio, a łe cui stremità cata posto łe tori cołombare e meridiane.
Viła Manin a Passariano di Codroipo (Provinsia de Ùdine) indove ze stà firmà el tratado de Canpoformio (deso Canpoformido)
Viła Contarini a Piasoła sol Brenta (provinsia de Padoa)
Viła Albrizzi Franchetti, projetae da Andrea Pagnossin, a San Trovaso (comun de Pregansiol in provinsia de Trevizo).

Opur łe ùnjołe barchese, ancò prive de ła viła:

Barco de ła Regina Cornaro ad Altivołe (Trevizo)
Barchesa Loredan a Volpago del Monteło (Trevizo)
Barchesa de villa Grollo a Selva del Monteło de Volpago del Monteło (Trevizo)
Barco Barbarigo Biagi a Montebełuna
Barchesa de Viła Thiene a Cicogna de Viłafranca Padoana (A. Palladio)
Barchese de Viła Valmarana a Mira łongo la Riviera del Brenta
Barchesa de Viła Pola dita el "Barcòn" a Barcòn de Vedełago (Trevizo)
Barchesa de Viła Monza a Dueville (Vicensa)
Barchesa de viła Badoer dita "La Rotonda" de Badoere de Morgano (TV)
Barchesa de Villa Monselicense de Davide Boetto (PD)

Gałarìa de imajini

Ła barchesa de sanca de Villa Barbaro a Maser (TV), vedesta da ła viła
Ła barchesa de drèta de Villa Barbaro, vedesta dal so interno
Barchesa de sanca de Villa Contarini a Piasoła sol Brenta
Pianta de Villa Emo. A se note corpo de ła caza domenegałe (cuadrà, al sentro) e, a drèta e a sanca, i retangołi zlongai de łe barchese (dezenjo de Ottavio Bertotti Scamozzi, 1781)
Barchesa de Limena (Padoa), uncò sede del Munisipio
Barchesa de Villa Thiene a Cicogna, únega restansa de un projeto paładian

Voxe corełade

Altri projeti

Wikimedia Commons el detien imàjini o altri file so Barchesa